ហេតុអ្វីប្រជាជនអឺរ៉ុបធ្វើបាតុកម្មប្រឆាំងវិធានការបិទខ្ទប់ដែលជួយទប់ស្កាត់ការឆ្លងជំងឺកូវីដ១៩?
ចុះផ្សាយនៅថ្ងៃ៖
ស្តាប់ - ០៧:៤១
ពីបារាំង អាល្លឺម៉ង់ អង់គ្លេស ហូឡង់ ស្វ៊ីស រហូតដល់អូទ្រីស ប៊ុលហ្ការី បាតុកម្មប្រឆាំងវិធានការបិទខ្ទប់ប្រទេសត្រូវបានរៀបចំឡើង នៅតាមបណ្តាប្រទេសអឺរ៉ុប ជាច្រើន កាលពី ថ្ងៃសៅរ៍ទី ២០មីនា ២០២១។ នៅអង់គ្លេស ប៉ូលិសបានចាប់ឃាត់ខ្លួន បាតុករ ៣៣នាក់ ក្នុងបទចោទប្រកាន់ រំលោភច្បាប់ ដែលបានហាមមិនឲ្យមានការជួបជុំមនុស្សច្រើន ដើម្បីជៀសវាងការឆ្លងរាលជំងឺកូវីដ១៩។ បាតុកម្មប្រឆាំងវិធានការបិទខ្ទប់ប្រទេសបានកើតឡើង នៅចំពេលដែលប្រទេសអឺរ៉ុបជាបន្តបន្ទាប់ ដូចជាអ៊ីតាលី អេស្ប៉ាញ បារាំង និងប៉ូឡូញ ជាដើមបានចាប់ផ្តើមបិទខ្ទប់ប្រទេសសាជាថ្មី ដើម្បីជៀសវាង រលកទី៣នៃជំងឺកូវីដ១៩។
នៅថ្ងៃសៅរ៍ម្សិលមិញ ប្រជាជនអឺរ៉ុបរាប់ម៉ឺននាក់ បានធ្វើបាតុកម្ម ប្រឆាំងវិធានការបិទខ្ទប់ប្រទេស ដោយសារវិបត្តិកូវីដ។ នៅអាល្លឺម៉ង់ ប៉ូលិសបានប្រើផ្សែងម្រេច និងកាណុងទឹកដើម្បីបាញ់បំបែក ក្រុមបាតុករ ចំណែកនៅអង់គ្លេស ជាទីដែលប្រជាជនរាប់ពាន់នាក់ធ្វើបាតុកម្មប្រឆាំងនឹងវិធានការរឹតបន្តឹងរបស់រដ្ឋាភិបាល ប៉ូលិសបានចាប់ឃាត់ខ្លួន មនុស្ស៣៣នាក់។
បាតុកម្មស្រុះគ្នានៅបណ្តាប្រទេសអឺរ៉ុប ដើម្បីប្រឆាំង នឹងវិធានការបិទខ្ទប់ នេះ ស្តែងឲ្យឃើញពីការនឿយណាយ របស់ប្រជាជនអឺរ៉ុប ដែលលែងជឿទុកចិត្តសមត្ថភាពរបស់រដ្ឋាភិបាលខ្លួន ក្នុងការគ្រប់គ្រង ដោះស្រាយវិបត្តិកូវីដ តទៅទៀត។ មួយវិញទៀត បាតុកម្មប្រឆាំង នឹងវិធានការបិទខ្ទប់ប្រទេស ត្រូវបានរៀបចំឡើងនៅចុងសប្តាហ៍នេះ គឺ អាចជាសារ ដាក់សម្ពាធទៅលើរដ្ឋាភិបាល ផងដែរ ដើម្បី ឲ្យរដ្ឋាភិបាលគិតគូរឡើងវិញ ពីសុខាមាលភាព មុខជំនួញ ហើយនិងសិទ្ធិរស់នៅរបស់ប្រជាជនដែលរងប៉ះពាល់ ដោយសារតែវិធានការបិទខ្ទប់ប្រទេសយ៉ាងដូច្នេះ។
ជាក់ស្តែង បាតុកម្មប្រឆាំងវិធានការបិទខ្ទប់ នៅអាល្លឺម៉ង់ បានផ្ទុះឡើង នៅមុនពេលដែល រដ្ឋាភិបាលអាល្លឺម៉ង់ កំពុង ត្រៀមប្រជុំ នៅថ្ងៃចន្ទ ដើម្បី សម្រេចថា តើនឹងរឹតបន្តឹង វិធានការបិទខ្ទប់ បន្ថែមទៀត ដែរឬទេ ព្រោះថា អាល្លឺម៉ង់ បើទោះជាប្រទេសគំរូនាំមុខគេ ខាងមានចំនួនអ្នកឆ្លងតិច បើប្រៀបធៀបនឹងបារាំង អ៊ីតាលី គឺនៅតែប្រឈមនឹងការកើនឡើង នៃចំនួនអ្នកឆ្លងថ្មី។ ឧទាហរណ៍ គិតត្រឹមថ្ងៃសុក្រអាល្លឺម៉ង់ មានអ្នកឆ្លងកូវីដ ថ្មី ជាង ១៦ ០០០នាក់ ក្នុងមួយថ្ងៃ និងមានអ្នកស្លាប់ ២០៧ ក្នុងមួយថ្ងៃដែរ។
សម្រាប់ប្រជាជនអាល្លឺម៉ង់ ដែលបានរស់នៅក្រោមវិធានការបិទខ្ទប់ ប្រទេស ៣ខែមកហើយ គេមិនអាចទទួលយកបានទៀតទេ ការរឹតបន្តឹងវិធានការបិទខ្ទប់ប្រទេសនោះ។ ជាង ៣ខែមកនេះ សាលារៀនបានបិទទ្វារ ហាងទំនិញ ភោជនីយដ្ឋាន កន្លែងកំសាន្តត្រូវបិទទ្វារ។
ងាកមកមើលអង់គ្លេសវិញ ដែលកំពុងចាប់បានទទួលផលផ្លែផ្កាបណ្តើរៗ ពីយុទ្ធនាការចាក់វ៉ាក់សាំង ប្រឆាំងកូវីដ រដ្ឋាភិបាលអង់គ្លេស កំពុងត្រៀមបើកប្រទេសបន្តិចម្តងៗឡើងវិញ នៅ ចុងមីនានេះ ប៉ុន្តែ ប្រជាជនអង់គ្លេស ដែលរស់នៅក្រោមវិធានការបិទខ្ទប់ប្រទេសជាច្រើនខែមកហើយ គឺលែងទ្រាំចាំតទៅទៀតបាន។
មិនមែនគ្រប់ប្រជាជនអឺរ៉ុប ទាំងអស់ប្រឆាំង វិធានការបិទខ្ទប់នោះទេ។ នៅក្នុងបណ្តាប្រទេសអឺរ៉ុប ដូចជាអាល្លឺម៉ង់ អូទ្រីស ហូឡង់ អង់គ្លេស ជាដើម អ្នកដែលចេញធ្វើបាតុកម្មលើកនេះ ភាគច្រើនជាក្រុមស្តាំ ក្រុមឆ្វេងនិយមជ្រុល ក្រុមប្រឆាំងវ៉ាក់សាំង ហើយនិង ក្រុមដែលដើរផ្សព្វផ្សាយថា ជំងឺកូវីដជារឿងដែលគេប្រឌិតឡើង តែប៉ុណ្ណោះ។
យុទ្ធនាការចាក់វ៉ាក់សាំង អឺរ៉ុប យឺតយ៉ាវ នៅក្រោយដាច់ឆ្ងាយ អង់គ្លេសនិងអាមេរិក
ទោះជាវ៉ាក់សាំងជាជម្រើសតែមួយ ដើម្បីងើបចេញពីវិបត្តិកូវីដ ប៉ុន្តែ ប្រទេសនៅអឺរ៉ុបនៅតែយឺតយ៉ាវ នៅក្នុងយុទ្ធនាការចាក់វ៉ាក់សាំង។ យឺតយ៉ាវ ព្រោះថា អឺរ៉ុបមិនបានទទួលវ៉ាក់សាំង គ្រប់គ្រាន់ តាមការកម្ម៉ង់ទៅក្រុមហ៊ុនផលិតវ៉ាក់សាំង មិនថា ក្រុមហ៊ុនអាមេរិកាំង Pfizer ឬក្រុមហ៊ុនអង់គ្លេស AstraZeneca។ ក្រុមហ៊ុនទាំងពីរធ្លាប់បានប្រាប់ភាគីអឺរ៉ុបថា វ៉ាក់សាំង ដែលត្រូវបញ្ជូនមកឲ្យអឺរ៉ុប នឹងត្រូវកាត់បន្ថយ យ៉ាងតិច ៤០% ដោយសារតែមានបញ្ហាបច្ចេកទេស ដែលធ្វើឲ្យគេមិនអាចផលិតទាន់ តាមតម្រូវការ។ ឧទាហរណ៍ ក្រុមហ៊ុន AstraZeneca បានប្រកាសថា ខ្លួនបញ្ជូនឲ្យអឺរ៉ុប វ៉ាក់សាំង ៣០លានដូស នៅ ខែមេសា ពោលគឺថយអស់ពាក់កណ្តាល។
អឺរ៉ុបបានទទួលវ៉ាក់សាំង មិនគ្រប់តាមចំនួន ដែលខ្លួនបានកុម្ម៉ង់ ដែលជាហេតុធ្វើឲ្យអឺរ៉ុបស្ថិតនៅក្រោយគេ ក្រោយ អង់គ្លេស និងអាមេរិក ដែលកំពុងបោះពួយលឿនស្លេវ ក្នុងរឿងចាក់វ៉ាក់សាំងបង្ការកូវីដ ដល់ប្រជាជនរបស់ខ្លួន។ អង់គ្លេសមានប្រជាជនជាង ២៦លាននាក់ ពោលគឺ៤០ភាគរយ នៃប្រជាជនដែលបានទទួលវ៉ាក់សាំងបង្ការកូវីដ។ អាមេរិក វិញ មានអ្នកទទួលចាក់វ៉ាក់សាំង ជាង ៧៦លាននាក់ ស្មើនឹង ២៣%នៃប្រជាជនសរុប។ គេឃើញមានគម្លាតខ្លាំងមែនទែន រវាងអឺរ៉ុប ហើយនិងអង់គ្លេស ឬអាមេរិក។ ជាក់ស្តែង នៅបារាំង មានតែប្រជាជនប្រមាណ ៧%ដែលបានទទួលចាក់វ៉ាក់សាំង។
អង់គ្លេស និងអាមេរិក មានចំនួនអ្នកចាក់វ៉ាក់សាំង ច្រើនជាងគេ ព្រោះថា ប្រទេសទាំងពីរ នៅតែបន្ត ចាក់វ៉ាក់សាំង មុនគេ ហើយប្រទេសទាំងពីរ មិនដែលជួបបញ្ហាខ្វះវ៉ាក់សាំងនោះទេ។ មិនដែលខ្វះវ៉ាក់សាំង ព្រោះ អង់គ្លេស និងអាមេរិក ជាប្រទេសផលិតវ៉ាក់សាំង និងជាអ្នកដែលបានវិនិយោគច្រើនជាងគេលើការស្រាវជ្រាវរកវ៉ាក់សាំង។ ជាក់ស្តែង នៅពេលអឺរ៉ុបចំណាយ ប្រមាណ តែ ៣ពាន់លានអឺរ៉ូ សម្រាប់ ការស្រាវជ្រាវនិងផលិតវ៉ាក់សាំង អាមេរិកបានចំណាយ ប្រាក់ ២០ពាន់លាន ចំណែក អង់គ្លេស ១០ពាន់លានដុល្លារ។
មួយវិញទៀត នៅពេល ក្រុមហ៊ុនផ្គត់ផ្គង់វ៉ាក់សាំង មិនអាចបញ្ជូនវ៉ាក់សាំងតាមចំនួន តាមការគ្រោងហើយនោះ យុទ្ធនាការចាក់វ៉ាក់សាំងនៅ អឺរ៉ុប យឺតយ៉ាវ មួយកម្រិតទៀត ដោយសារតែនយោបាយផ្អាក បន្តបន្ទាប់គ្នា មិនចាក់វ៉ាក់សាំង AstraZeneca នៅក្រោយ គេរកឃើញមានករណីអ្នកចាក់វ៉ាក់សាំង មួយចំនួន កើតមានជំងឺកំណកដុំឈាម ក្នុងសរសៃឈាម ក្នុងទឹកដីអឺរ៉ុប។
ប្រធានគណៈកម្មការអឺរ៉ុបបានព្រមានសាជាថ្មី នឹងបិទខ្ទប់ មិនឲ្យក្រុមហ៊ុនAstraZeneca នាំវ៉ាក់សាំង ចេញពី ទឹកដីអឺរ៉ុប
សហភាពអឺរ៉ុបនឹងមិនឈប់និយាយគំរាមក្រុមហ៊ុន AstraZeneca ដរាប ក្រុមហ៊ុនអង់គ្លេស មិនព្រមផ្គត់ផ្គង់វ៉ាក់សាំងតាមកិច្ចសន្យា។ នៅក្នុងកាលៈទេសៈដែលខ្លួនត្រូវការខ្លាំងវ៉ាក់សាំង ដើម្បីប្រយុទ្ធប្រឆាំងនឹងជំងឺរាតត្បាតកូវីដ សហភាពអឺរ៉ុប កាន់តែតឹងចិត្ត ខ្លាំង នៅពេលឃើញ ការកុម្ម៉ង់វ៉ាក់សាំងរបស់ខ្លួន យឺតយ៉ាវ។
នៅថ្ងៃសុក្រ ប្រមុខគណៈកម្មការអឺរ៉ុប លោកស្រី អ៊ុយសូឡា វ៉ុនឌែរ ឡេយ៉ែន Ursula von der Leyen បានព្រមានសាជាថ្មី អឺរ៉ុប នឹងអាចហាមឃាត់មិនឲ្យមានការនាំចេញវ៉ាក់សាំង ផលិតនៅទឹកដី អឺរ៉ុប ទៅកាន់ប្រទេសផ្សេង ក្រៅទឹកដីអឺរ៉ុប បើសិនក្រុមហ៊ុនAstraZeneca នៅតែមិនអាចគោរពតាមកិច្ចសន្យា ក្នុងការផ្គត់ផ្គង់វ៉ាក់សាំង ឲ្យទាន់ពេលវេលា និងគ្រប់ចំនួន។ នៅឆ្នាំមុន ក្រុមហ៊ុនAstraZeneca បានសន្យាបញ្ជូនវ៉ាក់សាំង ៣៦០លានដូស សម្រាប់ភាគីអឺរ៉ុប ឲ្យបានមុនពាក់កណ្តាលឆ្នាំនេះ។ ប៉ុន្តែ នៅ សប្តាហ៍មុន AstraZeneca និយាយថា គេអាចផ្តល់ឲ្យអឺរ៉ុបតែ ១០០លានដូសតែប៉ុណ្ណោះ។ ដោយសារតែ AstraZeneca អាចបញ្ជូនវ៉ាក់សាំង មិនដល់ ពាក់កណ្តាល នៃចំនួនកុម្ម៉ង់ អឺរ៉ុបកាន់តែ ក្តៅក្នុងចិត្ត និងរករឿង ក្រុមហ៊ុន AstraZeneca មិនឈប់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ