ហុងកុងប្រាប់ប្រទេសផ្សេង កុំឲ្យទទួលស្គាល់ « លិខិតឆ្លងដែននាយសមុទ្រអង់គ្លេស »
ចុះផ្សាយនៅថ្ងៃ៖
ស្តាប់ - ០៨:០៣
សង្រ្គាមពាក្យសំដី ផ្នែកការទូត កំពុងតែកើតមានឡើង រវាងរដ្ឋាភិបាលអង់គ្លេ និង រដ្ឋបាលហុងកុង បន្ទាប់ពីរដ្ឋបាលហុងកុង បានជូនដំណឹងទៅបណ្តាប្រទេសមួយចំនួន ថាត្រូវឈប់ទទួលស្គាល់លិខិតឆ្លងដែននាយសមុទ្ររបស់អង់គ្លេស ដែលប្រជាជនហុងកុងមួយចំនួនប្រើប្រាស់ ជាឯកសារផ្លូវការ។ រដ្ឋាភិបាលអង់គ្លេស បានប្រតិកម្មភ្លាមនៅថ្ងៃសុក្រនេះ ដោយបានលើកឡើងថា រដ្ឋបាលហុងកុងគ្មានសិទ្ធិអំណាចអ្វី មកហាមឃាត់ប្រទេសណាមួយ មិនឲ្យទទួលស្គាល់លិខិតឆ្លងដែន ដែលចេញដោយអាជ្ញាធរអង់គ្លេសនោះទេ។
លិខិតឆ្លងដែនអង់គ្លេស សម្រាប់ប្រជាជនហុងកុង
លិខិតឆ្លងដែននាយសមុទ្ររបស់អង់គ្លេស ហៅជាភាសាអង់គ្លេស BNO British National Overseas Passport គឺជាឯកសារធ្វើដំណើរផ្លូវការមួយប្រភេទ ដែលត្រូវបានបង្កើតឡើង តាំងតែពីឆ្នាំ១៩៨៧ សម្រាប់ប្រជាជនហុងកុង។ កាលណោះ ហុងកុង គឺជាដែនដីនាយសមុទ្ររបស់អង់គ្លេស ហើយប្រជាជនហុងកុង គឺត្រូវអាជ្ញាធរអង់គ្លេសទទួលស្គាល់ថា គឺជាប្រជាជនអង់គ្លេសដែរដែរ តែនៅឯនាយសមុទ្រ។ លុះក្រោយ អង់គ្លេសប្រគល់ដែនដីហុងកុង ទៅឲ្យចិននៅឆ្នាំ១៩៩៧ ក៏អង់គ្លេសនៅតែបន្ត ធ្វើលិខិតឆ្លងដែនពិសេសនេះ ជូនប្រជាជនហុងកុងដែរ ឲ្យតែអ្នកនោះ កើតនៅដែនដីហុងកុង នៅមុនថ្ងៃទី ១កក្កដា ឆ្នាំ១៩៩៧។
លិខិតឆ្លងដែននេះ ទទួលបានការពេញនិយមប្រើប្រាស់ណាស់ សម្រាប់ប្រជាជនហុងកុង ចំនួនប្រមាណជាង៣លាននាក់ ព្រោះគេអាចធ្វើដំណើរ និងស្នាក់នៅអង់គ្លេស រយៈពេល៦ខែ ដោយមិនចាំបាច់មានទិដ្ឋាការ។ ក៏ប៉ុន្តែ ក្រោយមក ប្រជាជនហុងកុង ជាង២លាននាក់ មិនបានពន្យា ឬធ្វើលិខិតិឆ្លងដែននេះថ្មីទេ។ បច្ចុប្បន្ន បើតាមតួលេខ គឺមានប្រជាជនហុងកុង ចំនួនប្រមាណ៣៥ម៉ឺននាក់ ដែលកាន់លិខិតឆ្លងដែននេះ។ ក៏ប៉ុន្តែ ប្រជាជនហុងកុង ជាង២លាននាក់ផ្សេងទៀត ឲ្យតែកើតមុនថ្ងៃទី១កក្កដា ១៩៩៧ គឺសុទ្ធតែអាចសុំលិខិតឆ្លងដែននេះបាន។
យ៉ាងណាមិញ ចាប់ពីឆ្នាំ២០១៤ ក្រោយមានចលនាបាតុកម្មនៅហុងកុង គេសង្កេតឃើញ ប្រជាជនហុងកុងកាន់តែច្រើន ដែលបានទៅដាក់ពាក្យដើម្បីទទួលបានលិខិតឆ្លងដែនពិសេសរបស់អង់គ្លេសនេះ ដើម្បីងាយស្រួលធ្វើដំណើរចេញពីហុងកុង។ គ្រាន់តែចន្លោះ ពីខែកក្កដា ដល់ខែមករាដើមឆ្នាំនេះ អាជ្ញាធរអង់គ្លេសបានបញ្ជាក់ថាមានប្រជាជនហុងកុង ប្រមាណ៧០០០នាក់ បានធ្វើដំណើរទៅរស់នៅអង់គ្លេស ជាមួយនឹងលិខិតឆ្លងដែននេះ។ ហើយនៅចុងខែមករា ដើមឆ្នាំនេះ រដ្ឋាភិបាលអង់គ្លេស បានធ្វើកំណែទម្រង់បន្ថែម ដោយអនុញ្ញាតឲ្យប្រជាជនហុងកុង ដែលកាន់លិខិតវឆ្លងដែនពិសេសនេះ អាចស្នាក់នៅ និងធ្វើការនៅអង់គ្លេស រយៈពេល៥ឆ្នាំ ហើយបន្ទាប់មកទៀត អាចដាក់ពាក្យសុំសញ្ជាតិអង់គ្លេសបាន។
ហុងកុងហាមប្រទេស១៤កុំឲ្យទទួលស្គាល់លិខិតឆ្លងដែន BNO
នៅក្រោយពេលដែលរដ្ឋាភិបាលអង់គ្លេសធ្វើកំណែទម្រង់ អនុញ្ញាតឲ្យអ្នកកាន់លិខិតឆ្លងដែននេះ អាចរស់នៅនឹងធ្វើការនៅអង់គ្លេស៥ឆ្នាំ ព្រមទាំងសុំសញ្ជាតិបានផងនោះ អាជ្ញាធរចិនដីគោក បានចេញវិធានការឆ្លើយតបរួចទៅហើយ ដោយឈប់ទទួលស្គាល់លិខិតឆ្លងដែននាយសមុទ្ររបស់អង់គ្លេស ចាប់ពីថ្ងៃទី៣១មករាមក។ មានន័យថាប្រជាជនហុងកុង ដែលចង់ធ្វើដំណើរចូលហុងកុង និងចូលចិនដីគោក គឺត្រូវតែប្រើលិខិតឆ្លងដែនហុងកុង។
ឥឡូវចិនកំពុងតែរកវិធីថ្មីបន្ថែមទៀត ដើម្បីរារាំងអ្នកកាន់លិខិតឆ្លងដែនពិសេសរបស់អង់គ្លេសនេះ។ ហេតុដូច្នេះហើយ បានជារដ្ឋបាលហុងកុង បានធ្វើលិខិតមួយ កាលពីថ្ងៃព្រហស្បតិ៍ទី២៥មីនា ផ្ញើទៅកាន់ស្ថានកុងស៊ុល របស់ប្រទេសចំនួន១៤ នៅហុងកុង ថាឲ្យឈប់ទទួលស្គាល់លិខិតឆ្លងដែននាយសមុទ្ររបស់អង់គ្លេស។ ប្រទេសទាំង១៤នោះ គឺមាន ដូចជា អូស្ត្រាលី អូទ្រីស កាណាដា បារាំង អាល្លឺម៉ង់ ហុងគ្រី អៀរឡង់ អ៊ីតាលី ជប៉ុន កូរ៉េខាងត្បូង ហូឡង់ ញូហ្សឺលែន ស្វ៊ីស និង អង់គ្លេសនេះឯង។
អាជ្ញាធរហុងកុង មានបំណងហាមឃាត់ កុំឲ្យប្រជាជនហុងកុង ប្រើលិខិតឆ្លងដែនពិសេសនេះ ទៅសុំទិដ្ឋាការធ្វើដំណើរ ទៅធ្វើការនៅតាមប្រទេសទាំង១៤នេះ។ អ្នកនាំពាក្យនាយកដ្ឋានការងាររបស់ហុងកុងបានលើកឡើងថា អ្នកដែលចង់ទៅធ្វើការនៅតាមប្រទេសទាំង១៤ ដែលបានចុះកិច្ចព្រមព្រៀងផ្នែកការងារ ជាមួយដែនដីហុងកុង គឺត្រូវតែប្រើលិខិតឆ្លងដែនរបស់ហុងកុង។
អង់គ្លេស៖ ហុងកុងគ្មានសិទ្ធិបញ្ជាគេ មិនឲ្យទទួកស្គាល់លិខិតឆ្លងដែនអង់គ្លេស!
ក្រសួងការបរទេសអង់គ្លេស បានប្រតិកម្មភ្លាមនៅព្រឹកថ្ងៃសុក្រទី២៦មីនា ថា អាជ្ញាធរហុងកុង គ្មានសិទ្ធិអី មកបញ្ជា ដាក់កំហិត ឲ្យប្រទេសផ្សេង ឈប់ទទួលស្គាល់លិខិតឆ្លងដែនរបស់អង់គ្លេសនោះទេ។ ប្រទេសទាំង១៤នេះ គេចង់ទទួលស្គាល់ លិខិតឆ្លងដែនណាមួយ ឯកសារផ្លូវការ គឺសិទ្ធិរបស់គេ រដ្ឋបាលហុងកុងគ្មានសិទ្ធិអី មកបង្ខំឲ្យគេ ទទួលស្គាល់តែលិខិតឆ្លងដែនហុងកុងនោះទេ។
ជាក់ស្តែង មន្ត្រីទូតបរទេសម្នាក់ នៅហុងកុង បាននិយាយប្រាប់អ្នកយកព័ត៌មានបារាំង AFP ថា លិខិតរបស់រដ្ឋាបាលហុងកុងនេះ នឹងគ្មានអំណាចអ្វីមកចាប់បង្ខំគេទេ។ ពោលគឺស្ថានកុងស៊ុលប្រទេសទាំង១៤នេះ នឹងនៅតែបន្តទទួលស្គាល់លិខិតឆ្លងដែននាយសមុទ្រអង់គ្លេស ដែលប្រជាជនហុងកុងប្រើប្រាស់។
ក្រសួងការបរទេសអង់គ្លេស បានបញ្ជាក់ទៀតថា គេនឹងនៅបន្ត ចេញលិខិតឆ្លងដែនពិសេសនេះ ជូនប្រជាជនហុងកុងទាំងអស់ ឲ្យតែបំពេញលក្ខខណ្ឌកំណត់ទៅតាមច្បាប់។ បើតាមការរំពឹងទុក អាជ្ញាធរអង់គ្លេសសង្ឃឹមថា នឹងអាចទទួលប្រជាជនហុងកុង ដែលកាន់លិខិតឆ្លងដែនពិសេសនេះ ជាង៣សែននាក់បន្ថែមទៀត ឲ្យមកស្នាក់នៅលើទឹកដីអង់គ្លេស ក្នុងរវាង៥ឆ្នាំទៅមុខ។
អង់គ្លេសនិងចិន ឈ្លោះគ្នាក្នុងសំណុំរឿងអ៊ុយហ្គួ
រដ្ឋាភិបាលអង់គ្លេស បានចេញមុខ រួមជាមួយសហភាពអឺរ៉ុប អាមេរិក និងកាណាដា ដាក់ទណ្ឌកម្មទៅលើមន្ត្រីចិនមួយចំនួន ដែលជាអ្នកទទួលខុសត្រូវលើសកម្មភាពរំលោភសិទ្ធិមនុស្ស ធ្វើទៅលើប្រជាជនអ៊ុយហ្គួ ខេត្តស៊ីនជាំង។ ក៏ប៉ុន្តែនៅថ្ងៃសុក្រនេះ រដ្ឋាភិបាលចិនសម្រេច ដាក់ទណ្ឌកម្មសងសិកវិញ មកលើអង់គ្លេស។ ក្រសួងការបរទេសចិន បានលើកឡើងថា គេដាក់ទណ្ឌកម្មទៅលើក្រុមមនុស្សមួយចំនួន ដែលដើរនិយាយបង្កាច់បង្ខូច បង្កើតពាក្យមុសា ចោទថាចិន ធ្វើបាបប្រជាជនអ៊ុយហ្គួនៅស៊ីនជាំង។
ក្នុងចំណោមអ្នកដែលរងទណ្ឌកម្មរបស់ចិននេះ គឺមានដូចជា គណកម្មការសិទ្ធិមនុស្ស នៃគណបក្សអភិរក្សនិយមអង់គ្លេស ដែលជាគណបក្សរបស់លោក បូរីស ចិនសុន ព្រមទាំងសមាជិកសភាអង់គ្លេសច្រើននាក់ទៀត ដូចជា លោក Iain Duncan Smith អតីតប្រធានគណបក្សអភិរក្សនិយម លោក Tom Tugendhat ប្រធានគណកម្មការកិច្ចការបរទេសនៅសភាជាន់ទាបអង់គ្លេស និងលោកស្រី Nusrat Ghani សមាជិកសភាម្នាក់ទៀត។
ជាការប្រតិកម្ម លោក Dominic Raab រដ្ឋមន្ត្រីការបរទេសអង់គ្លេស បានសរសេរលើទំព័រ Twitter នៅថ្ងៃនេះថា ចិនកំពុងតែចង់បំបិតមាត់ អ្នកណាដែលហ៊ាននិយាយរិះគន់ខ្លួន ទាក់ទិននឹងការរំលោភសិទ្ធិមនុស្សនៅខេត្តស៊ីនជាំង។ លោកបន្ថែមថា បើចិនចង់បង្ហាញភាពស្អាតស្អំណាស់ ចិនត្រូវបើកផ្លូវ ឲ្យអ្នកជំនាញអន្តរជាតិរបស់ក្រុមប្រឹក្សាសិទ្ធិមនុស្ស ចុះទៅពិនិត្យនៅខេត្តស៊ីនជាំងដោយផ្ទាល់ មិនត្រូវមកដាក់ទណ្ឌកម្ម បំបិតមាត់មនុស្សដែលហ៊ាននិយាយលើកឡើង ពីទង្វើរបស់ចិនទេ។
ដូចគ្នាដែលលោក លោក Iain Duncan Smith អតីតប្រធានគណបក្សអភិរក្សនិយមអង់គ្លេស បានលើកឡើងថា វាគឺជាកាតព្វកិច្ចរបស់លោក និងអ្នកប្រជាធិបតេយ្យទាំងអស់ ដែលត្រូវបរិហារអំពីការរំលោភបំពានរបស់ចិន ធ្វើទៅលើប្រជាជនអ៊ុយហ្គួ។ ហើយបើចិនដាក់ទណ្ឌកម្មលើរូបលោក ដោយសារតែរឿងនេះ លោកពេញចិត្តនឹងទទួល ចាត់ទុកថាដូចជាបណ្ណសរសើរទៅចុះ!
ដូច្នេះយើងឃើញថា ចិនពេលនេះ កំពុងតែមានបញ្ហាការទូត ជាមួយប្រទេសលោកខាងលិចច្រើនណាស់ មិនថាពីអឺរ៉ុប ពីអាមេរិក ទាក់ទិននឹងរឿងជនជាតិអ៊ុយហ្គួរនេះ។ ដរាបណាចិន មិនព្រមបង្ហាញតម្លាភាព ពាក្យចោទ ពាក្យសង្ស័យក៏នឹងកាន់តែកើនឡើង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ