រដ្ឋមន្ត្រីការបរទេសនៃរបបសិកភូមា ទៅក្រុងបាងកកដើម្បីជួបប្រជុំ ទាក់ទិននឹងវិបត្តិនយោបាយ
ចុះផ្សាយនៅថ្ងៃ៖
ស្តាប់ - ០៦:៣០
ខណៈពេលដែលបាតុកម្មតវ៉ារបស់ប្រជាជនភូមា មិនចុះថមថយ ថ្វីបើមានការបង្រ្កាបដោយហិង្សាក៏ដោយនោះ នៅថ្ងៃពុធនេះ បើតាមប្រភពច្បាស់ការ បានឲ្យដឹងថា លោករដ្ឋមន្ត្រីការបរទេស នៃរបបសិកភូមា បានធ្វើដំណើរទៅដល់ទីក្រុងបាងកក ដើម្បីជួបប្រជុំជាមួយរដ្ឋមន្ត្រីការបរទេសថៃ។ ចំណែកលោកស្រី រដ្ឋមន្ត្រីការបរទេសឥណ្ឌូណេស៊ី ក៏មានវត្តមាននៅទីក្រុងបាងកកដែរ។ បើតាមការស្មាន គឺឥណ្ឌូណេស៊ី និង ថៃ កំពុងតែព្យាយាមនិយាយជាមួយនឹងរបបសិកភូមា ដើម្បីរកផ្លូវដោះស្រាយវិបត្តិនយោបាយ។
លោក Wunna Maung Lwin រដ្ឋមន្ត្រីការបរទេសភូមា ដែលក្រុមកងទ័ពបានតែងតាំង ឲ្យជំនួសលោកស្រីអ៊ុងសាន ស៊ូជី ពិតជាមានវត្តមាននៅក្រុងបាងកកមែន នៅថ្ងៃពុធទី២៤កុម្ភៈនេះ។ នេះបើផ្អែកតាមប្រភពរបស់មន្ត្រីរដ្ឋាភិបាលថៃ។ ដំណើរមកបាងកក ជាលើកទីមួយ របស់លោករដ្ឋមន្ត្រីការបរទេសភូមារូបនេះ គឺដើម្បីជួបជាមួយ លោក Don Pramudwinai រដ្ឋមន្ត្រីការបរទេសថៃ។
ហើយបើផ្អែកតាមប្រភពពីរដ្ឋាភិបាលថៃដដែល គឺ លោកស្រី Retno Marsudi រដ្ឋមន្ត្រីការបរទេសឥណ្ឌូណេស៊ី ក៏មានវត្តមាននៅក្រុងបាងកកដែរ។ កាសែតបាងកកប៉ុស្តិ៍បានចុះផ្សាយថា រដ្ឋមន្រ្តីការបរទេសភូមា បានជួបជាមួយរដ្ឋមន្ត្រីការបរទេសថៃតែ២នាក់សិន ហើយបន្ទាប់មក ទើបជួបប្រជុំគ្នាទាំង៣នាក់ ជាមួយលោកស្រី Retno Marsudi រដ្ឋមន្ត្រីការបរទេសឥណ្ឌូណេស៊ី។
ឥណ្ឌូណេស៊ីប្រឹងខ្នះខ្នែង
ប្រទេសដែលចេញមុខខ្លាំងជាងគេ ក្នុងការស្វែងរកផ្លូវដោះស្រាយវិបត្តិនៅភូមា គឺឥណ្ឌូណេស៊ី។ តាំងតែពីមានវិបតិ្តក្រោយរដ្ឋប្រហារមក រដ្ឋាភិបាលឥណ្ឌូណេស៊ី បានចេញសេចក្តីថ្លែងការណ៍ថាចង់ និយាយជាមួយភាគីនយោបាយភូមាទាំងអស់ ដើម្បីរកផ្លូវដោះស្រាយបញ្ហានេះ ដោយសន្តិវិធី។
តាមពិត កាលពីថ្ងៃអង្គារទី២៣កុម្ភៈ មានឯកសារផ្លូវការមួយ ត្រូវបានបែកធ្លាយនៅភូមា ដែលបង្ហាញថា លោកស្រី Retno Marsudi រដ្ឋមន្ត្រីការបរទេសឥណ្ឌូណេស៊ី គ្រោងធ្វើដំណើរទៅភូមា នៅថ្ងៃពុធនេះ។ ក្រោយបែកធ្លាយដំណឹងនេះ ប្រជាជនភូមា បាននាំគ្នាមកធ្វើបាតុកម្ម នៅខាងមុខស្ថានទូតឥណ្ឌូណេស៊ី នៅក្រុងរ៉ង់ហ្គូន ហើយបូកបន្ថែមជាមួយនឹងបញ្ហាកាន់តែចលាចលផង នៅក្រោយការស្លាប់បាតុករភូមា៣នាក់ ភាគីឥណ្ឌូណេស៊ី ក៏បានលុបចោលដំណើរទៅភូមានេះវិញ។ អ្នកនាំពាក្យក្រសួងការបរទេសឥណ្ឌូណេស៊ី បានបញ្ជាក់ប្រាប់ថា កាលៈទេសៈពេលនេះ គឺមិនអំណោយផល ឲ្យរដ្ឋមន្ត្រីឥណ្ឌូណេស៊ី ទៅភូមាទេ។ ហេតុដូច្នេះហើយ បានជាគេអញ្ជើញឲ្យភាគីភូមា មកបាងកកវិញ ដើម្បីជួបជាមួយភាគីថៃ និងឥណ្ឌូណេស៊ី។
អ្នកនាំពាក្យក្រសួងការបរទេសឥណ្ឌូណេស៊ី បានបញ្ជាក់ថា គេមិនបោះបង់គំនិតទៅភូមាទេ តែគេនឹងរកឱកាស ឲ្យសមស្របបំផុត។ អ្នកនាំពាក្យរូបនេះ ក៏បានអះអាងដែរ ថា លោកស្រីរដ្ឋមន្ត្រីការបរទេសឥណ្ឌូណេស៊ី កំពុងជំរុញ ឲ្យមានកិច្ចប្រជុំពិសេសមួយ ក្នុងក្រខណ្ឌរដ្ឋមន្ត្រីការបរទេសអាស៊ានទាំងអស់ តែកាលបរិច្ឆេទ គឺមិនទាន់អាចកំណត់បាននោះទេ សម្រាប់ពេលនេះ។ ដូច្នេះ បើតាមការស្មាន ការប្រជុំត្រីភាគីជាមួយ នឹងតំណាងរដ្ឋាភិបាលកងទ័ពភូមានៅថ្ងៃទី ២៤កុម្ភៈនេះ គឺ ឥណ្ឌូណេស៊ីចង់ស្ទង់កំដៅ ស្វែងយល់ពីជំហររបស់កងទ័ពភូមាសិន ថាតើចង់ឲ្យមានយន្តការដោះស្រាយ ក្នុងក្របខណ្ឌអាស៊ានដែរឬទេ។ ហើយការដែលកងទ័ពភូមា បានបញ្ជូនមនុស្សឲ្យមកបាងកក វាក៏សញ្ញាវិជ្ជមានមួយដែរ។
អាស៊ានពិបាកនឹងរកគោលជំហររួម
រឿងយល់ស្របគ្នា ឬ មិនស្របនេះ ជាបញ្ហាចំណោទមួយ តែងតែចោទឡើង នៅក្នុងក្របខណ្ឌអាស៊ាន។ ប្រទេសដែលចង់ឲ្យអាស៊ាន ដើរតួនាទីច្បាស់លាស់ ដើម្បីការពារគោលការណ៍លទ្ធិប្រជាធិបតេយ្យ និងសិទ្ធិសេរីភាពនៅភូមា គឺមានឥណ្ឌូណេស៊ី ម៉ាឡេស៊ី និងសិង្ហបុរី ហើយចុងក្រោយនេះ គឺហ្វីលីពីនបានយល់ព្រមគាំទ្រដែរ។ ប្រទេសប្រ៊ុយណេ ដែលជាប្រធានវិលជុំអាស៊ាន ក្នុងពេលនេះ បានចេញសេចក្តីថ្លែងការណ៍ អំពាវនាវ ឲ្យភាគីនយោបាយនៅភូមា ស្វែងរកឲ្យបាននូវការផ្សះផ្សាគ្នា ដោយលើកឡើង នូវគោលការណ៍គ្រិះនៃលទ្ធិប្រជាធិបតេយ្យ ដែលមានចែងក្នុងធម្មនុញ្ញអាស៊ាន។
ចំណែកប្រទេសខ្លះ ដូចជាថៃ និងកម្ពុជា ធ្លាប់បានប្រកាន់ជំហរថា បញ្ហានយោបាយ វាគឺជាបញ្ហាផ្ទៃក្នុងនៃប្រទេសសមាជិក គួរទុកឲ្យប្រជាពលរដ្ឋ និងរដ្ឋអំណាចប្រទេសនោះដោះស្រាយ អាស៊ានមិនគួរលូកដៃទេ។ តែយ៉ាងណា ថ្មីៗនេះ លោកប្រាយុទ្ធ ចានអូចា នាយករដ្ឋមន្ត្រីថៃ បានលើកឡើងថា លោកគាំទ្រឲ្យ ប្រទេសសមាជិកអាស៊ានទាំងអស់ រួមគ្នាកំណត់គោលជំហររួមមួយ នៅក្នុងសំណុំរឿងភូមានេះ។
តែយ៉ាងណា សម្រាប់ពេលនេះ យើងមិនអាចនិយាយថា អាស៊ានប្រាកដជាមិនអាចធ្វើអ្វីបាន ដើម្បីជួយដោះស្រាយវិបត្តិនយោបាយនៅភូមានោះទេ។ យើងមិនគួរមិនស្រាល ការប្រឹងប្រែង របស់ប្រទេសខ្លះដូចជាឥណ្ឌូណេស៊ី នាពេលនេះឡើយ។ បើអាស៊ានបិទភ្នែក មិនលូកដៃក្នុងរឿងភូមានេះ វាអាចជះផលអាក្រក់ ទៅលើកិត្តិយសរបស់អាស៊ានទាំងមូលដែរ។ ខណៈដែល ប្រទេសមហាអំណាចធំៗ ដូចជាសហរដ្ឋអាមេរិក និងអឺរ៉ុប នាំគ្នាដាក់ទណ្ឌកម្មខ្លាំងៗលើ ក្រុមយោធាភូមា ប្រទេសអាស៊ាន អាចស្វែងរកច្រកផ្លូវកណ្តាលមួយផ្សេង ដែលមានប្រសិទ្ធិភាពជាងក៏ថាបាន។
បញ្ហាចំបងនៅពេលនេះ គឺថាកងទ័ពភូមា បានធីបចោលលទ្ធផលបោះឆ្នោត កាលពីខែវិច្ឆិកាឆ្នាំមុន ហើយអនុវត្តច្បាប់អាជ្ញាសិក រយៈពេល១ឆ្នាំ មុននឹងរៀបចំការបោះឆ្នោតថ្មីមួយទៀត។ តែមកទល់ពេលនេះ គ្មានការបញ្ជាក់ណាមួយពីកងទ័ពភូមា ថានឹងរៀបចំការបោះឆ្នោត នៅពេលណានោះទេ។ ប្រជាជនភូមា ភ័យថាវាអាចជាសន្យាខ្យល់។ បើតាមប្រភពពីអ្នកស្និទនឹងកិច្ចការនេះ គឺឥណ្ឌូណេស៊ី មានគំរោងស្នើផែនការមួយ ឲ្យកងទ័ពភូមា យល់ព្រមទទួលក្រុមការងារពិសេសមួយដែលប្រទេសអាស៊ានចាត់ទៅ ដើម្បីចុះទៅពិនិត្យតាមដាន និងធានាថាកងទ័ពភូមា ពិតជាគោរពសន្យា រៀបចំការបោះឆ្នោតដោយសេរីពិតមែន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ