អង់គ្លេស បិទបញ្ចប់ជាស្ថាពរ ទំព័រប្រវត្តិសាស្ត្រជាសមាជិកនៃសហភាពអឺរ៉ុប
ចុះផ្សាយនៅថ្ងៃ៖
ស្តាប់ - ០៨:១២
ឆ្នាំ២០២០ ត្រូវបិទបញ្ចប់ទៅ ដោយនាំយកអង់គ្លេស ឲ្យចាកចេញពីសហភាពអឺរ៉ុប ជាស្ថាពរ។ ថ្ងៃទី៣១ធ្នូ នេះ គឺជាថ្ងៃចុងក្រោយហើយសម្រាប់ការរួមរស់របស់អង់គ្លេស នៅក្នុងមហាគ្រួសារសហភាពអឺរ៉ុប។ ៤៥ឆ្នាំ នៃទំនាក់ទំនងគ្រួសារតែមួយ ត្រូវបានបិទបញ្ចប់ទៅ ដោយការបោះឆ្នោតប្រជាមតិ Brexit កាលពីឆ្នាំ២០១៦ ដែលប្រជាជនអង់គ្លេសសម្លេងភាគច្រើន បានសម្រេចចិត្តគាំទ្រ ការផ្តាច់ខ្លួនចេញពីសហភាពអឺរ៉ុប។ បន្ទាប់ពីបានឆ្លងកាត់ការចរចា យ៉ាងលំបាកលំបិនជាទីបំផុត រវាងភាគី អង់គ្លេស និងសហភាពអឺរ៉ុប ទីបំផុតទៅ គេបានសម្រេចបាននូវកិច្ចព្រមព្រៀងមួយ ដែលនឹងគូសវាសពីទំនាក់ទំនងរវាងភាគីទាំង២ទៅថ្ងៃអនាគត។
Goodbye !
នៅយប់ម៉ោង១២រំលងអាធ្រាត្រ ថ្ងៃទី៣១ធ្នូនេះ នាឡិកាប៊ីកប៊េន ដ៏ល្បីនៅទីក្រុងឡុងដ៍ និងបន្លឺសំលេងជួង ជាសញ្ញាប្រៀបបីដូចជាពាក្យ « លាហើយ » ដែលអង់គ្លេសនិយាយមកកាន់សហភាពអឺរ៉ុប និងប្រទេសសមាជិកទាំង២៧ផ្សេងទៀត។ ចូលជាសមាជិកអឺរ៉ុប នៅឆ្នាំ១៩៧៣ អង់គ្លេសបានសម្រេចចិត្តចាកចេញ តាមរយៈការបោះឆ្នោត ប្រជាមតិ កាលពីថ្ងៃទី ២៣ ខែមិថុនា ឆ្នាំ២០១៦ ដោយសម្លេងឆ្នោតព្រមផ្តាច់ខ្លួន មានចំនួន ៥១.៩%។
តែការផ្តាច់ខ្លួននេះ មិនមែនជារឿងងាយស្រួលធ្វើប៉ុន្មានទេ ព្រោះត្រូវស្រាយចំណង ទាំងអស់ ដែលអង់គ្លេសមានជាមួយសហភាពអឺរ៉ុប រយៈពេល៤៥ឆ្នាំកន្លងមកនេះ។ បទដ្ឋានច្បាប់ សន្ធិសញ្ញា ស្តង់ដារ ទំនាក់ទំនងពាណិជ្ជ ចរាចរណ៍មនុស្ស និងទំនិញគ្រប់បែបយ៉ាង គឺត្រូវតែរៀបចំសាឡើងវិញទាំងអស់ ព្រោះអង់គ្លេសមិនមែនជាសមាជិកសហភាពអឺរ៉ុបទៀតឡើយ។
ការចរចាផ្តាច់ខ្លួននេះ មានការលំបាកលំបិនខ្លាំងណាស់។ ដូចយើងបានដឹងហើយ ប្រជាមតិតាំងតែពីឆ្នាំ២០១៦ តែទីបំផុតការផ្តាច់ខ្លួនទើបតែចូលជាធរមានជាផ្លូវការ ជាក់ស្តែង នៅពេលនេះតែប៉ុណ្ណោះ បន្ទាប់ពីលើកពេល ពន្យារពេលម្តងហើយម្តងទៀត។ ពោលគឺ៤ឆ្នាំ ដែលភាគីទាំង២ចរចាគ្នា ឈ្លោះផងត្រូវផង នាយករដ្ឋមន្ត្រីអង់គ្លេស ដូរអស់ដល់ទៅ៣នាក់ ដោយសារតែបញ្ហាដ៏ស្មុគស្មាញនេះ។
នៅចំពោះអង្គសភាកាលពីយប់ថ្ងៃពុធទី៣០ធ្នូ លោកបូរីស ចនសុន នាយករដ្ឋមន្ត្រីអង់គ្លេស បានថ្លែងថា៖ ចាប់ពីពេលនេះទៅ ជោគវាសនារបស់ប្រទេសដ៏ធំមួយនេះ គឺស្ថិតក្នុងកណ្តាប់ដៃរបស់យើងទាំងអស់គ្នាហើយ !។ នៅព្រឹកថ្ងៃព្រហស្បតិ៍ កាសែត Daily Mail បានចុះក្របមុខថា៖ ចាប់ពីពេលនេះទៅ គឺជាការបោះជំហានដ៏ធំ ឆ្ពោះទៅកាន់សេរីភាព។ ដូចគ្នាដែរ កាសែត The Sun បានសរសេរថា ទីបំផុតការផ្តាច់ខ្លួន បានសម្រេចហើយ!។ ចំណែកថ្នាក់ដឹកនាំអឺរ៉ុប បានថ្លែងថា វាពិតហើយ ដែលថ្ងៃនេះជាថ្ងៃមួយគួរឲ្យសោកស្តាយ តែអ្វីដែលសំខាន់ គឺត្រូវតែសម្លឹងទៅឆ្ងាយ នៅអនាគតរវាងអង់គ្លេស និងសហភាពអឺរ៉ុប។ បែកគ្នាមែន តែនៅតែរាប់គ្នាជាមិត្ត ជាញាតិស្និទស្នាលដដែល។
ឈប់ធ្វើជាសមាជិក តែបន្តធ្វើជាដៃគូ
សភាជាន់ខ្ពស់អង់គ្លេស បានបោះឆ្នោតទទួលយកកិច្ចព្រមព្រៀងនេះហើយ កាលពីថ្ងៃពុធម្សិលមិញ។ ម្ចាស់ក្សត្រីអេលីហ្សាបែតទី២ ក៏បានចេញព្រះរាជសារ ត្រាស់បង្គាប់ ឲ្យរដ្ឋាភិបាលអង់គ្លេស អនុវត្តកិច្ចព្រមព្រៀងនេះដែរ។
ចាប់ពីថ្ងៃទី១មករា២០២២១ទៅ ទំព័រសករាជថ្មីនឹងចាប់ផ្តើម រវាងអង់គ្លេស និងសហភាពអឺរ៉ុប។ តែយ៉ាងណា មានចំណុចមួយចំនួន ដែលមិនប្រែប្រួលទេ ដើម្បីរក្សាទំនាក់ទំនង និងផលប្រយោជន៍ឲ្យគ្នាទៅវិញទៅមក។ ចំណុចនោះ គឺការបន្តនៅក្នុងទីផ្សារទំនិញអឺរ៉ុប ដោយការនាំចូលនាំចេញទំនិញ រវាងអឺរ៉ុប និងអង់គ្លេស គឺនឹងមិនតម្រូវឲ្យមានការបង់ពន្ធទេ។ តែអ្វីដែលប្រែប្រួល គឺថាការនាំចូលទំនិញទាំងសងខាង គឺត្រូវតែធ្វើបញ្ជីរាយនាមមុខទំនិញ ប្រកាសទៅឲ្យអាជ្ញាធរគយ។ ការត្រួតពិនិត្យស្តង់ដារអនាម័យ និងសុខភាព ក៏នឹងអាចត្រូវធ្វើដែរ ទៅលើមុខទំនិញមួយចំនួន។
ទាក់ទិននឹងបទដ្ឋានស្តង់ដារនេះដែរ គឺអង់គ្លេសសន្យាបន្តគោរពស្តង់ដាររបស់អឺរ៉ុបទាំងអស់ តែមិនតម្រូវឲ្យធ្វើឲ្យស្របតាមដោយស្វ័យប្រវត្តិទេ។ មានន័យថា អង់គ្លេសអាចប្រើស្តង់ដារខ្លួនបាន តែក្នុងករណីហ្នឹង គឺប្រាកដជាត្រូវតែបង់ពន្ធនាំចូលហើយ។
ដោយឡែក ក្នុងករណីមានជម្លោះ វិវាទពាណិជ្ជកម្មវិញ គឺតុលាការយុត្តិធម៌សហភាពអឺរ៉ុប មិនមានអំណាចយុត្តាធិការទេ។ សំណុំរឿងនឹងត្រូវបញ្ជូនឲ្យក្រុមប្រឹក្សាពិសេសមួយ ដែលមានតំណាងភាគីទាំង២ អង់គ្លេស និងអឺរ៉ុប ជាអ្នកកាត់ក្តី ឬសម្របសម្រួល ឲ្យមានសមភាព។ ចំណែកចំណងសហប្រតិបត្តិការវិស័យគតិយុត្តិវិញ កិច្ចព្រមព្រៀងនេះ បានកំណត់នូវក្របខណ្ឌថ្មី ដើម្បីទប់ស្កាត់បទឧក្រិដ្ឋឆ្លងដែន។ អឺរ៉ុបនិងអង់គ្លេស នឹងបន្តផ្តល់ឲ្យគ្នានូវបញ្ជី ADN ដោយសហការជាមួយ Europol។
ទាក់ទិននឹងវិស័យនេសាទវិញ គេបានកំណត់រយៈពេលអន្តរកាល៥ឆ្នាំកន្លះ ដោយក្នុងរយៈពេលនេះ អ្នកនេសាទរបស់ប្រទេសអឺរ៉ុប ត្រូវតែកាត់បន្ថយចំនួន២៥% នៃផលនេសាទ ដែលបានមកពីដែនទឹករបស់អង់គ្លេស។
ចំណែកវិស័យដឹកជញ្ជូនវិញ គឺមិនមានអ្វីប្រែប្រួលច្រើនទេ ទាំងផ្លូវអាកាស ផ្លូវថ្នល់ ផ្លូវដែក និងផ្លូវទឹក។ អ្នកដំណើរជនជាតិអឺរ៉ុប ចង់ទៅអង់គ្លេសក្រោម៣ខែ គឺមិនចាំបាច់មានទិដ្ឋាការទេ។ តែអ្នកដែលចង់ទៅរស់នៅ ឬធ្វើការនៅអង់គ្លេស គឺត្រូវតែមានបណ្ណអនុញ្ញាតឲ្យធ្វើការ ចេញដោយអាជ្ញាធរអង់គ្លេស។ អ្វីដែលប្រែប្រួលមួយទៀត គឺទាក់ទិននឹងការសិក្សារបស់សិស្សនិស្សិត។ ចាប់ពីឆ្នាំ២០២១ទៅ និស្សិតអឺរ៉ុបដែលចង់ទៅរៀននៅអង់គ្លេស គឺត្រូវបង់ពេញថ្លៃ មិនមែន ១ម៉ឺនអឺរ៉ូ ក្នុងមួយឆ្នាំដូចមុនទៀតឡើយ។ បញ្ហានេះ យើងអាចចាត់ទុកបានថា គឺជាការលំបាក និងការខាតបង់ធំ សម្រាប់យុវជនអឺរ៉ុប។
វិបតិ្តសេដ្ឋកិច្ច វិបត្តិផ្ទៃក្នុង កំពុងរងចាំអង់គ្លេសដែលឯកា
គ្រប់គ្នាចោទសួរជាទូទៅ ថាតើ អង់គ្លេសអាចឆ្លងកាត់ឧបសគ្គ រស់នៅតែម្នាក់ឯង ទៅថ្ងៃអនាគតដែរ ឬទេ? បើទោះ អង់គ្លេសជាប្រទេសមហាអំណាចមួយដ៏សំខាន់ដែរ តែកន្លងមកកម្លាំងរបស់អង់គ្លេសទាំងសេដ្ឋកិច្ច ទាំងនយោបាយការបរទេស គឺដោយសារមានកម្លាំងរួម របស់សហភាពអឺរ៉ុបជំរុញ។ អំណេះតទៅ អង់គ្លេសលែងមានសហភាពអឺរ៉ុបហើយ។ អង់គ្លេស នឹងត្រូវតែកសាងកេរ្តិ៍ឈ្មោះ រៀបចំកន្លែងតាំងតែដោយខ្លួនឯង នៅក្នុងពិភពលោកបច្ចុប្បន្ន ដែលមានកំពូលអំណាចច្រើនកន្លែង មានចិន មានអាមេរិក និងមានរុស្ស៊ីជាដើម។
ទាក់ទិននឹងបញ្ហាសេដ្ឋកិច្ចវិញ គ្មាននរណាអាចស្មានដឹង ឲ្យជាក់ច្បាស់ថា អង់គ្លេស នឹងចំណេញឬខាតនោះទេ ចាប់ពីពេលនេះទៅ។ យើងអាចនិយាយថា អង់គ្លេសដើរថយក្រោយ ត្រលប់ទៅរស់នៅម្នាក់ឯងក៏បាន តែយ៉ាងអាចថា អង់គ្លេសនឹងកាច់ចង្កូតសេដ្ឋកិច្ចដោយខ្លួនឯងក៏បានចាប់ពីពេលនេះទៅ។ យ៉ាងណាក៏ដោយ អ្វីដែលយើងឃើញនាពេលនេះ គឺថាទីផ្សារហិរញ្ញវត្ថុទីក្រុងឡុង អាចនឹងបាត់បង់កម្លាំងមួយផ្នែកធំ ព្រោះថាគេបានបែងចែកមកធ្វើនៅក្នុងសហភាពអឺរ៉ុប។ ជាងនេះទៀត វាជួនចំពេលដែលអង់គ្លេសកំពុងឆ្លងកាត់វិបត្តិសេដ្ឋកិច្ច បង្កឡើងដោយជម្ងឺកូវីដ១៩។ បញ្ហាសុខភាពសាធារណៈ បញ្ហាសេដ្ឋកិច្ចដុនដាបខ្លាំង ទាំងនេះគឺជាអ្វីដែលរងចាំឲ្យរដ្ឋាភិបាលលោកបូរីស ចនសុន ដោះស្រាយ។
បើនិយាយពីបញ្ហានយោបាយផ្ទៃក្នុងវិញ គឺអង់គ្លេសត្រូវប្រឈមនឹងគ្រោះថ្នាក់ខ្លាំងណាស់។ ឯកភាពជាតិអង់គ្លេសអាចនឹងបែកបាក់ ដោយសារតែការចាកចេញ ពីសហភាពអឺរ៉ុបនេះ។ ដែនដីអៀរឡើងខាងជើង ក៏ដូចជាដែនដីស្កុតលែន កំពុងតែរអ៊ូ ហើយរងចាំពេលវេលា ដើម្បីផ្តាច់ខ្លួនចេញពីចក្រភពអង់គ្លេសដែរ ព្រោះពួកគេអាចចង់បន្តរស់ក្នុងសហភាពអឺរ៉ុប ជាជាងនៅជាមួយអង់គ្លេសតែម្នាក់។ អនាគតយ៉ាងណា គឺមានតែពេលវេលាទេ ជាអ្នកសម្រេច៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ