ប៉េកាំងត្រៀមកែប្រែប្រព័ន្ធបោះឆ្នោតហុងកុង ដើម្បី ផាត់ចោលអ្នកនយោបាយគាំទ្រលទ្ធិប្រជាធិបតយ្យ
ចុះផ្សាយនៅថ្ងៃ៖
ស្តាប់ - ០៨:៥៥
សភាប្រជាជនចិនបន្តបើកកិច្ចប្រជុំពេញអង្គ នៅថ្ងៃសុក្រនេះ ដោយផ្តោតសំខាន់ លើស្នាដៃជោគជ័យរបស់រដ្ឋាភិបាលក្នុងការលុបបំបាត់ចោលភាពក្រីក្រ ជំងឺកូវីដ។ កិច្ចប្រជុំពេញអង្គរបស់សភាចិន ផ្តោតផងដែរ លើអនាគត បោះឆ្នោតនៅ ហុងកុង និងបញ្ហាភូមិសាស្រ្តនយោបាយ ជាមួយអាមេរិក ជុំវិញ សំណុំរឿងតៃវ៉ាន់ និងនៅសមុទ្រចិនខាងត្បូង។ សូមបញ្ជាក់ដែរថា សម័យប្រជុំសភាប្រជាជនចិននៅ ឆ្នាំនេះ មានលក្ខណៈពិសេស ព្រោះថា វាធ្វើឡើង នៅពេល ចិនត្រៀមប្រារព្ធខួប១០០ឆ្នាំ នៃការបង្កើតបក្សកុម្មុយនិស្ត ចិន ដែលត្រូវប្រព្រឹត្តទៅ នៅខែកក្កដា ខាងមុខនេះ។
សភាប្រជាជនចិនបានបើកសម័យប្រជុំពេញអង្គនៅថ្ងៃសុក្រនេះដោយមានការចូលរួមពីអ្នកតំណាងបក្សកុម្មុយនិស្តចិនជាង ៣ពាន់រូប។ ក្រៅតែ ពីលើកឡើងពីស្នាដៃជោគជ័យរបស់រដ្ឋាភិបាលក្នុងការគ្រប់គ្រងវិបត្តិកូវីដ កាត់បន្ថយភាពក្រីក្រ សភាប្រជាជនចិនត្រូវពិភាក្សាផងដែរ ពីបញ្ហាដែនដី ហុងកុង។
នៅមួយឆ្នាំក្រោយ បង្កើតច្បាប់សន្តិសុខជាតិហុងកុង ដើម្បី ចូលគ្រប់គ្រងសណ្តាប់ធ្នាប់ នៅហុងកុង សភាប្រជាជនចិន នៅថ្ងៃសុក្រនេះ ត្រូវ សម្រេចលើសេចក្តី ស្នើច្បាប់ថ្មី មួយទៀត ដែលមានគោលដៅ ធ្វើកំណែទម្រង់ ការបោះឆ្នោត នៅទីក្រុងហុងកុង។
សម្រាប់អ្នកប្រជាធិបតេយ្យហុងកុងជាច្រើន លទ្ធិប្រជាធិបតេយ្យនៅទីក្រុងហុងកុង នឹងត្រូវសម្លាប់ទាំងស្រុង បើសិន ទីក្រុងប៉េកាំងលូកដៃចូលបន្ថែមទៀត ក្នុងយន្តការបោះឆ្នោតនៅហុងកុង។
តាមអ្នកជំនាញខាងភាសាចិន នៅសកលវិទ្យាល័យ ហុងកុង គឺ លោក Willy Lam បើសិនសភាប្រជាជនចិនបោះឆ្នោតអនុម័តច្បាប់ធ្វើកំណែទម្រង់ការបោះឆ្នោត មែន នោះ គឺសំឡេងរបស់បក្សប្រឆាំងហុងកុង សំឡែងរបស់អ្នកដែលគាំទ្រលទ្ធិប្រជាធិបតេយ្យ ដែលត្រូវគេបិទខ្ទប់ លែងឲ្យមានតទៅទៀតនៅ ហុងកុង។
វាអាចពិតដូចការលើកឡើងរបស់អ្នកជំនាញខាងលើ ព្រោះថា បើតាមការពន្យល់របស់សមាជិកសភាម្នាក់របស់បក្សកុម្មុយនិស្តចិន ដែលបានប្រាប់អ្នកសារព័ត៌មានចិន គឺលោក វ៉ាង ឆេន Wang Chen រដ្ឋអំណាចចិននឹងផ្លាស់ប្តូរស៊ីជម្រៅ គោលនយោបាយបោះឆ្នោត នៅ ហុងកុង។ ជាក់ស្តែង សេចក្តីព្រាងច្បាប់ថ្មី ដែលដាក់ឲ្យសភា ប្រជាជនចិន ពិភាក្សា និងត្រូវបោះឆ្នោត អនុម័តនៅថ្ងៃព្រហស្បតិ៍សប្តាហ៍ក្រោយនេះ នឹងផ្តល់អំណាចច្រើនទៅឲ្យគណៈកម្មការបោះឆ្នោត នៅ ហុងកុង ដែលស្ថិតនៅក្រោមអំណាចរបស់ទីក្រុងប៉េកាំង។
ពីមុន គណៈកម្មការបោះឆ្នោត មានសិទ្ធិជ្រើសរើសសមាជិកសភាហុងកុង ចំនួន ពាក់កណ្តាល គឺ៣៥នាក់ ចំណែក ពាក់កណ្តាលទៀត គឺកើតចេញមកពីការបោះឆ្នោតជាទូទៅពី ប្រជាជនហុងកុង។ ប៉ុន្តែ ទៅតាមវិធានការថ្មី គណៈកម្មការបោះឆ្នោតដែលមាននិន្នាការទៅរកទីក្រុងប៉េកាំង នឹងមានសិទ្ធិជ្រើសរើសសមាជិកសភាហុងកុង ច្រើនជាង ពាក់កណ្តាល ហើយនិងមានសិទ្ធិសម្រេចលើបេក្ខភាពសមាជិកសភាហុងកុង។ មានន័យថា បើសិន គណៈកម្មការបោះឆ្នោត ហុងកុង មិនផ្តល់ភ្លើងខៀវទេ នោះ គេមិនអាចឈរឈ្មោះសម្រាប់ការបោះឆ្នោតសភាហុងកុងបាននោះទេ។
ច្បាប់ថ្មីនេះ សំដៅ រុញច្រានក្រុមអ្នកគាំទ្រប្រជាធិបតេយ្យ ឲ្យនៅក្រៅសៃង្វៀន នយោបាយនៅហុងកុង ព្រោះថា ចង់ ឬមិនចង់ អ្នកដែលគាំទ្រលទ្ធិប្រជាធិបតេយ្យហុងកុង ដែលរិះគន់ រដ្ឋអំណាចចិន នឹងគ្មានថ្ងៃបានទទួលការអនុញ្ញាតឲ្យឈរឈ្មោះ ក្នុងការបោះឆ្នោតសភាហុងកុងនោះទេ។ តាមរយៈច្បាប់ធ្វើកំណែទម្រង់ ការបោះឆ្នោតនៅ ហុងកុង ទីក្រុងប៉េកាំង ចង់បានលើកបន្តុប ឲ្យមានតែអ្នកដែល គាំទ្រ រដ្ឋអំណាចចិនប៉ុណ្ណោះ នៅក្នុងស្ថាប័នច្បាប់ និងរដ្ឋបាលដឹកនាំហុងកុង ពោលគឺដើម្បីជៀសវាង កុំឲ្យមានបាតុកម្មតវ៉ា រិះគន់ចិន ដូចកាលពីឆ្នាំ ២០១៩ទៀត។
គេអាចនិយាយថា អំណើះតទៅ លទ្ធិប្រជាធិបតេយ្យនៅហុងកុង នឹងលែងមានដូចដើមទៀតហើយ ព្រោះថា ប៉េកាំងបានលូកដៃកាន់តែជ្រៅ ទៅក្នុងប្រព័ន្ធដឹកនាំរបស់ហុងកុង។
កាសែតចិន៖ ប៉េកាំងនឹងលើកថ្ងៃបោះឆ្នោតសភាហុងកុងទៅឆ្នាំ២០២២
គោលការណ៍ ប្រទេសមួយប្រព័ន្ធពីរ កើតចេញមកពីការសន្យា របស់ប្រទេសចិន ដែលចង់ទារយកហុងកុង ពីអង់គ្លេស មកវិញ។ ទៅតាមកិច្ចព្រមព្រៀង ឆ្នាំ ១៩៨៤ នៅក្រោយ ចប់កិច្ចសន្យាគ្រប់គ្រង រយៈពេល ៩៩ឆ្នាំ អង់គ្លេស ត្រូវប្រគល់ហុងកុងទាំងមូលទៅចិនវិញ នៅថ្ងៃទី១ កក្កដា ឆ្នាំ១៩៩៧។ អង់គ្លេសសុខចិត្តប្រគល់ ហុងកុង ទៅឲ្យចិន វិញ ក៏ព្រោះ ថា ចិនបានសន្យាថា ហុងកុងជាដែនដីរបស់ចិនមែន ប៉ុន្តែ ហុងកុងនៅតែ ទទួលសិទ្ធិជាដែនដីស្វយ័ត ទៅតាមគោលការណ៍ប្រទេសមួយប្រព័ន្ធពីរ ដែលធានាឯករាជ្យភាព និងប្រព័ន្ធនយោបាយខុសស្រលះពីចិនដីគោក។ តាមកិច្ចព្រមព្រៀង ចិនត្រូវរក្សាគោលការណ៍នេះ រហូតដល់ឆ្នាំ ២០៤៧ ពោលគឺ ៥០ឆ្នាំ ក្រោយដែលហុងកុង ត្រូវផ្ទេរទៅឲ្យចិន។
ប៉ុន្តែ មើលទៅ ចិនលែងចង់គោរពតាមការសន្យាអ្វីទៀតហើយ ជាពិសេស នៅក្រោយ កើតមានចលនាប្រឆាំងរដ្ឋអំណាចចិន កាន់តែច្រើន នៅទឹកដី ហុងកុង។ បាតុកម្មប្រឆាំងនឹងច្បាប់ធ្វើបត្យាប័នទៅចិន ដែលក្រោយមកបានរីករាលដាលជាបាតុកម្មរបស់ក្រុមប្រជាធិបតេយ្យហុងកុង ដើម្បីប្រឆាំងការលូកដៃរបស់រដ្ឋអំណាចចិន នៅក្នុងការដឹកនាំហុងកុង បានធ្វើឲ្យទីក្រុងប៉េកាំង ក្តៅស្លឹកត្រចៀក និងសម្រេចចាត់វិធានការបិទបង្រ្កាប តាមរយៈ ការបង្កើតច្បាប់សន្តិសុខជាតិហុងកុង។
នៅមុនដាក់សេចក្តីព្រាងច្បាប់ សម្រាប់ធ្វើកំណែទម្រង់ការបោះឆ្នោតនៅហុងកុង នេះទៅទៀត អាជ្ញាធរចិនបានចាប់បោសសម្អាតក្រុមអ្នកប្រឆាំង នៅហុងកុង តាមរយៈ ការចាប់ខ្លួន ជាខ្សែ ក្រុមអ្នកគាំទ្រប្រជាធិបតេយ្យហុងកុង។ ក្រោមច្បាប់សន្តិសុខជាតិហុងកុង អាជ្ញាធរហុងកុង កាលពីថ្ងៃពុធ បាន ចាប់បញ្ជូនសកម្មជនប្រជាធិបតេយ្យ ហុងកុង ទៅតុលាការ ដែលនៅក្នុងនោះមានផងដែរ អតីតសមាជិកសភាហុងកុង មកពីគណបក្សប្រឆាំង។ ពួកគេ ដែលភាគច្រើនជាអ្នកទាមទារសិទ្ធិសេរីភាព ឲ្យប្រជាជនហុងកុង បានរងការចោទប្រកាន់ថា បានរៀបចំការបោះឆ្នោត ដោយខុសច្បាប់ កាលពីឆ្នាំ ២០២០។ ត្រូវដឹងថា ដោយសារអស្ថិរភាពនយោបាយនៅហុងកុង និងដោយសារចង់ធ្វើកំណែទម្រង់ការបោះឆ្នោតនៅ ហុងកុង រដ្ឋអំណាចចិនបានសម្រេច លុបចោលការបោះឆ្នោត នៅ ២០២០ និងលើកមកធ្វើនៅ ខែកញ្ញាឆ្នាំនេះវិញ។
ប៉ុន្តែ កាសែតក្នុងស្រុកចិន ដែលបានស្រង់សំដីរបស់មន្រ្តីចិន បានផ្សាយថា ការបោះឆ្នោត សភាហុងកុង នឹងត្រូវលើក បន្ត ១ឆ្នាំទៀត ទៅធ្វើនៅ ឆ្នាំក្រោយ ពោលគឺនៅក្រោយ ការបង្កើតច្បាប់ រៀបចំ ប្រព័ន្ធបោះឆ្នោតថ្មីនៅ ហុងកុង។
ចិនបង្កើនថវិកាកងទ័ព សម្រាប់ឆ្នាំ ២០២១
ក្រៅតែពីបញ្ហាហុងកុង រដ្ឋាភិបាលចិន តាមរយៈរដ្ឋមន្រ្តីការពារជាតិបានប្រកាសនៅថ្ងៃសុក្រនេះ ពី ការបង្កើនថវិកាសម្រាប់កងទ័ពជាតិចិន បន្ថែមទៀត។ ថវិកាកងទ័ពចិន នៅឆ្នាំ ២០២១ នឹងត្រូវបង្កើន ប្រមាណ ៦,៨% គឺកើនឡើងបន្តិច បើប្រៀបធៀបនឹងឆ្នាំ ២០២០ ដែលមានប្រមាណ ៦,៦%។ ការណ៍នេះនឹងធ្វើឲ្យថវិកាសម្រាប់កងទ័ពចិនទាំងមូល សម្រាប់ឆ្នាំ ២០២១ នឹងមានប្រមាណ ២០៩ពាន់លានដុល្លារ។ ស្តាប់ទៅច្រើន ប៉ុន្តែ ចំនួននេះនៅតែតិច បើប្រៀបធៀបនឹងអាមេរិក ដែលមានថវិកាកងទ័ព ដល់ទៅជាង ៧០០ពាន់លានដុល្លារឯណោះ។
ទីក្រុងប៉េកាំងបាននិយាយការពារខ្លួនថា ខ្លួន បង្កើនថវិកាកងទ័ព នេះ ដោយយោងទៅលើកំណើនសេដ្ឋកិច្ចក្នុងស្រុក ពោល គឺមិនមែនដើម្បី ពង្រឹងកម្លាំងទ័ពដើម្បី ធ្វើបាប អ្នកដទៃនោះទេ។ នៅថ្ងៃសុក្រនេះ នាយករដ្ឋមន្រ្តី ចិន លោកលី ឃឺឈាំង ផ្ទាល់បានប្រកាសថា កំណើនសេដ្ឋកិច្ចចិន នៅ ឆ្នាំ ២០២១ អាចមានប្រមាណ ជាង ៦%។ អ្នកជំនាញវាយតម្លៃថា កំណើនសេដ្ឋកិច្ចចិន អាចខ្ពស់ជាងនេះ ព្រោះថា ខុសប្លែកពីប្រទេសដទៃនៅក្នុងពិភពលោក ដោយរួមទាំងអាមេរិក និងអឺរ៉ុប ផង ចិនជាប្រទេសកម្រដែលមានកំណើនសេដ្ឋកិច្ច នៅក្នុងសម័យកូវីដ។
ទោះជាចិនអះអាងថា កងទ័ពចិនសម្រាប់តែការពារ ខ្លួន គឺគ្មានបំណងវាយប្រហារទៅលើអ្នកផ្សេង ប៉ុន្តែ គេជឿថា ចិនបានបង្កើន ថវិកាកងទ័ពជាប្រចាំ រៀងរាល់ឆ្នាំ ដើម្បី ទី១ តាមឲ្យទាន់ ប្រទេសលោកខាងលិច ជាពិសេស ក្នុងរឿងបង្កើនប្រាក់ខែកងទ័ព ដើម្បីទាក់ទាញអ្នកដែលមានទេពកោសល្យ។ ទី ២ ទៀត ចិនបានចំណាយលុយកាន់តែច្រើនដើម្បីទំនើបកម្មកងទ័ព ក្នុងរយៈពេលប៉ុន្មានឆ្នាំចុងក្រោយនេះ ដើម្បី ត្រៀមទប់ទល់អាមេរិក ដែលចេញមុខ កាន់តែខ្លាំង នៅក្នុងសំណុំរឿងតៃវ៉ាន់ និងសមុទ្រចិនខាងត្បូង ទប់ទល់ឥណ្ឌា ដែលឈ្លោះដែនដីគោក នៅភ្នំហិមាល័យ និងទប់ទល់ជាមួយជប៉ុន ដែលមានជម្លោះដីកោះ នៅ សមុទ្រចិនខាងកើត។
ក្នុងរឿងតៃវ៉ាន់ ចិនធ្លាប់គំរាមហើយថា នឹងធ្វើសង្រ្គាម វាយប្រហារដណ្តើមយកកោះតៃវ៉ាន់ មកគ្រប់គ្រង បើសិន តៃវ៉ាន់ ហ៊ានប្រកាសឯករាជ្យ។ ទោះជាឥលូវនេះ តៃវ៉ាន់ មិនទាន់និយាយអ្វីមែន ប៉ុន្តែ ចិនបានត្រៀមខ្លួន រួចហើយ ដើម្បីឈ្លានពានតៃវ៉ាន់ ដោយបានបញ្ជូន ជាញឹកញាប់ យន្តហោះចម្បាំងរបស់ខ្លួន ទៅហោះរំលោភចូលក្នុងដែនអាកាសតៃវ៉ាន់ ដែលជាហេតុធ្វើឲ្យខ្ទង់ចំណាយរបស់កងទ័ពចិន កើនឡើង កាន់តែខ្ពស់ដែរ។
ដើម្បីអាចប្រឈមនឹងអាមេរិកដែលមានសព្វាវុធទំនើបៗ ចិនបានធ្វើទំនើបកម្មកងទ័ពរបស់ខ្លួនដែរ ដោយបានបង្កើនការផលិតយន្តហោះចម្បាំង នាវាចម្បាំង និងដាក់ឲ្យប្រើនាវាដឹកឧទ្ធម្គាគចក្រពីរគ្រឿង កាលពីពេលថ្មីៗនេះ។ ហើយបន្ទាប់ពីផលិតបាននាវាដឹកយន្តហោះចម្បាំងដ៏ធំដោយខ្លួនឯង ចិនកំពុងសាងសង់នាវាដឹកយន្តហោះចម្បាំងមួយគ្រឿងទៀត ដើម្បីសរុបឲ្យបាន៣គ្រឿង។ គេមើលឃើញថា ដោយសារតែ ជម្លោះនៅសមុទ្រចិនខាងត្បូង និងតៃវ៉ាន់ គឺកងទ័ពជើងទឹកចិន ដែលស្រូបមួយភាគធំថវិកាកងទ័ពចិន ប៉ុន្តែ ទោះជាចិន ប្រឹង ជំរុញវិស័យកងទ័ពរបស់ខ្លួនប៉ុណ្ណា ចិននៅត្រូវការ យ៉ាងតិច ១០ឆ្នាំទៀត ដើម្បីអាចមានសមត្ថភាពផលិត សព្វាវុធ ទំនើប ដូចអាមេរិក ឬរុស្ស៊ី។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ