ក្រុមប្រទេស G7 បើកជំនួបកំពូលដោយផ្តោតលើប្រធានបទកូវីដ សេដ្ឋកិច្ចនិងប្រទេសចិន
ចុះផ្សាយនៅថ្ងៃ៖
ស្តាប់ - ០៧:៤៥
ក្រុមប្រទេសមហាអំណាចឧស្សាហកម្មទាំង ៧ ដែលហៅកាត់ថាហ្សេ៧ (G7) នឹងបើកជំនួបកំពូលអនឡាញមួយនៅថ្ងៃសុក្រ ១៩ កុម្ភៈនេះ ដោយមានប្រទេសអង់គ្លេសធ្វើជាម្ចាស់ផ្ទះ។ កិច្ចប្រជុំរបស់ក្រុមប្រទេស G7 នឹងផ្តោតការយកចិត្តទុកដាក់លើប្រធានបទមួយចំនួនរួមមានជាអាទី៍ បញ្ហាកូវីដ១៩ វិបត្តិសេដ្ឋកិច្ចសកល និងប្រទេសចិន។
ជំនួបកំពូលតាមអនឡាញរបស់ក្រុមប្រទេសមហាអំណាចឧស្សាហកម្មទាំង៧
ក្រុមប្រទេសមហាអំណាចឧស្សាហកម្មទាំង៧ ដែលហៅកាត់ថា G7 នឹងបើកជំនួបកំពូលនៅថ្ងៃសុក្រទី ១៩ កុម្ភៈនេះ។ ជំនួបកំពូលក្រុមប្រទេស G7 ដែលរួមមានសហរដ្ឋអាមេរិក កាណាដា បារាំង អង់គ្លេស អាល្លឺម៉ង់ អ៊ីតាលី និងជប៉ុន នឹងធ្វើឡើងតាមរយៈអនឡាញដោយចាប់ផ្តើមនៅវេលាម៉ោង ២ រសៀល ម៉ោងសកល ឬត្រូវនឹងម៉ោង ៩ យប់នៅខ្មែរ និងដែលមានប្រទេសអង់គ្លេសធ្វើជាម្ចាស់ផ្ទះ។
ជាការគួរឲ្យកត់សម្គាល់ លោកចូ បៃដិន នឹងចូលរួមកិច្ចពិភាក្សាកំពូលនេះ។ កិច្ចប្រជុំនៅថ្ងៃសុក្រនេះនឹងក្លាយជាកិច្ចប្រជុំកំពូលលើកដំបូងគេហើយរបស់លោកបៃដិន ជាមួយនឹងក្រុមប្រទេសមហាអំណាចឧស្សាហកម្មទាំង៧ ក្នុងនាមជាប្រធានាធិបតីរបស់សហរដ្ឋអាមេរិក ហើយក៏ជាការចូលរួមជាអន្តរជាតិដ៏ធំលើកដំបូងរបស់លោកដែរ ចាប់តាំងពីចូលកាន់តំណែងកាលពីខែមុនមក។ គួរជ្រាបដែរ ក្រៅពីលោកចូ បៃដិន នាយករដ្ឋមន្ត្រីអ៊ីតាលី លោកដ្រាហ្គី ក៏ជាមេដឹកនាំថ្មីមួយរូបដែលទើបបានចូលរួមជំនួបកំពូលនេះជាលើកទី១។
ដោយឡែក បើនិយាយពីប្រធានបទវិញ ក្រុមប្រទេស G7 ដូចបានរៀបរាប់មុននេះរួមមាន សហរដ្ឋអាមេរិក កាណាដា បារាំង អង់គ្លេស អាល្លឺម៉ង់ អ៊ីតាលី និងជប៉ុន ព្រមជាមួយនឹងមេដឹកនាំសហភាពអឺរ៉ុបផង នឹងផ្តោតការពិភាក្សាលើប្រធានបទស្នូលដែលរួមមាន វិបត្តិកូវីដ១៩ វិបត្តិសេដ្ឋកិច្ចសកល បញ្ហាអាកាសធាតុ និងការឆ្លើយតបទៅនឹងបញ្ហាប្រឈមដែលបង្កឡើងដោយប្រទេសចិន។
តើក្រុមប្រទេស G7 នឹងពិភាក្សាអំពីវិបត្តិកូវីដ ដោយផ្តោតសំខាន់ពីចំណុចអ្វីខ្លះ?
ជាបឋមគួរបញ្ជាក់ជូនថារហូតមកទល់នឹងពេលនេះ ជំងឺកូវីដ១៩ នៅតែបន្តការឆ្លងរាលខ្លាំងនៅឡើយនៅតាមបណ្តាប្រទេសជាច្រើន និងនៅតែបន្តតាមញាំញីពិភពលោកមិនឈប់។
ចាប់តាំងពីផ្ទុះឡើងដំបូងនៅក្នុងទីក្រុងវូហានប្រទេសចិននាចុងឆ្នាំ ២០១៩ ជំងឺរាតត្បាតសកលកូវីដ១៩ បានសម្លាប់មនុស្សអស់ជាង ២ លាន ៤ សែននាក់ និងបានទាញទម្លាក់ សេដ្ឋកិច្ចពិភពលោកឲ្យធ្លាក់ក្នុងវិបត្តិធ្ងន់ធ្ងរខ្លាំង។
ដូច្នោះលោកចូ បៃដិន ហើយនិងមេដឹកនាំប្រទេស G7 ផ្សេងទៀតនឹងពិភាក្សាគ្នាអំពីវិបត្តិកូវីដ ដោយផ្តោតទៅលើការឆ្លើយតបជាសកលចំពោះជំងឺរាតត្បាតនេះ និងរួមបញ្ចូលផងដែរទាំងផលិតកម្មវ៉ាក់សាំងកូវីដ ការចែកចាយផ្គត់ផ្គង់វ៉ាក់សាំង ហើយនិងកិច្ចខិតខំប្រឹងប្រែងដើម្បីប្រយុទ្ធប្រឆាំងនឹងការឆ្លងរាលថ្មី។ នេះបើតាមការប្រកាសឲ្យដឹងពីខាងសេតវិមានអាមេរិកកាលពីថ្ងៃព្រហស្បតិ៍ម្សិលមិញ។
ដោយសារតែកិច្ចប្រជុំនៅមិនទាន់បានចាប់ផ្តើមនៅឡើយ ចឹងហើយលទ្ធផលជុំវិញ វិបត្តិកូវីដរបស់ក្រុមប្រទេស G7 យ៉ាងណានោះ គេនៅមិនទាន់អាចនិយាយអ្វីបាននោះទេ។
ក៏ប៉ុន្តែមកទល់នឹងពេលនេះគេដឹងថាពីខាងទីក្រុងវ៉ាស៊ីនតោន រដ្ឋបាលអាមេរិករបស់លោកចូ បៃដិន បានសន្យាថានឹងផ្តល់ថវិកាចំនួន ៤ ពាន់លានដុល្លារដល់កម្មវិធីចាក់វ៉ាសាំង ដើម្បីជួយដល់ក្រុមប្រទេសក្រីក្រ ឲ្យអាចទទួលបានថ្នាំវ៉ាក់សាំងកូវីដ១៩។
រីឯ អង់គ្លេសដែលជាប្រទេសម្ចាស់ផ្ទះនៃកំជួបកំពូលក្រុមប្រទេស G7 វិញ បានសន្យាថានឹងផ្តល់ប្រាក់ចំនួន ៥៤៨ លានផោន (៧៦៦ លានដុល្លារ) ដល់យន្តការកូវ៉ាក់។ យន្តការកូវ៉ាក់ ដែលអង្គការសុខភាពពិភពលោក និងសម្ព័ន្ធដើម្បីវ៉ាក់សាំង បង្កើតឡើងនៅខែកក្កដា ឆ្នាំ ២០២០កន្លងទៅ ដើម្បីធានាឲ្យមានវ៉ាក់សាំងបង្ការកូវីដប្រមាណ២ពាន់លានដូស សម្រាប់ក្រុមប្រទេសក្រីក្រ។
ក្រៅពីនេះ ប្រទេសអង់គ្លេស ក៏នឹងស្នើសុំផងដែរឲ្យប្រទេសដៃគូ G7 ផ្សេងទៀត ចូលរួមផ្តល់ថវិកាគាំទ្របន្ថែមទៅក្នុងកម្មវិធីចាក់វ៉ាក់របស់អង្គការសុខភាពពិភពលោកនេះ។
ហេតុអ្វីបានជាប្រទេសចិន ក្លាយជាប្រធានបទដ៏សំខាន់មួយដែរនៅក្នុងជំនួបកំពូល G7?
ប្រទេសចិនក៏នឹងស្ថិតនៅក្នុងរបៀបវារៈនៃកិច្ចប្រជុំកំពូលរបស់ក្រុមប្រទេសមហាអំណាចឧស្សាហកម្មទាំង៧ផងដែរ។ ហេតុអ្វី?
គួររំឭកថា ក្នុងពេលថ្លែងសុន្ទរកថាអំពីគោលនយោបាយការបរទេសដ៏សំខាន់ ជាលើកដំបូង ក្នុងនាមជាប្រធានាធិបតីអាមេរិក លោកចូ បៃដិន បានចាត់ទុកប្រទេសចិនថាជាគូប្រជែងដ៏មានសក្កានុពលបំផុតរបស់សហរដ្ឋអាមេរិក។
ចាប់តាំងពីចូលកាន់តំណែងកាលពីខែមករាមុនមក លោកចូ បៃដិន ដែលជាប្រធានាធិបតីអាមេរិកមកពីគណបក្សប្រជាធិបតេយ្យ បានប្តេជ្ញាចិត្តយ៉ាងមុតមាំថានឹងនាំយកប្រទេសអាមេរិកទៅចូលរួមជាមួយសម្ព័ន្ធមិត្តវិញដើម្បីជួយគ្នាដោះស្រាយបញ្ហាទាក់ទងអាកាសធាតុ និងវិលទៅចូលរួមជាមួយអង្គការសុខភាពពិភពលោកវិញ ដែលនេះវាខុសគ្នាផ្ទុយស្រឡះពីរដ្ឋបាលចាស់ដឹកនាំដោយលោកដូណាល់ ត្រាំ។
ក៏ប៉ុន្តែ មានទស្សនៈមួយដែលលោកចូ បៃដិន នៅរក្សាបន្តគិតដូចលោកត្រាំ នោះគឺទស្សនៈដែលយល់ថាកុំទុកចិត្តចិនឲ្យសោះ។ ទីក្រុងវ៉ាស៊ីនតោន បានលើកឡើងពីការខ្វះតម្លាភាពរបស់ចិន នៅក្នុងកិច្ចសហប្រតិបត្តិការជាមួយក្រុមអ្នកជំនាញរបស់អង្គការសុខភាពពិភពលោកក្នុងបេសកកម្មស្រាវជ្រាវស្វែងរកប្រភពដើមកូវីដ ហើយវ៉ាស៊ីនតោនក៏មានមន្ទិលសង្ស័យផងដែរលើចំណាត់ការដំបូងរបស់ចិនឆ្លើយតបនឹងជំងឺកូវីដ។
ទន្ទឹមនេះ ប្រទេសអង់គ្លេស ចង់ឲ្យក្រុមប្រទេស G7 គាំទ្រឲ្យមានសន្ធិសញ្ញាសកលមួយ ស្តីពីជំងឺរាតត្បាត ដើម្បីបង្កើនការព្រមាននិងធានាឲ្យបានូវតម្លាភាពទិន្នន័យជាមុនក្នុងករណីមានការផ្ទុះជំងឺរាតត្បាតផ្សេងទៀតនាពេលអនាគត។
ទីក្រុងឡុងដ៍បានបដិសេធថាខ្លួនមិនចង់សំដៅនិយាយអ្វីប៉ះពាល់ដល់ចិននោះទេ ក៏ប៉ុន្តែ ចិនដែលជាមហាអំណាចអាស៊ី ត្រូវគេចោទប្រកាន់ជារឿយៗនិងជាទូលំទូលាយ ពីបទបិទបាំងអំពីការផ្ទុះឡើងដំបូងនៃជំងឺកូវីដកាលពីចុងឆ្នាំ ២០១៩។ ចិន ក៏ទទួលរងការចោទប្រកាន់ផងដែរថាបានលាក់បាំងព័ត៌មានសំខាន់ៗ មិនផ្តល់ទៅឲ្យក្រុមអ្នកជំនាញរបស់អង្គការសុខភាពពិភពលោក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ