ភូមា៖ បាតុកម្មប្រឆាំងរដ្ឋប្រហារ ខណៈអាជ្ញាធរព្យាយាមបិទខ្ទប់បណ្តាញសង្គម
ចុះផ្សាយនៅថ្ងៃ៖
ស្តាប់ - ០៦:៥២
នៅថ្ងៃសៅរ៍ទី៦កុម្ភៈ ប្រជាជនភូមា ជាច្រើនពាន់នាក់ បានចេញធ្វើបាតុកម្ម នៅទីក្រុងរ៉ង់ហ្គូន ដើម្បីប្រឆាំងនឹងការធ្វើរដ្ឋប្រហារ របស់ក្រុមយោធា ព្រមទាំងទាមទារឲ្យដោះលែងលោកស្រី អ៊ុងសាន ស៊ូជី និងអ្នកនយោបាយឯទៀត ដែលត្រូវបានគេចាប់ខ្លួនកាលពីថ្ងៃទី ១កុម្ភៈ។ រដ្ឋាភិបាលភូមា ដែលស្ថិតក្នុងកណ្តាប់ដៃក្រុមយោធា នាពេលនេះ បានព្យាយាមបិទខ្ទប់បណ្តាញសង្គមនៅទូទាំងប្រទេស ដើម្បីកុំឲ្យប្រជាជនភូមា អាចទាក់ទងគ្នា ឬផ្ញើសារនានា ទាក់ទិននឹងបញ្ហានយោបាយ។
"តស៊ូដើម្បីកូនចៅជំនាន់ក្រោយ"
ជាការកត់សំគាល់របស់អ្នកកាសែតបារាំង AFP នៅទីក្រុងរ៉ង់ហ្គូន នៅថ្ងៃសៅរ៍នេះ គឺថាមានប្រជាជនភូមា ប្រមាណយ៉ាងហោច៣០០០នាក់ ភាគច្រើនជាយុវជន បានជួបជុំគ្នាធ្វើបាតុកម្មដោយលើកដៃម្រាម៣ ជាសញ្ញានៃការតស៊ូរើបំរាស់។ នេះគឺជាចំនួនបាតុករច្រើនបំផុត បើគិតចាប់ពីថ្ងៃធ្វើរដ្ឋប្រហារមក។ បាតុករ បានស្លៀកពាក់ពណ៌ក្រហម បង់កកន្សែងក្រហម និងខ្លះដាក់បូរពណ៌ក្រហមតូចមួយនៅលើអាវ។ តាមផ្លូវគេបានចង់ក្រណាត់ក្រហម ឬប៉េតប៉ោងពណ៌ក្រហម ដែជាពណ៌របស់គណបក្សសម្ព័ន្ធជាតិដើម្បីប្រជាធិបតេយ្យ។
នៅក្បែរសកលវិទ្យាសល័យក្រុងរ៉ង់ហ្គូន បាតុករបានស្រែក បន្លឺសម្លេងថា ត្រូវតែប្រយុទ្ធកំទេចរបបផ្តាច់ការយោធា។ អ្នកខ្លះបានលើកគ្រវីទង់ របស់គណបក្សសម្ព័ន្ធជាតិប្រជាធិបតេយ្យ។ បាតុករម្នាក់ បានប្រាប់អ្នកកាសែតថា ពួកគេធ្វើបាតុកម្មនៅពេលនេះ គឺជាការតស៊ូ ប្រយុទ្ធដើម្បីកូនចៅភូមាជំនាន់ក្រោយ ដើម្បីរំដោះប្រទេសនេះ កុំឲ្យស្ថិតនៅក្រោមនឹមរបបផ្តាច់ការ របស់ពួកក្រុមយោធាតទៅទៀត។
បើតាមការសង្កេត របស់អ្នកកាសែតបារាំង គឺរហូតមកទល់ពេលនេះ មិនទាន់មានការបង្រ្កាបរារាំង ដោយប្រើកំលាំងហិង្សាណាមួយ ទៅលើក្រុមបាតុករទេ។ សមត្ថកិច្ចភូមា បានដាក់ពង្រាយកម្លាំង បិទរនាំង នៅតាមផ្លូវធំៗ មួយចំនួនក្នុងក្រុងរ៉ង់ហ្គូន តែបើតាមការសង្កេត គឺហាក់ដូចជាមិនបានទទួលបញ្ជា ពីថ្នាក់លើ ថាឲ្យបំបែកក្រុមបាតុករទេ។
ក្រៅពីយុវជន សិស្សនិស្សិត គឺមានបុគ្គលិកស្ថាប័នរដ្ឋ គ្រូបង្រៀនជាដើម បាននាំគ្នាឈប់ទៅធ្វើការ ហើយចាប់ផ្តើមធ្វើបាតុកម្ម តាំងតែពីថ្ងៃសុក្រម្លេះ។ នៅយប់ថ្ងៃសុក្រវិញ ប្រជាជននៅក្រុងរ៉ងហ្គូន បាននាំគ្នាចុចស៊ីផ្លេឡានម៉ូតូ និងបានវាយចានវាយឆ្នាំង បន្លឺសម្លេងទ្រហឹងអឺងកង ដើម្បីបណ្តេញឧបទ្រព ខ្មោចព្រាយចង្រៃ ដែលសំដៅទៅដល់ ក្រុមយោធា ដែលបានធ្វើរដ្ឋប្រហារនេះឯង។
អាជ្ញាធរភូមាបិទអ៊ីនធ័រណិត និងព្យាយាមខ្ទប់បណ្តាញសង្គម
យោងតាម អង្គការNetBlocks ដែលជាអ្នកឃ្លាំមើលសិទ្ធិសេរីភាពអ៊ីនធ័រណិត បានអះអាងថា អាជ្ញាធរភូមាបានបិទសេវាអ៊ីនធ័រណិត នៅទូទាំងប្រទេសតែម្តង ជាលើកទី២ នៅថ្ងៃសៅរ៍នេះ។ លើកទី១គឺនៅថ្ងៃធ្វើរដ្ឋប្រហារ។ ក្រុមហ៊ុន Telenor ស្ថិតនៅប្រទេសន័រវ៉េស ដែលមានសាខា ចែកចាយបណ្តាញអ៊ីនធ័រណិតនៅភូមា បានបញ្ជាក់ថា ក្រុមហ៊ុនគេ ពិតជាបានទទួលបញ្ជា ពីអាជ្ញាធរភូមា ឲ្យបិទខ្ទប់បណ្តាញសង្គមមួយរយៈមែន រហូតដល់មានបទបញ្ជាថ្មី។
កម្មវត្ថុរបស់អាជ្ញាធរភូមា គឺចង់បិទបណ្តាញសង្គម ដូចជា Twitter Instagram ជាដើម ព្រោះថាប្រជាជនភូមា ប្រើប្រាស់បណ្តាញទាំងនេះដើម្បីទាក់ទងគ្នា ផ្សព្វផ្សាយសារ និងប្រមូលគ្នាជួបជុំធ្វើបាតុកម្មជាដើម។ កាលពី២ថ្ងៃមុន ក្រុមយោធា បានព្យាយាមចេញបញ្ជា ចង់បិទ Facebook ថែមទៀតផង។ អ្នកនាំពាក្យក្រុមហ៊ុន Twitter បានលើកឡើងថា ទង្វើរបស់អាជ្ញាធរភូមានេះ គឺជាការបំបិទសិទ្ធិសេរីភាព របស់មនុស្សក្នុងការបញ្ចេញមតិ។
ដោយឡែក ក្រសួងដឹកជញ្ជូន និងទូរគមនាគមន៍ភូមា បានបញ្ជាក់ប្រាប់អ្នកកាសែតបារាំងថា អាជ្ញាធរភូមា បានបិទអ៊ីនធ័រណិត និងបណ្តាញសង្គមនេះ គឺដោយសារបណ្តាញសង្គម គឺជាអ្នកធ្វើឲ្យរីកសាយភាពនូវដំណឹងចចាមអារ៉ាម បង្កចលាចលក្នុងសង្គម។
សំរាប់ពេលនេះ ប្រជាជនភូមា ហាក់ដូចជាស្ថិតក្នុងស្បៃអន្ធកាល ដោយសារតែគ្មានសេវ៉ាអ៊ីនធ័រណិត ទាក់ទងគ្នា។ នេះបើផ្អែកតាមប្រសាសន៍ របស់លោក Ming Yu Hah តំណាងអង្គការ Amnesty International ប្រចាំនៅភូមា។ តែមានអ្នកខ្លះៗ បានប្រើប្រាស់ សោVPN ដើម្បីអាចបន្តប្រើបណ្តាញសង្គមបាន។
យន្តការអន្តរជាតិត្រូវរាំងស្ទះ ដោយសារចិន និងរុស្ស៊ី
ក្រុមប្រឹក្សាសន្តិសុខអង្គការសហប្រជាជាតិ ប្រជុំគ្នា អស់ពេញមួយយប់ថ្ងៃទី២ កុម្ភៈ តែទីបំផុត គ្មានលទ្ធផលអ្វីធំដំទេ ដោយសារតែ ចិន និង រុស្ស៊ី បានរារាំង។ ក្នុងសេចក្តីថ្លែងការណ៍រួម ក្រោយការប្រជុំនេះ ក្រុមប្រឹក្សាសន្តិសុខ មិនទាំងហ៊ានប្រើពាក្យ រដ្ឋប្រហារយោធាផងទេ ព្រោះចិន និង រុស្ស៊ី បដិសេធមិនឲ្យប្រើ។ គេគ្រាន់តែបានអំពាវនាវ ឲ្យដោះលែងមនុស្សទាំងអស់មកវិញ គឺមានលោកស្រី អ៊ុងសាន ស៊ូជី និងអ្នកនយោបាយផ្សេងទៀត។
នៅថ្ងៃទី៦កុម្ភៈនេះ លោកអគ្គលេខាធិការអង្គការសហប្រជាជាតិ បានបញ្ជាក់ឲ្យដឹងថា លោកស្រី Christine Schraner Burgener ប្រេសិតពិសេសរបស់អង្គការសហប្រជាជាតិប្រចាំនៅភូមា បានទាក់ទងទៅកងទ័ពភូមា ដោយបាននិយាយជាមួយអគ្គមេបញ្ជាការរងម្នាក់។ លោកអង់តូនីញ៉ូ ហ្គូតតែស បានអះអាងថា ប្រេសិទពិសេសរបស់អង្គការសហប្រជាជាតិ បានបញ្ជាក់ប្រាប់ទៅ ក្រុមយោធាភូមាច្បាស់ៗ អំពីគោលជំហររបស់អង្គការប្រជាជាតិ ដែលមិនគាំទ្ររដ្ឋប្រហារនេះ។ លោកបន្ថែមថា អង្គការសហប្រជាជាតិ នឹងប្រែងប្រែងជាមួយសហគមអន្តរជាតិ ដើម្បីធ្វើយ៉ាងណា រំលាយការធ្វើរដ្ឋប្រហារនេះឲ្យបាន។
ដោយឡែក យោងតាមការចុះផ្សាយរបស់កាសែត Global New Light of Myanmar ដែលជាការសែតរដ្ឋភូមា គឺកាលពីថ្ងៃសុក្រម្សិលមិញ មានកិច្ចប្រជុំមួយ ត្រូវបានគេរៀបចំឡើយ ដោយមានការចូលរួមពីសំណាក់តំណាងអាជ្ញាធរភូមា និងក្រុមមន្ត្រីអង្គទូតបរទេស។ យោងតាមប្រភពនេះ លោក Ko Ko Hlaing រដ្ឋមន្ត្រីក្រសួងសហប្រតិបត្តិការអន្តរជាតិភូមា បានលើកឡើងក្នុងពេលប្រជុំថា រដ្ឋាភិបាលភូមា យល់អំពីការព្រួយបារម្ភរបស់សហគមន៍អន្តរជាតិ ទាក់ទិននឹងដំណើរការប្រជាធិបតេយ្យនៅភូមា។
ជាសរុបមក គិតត្រឹមថ្ងៃនេះ ពុំមានយន្តការអ្វីជាដុំកំភួន នៅឡើយទេ។ ប្រទេសមហាអំណាច ដូចជាសហរដ្ឋអាមេរិក សហភាពអឺរ៉ុបជាដើម បានត្រឹមតែប្រកាសថ្កោលទោស ហើយសន្យាថានឹងរកវិធីដាក់ទណ្ឌកម្មលើក្រុមកងទ័ពភូមា។ ក្រុមកងទ័ពភូមា មិនមែនមិនដឹងថា ប្រទេសលោកខាងលិច នឹងដាក់ទណ្ឌកម្មខ្លួននោះទេ ក្នុងករណីធ្វើរដ្ឋប្រហារ។ គេមិនញញើត ប្រហែលមកពីគេ មានបង្អែកផ្សេងទៀត ដែលរឹងមាំអាចជួយគេបាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ