លោកដូណាល់ ត្រាំជាប្រធានាធិបតីអាមេរិកដំបូងគេដែលប្រឈមនឹងការដកតំណែង ដល់ទៅ២លើក
ចុះផ្សាយនៅថ្ងៃ៖
ស្តាប់ - ០៧:១៩
នៅ ៥ថ្ងៃក្រោយ ក្រុមគាំទ្រលោកដូណាល់ ត្រាំ សម្រុក ចូលលុកលុយ វិមានកាពីតូល គណបក្សប្រជាធិបតេយ្យបានសម្រេច ចាប់ផ្តើមនីតិវិធីដកតំណែង លោកដូណាល់ ត្រាំ ជាលើកទី២។ នៅក្នុងលិខិតចោទប្រកាន់ ដាក់ទៅរដ្ឋសភា កាលពីថ្ងៃចន្ទ គណបក្សប្រជាធិបតេយ្យបានចោទប្រកាន់លោកដូណាល់ ត្រាំ ពីបទញុះញង់ ក្រុមអ្នកគាំទ្ររបស់លោក ឲ្យរំលោភ សម្រុកចូលក្នុងនៅវិមានកាពីតូល កាលពីថ្ងៃទី ៦ មករា ២០២១។ បទចោទប្រកាន់នឹងត្រូវដាក់ជូនរដ្ឋសភាអនុម័ត នៅ ថ្ងៃពុធ ប៉ុន្តែ សំណួរចោទឡើងថា តើព្រឹទ្ធសភា ដែលកំពុងស្ថិតក្នុងដៃគ្រប់គ្រងរបស់បក្សសាធារណរដ្ឋ របស់លោកដូណាល់ ត្រាំ នឹងកោះប្រជុំ ដើម្បីបោះឆ្នោត ដកតំណែងលោកដូណាល់ ត្រាំ ដែលត្រូវផុតអាណត្តិ នៅថ្ងៃទី ២០មករា ខាងមុខដែរឬយ៉ាងណា?
គណបក្សប្រជាធិបតេយ្យបានចាប់ផ្តើមនីតិវិធីដកតំណែងលោកដូណាល់ ត្រាំ ជាលើកពីរ ដោយលើកនេះ លោកដូណាល់ ត្រាំ ត្រូវ ចោទប្រកាន់ខ្លាំងៗថា នឹងគំរាមកំហែង សន្តិសុខជាតិ ប្រជាធិបតេយ្យ និងរដ្ឋធម្មនុញ្ញ បើសិន គេនៅតែ បន្តឲ្យលោកកាន់តំណែង ដឹកនាំអាមេរិកបន្តទៀត
៥ថ្ងៃក្រោយ ការសម្រុកចូលរបស់ក្រុមគាំទ្ររបស់លោកដូណាល់ ត្រាំ ទៅក្នុងវិមានកាពីតូល ជាទីដែលសភាអ្នកតំណាងរាស្រ្ត និងព្រឹទ្ធសភា បោះឆ្នោត បញ្ជាក់ជ័យជំនះឆ្នោតរបស់លោកចូ បៃដិន គណបក្សប្រជាធិបតេយ្យ មិន អត់ឱនឲ្យលោកដូណាល់ ត្រាំនោះទេ។ បន្ទាប់ពីអំពាវនាវមិនបានសម្រេចឲ្យ លោកដូណាល់ ត្រាំ ចុះចេញពីតំណែងដោយខ្លួនឯង គណបក្សប្រជាធិបតេយ្យ ចាប់ផ្តើមនីតិវិធីតាមផ្លូវច្បាប់ នៅថ្ងៃចន្ទ ដើម្បីចាប់បង្ខំឲ្យគេដកហូតតំណែងរបស់លោកដូណាល់ ត្រាំ។ គណបក្សប្រជាធិបតេយ្យបានផ្តើមនីតិវិធី២ ក្នុងពេលតែមួយ ដើម្បី ដាក់សម្ពាធ លើគណបក្សសាធារណរដ្ឋ ឲ្យដោះដៃ ចេញពីលោកដូណាល់ ត្រាំ។ ទី ១ ក្រុមបក្សប្រជាធិបតេយ្យបានដាក់ពាក្យចោទប្រកាន់ជាផ្លូវការលោកដូណាល់ ត្រាំ នៅ រដ្ឋសភា កាលពីថ្ងៃចន្ទ។ នៅ ថ្ងៃអង្គារ រដ្ឋសភាត្រូវបើកអង្គប្រជុំ ដើម្បី បោះឆ្នោត លើសម្រេចចិត្តមួយ ទៀត ដែលទាមទារឲ្យលោកអនុប្រធានាធិបតី Mike Pence ប្រើមាត្រា ទី ៤ នៃវិសោធនកម្មក្នុងរដ្ឋធម្មនុញ្ញ ដើម្បី ដកអំណាចពីលោកដូណាល់ ត្រាំ ក្នុងហេតុផល គ្មានសមត្ថភាពដឹកនាំប្រទេស។ នៅពេលនោះ គឺលោកMike Pence ដែលត្រូវដឹកនាំប្រទេស ជំនួស លោកដូណាល់ ត្រាំ។
ប៉ុន្តែ ដោយសារតែ លោកMike Pence ហាក់គ្មានជំហរចង់ ដកអំណាចពីលោកដូណាល់ ត្រាំ គណបក្សប្រជាធិបតេយ្យ បានរៀបជើងព្រួលមួយទៀត ដោយទុកពេលឲ្យលោកអនុប្រធានាធិបតី ២៤ម៉ោង ដើម្បី សម្រេចចិត្ត។ មានន័យថា បើសិន លោកMike Pence នៅតែមិនព្រមដោះដៃចូលលោកដូណាល់ ត្រាំ នោះ រដ្ឋសភា ត្រូវបោះឆ្នោតជាផ្លូវការ ដើម្បី ដកតំណែងប្រធានាធិបតី ពីលោកដូណាល់ ត្រាំ។
ការប៉ុនប៉ងរបស់គណបក្សប្រជាធិបតេយ្យ ដើម្បីបើកនីតិវិធីដកតំណែងរបស់លោកដូណាល់ ត្រាំ ធ្វើឡើងនៅក្នុងពេល ប៉ូលិស FBI បានព្រមានពីការផ្ទុះឡើងបាតុកម្មរបស់ក្រុមជ្រុលនិយម នៅគ្រប់រដ្ឋ អាមេរិក ពីពេលនេះ រហូតដល់ថ្ងៃស្បថចូលកាន់តំណែងប្រធានាធិបតី របស់លោកចូ បៃដិន នៅថ្ងៃទី ២០ មករា ខាងមុខ។ រងការរិះគន់ថា យឺតយ៉ាវ ក្នុងការអន្តរាគមន៍នៅថ្ងៃសម្រុកចូលរបស់ក្រុមគាំទ្រលោកដូណាល់ ត្រាំ ទៅក្នុងវិមានកាពីតូល ក្រសួងការពារជាតិ អាមេរិកបានប្រកាសពង្រាយ ឆ្មាំជាតិ ១៥ ០០០នាក់ នៅរដ្ឋធានីវ៉ាស៊ីតោន សម្រាប់ពិធីស្បថចូលកាន់តំណែងរបស់លោកចូ បៃដិន។
គណបក្សប្រជាធិបតេយ្យនៅតែព្យាយាមចង់បើកនីតិវិធីទម្លាក់លោកដូណាល់ ត្រាំ
នីតិវិធី ទម្លាក់លោកដូណាល់ ត្រាំ ពីតំណែង ប្រធានាធិបតី ដែលធ្វើឡើងនៅប៉ុន្មានថ្ងៃ មុនអស់អាណត្តិយ៉ាងដូច្នេះ មានន័យជានិមិត្តរូប ព្រោះថា ចង់ ឬមិនចង់ ចាប់ពីថ្ងៃ ទី ២០មករា គឺនៅតែ ៨ថ្ងៃទៀត លោកដូណាល់ ត្រាំ ក៏លែងជាប្រធានាធិបតីអាមេរិកតទៅទៀតដែរ។ គ្រប់គ្នា រួមទាំងគណបក្សប្រជាធិបតេយ្យ ដឹងរឿងនេះច្បាស់។ ប៉ុន្តែ សម្រាប់ គណបក្ស ប្រជាធិបតេយ្យ ការប៉ុនប៉ង ឈានទៅទម្លាក់លោកដូណាល់ ត្រាំឲ្យបានមុន ថ្ងៃ ទី ២០មករា មិនសំខាន់នោះទេ។ អ្វីដែលសំខាន់ គឺ គេបានបើកនីតិវិធី ដើម្បីថ្កោលទោសប្រធានាធិបតី មួយរូប ដែលបានញុះញង់ឲ្យមានអំពើហិង្សា លើកទឹកចិត្តឲ្យក្រុមគាំទ្រខ្លួន សម្រុកចូលក្នុងវិមានកាពីតូល ដែលតំណាងឲ្យបេះដូងនៃលទ្ធិប្រជាធិបតេយ្យរបស់អាមេរិក។
ទោះជាមិនអាច ឈានទៅ ដកតំណែងលោកដូណាល់ ត្រាំ ឲ្យបានមុន ថ្ងៃទី ២០ មករា ប៉ុន្តែ គណបក្សប្រជាធិបតេយ្យ នៅតែបើកនីតិវិធីទម្លាក់តំណែង ប្រធានាធិបតី ព្រោះថា ធ្វើដូច្នេះ គឺ ដើម្បី បិទផ្លូវ មិន ឲ្យលោកដូណាល់ ត្រាំ អាចត្រលប់មកចូលក្នុងឆាកនយោបាយ ឬ ឈរឈ្មោះ សម្រាប់ការបោះឆ្នោត ប្រធានាធិបតី នៅ៤ឆ្នាំទៀត នៅ ឆ្នាំ ២០២៤។ លោកដូណាល់ ត្រាំ ជាប្រធានាធិបតីអាមេរិក ដំបូង គេ ក្នុងប្រវត្តិសាស្រ្តអាមេរិក ដែលរងប្រឈមនឹងនីតិវិធីដកតំណែង នៅសភា ដែលនឹងធ្វើឲ្យជីវប្រវត្តិរបស់លោក មានដានមិនល្អ មិនអាចឈរឈ្មោះនយោបាយអ្វីទៀតនោះទេ។ ម្យ៉ាងទៀត បើសិន លោកត្រូវព្រឹទ្ធសភារកឃើញថា លោកមានទោស ក្នុងរឿងញុះញង់ ឲ្យអ្នកគាំទ្ររបស់លោក សម្រុកចូលវិមានកាពីតូល មែន នោះលោកដូណាល់ ត្រាំ មិនអាចទទួលបាន ប្រាក់សោធននិវត្ត ក្នុងនាមជាអតីតប្រធានាធិបតីនោះទេ។
បក្សប្រជាធិបតេយ្យមានគោលដៅ បំបាក់សំឡេងរបស់បក្សសាធារណរដ្ឋ
មួយវិញទៀត ដោយបើកនីតិវិធី ទាមទារដកតំណែងរបស់លោកដូណាល់ ត្រាំ គណបក្សប្រជាធិបតេយ្យចង់ផងដែរ បំបែកបំបាក់ សមាជិករបស់បក្សសាធារណរដ្ឋ។ តាមរយៈ ការបោះឆ្នោត នៅសភាអ្នកតំណាងរាស្រ្ត នៅថ្ងៃពុធស្អែក ក្រុមបក្សប្រជាធិបតេយ្យ ចង់ឲ្យពលរដ្ឋអាមេរិកមើលឃើញថា តើសមាជិករបស់បក្សសាធារណរដ្ឋមួយណា ដែលបោះឆ្នោតប្រឆាំង មិនចង់ដកលោកដូណាល់ ត្រាំ។ មានន័យថា អ្នកទាំងនោះ គឺ នៅតែ គាំទ្រលោកដូណាល់ ត្រាំ គាំទ្រ សកម្មភាពហិង្សា រំលោភចូលវិមានកាពីតូល រំលោភប្រជាធិបតេយ្យ អាមេរិក ដែលគេមិនគួររាប់រកនោះទេ។ គណបក្សសាធារណរដ្ឋ កំពុងស្ថិតក្រោមសម្ពាធ មែនទែន ព្រោះថា ពួកគេ អាចប្រឈមនឹងការបាត់បង់ប្រជាប្រិយភាព បើសិនជាបោះឆ្នោតប្រឆាំង ប៉ុន្តែបើគាំទ្រឲ្យគេដកដូណាល់ ត្រាំ នោះ នឹងមានអ្នកគាំទ្របក្សសាធារណរដ្ឋជាច្រើនដែលមិនសប្បាយចិត្ត។
នីតិវិធី ដកតំណែង នឹងបន្ត ក្រោយ លោកដូណាល់ ត្រាំ ផុតអាណត្តិជាផ្លូវការ នៅថ្ងៃទី ២០មករា
នីតិវិធីដកតំណែងលោកដូណាល់ ត្រាំ នឹងមិនអាច ធ្វើឡើងនៅ មុន ថ្ងៃ ទី ១៩មករានោះទេ នោះបើទោះបីជារដ្ឋសភា ឬសភាអ្នកតំណាងរាស្រ្តអាចបោះឆ្នោត ទម្លាក់លោកដូណាល់ ត្រាំ ចេញពីតំណែងនៅថ្ងៃពុធ ស្អែកក៏ដោយ។ ការសម្រេចចិត្តចុងក្រោយ គឺនៅព្រឹទ្ធសភា ដែលត្រូវបើអង្គប្រជុំ នៅថ្ងៃ ទី ១៩មករាខាងមុខ។
តាមសមាជិកបក្សប្រជាធិបតេយ្យ ទោះជាលោកដូណាល់ ត្រាំ ត្រូវផុតអាណត្តិ នៅ ថ្ងៃទី ២០ ប៉ុន្តែ សវនាការជំនុំជម្រះរបស់លោក នឹងនៅតែមាន ទោះលោកលែងជាប្រធានាធិបតីទៀតក៏ដោយ។ គណបក្សប្រជាធិបតេយ្យ នៅតែចង់អូសក លោកដូណាល់ ត្រាំ ឲ្យមកទទួលខុសត្រូវលើការញុះញង់ ឲ្យមានការរំលោភចូលដោយខុសច្បាប់ ទៅក្នុងសភា វិមានកាពីតូល ទោះលោកលែងជាប្រធានាធិបតីទៀតក៏ដោយ។
នៅ ព្រឹទ្ធសភាទៀតសោត គណបក្សប្រជាធិបតេយ្យ បើទោះបីជាមានសំឡេងភាគច្រើន នៅព្រឹទ្ធសភា ចាប់ពីថ្ងៃទី ២០មករា ខាងមុខ នឹងមិនសង្ឃឹមប្រមូលបានសំឡេងភាគច្រើន ៦៧ លើ១០០ ដើម្បីប្រឆាំង លោកដូណាល់ ត្រាំដែរ។
ការក្រាញននៀលរបស់បក្សប្រជាធិបតេយ្យ ដើម្បី បើកសវនាការ ទម្លាក់តំណែងរបស់លោកដូណាល់ ត្រាំ នឹងជះឥទ្ធិពលអាក្រក់ ទៅលើអាណត្តិដឹកនាំថ្មី របស់លោកចូ បៃដិន ដែលត្រូវចាប់ចូលកាន់តំណែង នៅថ្ងៃទី ២០មករាខាងមុខ។
ដោយសារព្រឹទ្ធសភា ជាប់រវល់នឹងសវនាការកាត់ទោស លោកដូណាល់ ត្រាំ នៅ ខែមករា ព្រឹទ្ធសភា នឹងគ្មានពេលគ្រប់គ្រាន់ដើម្បី សិក្សា បោះឆ្នោត ឈ្មោះបេក្ខជនសមាជិករដ្ឋាភិបាល ថ្មី ឬលើច្បាប់ស្រោចស្រង់សេដ្ឋកិច្ចរបស់លោកចូ បៃដិន។ នៅថ្ងៃចន្ទ លោកចូ បៃដិនបាននិយាយថា លោកបានពិភាក្សាជាមួយ សមាជិកព្រឹទ្ធសភា ដើម្បីធ្វើយ៉ាងណា បែងចែក ពេលវេលាពាក់កណ្តាល សម្រាប់ កិច្ចការ ចាំបាច់ បន្ទាន់ ពោលគឺធ្វើយ៉ាងណាកុំឲ្យការងាររបស់រដ្ឋបាលថ្មី របស់លោក ត្រូវខកខាន យឺតយ៉ាវ ដោយសារតែសវនាការ ដកតំណែងរបស់លោកដូណាល់ ត្រាំ លើកនេះ។
នៅក្នុងសំណុំរឿង បើកនីតិវិធីដកតំណែងរបស់លោកដូណាល់ ត្រាំ លោកចូ បៃដិនធ្លាប់បាននិយាយថា លោកមិនចង់ឲ្យកើតមាននោះទេ ព្រោះវានឹងធ្វើប្រជាជនអាមេរិកាំងនៅតែបែកបាក់ គ្នាសាជាថ្មី។ ប៉ុន្តែ នៅថ្ងៃចន្ទ លោកចូ បៃដិនលែងនិយាយទៀតហើយថា តើលោកគាំទ្រឬទេ សវនាការ ទម្លាក់លោកដូណាល់ ត្រាំ។ លោកគ្រាន់តែប្រាប់អ្នកកាសែតថា លោកធ្លាប់និយាយតាំងពីយូរហើយថា លោកដូណាល់ ត្រាំមិនសក្តិសមនឹងធ្វើជាប្រធានាធិបតី អាមេរិក។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ