វិសមភាព ចិន វិបត្តិកូវីដ ជាភ្ញៀវពិសេសរបស់វេទិកាសេដ្ឋកិច្ចពិភពលោក២០២១
ចុះផ្សាយនៅថ្ងៃ៖
ស្តាប់ - ០៧:៥៥
វេទិកាសេដ្ឋកិច្ចដាវ៉ូសចាប់ផ្តើមបើកនៅថ្ងៃចន្ទទី ២៥មករា ២០២១នេះ សម្រាប់រយៈពេល៥ថ្ងៃ ដែលគេប្រសិទ្ធនាមថា “របៀបវារៈដាវ៉ូស”។ វេទិកាដែលប្រព្រឹត្តទៅតាមអនឡាញសុទ្ធសាធ ផ្តោតជាសំខាន់ទៅលើវិបត្តិកូវីដ និងផលប៉ះពាល់សេដ្ឋកិច្ចដោយវិបត្តិកូវីដ និងប្រទេសចិន ដែលបានដើរចេញរួចពីវិបត្តិកូវីដ១៩មុនគេ។ ដូចទម្លាប់ជារៀងរាល់ឆ្នាំ ក្នុងឱកាសបើកវេទិកាសេដ្ឋកិច្ចនេះ អង្គការ Oxfam តែងបានចេញផ្សាយរបាយការណ៍មួយដាស់សតិពិភពលោក។ របាយការណ៍ឆ្នាំនេះ បានបង្ហាញអំពីការកើនឡើងនៃវិសមភាពសង្គមនៅទូទាំងពិភពលោក បង្កឡើងដោយវិបត្តិកូវីដ។
ដោយហេតុវិបត្តិកូវីដ១៩ ពុំមានការជួបជុំគ្នាបង្ហាញវត្តមាននៅក្រុងដាវ៉ូសប្រទេសស្វ៊ីសដូចទម្លាប់ចំនួន៥០ឆ្នាំមកទេ។វេទិកាសេដ្ឋកិច្ចដាវ៉ូសអនឡាញឆ្នាំនេះ បានការចូលរួមពីសំណាក់ប្រមុខរដ្ឋ រដ្ឋាភិបាល ប្រធានក្រុមហ៊ុនសហគ្រាសគ្រាក់ៗ និងអង្គការក្រៅរដ្ឋាភិបាល អ្នកវិទ្យាសាស្ត្រ សរុបចំនួន ១៥០០នាក់ ក្នុងនោះក៏មានប្រធានក្រុមហ៊ុនមន្ទីរពិសោធន៍ឱសថ AstraZeneca ឬប្រធានធនាគារយក្សGoldman Sachsផង។ ប្រធានាធិបតី ចិន លោក ស៊ី ជីនពីង ជាអ្នកឡើងថ្លែងសុន្ទរកថាបើកកម្មវិធីផង។កម្មវត្ថុនៃវេទិកានេះ គឺរកវិធីគ្រប់គ្រងជំងឺរាតត្បាតដែលកំពុងបន្តសម្លាប់ជីវិតមនុស្សនៅលើពិភពលោក និងស្តារឱ្យមានកំណើនសេដ្ឋកិច្ច ដែលខ្ទេចខ្ទាំដោយវិបត្តិកូវីដ១៩។
កូវីដ-ចិន ស្នូលនៃវេទិកា
វេទិកាឆ្នាំនេះខុសប្លែកទាំងស្រុងពីឆ្នាំទៅទាំងទម្រង់ និងខ្លឹមសារ។ ឆ្នាំទៅវេទិកាបានប្រព្រឹត្តទៅដោយគ្មាននរណាខ្វល់ពីវីរុសចម្លែក បង្កជំងឺរលាកសួត នៅវ៉ូហានប្រទេសចិនទេ។ តែឆ្នាំនេះ បញ្ហាកូវីដ និងចិន លេចត្រដែតក្នុងវេទិកា ព្រោះចិនជាប្រទេសមហាសេដ្ឋកិច្ចតែមួយគត់នៅលើពិភពលោកដែលមានកំណើនសេដ្ឋកិច្ចវិជ្ជមាន (២,៣%) នៅឆ្នាំ២០២០ គេចផុតពីវិបត្តិសេដ្ឋកិច្ចដើរថយក្រោយបង្កឡើងកូវីដ១៩។ ដោយសារកូវីដចិននឹងអាចមានផលិតផលសរុបស្រុកស្មើសហរដ្ឋអាមេរិកនៅឆ្នាំ២០៣០ (ពោលគឺពីរឆ្នាំមុនការព្យាករណ៍ដែលគ្មានវិបត្តិកូវីដ)។ ដូច្នេះពេលនេះចង់ឬមិនចង់ ចិនគឺជាក្បាលម៉ាស៊ីនដ៏ចាំបាច់ ដែលជួយអូសទាញពិភពលោកឱ្យមានកំណើនសេដ្ឋកិច្ចឡើងវិញ និងដែលវេទិកាមិនអាចមើលរំលងបានជាដាច់ខាត។
ប្រធានាធិបតីចិន លោក ស៊ី ជិនពីង ដែលបានចូលរួមក្នុងវេទិកាសេដ្ឋកិច្ចដាវ៉ូសជាលើកទីមួយនៅឆ្នាំ២០១៧ ដើម្បីបំផុសពិភពលោកឱ្យទ្រទ្រង់ការផ្តោះប្តូរសេដ្ឋកិច្ចសេរី និងមានកិច្ចសហប្រតិបត្តិការអន្តរជាតិ នឹងធ្វើសេចក្តីអំពាវនាវក្នុងទិសនេះជាថ្មី។ កាលណោះ ប្រធានាធិបតីចិនបានចេញមុខតតាំងនឹងនយោបាយការពារតែប្រយោជន៍ជាតិអាមេរិកម្នាក់របស់លោកដូណាល់ ត្រាំ ដែលទើបចាកចេញពីអំណាច។ ហើយចិនក៏បានឆ្លៀតឱកាសយកវេទិកាដាវ៉ូសសម្រាប់ បង្ហាញខ្លួន បង្ហាញសមត្ថភាពថាចិនអាចធានារ៉ាប់រងឱ្យមាននយោបាយសកលភាវូបនីកម្ម។ ហេតុដូច្នេះ ហើយបានជារដ្ឋអំណាចប៉េកាំងចាប់អារម្មណ៍លើ ដាវ៉ូស សម្រាប់ណែនាំពិភពលោកឱ្យស្គាល់ចិនថាជាជម្រើសគួរឱ្យទុកចិត្ត។ ចិនត្រលប់មកវេទិកាដាវ៉ូសលើកទី៥១ ជាមួយពាក្យស្លោកថា “ឆ្នាំដ៏សំខាន់ក្នុងការស្ថាបនាទំនុកចិត្ត”។
ក្រៅពីចិន អ្នករៀបចំវេទិកាឆ្នាំនេះ ផ្តល់តម្លៃពិសេសដល់ អាស៊ី តែម្តង។ ក្រៅអំពីប្រធានាធិបតីចិន គេសង្កេតឃើញមានអន្តរាគមន៍របស់ប្រធានាធិបតីកូរ៉េខាងត្បូង នាយករដ្ឋមន្ត្រីឥណ្ឌានិងជប៉ុនទៀត។ បើតាមស្ថានិបវេទិកាដាវ៉ូស លោកសាស្ត្រាចារ្យ Klaus Schwab នៅឆ្នាំ២០២១ អាស៊ីនឹងតំណាងឱ្យ៥០%នៃផលិតផលសរុបរបស់ប្រជាជនពិភពលោក។ វេទិកាចាំបាច់ត្រូវគិតគូរអំពីតួនាទីរបស់អាស៊ី ដែលអាចមានឥទ្ធិពលខ្លាំងក្នុងការផ្តល់កំណើនសេដ្ឋកិច្ចពិភពលោក។ ដោយយល់អំពីភាពសំខាន់របស់អាស៊ីនេះហើយទើបបានជាវេទិកាសេដ្ឋកិច្ចដាវ៉ូសលើកទី៥១នឹងលើកទៅធ្វើដោយពិតៗ នៅប្រទេសសិង្ហបុរី នៅខែឧសភាខាងមុខ។ រដ្ឋដែលគេចាត់ទុកថាមានសុវត្ថិភាពជាងក្រុងហ្សឺណែវប្រទេសស្វ៊ីស ប្រឈមនឹងការរាតត្បាតរបស់កូវីដ១៩។
យុទ្ធសាស្ត្រស្វ័យភាពអឺរ៉ុប
ថ្វីបើលោកចូបៃដិនប្រធានាធិបតីអាមេរិកថ្មី មិនបង្ហាញវត្តមានក្នុងវេទិកាអនឡាញ ដោយបញ្ជូនត្រឹមលោកចនឃែរី ប្រេសិតពិសេសទទួលបន្ទុកអកាសធាតុ និងលោក Anthony Fauci មកចូលរួមក្នុងវេទិកាមែន តែខាងអឺរ៉ុបវិញ មានលោកប្រធានាធិបតីបារាំង ប្រមុខរដ្ឋាភិបាលអាល្លឺម៉ង់ នាយករដ្ឋមន្ត្រីអ៊ីតាលី និងប្រធានគណៈកម្មការអឺរ៉ុប មកជាតំណាង ដើម្បីរំលឹកអំពីវត្តមានអឺរ៉ុប នៅរវាងមហាអំណាចអាមេរិកនិងចិន។ អឺរ៉ុបនឹងប្រើវេទិកានេះ ដើម្បីសាកល្បងលាតត្រដាង យុទ្ធសាស្ត្រស្វ័យភាពរបស់ខ្លួន។
វិបត្តិកូវីដ១៩ បានបំភ្លឺឱ្យឃើញថា ក្រុមលោកខាងលិច រំពឹងខ្លាំងណាស់លើចិន ក្នុងនាមជារោងចក្ររបស់ពិភពលោក។ ពេលនេះ អឺរ៉ុប សហរដ្ឋអាមេរិក កំពុងចាប់ផ្តើមរៀបចំវិធានច្បាប់នាំផលិតកម្មយុទ្ធសាស្ត្រចូលមកតាំងទីក្នុងស្រុកវិញ។ ដោយហេតុវិបត្តិកូវីដ សេដ្ឋកិច្ចអនឡាញនិងវេជ្ជសាស្ត្រអនឡាញ បានស្ទុះឡើងខ្លាំង អឺរ៉ុបដែលមានធនធានមនុស្សផ្នែកបច្ចេកវិទ្យាបញ្ញាសិប្បនិម្មិត្ត និងកង់ទិក ចាប់ផ្តើមបង្កើនវិនិយោគ និងបង្កើនល្បឿនផ្នែកបច្ចេកវិទ្យានេះហើយ។
អ្នកជំនាញភូមិសាស្ត្រនយោបាយបានអះអាងថា សូមកុំយល់ច្រលំថាចិនអាចឈ្នះវិបត្តិកូវីដ ដោយម្នាក់ឯងបាន និងដោយសារតែមានកំណើនសេដ្ឋកិច្ចលឿនជាងគេ។ ត្រូវតែសហការគ្នា ទើបអាចគ្រប់គ្រងការចម្លងរាតត្បាត និងផ្តល់ថ្នាំបង្ការដល់ពលរដ្ឋគ្រប់រូប។ ស្ថាបនិកវេទិកាដាវ៉ូស បានអំពាវនាវឱ្យពិភពលោកឆក់ឱកាស ជាប្រវត្តិសាស្ត្រតែម្តង ដើម្បីរៀបចំសណ្តាប់ធ្នាប់សេដ្ឋកិច្ចពិភពលោក។
កូវីដបង្កើនវិសមភាពក្នុងលោក
Oxfam បានហៅកូវីដ១៩ ថាជា វីរុសវិសមភាព។ បើតាមរបាយការណ៍ប្រចាំឆ្នាំ ដែលចេញផ្សាយជាសាធារណៈចំនៅថ្ងៃបើកវេទិកាដាវ៉ូស កូវីដ១៩បានបង្កើនវិសមភាពសង្គមខ្លាំងណាស់។ ក្រុមអ្នកមានបានឆ្លងរួចពីវិបត្តិ បានយ៉ាងលឿនរហ័ស។ ក្នុងរយៈពេលតែ៩ខែ ក្រុមអ្នកមានជាងគេ១ពាន់នាក់ដំបូងនៅលើពិភពលោក រកបានទ្រព្យធនស្មើដើមវិញ ដូចមុនសម័យមុនកូវីដ ឯចំណែកជនក្រីក្រជាងគេបំផុតវិញ ត្រូវការពេលវេលាដល់ទៅ១០ឆ្នាំ ទើបអាចងើបពីចេញផុតពីវិបត្តិសេដ្ឋកិច្ចបាន។
មិនតែប៉ុណ្ណោះ មហាសេដ្ឋីមានប្រាក់ដល់ទ្រីលាន កាន់តែមាន។ តាំងពីផ្ទុះវិបត្តិកូវីដមកអ្នកមាន១ពាន់នាក់ដំបូងគេ កើនទ្រព្យសម្បត្តិដល់ទៅ ៥៤០ពាន់លានដុល្លារ ពោលគឺជាទឹកប្រាក់គ្រប់គ្រាន់ល្មមសម្រាប់ទិញថ្នាំបង្ការកូវីដ១៩ដល់ជនគ្រប់រូប និងបញ្ចៀសមិនឱ្យជន ណាម្នាក់ធ្លាក់ក្នុងភាពក្រីក្រ ដោយកូវីដបាន។ នេះបើតាមការបញ្ជាក់របស់Oxfam៕
ក្នុងកំរិតពិភពលោក ទ្រព្យសម្បត្តិរបស់អ្នកមានបានកើនឡើងដល់៣៩០០ទ្រីលានក្នុងរវាងពីថ្ងៃទី ១៨មីនា ដល់ថ្ងៃតី ៣១ធ្នូ ២០២០។ ជាឧទាហរណ៍ជាក់ស្តែង មហាសេដ្ឋីបារាំង លោក Bernard Arnault ប្រធានក្រុមហ៊ុនLouis Vuitton ដែលជាអ្នកមានលំដាប់ទីបីពិភពលោក ចំណេញបានជិត១៧៥លានអឺរ៉ូ (ពីខែមីនាដល់ធ្នូ ២០២០) ពោលគឺច្រើនជាងផលចំណេញមុនវិបត្តិកូវីដ១៩ទៅទៀត។
ប្រឈមនឹងវិសមភាពបែបនេះ អង្គការOxfam បានសំណូមពរឱ្យប្រទេសនីមួយៗនៅលើពិភពលោក ដំឡើងពន្ធលើក្រុមអ្នកមាន ព្រោះជាឧទាហរណ៍ នៅ ប្រទេសអាហ្សង់ទីន ដែលទើបបានអនុម័តច្បាប់យកពន្ធពិសេសពីអ្នកមានទ្រព្យច្រើនខ្លាំង បានពាំនាំថវិកាបានប្រមាណ៣ពាន់លានដុល្លារសម្រាប់យកទៅចំណាយក្នុងយុទ្ធនាការប្រយុទ្ធប្រឆាំងនឹងកូវីដ១៩៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ