ជប៉ុនប្រារព្ធខួប ១០ឆ្នាំក្រោយ រងគ្រោះដោយសាររលកយក្សស៊ូណាមី នៅហ្វូគូស្ហ៊ីម៉ា
ចុះផ្សាយនៅថ្ងៃ៖
ស្តាប់ - ០៨:៤០
នៅថ្ងៃ១១ មីនានេះ គឺមានរយៈពេល ១០ឆ្នាំគត់ ដែលគ្រោះរញ្ជួយដី បង្កជារលកយក្សស៊ូណាមី វាយបោកទៅលើហ្វូគូស្ហ៊ីម៉ា តំបន់ភាគឦសានប្រទេសជប៉ុន។ នៅថ្ងៃនេះ ក៏ដូចជាទម្លាប់រៀងរាល់ឆ្នាំ រដ្ឋាភិបាល និងប្រជាជនជប៉ុនបានរៀបចំពិធីធ្វើបុណ្យ គោរព រំលឹក វិញ្ញាណក្ខន្ធជនរងគ្រោះ ដែលបានស្លាប់ និងបាត់ខ្លួន ជិត ១ម៉ឺន ៩ពាន់នាក់ នៅក្នុងគ្រោះមហន្តរាយរលកយក្សស៊ូណាមី កាលពី ១០ឆ្នាំមុន។ ក្រៅតែពីសម្លាប់ជីវិតមនុស្ស និងបំផ្លាញផ្ទះសម្បែង គ្រោះរលកយក្សស៊ូណាមី នៅបានបង្ក ផលវិបាកដ៏ធ្ងន់ធ្ងរមួយទៀតសម្រាប់ប្រជាជនជប៉ុន នោះ គឺសារធាតុវិទ្យុសកម្ម ដែលសាយភាយចេញពី រោងចក្រនុយក្លេអ៊ែរ ដែលរងការបំផ្លាញ ដោយសាររលកស៊ូណាមី។
នៅថ្ងៃនេះ ប្រទេសជប៉ុនប្រារព្ធខួប ១០ឆ្នាំ នៃគ្រោះមហន្តរាយ ដែលបង្កឡើងដោយរលកយក្សស៊ូណាមី។ នៅតំបន់ហ្វូគូស៊្ហីម៉ា ដែលរងគ្រោះ ខ្លាំងក្លាជាងគេដោយសាររលកយក្សស៊ូណាមី ទោះជាព្រឹត្តិការណ៍នេះបានកន្លងទៅផុត អស់១០ឆ្នាំមែន ប៉ុន្តែ វានៅតែដក់ជាប់ក្នុងការចងចាំមិនភ្លេចរបស់ប្រជាជនជប៉ុន…..
នៅក្នុងពិធីរំលឹកខួបនៅ ទីក្រុងតូក្យូ អធិរាជជប៉ុន ណារុហ៊ីតូ បានមានព្រះបន្ទូលថា កម្រិតខូចខាត បង្កដោយគ្រោះមហន្តរាយ នៅតែដិតជាប់ មិនភ្លេច ក្នុងការចងចាំរបស់ព្រះអង្គ។ ចំណែកនាយករដ្ឋមន្រ្តីជប៉ុន លោក យ៉ូស៊្ហីហ៊ីត ស៊ុហ្កា ថ្លែងថា ជប៉ុនធ្លាប់ជួបគ្រោះមហន្តរាយ ដែលចាត់ទុកជាវិបត្តិជាតិ។ ប៉ុន្តែ ប្រជាជនជប៉ុនបានឆ្លងកាត់ រាល់វិបត្តិ ដោយក្តីសង្ឃឹម និងក្លាហាន។
នៅថ្ងៃទី ១១ មីនា កាលពី១០ឆ្នាំមុន ប្រជាជន នៅភាគឦសានប្រទេសជប៉ុន បានរងគ្រោះដោយសារហេតុការណ៍ បី នៅក្នុងពេលតែមួយ គឺគ្រោះរញ្ជួយដី រលកយក្សស៊ូណាមី ហើយនិង គ្រោះថ្នាក់ផ្ទុះឆេះរោងចក្រនុយក្លេអ៊ែរនៅហ្វូគូស៊្ហីម៉ា។
នៅរសៀលថ្ងៃសុក្រ ទី ១១មីនា ឆ្នាំ ២០១១ គ្រោះរញ្ជួយដីខ្លាំង កម្រិត ៩មាត្រដ្ឋានរិចទែរ បានបង្កឲ្យមានរលកយក្សស៊ូណាមី ដែលនៅ កន្លែងខ្លះ មានកំពស់ដល់ទៅ ១៦ម៉ែត្រ។ រលកយក្សស៊ូណាមី បានវាយបោកបក់ បំផ្លាញទាំងស្រុងទីក្រុងមួយចំនួន ហើយនិងសម្លាប់មនុស្សជាង ១ម៉ឺន ៨ពាន់នាក់។ មនុស្សជាង ២ពាន់នាក់ បានបាត់ខ្លួន ទៅក្នុងទឹកសមុទ្រ ចំណែកមនុស្សជាង កន្លះលាននាក់ ត្រូវគេជម្លៀសចេញបន្ទាន់ ដោយសាររលកយក្សស៊ូណាមីផង និងដោយសារតែ ការផ្ទុះរោងចក្រនុយក្លេអ៊ែរ នៅ ហ្វូគូស៊្ហីម៉ា ដែលបង្កឡើងដោយរលកយក្សស៊ូណាមីផង។
នៅ ហ្វូគូស៊្ហីម៉ា រោងចក្រនុយក្លេអ៊ែរដ៏ទំនើប របស់ជប៉ុន ដែលធំសំខាន់មួយនៅក្នុងលោក អាចទប់ទល់ នឹងគ្រោះរញ្ជួយដី កម្រិត ៩មាត្រដ្ឋានរិចទែរ ប៉ុន្តែ វាមិនអាចទប់ទល់នឹងកម្លាំងវាយបោករបស់ទឹករលកសមុទ្រ នោះទេ។ ដោយសារកម្លាំងវាយបោក របស់រលកយក្សដែលមានកំពស់ ខ្ពស់ជាង ទំនប់ការពារ ដែលមានត្រឹម ៧ម៉ែត្រ ជញ្ជាំងរបស់រោងចក្រនុយក្លេអ៊ែរនៅ ហ្វូគូស៊្ហីម៉ា ត្រូវបំផ្លាញ ដោយធ្វើឲ្យ ទឹកសមុទ្រអាចចូលទៅជន់លិចបំផ្លាញ បណ្តាញទឹកត្រជាក់សម្រាប់ម៉ាស៊ីនប្រតិករ។
រោងចក្រនុយក្លេអ៊ែរនៅ ហ្វូគូស្ហ៊ីម៉ា បានឈប់ ភ្លាម មិនដំណើរការដោយស្វ័យប្រវត្តិ ដោយសារគ្រោះរញ្ជួយដី ប៉ុន្តែ ដោយសារតែបណ្តាញទឹកត្រជាក់ ខូច មិនអាចទៅបញ្ចុះកំដៅបាន ស្នូលរបស់ម៉ាស៊ីនប្រតិករចំនួន ៣បានចាប់រលាយ ធ្វើឲ្យផ្ទុះ ឆេះ បន្ទប់ ម៉ាស៊ីនប្រតិករ និងបញ្ចេញសារធាតុវិទ្យុសកម្ម ទៅក្នុងបរិយាកាស។
នៅក្រោយ រោងចក្រនុយក្លេអ៊ែរ ផ្ទុះឆេះ បញ្ចេញសារធាតុវិទ្យុសកម្ម នៅ ហ្វូគូស្ហ៊ីម៉ា រដ្ឋាភិបាលជប៉ុនបានជំលៀសចេញប្រជាជនជាង ១សែន ៥ម៉ឺននាក់ និងប្រកាសដាក់តំបន់ ជុំវិញ រោងចក្រ នុយក្លេអ៊ែរ ក្នុងរង្វង់ ២០គីឡូម៉ែត្រ ជាតំបន់ហាមឃាត់ ដើម្បី បើកប្រតិបត្តិការសម្អាតសារធាតុវិទ្យុសកម្ម។
ជប៉ុនបង្កើនសាងសង់មហាកំផែង ក្នុងសមុទ្រ
១០ឆ្នាំក្រោយ គ្រោះមហន្តរាយដោយសាររលកយក្សស៊ូណាមី ហ្វូគូស្ហ៊ីម៉ា បានក្លាយជាតំបន់ស្ងាត់ មិនសូវមានប្រជាជនរស់នៅ ប៉ុន្តែ ផ្ទុយទៅវិញ សំបូរតែអាងស្តុកទឹកដែលមានសារធាតុវិទ្យុសកម្ម ដែលគេបូមចេញពីរោងចក្រនុយក្លេអ៊ែរដែលផ្ទុះឆេះដោយសាររលកយក្សស៊ូណាមី។
រហូតមកដល់សព្វថ្ងៃនេះ ប្រជាជនជប៉ុន ជាង ១សែននាក់ នៅតែរស់នៅក្នុងនាមជាជនភៀសខ្លួន ក្នុងបន្ទុករបស់រដ្ឋាភិបាល។ នៅ ហ្វូគូស៊្ហីម៉ា រោងចក្រនុយក្លេអ៊ែរនៅតែ បិទមិនដំណើរការ។ អាជ្ញាធរ និងក្រុមហ៊ុន Tepco ដែលជាម្ចាស់រោងចក្រនុយក្លេអ៊ែរ នៅតែបន្តប្រតិបត្តិការសម្អាត បំបាត់សារធាតុវិទ្យុសកម្ម ក្នុងក្តីសង្ឃឹមថា ប្រជាជននឹងអាចសុខចិត្តវិលត្រលប់ទៅរស់នៅធម្មតាឡើងវិញ។
អាជ្ញាធរជប៉ុនជឿថា គេត្រូវរយៈពេល ៤០ឆ្នាំ ដើម្បីបញ្ចប់ការងារ សម្អាតសារធាតុវិទ្យុសកម្ម និង ដើម្បី រុះរើរោងចក្រនុយក្លេអ៊ែរ ដែលបានធ្វើឲ្យរដ្ឋាភិបាលជប៉ុន ចំណាយលុយអស់រាប់ម៉ឺនលានដុល្លាររួចហើយនោះ។ ក្រៅតែពីចំណាយលើការសំអាត សារធាតុវិទ្យុសកម្ម នៅក្នុងតំបន់ដែលមានផ្ទុះឆេះរោងចក្រនុយក្លេអ៊ែរ រដ្ឋាភិបាលជប៉ុនបានចំណាយផងដែរ មូលនិធិសាធារណ ប្រមាណ ១០ពាន់លានអឺរ៉ូ សម្រាប់បង្កើន ពង្រឹង មហាកំផែង ក្នុងសមុទ្រ សម្រាប់រលកយក្សស៊ូណាមី នៅថ្ងៃអនាគត។ ជប៉ុនធ្លាប់មានទំនប់ការពារពីរលកយក្សរួចហើយ ប៉ុន្តែរលកយក្សស៊ូណាមី ឆ្នាំ ២០១១ ដែលមានកំពស់ដល់ទៅ ១៦ម៉ែត្រ បានវាយបំផ្លាញខ្ទេចទំនប់ក្នុងទឹកសមុទ្ររបស់ជប៉ុន។
លើកនេះ មហាកំផែងរបស់ជប៉ុន ដើម្បីទប់ទឹករលកយក្សមានប្រវែងសរុប ៤៣០គីម៉ែត្រ មានកំពស់ យ៉ាងតិច ១៤ម៉ែត្រ និងត្រូវបានគូរសាងសង់ សាជាថ្មីដើម្បី អាចទប់ទល់នឹងរលកយក្ស។ សម្រាប់អាជ្ញាធរជប៉ុន មហាកំផែងនៅក្នុងសមុទ្រ នឹងមិនអាចជួយការពារ ១០០ភាគរយ ពីការវាយប្រហាររបស់រលកយក្សស៊ូណាមី នោះទេ ព្រោះថា គេមិនអាចមើលដឹងពីកំហឹងរបស់ធម្មជាតិនោះទេ។ ប៉ុន្តែ យ៉ាងហោចណាស់ មហាកំផែងក្នុងសមុទ្រ នឹងអាចឲ្យគេចំណេញពេល សម្រាប់ជំលៀស កុំឲ្យមានការខាតបង់ជីវិតប្រជាជន ដូចកាលពី១០ឆ្នាំមុន។
របាយការណ៍របស់អ្នកជំនាញអង្គការសហប្រជាជាតិ៖ សារធាតុវិទ្យុសកម្មមិនបានធ្វើករណីអ្នកកើតជំងឺមហារីកកើនឡើង នៅជប៉ុន
ទោះរដ្ឋាភិបាលអះអាងថា គេអាចត្រលប់ទៅរស់នៅតំបន់ហ្វូគូស្ហ៊ីម៉ា ប្រជាជនជប៉ុននៅតែ រារែក មិនត្រលប់ទៅរស់នៅវិញទេ ដោយសារខ្លាចសារធាតុវិទ្យុសកម្ម។ គេបារម្ភថា សារធាតុវិទ្យុសកម្មដែលលេចសាយភាយចេញពីរោងចក្រនុយក្លេអ៊ែរ ដែលរងបំផ្លាញដោយសាររលកយក្សស៊ូណាមី អាចប៉ះពាល់ដល់សុខភាព។ ប៉ុន្តែ អ្នកជំនាញរបស់អង្គការសហប្រជាជាតិវិញ បានរកឃើញថា គ្មានអ្នកណាកើតជំងឺមហារីក ដោយសាររងសារធាតុវិទ្យុសកម្មទេ។
តាមការសន្និដ្ឋានរបស់គណៈកម្មការស្រាវជ្រាវរបស់អង្គការសហប្រជាជាតិ ដែលបានចេញផ្សាយ របាយការណ៍របស់ខ្លួន នៅតែ២ថ្ងៃមុនខួប ១០ឆ្នាំ នៃគ្រោះមហន្តរាយនៅហ្វូគូស្ហ៊ីម៉ា ការសាយភាយសារធាតុវិទ្យុសកម្ម នៅក្រោយគ្រោះថ្នាក់ផ្ទុះឆេះរោងចក្រនុយក្លេអ៊ែរ នៅហ្វូគូស្ហ៊ីម៉ា មិនបានជះផលអាក្រក់លើសុខភាពនោះទេ។
គេហ៊ាននិយាយយ៉ាងដូច្នេះ ព្រោះថា នៅក្នុងរយៈពេល ១០ឆ្នាំមកនេះ គេគ្មានរកឃើញអ្នកណាម្នាក់ដែលស្លាប់ដោយសារសារធាតុវិទ្យសកម្មនោះទេ។ ក្នុងរយៈពេល ១០ឆ្នាំ មានមនុស្ស ៦នាក់ ក្នុងចំណោមមនុស្សជាង ២ម៉ឺន ៤ពាន់នាក់ ដែលធ្វើការនៅក្នុងបរិវេណបោសសម្អាតសារធាតុវិទ្យុសកម្ម ដែលកើតមានជំងឺមហារីក។ រដ្ឋាភិបាលជប៉ុនបានចាត់ទុកពួកគេជាអ្នកកើតជំងឺមហារីកដោយសារការងារ ប៉ុន្តែ សម្រាប់ក្រុមអ្នកជំនាញរបស់អង្គការសហប្រជាជាតិ ករណីអ្នកមានជំងឺមហារីក មានកម្រិតធម្មតា ដូចនៅមុន ពេលមានផ្ទុះឆេះរោងចក្រនុយក្លេអ៊ែរ។ ការណ៍នេះធ្វើឲ្យគេជឿថា សារធាតុវិទ្យុសកម្ម មិនមែនជាអ្នកធ្វើឲ្យមនុស្សកើតជំងឺមហារីក នោះទេ។
មួយវិញទៀត បើតាមអ្នកជំនាញ ប្រជាជនជប៉ុន នៅហ្វូគូស្ហ៊ីម៉ាបានរងតិចតួច ដោយសារសារធាតុវិទ្យុសកម្ម នៅត្រង់ថា នៅពេលផ្ទុះ ឆេះម៉ាស៊ីនប្រតិករទាំងបីរបស់រោងចក្រនុយក្លេអ៊ែរ សារធាតុវិទ្យុសកម្មបានហោះឡើងទៅលើ នឹងត្រូវខ្យល់បក់ផាត់ទៅក្នុងទឹកសមុទ្រ។ ប្រជាជនជប៉ុន វិញ ត្រូវបានគេជម្លៀសភ្លាមៗ ចេញពីតំបន់ដែលអាចមានសាយភាយសារធាតុវិទ្យុសកម្ម។
ដោយសារតែ រងសារធាតុវិទ្យុសកម្មតិចតួច ហើយសារធាតុវិទ្យុសកម្មភាគច្រើន ត្រូវធ្លាក់ចូលទៅក្នុងទឹកសមុទ្រ ឬត្រូវ គេបូមស្តុកទុក ក្នុងអាងយ៉ាងដូច្នេះ តំបន់ហ្វូគូស្ហ៊ីម៉ា មិនសូវជាមានសារធាតុកម្មគ្រោះថ្នាក់ ខ្លាំង ដូចនៅពេលផ្ទុះឆេះរោងចក្រនៅ ឆែណូបីលក្នុងប្រទេសអ៊ុយក្រែននោះទេ។
អនាគតខ្មៅងងឹតសម្រាប់វិស័យរោងចក្រនុយក្លេអ៊ែរជប៉ុន?
ដោយសារតែគ្រោះមហន្តរាយរលកយក្សស៊ូណាមីលើកនេះ ជប៉ុនបានបញ្ឈប់សកម្មភាពរោងចក្រនុយក្លេអ៊ែររបស់ខ្លួនសឹងទាំងស្រុង។ សព្វថ្ងៃនេះ មានតែរោងចក្រ នុយក្លេអ៊ែរចំនួន ៩ប៉ុណ្ណោះ ដែលនៅបន្តដំណើរការ គឺតិចជាង ចំនួន ៥៤ ដែលជប៉ុនធ្លាប់មាន នៅមុនឆ្នាំ ២០១១។ រោងចក្រនុយក្លេអ៊ែរចំនួន ២៤ ត្រូវរដ្ឋាភិបាល ចេញក្រឹត្យ អនុញ្ញាតឲ្យគេរុះរើ បិទចោលទៅវិញ ចំណែករោងចក្រដែលនឹងអាចបើកឡើងវិញ នៅថ្ងៃមុខត្រូវប្រឈមនឹងការត្រួតពិនិត្យ សើរើ ប្រព័ន្ធការពារគ្រោះថ្នាក់ឡើងវិញ ដើម្បី ជៀសវាងករណី នៅហ្វូគូស្ហ៊ីម៉ា។
គោលដៅរបស់រដ្ឋាភិបាល គឺត្រូវការរោងចក្រនុយក្លេអ៊ែរសម្រាប់ផលិតផ្គត់ផ្គង់អគ្គិសនី ប្រមាណ ២០% ពីពេលនេះ ដល់ឆ្នាំ ២០៣០។ នៅជប៉ុន ដោយសារតែគ្រោះថ្នាក់ ផ្ទុះឆេះរោងចក្រនុយក្លេអ៊ែរនៅហ្វូគូស្ហ៊ីម៉ា ចលនាប្រឆាំងនឹងដំណើរវិលត្រលប់ទៅប្រើថាមពលបានមកពីនុយក្លេអ៊ែរមានកាន់តែច្រើន មិនថា ក្នុងចំណោមប្រជាជន និងរដ្ឋាភិបាល។ ក្រុមហ៊ុនជប៉ុនមួយចំនួន ដូចជា Tepco ជាដើមបានបែរទុនវិនិយោគរបស់ខ្លួនប្រមាណ ១៦ពាន់លានអឺរ៉ូ សម្រាប់ថាមពលកកើតថ្មី ដែលតាមពិត ត្រូវការចំណាយលុយតិច ហើយ ជាងរោងចក្រនុយក្លេអ៊ែរ។ ក្រុមហ៊ុន Toshiba Hitachi ជាដើម បានសម្រេចបោះបង់ចោលគម្រោងសាងសង់រោងចក្រនុយក្លេអ៊ែរនុយក្លេអ៊ែរ និងបានបែរមកចង់អភិវឌ្ឍគម្រោងបៃតងវិញម្តង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ