អង្គការសុខភាពពិភពលោកផ្តើមចាយចែកវ៉ាក់សាំងបង្ការកូវីដ១៩ ដល់ ១៤៥ប្រទេសក្នុងលោក
ចុះផ្សាយនៅថ្ងៃ៖
ស្តាប់ - ០៨:១៣
នៅថ្ងៃពុធ ទី៣ កុម្ភៈអង្គការសុខភាពពិភពលោកហៅកាត់ជាភាសាអង់គ្លេស WHO បានផ្សព្វផ្សាយនូវបញ្ជីឈ្មោះប្រទេសដែលនឹងទទួលបានវ៉ាក់សាំងបង្ការកូវីដ១៩ តាមរយៈយន្តការកូវ៉ាក់ (Covax) ។ តាម WHO មាន ១៤៥ប្រទេសនឹងទទួលបានវ៉ាក់សាំងបង្ការកូវីដ១៩ ពីយន្តការកូវ៉ាក់ចាប់ពីពេលនេះទៅខែមិថុនាខាងមុខ។ តែនៅចំពោះមុខ និងដោយរង់ចាំការអនុញ្ញាតឲ្យប្រើវ៉ាក់សាំងរបស់មន្ទីរពិសោសធន៍ផ្សេងទៀត មានតែប្រទេសមួយក្តៅតូចប៉ុណ្ណោះដែលនឹងទទួលបានវ៉ាក់សាំងមុនគេ។ គួររម្លឹកថាមកទល់ពេលនេះ គឺទើបតែមានវ៉ាក់សាំងផលិតដោយមន្ទីរពិសោធន៍ Pfizer-BioNTech មួយគត់ដែល WHO បានអនុញ្ញាតឲ្យប្រើ។ បន្ទាប់ពីវ៉ាក់សាំងរបស់ Pfizer-BioNTech គឺវ៉ាក់សាំងរបស់ AstraZeneca ដែល WHO នឹងអនុញ្ញាតឲ្យប្រើនាពេលខាងមុខ។
កម្មវត្ថុរបស់អង្គការសុខភាពពិភពលោកតាមរយៈយន្តការកូវ៉ាក់របស់ខ្លួន គឺចែកចាយវ៉ាក់សាំងប្រមាណជាជាង ៣៣៧លានដូសទៅឲ្យ ១៤៥ប្រទេសនៅក្នុងរយៈពេល ៦ខែដើមឆ្នាំ ២០២១ នេះ។ នៅក្នុងចំណោម ១៤៥ប្រទេសនេះ មានភាគច្រើនជាប្រទេសក្រីក្រដែលមានចំណូលតិច និងមធ្យម។ តែមានក្រុមប្រទេសអ្នកមានមួយក្តាប់តូច ដូចជាកូរ៉េខាងត្បូង កាណាដា អង់ដូរ៉ា ម៉ូណាកូ នូវែលហ្សេឡង់ កាតា និងប្រទេសអារ៉ាប៊ីសាអូឌីត។ ចំណែកការបែងចែកវ៉ាក់សាំងនឹងត្រូវធ្វើឡើងជាលក្ខណៈសមាមាត្រដោយផ្អែកលើចំនួនពលរដ្ឋរបស់ប្រទេសនីមួយៗ។ ប្រទេសដែលនឹងទទួលបានវ៉ាក់សាំងច្រើនជាងគេពីយន្តការកូវ៉ាក់មានឥណ្ឌាចំនួន ៩៧ ២០០ ០០០ដូស ប៉ាគីស្ថានចំនួន ១៧ ២០០ ០០០ដូស នីហ្សេរីយ៉ាចំនួន ១៦ ០០០ ០០០ដូស ឥណ្ឌូណេស៊ីចំនួន ១៣ ៧០០ ០០០ដូស បង់ក្លាដែសចំនួន ១២ ០០០ ០០០ដូស និងប្រទេសប្រេស៊ីលចំនួន ១០ ៧០០ ០០០ដូស។
ដោយឡែក វៀតណាមនឹងទទួលបានជិត ៤ ៩០០ ០០០ដូស ហើយកម្ពុជានឹងទទួលបានជិត ១ ៣០០ ០០០ដូស។ គួរបញ្ជាក់ថា ក្នុងចំណោមប្រទេសដែលស្ថិតក្នុងបញ្ជីឈ្មោះទទួលវ៉ាក់សាំងបង្ការកូវីដ១៩ ពីយន្តការកូវ៉ាក់របស់ WHO មានភាគច្រើនក៏បានចំណាយលុយទិញវ៉ាក់សាំងខ្លួនឯង ហើយមានប្រទេសខ្លះថែមទាំងបានចាប់ផ្តើមចាក់វ៉ាក់សាំងទៀតផង។ អ្វីជាការកត់សម្គាល់ វ៉ាក់សាំងទាំងជាង ៣៣៧លានដូសដែល WHO សង្ឃឹមមានសម្រាប់ ៦ខែដើមឆ្នាំ ២០២១ នេះនៅមិនគ្រប់គ្រាន់ដើម្បីចាក់ទៅលើពលរដ្ឋទាំង ១៤៥ប្រទេសបានឡើយ។ អ៊ីចឹងហើយបានជា WHO បានស្នើឲ្យប្រទេសដែលនឹងទទួលវ៉ាក់សាំងនាពេលខាងមុខចាក់លើក្រុមមនុស្សអាទិភាពមុនគេ ពិសេសក្រុមមនុស្សងាយរងគ្រោះខ្លាំង និងក្រុមបុគ្គលិកបម្រើការក្នុងមន្ទីរពេទ្យ ឬសេវាសុខភាព។
មាន ១៧ប្រទេសនឹងទទួលបានវ៉ាក់សាំងមុនគេ
តាមការគន់គូររបស់ WHO វ៉ាក់សាំងទាំងជាង ៣៣៧លានដូសដែលអាចទទួលបានក្នុង ៦ខែដើមឆ្នាំ ២០២១ នេះអាចចាក់បានមនុស្សប្រមាណជា ៣,៣% នៃចំនួនប្រជាជនសរុបនៅក្នុង ១៤៥ប្រទេស។ មែនទែនទៅ និងតាមរយៈយន្តការកូវ៉ាក់នេះដដែល WHO គ្រោងចាក់វ៉ាក់សាំងបង្ការកូវីដ១៩ លើមនុស្សចំនួន ២០% នៃចំនួនមនុស្សសរុបនៅក្នុង ១៩០ប្រទេសពីពេលនេះទៅដំណាច់ឆ្នាំ ២០២១។ តែនេះគ្រាន់ជាគម្រោងផែនការប៉ុណ្ណោះ ព្រោះការសម្រេចបាន ឬមិនបានអាស្រ័យទាំងស្រុងលើការទទួលបានចំនួនវ៉ាក់សាំងពិតប្រាកដ។ ចូរកុំភ្លេចថាមកទល់ពេលនេះ គឺទើបមានតែវ៉ាក់សាំងរបស់មន្ទីរពិសោធន៍ Pfizer-BioNTech មួយគត់ដែល WHO បានអនុញ្ញាតឲ្យប្រើ។
នៅពេលខាងមុខ WHO នឹងអនុញ្ញាតឲ្យប្រើវ៉ាក់សាំងរបស់មន្ទីរពិសោធន៍ផ្សេងទៀត ពិសេស AstraZeneca។ តែក្នុងពេលរង់ចាំ WHO ទើបមានវ៉ាក់សាំងក្នុងដៃតែចំនួន ១លាន ២សែនដូសប៉ុណ្ណោះដែលជាវ៉ាក់សាំងរបស់មន្ទីរពិសោធន៍ Pfizer-BioNTech។ នេះជាចំនួនតិចតួចបំផុត បើធៀបនឹងចំនួនប្រទេសដល់ទៅ ៧២ប្រទេសដែលចង់បានវ៉ាក់សាំងភ្លាមៗ។ ដោយមានបរិមាណមិនគ្រប់គ្រាន់ WHO បានធ្វើការជ្រើសរើស និងសម្រេចចែកចាយឲ្យតែ ១៧ប្រទេសដំបូងនៅក្នុង ៣ខែដើមឆ្នាំ ២០២១ នេះ។ ជម្រើសយក ១៧ប្រទេសដំបូងបានធ្វើឡើងផ្អែកលើកត្តាមួយចំនួន ដូចជាការពិនិត្យមើលលើអត្រាស្លាប់បុគ្គលិកពេទ្យនៅក្នុងប្រទេសនីមួយៗ តើប្រទេសនោះបានត្រៀមខ្លួនដើម្បីបើកយុទ្ធនាការចាក់វ៉ាក់សាំងហើយ ឬនៅ ឬមួយក៏ថា តើប្រទេសនោះមានបានផ្តើមយុទ្ធនាការចាក់វ៉ាក់សាំងដាច់ដោយឡែករបស់ខ្លួនដែរ ឬទេ។
ក្នុងចំណោម ១៧ប្រទេសដែលនឹងទទួលបានវ៉ាក់សាំងនា ៣ខែដើមឆ្នាំ ២០២១ រួមមាន ដែនដីប៉ាឡេស្ទីនចំនួន ៣៧ ៤៤០ដូស ហើយប្រទេសកូឡុំប៊ី ប៉េរូ អ៊ុយក្រែន ហ្វីលីពីន អាហ្រ្វិកខាងត្បូង និងប្រទេសកូរ៉េខាងត្បូងទទួលបានម្នាក់ៗចំនួន ១១៧ ០០០ដូស។ បន្ទាប់មកនៅមានប្រទេសហ្សកហ្ស៊ី រវ៉ាន់ដា ម៉ុលដាវី ឬមួយក៏ប្រទេសឥណ្ឌូណេស៊ី។
WHO សង្ឃឹមទទួលបានវ៉ាក់សាំងចំនួន ២ ០០០លានដូសពីពេលនេះទៅដំណាច់ឆ្នាំ ២០២១
កូវ៉ាក់ជាយន្តការអន្តរជាតិមួយដែលបានបង្កើតឡើងដោយអង្គការសុខភាពពិភពលោក និងសម្ព័ន្ធដើម្បីវ៉ាក់សាំងហៅកាត់ Gavi កាលពីរដូវក្តៅឆ្នាំ ២០២០។ កម្មវត្ថុរបស់យន្តការកូវ៉ាក់ គឺធានាពីការចែកចាយវ៉ាក់សាំងបង្ការកូវីដ១៩ ឲ្យស្មើភាពគ្នាសម្រាប់គ្រប់ប្រទេសទាំងអស់ក្នុងលោក ពិសេសក្រុមប្រទេសក្រីក្រដែលមានចំណូលតិច និងមធ្យម។ ចូរកុំភ្លេចថា វ៉ាក់សាំងបង្ការកូវីដ១៩ជាវ៉ាក់សាំងដែលមនុស្សលោកត្រូវការយ៉ាងអន្ទះសារ ពិសេសក្រុមប្រទេសក្រីក្រ។ តាំងពីវ៉ាក់សាំងកំពុងស្ថិតក្នុងដំណាក់ការស្រាវជ្រាវម្ល៉េះ ក្រុមប្រទេសអ្នកមានបានកក់លុយមុនរួចជាស្រេច។
សួរថា ចុះចំណែកក្រុមប្រទេសអ្នកក្រដែលអត់លុយទិញគិតយ៉ាងម៉េចដែរ?។ តើពួកគេរង់ចាំតែថ្ងៃស្លាប់ ឬយ៉ាងណា?។ គឺផ្តើមចេញពីសំណួរទាំងនេះហើយដែល WHO និង Gavi បានបង្កើតឲ្យមានយន្តការកូវ៉ាក់នេះឡើង។ សព្វថ្ងៃនេះ ក្នុងចំណោមអ្នកក្រីក្រលើលោក មានជាង ៤០% កំពុងរស់ក្នុងប្រទេសផុយស្រួយ និងមានជម្លោះ។ ក្រៅពីរងគ្រោះដោយសង្រ្គាម ការបម្លាស់ទីដោយបង្ខំ និងគ្រោះធម្មជាតិ អ្នកក្រទាំងអស់នោះក៏កំពុងរងគ្រោះដោយវិបត្តិកូវីដ១៩ និងវិបត្តិសេដ្ឋកិច្ចដែលបង្កឡើងដោយកូវីដ១៩។
WHO និង Gavi បានយល់ឃើញថា សាមគ្គីភាពជាមួយក្រុមប្រទេសក្រីក្រជារឿងចាំបាច់មិនអាចខ្វះបានដើម្បីប្រឆាំងនឹងកូវីដ១៩។ មានជាង ១៨០ប្រទេសបានចូលរួមជាមួយយន្តការកូវ៉ាក់ និងមានការរួមសហការពីមន្ទីរពិសោធន៍ចំនួន ៩ ក្នុងចំណោមបេក្ខជនវ៉ាក់សាំងបង្ការកូវីដ១៩។ WHO និង Gavi សង្ឃឹមទទួលបានវ៉ាក់សាំងបង្ការកូវីដ១៩ ចំនួន ២ ០០០លានដូសពីពេលនេះទៅដំណាច់ឆ្នាំ ២០២១ ក្នុងនោះ មានជិតពាក់កណ្តាលនឹងយកទៅជួយប្រទេសចំនួន ៩២ប្រទេសដែលក្រខ្លាំងជាងគេក្នុងលោក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ