WWF៖មានព្រៃឈើចំនួន ៤៣លានហិចតាត្រូវបានកាប់បំផ្លាញនៅចន្លោះឆ្នាំ ២០០៤ និងឆ្នាំ ២០១៧
ចុះផ្សាយនៅថ្ងៃ៖
ស្តាប់ - ០៦:៣៤
នៅថ្ងៃពុធ ទី១៣ មករា មូលនិធិពិភពលោកដើម្បីធម្មជាតិហៅកាត់ជាភាសាអង់គ្លេស WWF បានចេញផ្សាយរបាយការណ៍មួយជាសាធារណៈស្តីពីស្ថានភាពព្រៃឈើក្នុងលោក។ របាយការណ៍បានបង្ហាញថា មានព្រៃឈើប្រមាណជា ៤៣លានហិចតានៅទូទាំងពិភពលោកត្រូវបានកាប់បំផ្លាញនៅចន្លោះឆ្នាំ ២០០៤ និងឆ្នាំ ២០១៧។ កាលពី ៨ ០០០ឆ្នាំមុន ផែនដីរបស់យើងបានគ្របដណ្តប់ដោយព្រៃឈើដល់ទៅ ៥០% តែបច្ចុប្បន្ននេះ គឺនៅសល់ប្រមាណតែ ៣០% ប៉ុណ្ណោះ នេះបើតាមរបាយការណ៍របស់ WWF ដដែល។
ក្នុងរយៈពេលតែ ១៣ឆ្នាំ ពោលពីឆ្នាំ ២០០៤ ដល់ឆ្នាំ ២០១៧ ពិភពលោកបានបាត់បង់ព្រៃឈើដល់ទៅ ៤៣លានហិចតា ពោលស្មើនឹងទំហំផ្ទៃក្រឡាដីរបស់ប្រទេសអ៊ីរ៉ាក់។ នៅក្នុងរបាយការណ៍ចេញផ្សាយជាសាធារណៈថ្ងៃពុធ ទី១៣ មករា មូលនិធិពិភពលោកដើម្បីធម្មជាតិ ឬហៅកាត់ជាភាសាអង់គ្លេស WWF បានលើកឡើងពីទីតាំងសំខាន់ៗចំនួន ២៤កន្លែងនៃការកាប់បំផ្លាញព្រៃឈើដែលស្ថិតក្នុង ៣០ប្រទេស។ តាម WWF ទីតាំងសំខាន់ៗទាំង ២៤កន្លែងនៃការកាប់បំផ្លាញព្រៃឈើមាន ៩កន្លែងស្ថិតក្នុងទ្វីបអាមេរិកឡាទីន ៨កន្លែងស្ថិតក្នុងទ្វីបអាហ្វ្រិក និង ៧កន្លែងស្ថិតនៅអាស៊ីប៉ាស៊ីហ្វិក។
WWF បានបញ្ជាក់បន្ថែមថា ទីតាំងសំខាន់ៗទាំង ២៤កន្លែងនេះបានតំណាងឲ្យការកាប់បំផ្លាញព្រៃឈើក្នុងតំបន់ត្រូពិចដល់ទៅ ៥២%។ ប្រទេស និងតំបន់ដែលរងការកាប់បំផ្លាញព្រៃឈើខ្លាំងជាងគេ គឺតំបន់អាម៉ាហ្សូន និងតំបន់សេរ៉ាដូក្នុងប្រទេសប្រេស៊ីល តំបន់អាម៉ាហ្សូនក្នុងប្រទេសបូលីវី ព្រៃឈើនៅក្នុងប្រទេសប៉ារ៉ាហ្កាយ ព្រៃឈើនៅក្នុងប្រទេសអាហ្សង់ទីន ព្រៃឈើនៅក្នុងប្រទេសម៉ាដាហ្កាស្កា ព្រៃឈើនៅកោះស៊ូម៉ាត្រា និងកោះបរណេអូក្នុងប្រទេសឥណ្ឌូណេស៊ី និងព្រៃឈើនៅក្នុងប្រទេសម៉ាឡេស៊ី។ នៅតំបន់សេរ៉ាដូក្នុងប្រទេសប្រេស៊ីល មានការកាប់បំផ្លាញព្រៃឈើដល់ទៅ ៣លានហិចតាក្នុងចន្លោះឆ្នាំ ២០០៤ និង ២០១៧។
បើគិតតាំងពីឆ្នាំ ២០០០ តំបន់ព្រៃឈើរបស់ប្រេស៊ីលមួយនេះបានបាត់បង់ទំហំផ្ទៃដីព្រៃឈើជាង ៣០%។ ដោយឡែក និងបើផ្អែកតាមរបាយការណ៍របស់ WWF ដដែល ព្រៃឈើដែលនៅសេសសល់ចំនួន ៤៥% នៅក្នុងទីតាំងសំខាន់ៗទាំង ២៤កន្លែងបានទទួលរងនូវការរិចរិល ឬផុយស្រួយដែលងាយរងគ្រោះខ្លាំង ពិសេសងាយរងគ្រោះនឹងការឆាបឆេះដូចដែលធ្លាប់បានកើតមានញឹកញាប់នារយៈពេលប៉ុន្មានឆ្នាំចុងក្រោយនេះ។
វិស័យកសិកម្មជាបុព្វហេតុចម្បងនៃការកាប់បំផ្លាញព្រៃឈើ
មានកត្តាច្រើនដែលបានជំរុញឲ្យមានការកាប់បំផ្លាញព្រៃឈើ តែកសិកម្មត្រូវបាន WWF ចាត់ទុកជាបុព្វហេតុចម្បងនៃការកាប់បំផ្លាញព្រៃឈើ ពិសេសកាប់ព្រៃឈើដើម្បីយកដីធ្វើកសិកម្ម និងចឹញ្ចិមសត្វ។ ទង្វើនេះបានកើតមានច្រើននៅអាមេរិកខាងត្បូង។ កត្តាបន្ទាប់មក គឺការកាប់ព្រៃឈើដើម្បីយកទីតាំងនោះសម្រាប់ស្វែងរកធនធានរ៉ែនៅក្រោមដី និងការកាប់ព្រៃឈើចេញដើម្បីយកទីតាំងសម្រាប់សាងសង់ហេដ្ឋារចនាសម្ព័ន្ធផ្សេងៗ ពិសេសផ្លូវថ្នល់ និងឧស្សាហកម្មព្រៃឈើ។ ទាំងនេះដោយមិនទាន់បានរាប់បញ្ចូលពីអាជីវកម្មព្រៃឈើ និងការកាប់ព្រៃឈើដើម្បីយកដីដំាដំណាំកសិកម្មសម្រាប់ចិញ្ចឹមជីវិតប្រចាំថ្ងៃ។
នៅមានកត្តាបន្ទាប់បន្សំទៀត គឺការកាប់ព្រៃឈើដើម្បីយកដីលក់ ព្រោះដីនៅទីតាំងនោះកំពុងមានតម្លៃ។ តែ WWF បានមើលឃើញថាមានពេលខ្លះ ដីព្រៃនោះគ្មានតម្លៃ និងមិនមែនកំពុងឡើងថ្លៃទេ តែគឺឈ្មួញដីជាអ្នកក្រឡុកឆាងឆេង។ កត្តាទាំងអស់ខាងលើបានជំរុញ និងជះឥទ្ធិពលឲ្យមានការកាប់បំផ្លាញព្រៃឈើ។ គួររម្លឹកថាកាលពី ៥ឆ្នាំមុន WWF ធ្លាប់បានចេញរបាយការណ៍ដូចគ្នានេះដែលបញ្ជាក់ពីកំណើនចរន្តនៃការកាប់បំផ្លាញព្រៃឈើ និងការបាត់បង់ផ្ទៃដីព្រៃឈើ។ នៅ ៥ឆ្នាំក្រោយមក ចរន្តដដែលនេះហាក់មានសន្ទុះកាន់តែខ្លាំងឡើង។ WWF បានកត់សម្គាល់ឃើញថាកាលពី ៨ ០០០ឆ្នាំមុន ផែនដីយើងបានគ្របដណ្តប់ដោយព្រៃឈើចំនួន ៥០% តែសព្វថ្ងៃ នៅសល់ជាង ៣០% ប៉ុណ្ណោះ។ បើការកាប់បំផ្លាញព្រៃឈើនៅតែបន្តក្នុងល្បឿនដូចបច្ចុប្បន្ន ទំហំផ្ទៃដីព្រៃឈើនឹងរួញកាន់តែតូចទៅៗ។
មនុស្សលោកគ្រុបរូបជាអ្នកទទួលខុសត្រូវនៃការបាត់បង់ព្រៃឈើ
គឺទាំងអស់គ្នាដែលត្រូវចូលរួមជួយការពារ និងថែរក្សាព្រៃឈើ។ តែបើតាម WWF រដ្ឋ និងតួអង្គសេដ្ឋកិច្ចជាអ្នកដែលត្រូវនាំមុខគេនៅក្នុងយុទ្ធនាការប្រយុទ្ធប្រឆាំងនឹងការកាប់បំផ្លាញព្រៃឈើ។ ជម្រើសនៃការធ្វើវិនិយោគ និងជម្រើសនៃការប្រើប្រាស់ដីដើរតួនាទីយ៉ាងសំខាន់ដើម្បីចូលរួមទប់ស្កាត់ការកាប់បំផ្លាញព្រៃឈើ។ WWF បានរម្លឹកថា ក្នុងនាមយើងជាពលរដ្ឋសាមញ្ញម្នាក់ គេអាចចូលរួមទប់ស្កាត់ការបំផ្លាញព្រៃឈើដោយគ្រាន់តែកុំប្រើប្រាស់ផលិតផល និងបរិភោគចំណីអាហារណាដែលជួយជំរុញឲ្យមានការកាប់បំផ្លាញព្រៃឈើ។ ឧទាហរណ៍ជាក់ស្តែង គេគួរចាប់យករបបចំណីអាហារដែលមិនសូវមានប្រូតេអ៊ីនមកពីសាច់បសុសត្វ ព្រោះថា ការចិញ្ចឹមបសុសត្វត្រូវការផ្ទៃដីធំល្វឹងល្វើយដែលការកាប់បំផ្លាញព្រៃឈើដើម្បីយកដីជារឿងមិនអាចចៀសរួច។
មែនទែនទៅ ការកាប់បំផ្លាញព្រៃឈើប្រៀបបីដូចជាការបង្កគ្រោះថ្នាក់ដល់ជីវិតរស់នៅប្រចាំថ្ងៃរបស់មនុស្សយើងម្នាក់ៗ។ ព្រៃឈើជាទីជម្រករបស់សត្វ រុក្ខជាតិ និងជីវៈចម្រុះសំបូរបែប ហើយព្រៃឈើជាទីកន្លែងទាញយកកាបោន និងស្រូបយកឧស្ម័នផ្ទះកញ្ចក់ដែលបញ្ចញដោយសកម្មភាពរបស់មនុស្សលោក។ ដូច្នេះបើពិភពលោកនឹងលែងមានព្រៃឈើនៅថ្ងៃណាមួយ មនុស្សលោកទាំងអស់គ្នាជាអ្នកទទួលខុសត្រូវ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ