អង្គការសហប្រជាជាតិអំពាវនាវឲ្យមានការចែកចាយវ៉ាក់សាំងបង្ការកូវីដ១៩ សម្រាប់គ្រប់ប្រទេសទាំងអស់
ចុះផ្សាយនៅថ្ងៃ៖
ស្តាប់ - ០៥:២៣
នៅថ្ងៃពុធ ទី១៧ កុម្ភៈ អង្គការសហប្រជាជាតិបានអំពាវនាវឲ្យមានកិច្ចខិតខំប្រឹងប្រែងជាសកលក្នុងរឿងវ៉ាក់សាំងបង្ការកូវីដ១៩និងព្រមានពីគ្រោះថ្នាក់នៃវិសមភាពក្នុងការទទួលបានវ៉ាកសាំងរវាងក្រុមប្រទេសអ្នកមាន និងប្រទេសក្រីក្រ។ ការអំពាវនាវនេះបានធ្វើឡើងនៅក្នុងកិច្ចប្រជុំតាមអនឡាញនៃថ្នាក់រដ្ឋមន្រ្តីការបរទេសរបស់ក្រុមប្រទេសសមាជិកក្នុងក្រុមប្រឹក្សាសន្តិសុខ។ ចំណែកអគ្គលេខាធិការអង្គការសហប្រជាជាតិលោកអង់តូនីញ៉ូ ហ្គូទែរស៍បានបញ្ជាក់ថា ខណៈដែលមានប្រទេសខ្លះទទួលបានវ៉ាក់សាំងច្រើនលើសលប់ និងខ្លះទៀតទទួលបានតិចតួច មានជាង ១៣០ប្រទេសនៅមិនទាន់បានទទួលវ៉ាក់សាំងទាល់តែសោះ សូម្បីមួយដូសក៏គ្មានដែរ។
ពិតជារឿងកម្រមែនដែលក្រុមប្រឹក្សាសន្តិសុខបានជជែកគ្នាលើវិបត្តិកូវីដ១៩ ដែលកំពុងបន្តញំញីពិភពលោកសព្វថ្ងៃ ព្រោះតាមទម្លាប់ ក្រុមប្រឹក្សាសន្តិសុខច្រើនចាប់អារម្មណ៍លើជម្លោះប្រដាប់អាវុធ ឬមួយក៏ជម្លោះនយោបាយនៅក្នុងលោក។ នេះស បញ្ជាក់ឲ្យឃើញពីស្ថានភាពធ្ងន់ធ្ងរកាន់តែខ្លាំងរបស់មនុស្សលោកដែលបង្កដោយជំងឺកូវីដ១៩។ អ្វីដែលក្រុមប្រឹក្សាសន្តិសុខចង់បានជាបន្ទាន់នៅចំពោះមុខ គឺផែនការចាក់វ៉ាក់សាំងបង្ការកូវីដ១៩ ជាសកល ហើយដើម្បីអាចរៀបចំផែនការវ៉ាក់សាំងសកលនេះបាន អគ្គលេខាធិការអង្គការសហប្រជាជាតិលោកអង់តូនីញ៉ូ ហ្គូទែរស៍បានស្នើឲ្យមានការប្រមូលផ្តុំនូវកត្តាសំខាន់ចំនួន ៣ គឺជំនាញវិទ្យាសាស្រ្ត សមត្ថភាពផលិតកម្ម និងថវិកា។
ជំនាញវិទ្យាសាស្រ្តដែលលោកហ្គូទែរស៍ចង់និយាយ គឺការបង្កើតក្រុមអ្នកវិទ្យាសាស្រ្តដើម្បីជជែកពីជម្រើសវ៉ាក់សាំង។ ចំណែកសមត្ថភាពផលិតកម្ម គឺសមត្ថភាពនៃការផលិតវ៉ាក់សាំងដើម្បីឆ្លើយតបនឹងតម្រូវការសកល ហើយថវិកា គឺជាកញ្ចប់លុយសកលដែលត្រូវចំណាយសម្រាប់វ៉ាក់សាំងសកល។ លោកអង់តូនីញ៉ូ ហ្គូទែរស៍យល់ថា មានតែក្រុមប្រទេស G២០ ពោលក្រុមប្រទេសមហាអំណាចឧស្សាហកម្ម និងក្រុមប្រទេសដែលកំពុងមានសេដ្ឋកិច្ចរីកលូតលាស់ទើបអាចរួមគ្នាបង្កើតចេញនូវផែនការវ៉ាក់សាំងសកលនេះឡើង។
គួរបញ្ជាក់ថា នៅក្នុងចំណោមសមាជិកក្រុមប្រឹក្សាសន្តិសុខទាំង ១៥ប្រទេស មាន ៥ប្រទេសដែលមានសមត្ថភាពផលិតវ៉ាក់សាំងបង្ការកូវីដ១៩ ក្រោមទ្រង់ទ្រាយធំពេលនេះ គឺសហរដ្ឋអាមេរិក រុស្ស៊ី ចិន អង់គ្លេស និងឥណ្ឌា។ ឥណ្ឌាដែលបានប្រកាសផ្តល់វ៉ាក់សាំងចំនួន ២០០ ០០០ដូសទៅឲ្យកម្លាំងមួកខៀវរបស់អង្គការសហប្រជាជាតិប្រមាណជា ១០០ ០០០នាក់។ ចំណែករដ្ឋបាលអាមេរិកបានប្រកាសពីការផ្តល់លុយចំនួន ២០០លានដុល្លារទៅឲ្យអង្គការសុខភាពពិភពលោកនៅមុនដំណាច់ខែកុម្ភៈ។
វិសមភាពវ៉ាក់សាំងនឹងអូសបន្លាយវិបត្តិកូវីដ១៩
ការអំពាវនាវរបស់ក្រុមប្រឹក្សាសសន្តិសុខពេលនេះហាក់ដូចជាចង់យឺតពេលបន្តិច តែវាគ្រាន់បើជាងមិនធ្វើអីសោះ និងបន្តឱបដៃឈរមើល។ ពិតណាស់ កម្មវត្ថុដែលក្រុមប្រឹក្សាសន្តិសុខចង់ឃើញ និងចង់បានពេលនេះ គឺប្រទេសទាំងអស់ មិនថាអ្នកមាន ឬអ្នកក្រត្រូវទទួលបានវ៉ាក់សាំង និងផ្តើមយុទ្ធនាការចាក់វ៉ាក់សាំងបង្ការកូវីដ១៩ ក្នុងពេលដំណាលគ្នា។ តែអ្វីដែលគេបានឃើញនឹងភ្នែកពេលនេះគឺថា គម្លាតនៃការទទួលបានវ៉ាក់សាំង និងកម្លាតនៃការចាក់វ៉ាក់សាំងមានការឃ្លាតគ្នាខ្លាំងណាស់រវាងប្រទេសនីមួយៗ មិនថាតែរវាងប្រទេសអ្នកមាន និងអ្នកក្រប៉ុណ្ណោះទេ សូម្បីតែរវាងប្រទេសអ្នកមាន និងអ្នកមានដូចគ្នាក៏មានដែរ។
ខណៈដែលប្រទេសខ្លះបានទទួលវ៉ាក់សាំងច្រើនលើសលប់ជាងតម្រូវការសម្រាប់ពលរដ្ឋរបស់ខ្លួនទៀតនោះ មានប្រទេសខ្លះទទួលបានមិនគ្រប់គ្រាន់ ហើយមានប្រទេសខ្លះអត់ទទួលបានវ៉ាក់សាំងសោះ។ តាមប្រមុខអង្គការសហប្រជាជាតិលោកអង់តូនីញ៉ូ ហ្គូទែរស៍ មានជាង ១៣០ ប្រទេសមិនទទួលបានវ៉ាក់សាំងទេ សូម្បីមួយដូសក៏គ្មានដែរ។ លោកអង់តូនីញ៉ូ ហ្គូទែរស៍បានចាត់ទុកបញ្ហានេះជារឿងអយុត្តិធម៌ និងមិនស្មើភាព រួចពន្យល់ថា បើគ្រប់ប្រទេសទាំងអស់មិនទទួលបានវ៉ាក់សាំង និងចាក់វ៉ាក់សាំងទេ វិបត្តិជំងឺកូវីដ១៩ នឹងអូសបន្លាយគ្មានទីបញ្ចប់។
ប្រមុខអង្គការពិភពលោករូបនេះដដែលបារម្ភថា នៅពេលដែលប្រទេសជាច្រើនមិនបានទាន់បានវ៉ាក់សាំង និងបន្តញំញីដោយជំងឺកូវីដ១៩ ជំងឺមួយនេះនឹងបន្តបំប្លែងខ្លួនកាន់តែច្រើន រួចអាចឆ្លងទៅកាន់ក្រុមប្រទេសដែលបានចាក់វ៉ាក់សាំងបង្ការកូវីដ១៩។ ដូច្នេះការឆ្លងរាលដាលនៃមេរោគកូវីដ១៩ បំប្លែងខ្លួននឹងគំរាមកំហែងជាយថាហេតុលើប្រសិទ្ធិភាពរបស់វ៉ាក់សាំង។ ផ្ទុយទៅវិញ បើគ្រប់ប្រទេសទទួលបានវ៉ាក់សាំង ការឆ្លងរាលដាលនៃកូវីដ១៩ នឹងចុះថយឥទ្ធិពល ហើយកម្រិតនៃការបំប្លែងខ្លួនរបស់កូវីដ១៩ ក៏មានតិច។
លោកដូមីនិក រ៉ាប រដ្ឋមន្រ្តីការបរទេសអង់គ្លេស និងជាប្រធានផ្លាស់វេនក្រុមប្រឹក្សាសន្តិសុខបានបញ្ជាក់ថា ពិភពលោកត្រូវរួមដៃគ្នាប្រយុទ្ធប្រឆាំងនឹងជំងឺឆ្លងសកលដោយមិនត្រូវបំភ្លេចចោលអ្នកណាម្នាក់ទេ និងថា កូវីដ១៩ ជាសត្រូវរួមរបស់យើងទាំងអស់។ គេមិនដឹងថា ក្រៅតែពីអំពាវនាវ និងខ្វាយខ្វល់នេះ តើក្រុមប្រឹក្សាសន្តិសុខអាចសម្រេចអ្វីបានទេនៅក្នុងរឿងកូវីដ១៩ នេះ។ ខណៈដែលមានប្រទេសសមាជិកជាច្រើន ដូចជាចិនបានទាមទារឲ្យមានសាមគ្គីភាព និងកិច្ចសហប្រតិបត្តិការច្រើនជាងនេះលើវ៉ាក់សាំងបង្ការកូវីដ១៩ មានប្រទេសសមាជិកខ្លះដូចជារុស្ស៊ីបានពេបជ្រាយដោយបញ្ជាក់ថា ការជជែករឿងវ៉ាក់សាំងនេះមិនមែនជាសមត្ថកិច្ចរបស់ក្រុមប្រឹក្សាសន្តិសុខទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ