ហ្សកដានី រំជើបរំជួលនយោបាយ ក្រោយការឃាត់ខ្លួនព្រះអង្គម្ចាស់ហាំហ្សា ពីបទរៀបគម្រោងក្បត់
ចុះផ្សាយនៅថ្ងៃ៖
ស្តាប់ - ០៧:៣៨
បញ្ហានយោបាយនៅប្រទេសហ្សកដានី កំពុងតែធ្វើឲ្យមានការងឿងឆ្ងល់បំផុត បន្ទាប់ពីកងទ័ព បានបើកប្រតិបត្តិការ ចាប់ឃាត់ខ្លួនមនុស្សមួយចំនួន កាលពីថ្ងៃសៅរ៍ទី៣មេសា។ ក្នុងចំណោមអ្នកដែលគេឃាត់ខ្លួន គឺមានព្រះអង្គម្ចាស់ ហាំហ្សា បេន ហ៊ូសេន ប្អូនប្រុសឪពុកតែមួយម្តាយទីទៃ របស់ព្រះចៅអាប់ដាឡាទី២។ ព្រះអង្គម្ចាស់ដ៏មានប្រជាប្រិយភាពរូបនេះ ត្រូវគេចោទ ថាបានចូលរួមក្នុងគំរោងក្បត់ បង្កអស្ថិរភាពនយោបាយ និងចង់ផ្តួលរំលំរាជបល្ល័ង្គ របស់ព្រះចៅអាប់ដាឡា។ តែយ៉ាងណា ប្រជាជនហ្សកដានី ក៏ដូចជាអ្នកវិភាគនយោបាយ មានចម្ងល់ជាច្រើន ទាក់ទិននឹងព្រឹត្តិការណ៍នេះ ខណៈដែលរដ្ឋាភិបាលហ្សកដានី ពុំបានបង្ហាញភស្តុតាងអ្វី ស្តីពីផែនការឃុបឃិតនេះទេ។
គ្មានការលំអិត ថាជាផែនការឃុបឃិតអ្វី ឲ្យពិតប្រាកដ
ប្រតិបត្តិការចាប់ឃាត់ខ្លួន មនុស្សបានធ្វើឡើង នៅថ្ងៃសៅរ៍ទី ៣មេសា។ នៅរសៀលថ្ងៃអាទិត្យ លោកAyman Safadi រដ្ឋមន្ត្រីការបរទេសហ្សកដានី បានចេញលិខិតប្រកាស បង្ហាញការចោទប្រកាន់ជាសាធារណៈ ដោយចោទព្រះអង្គម្ចាស់ហាំហ្សា និងមនុស្សប្រមាណ ១៤នាក់ទៀត ថាបានប៉ុនប៉ងធ្វើសកម្មភាពបង្កអស្ថិរភាពនយោបាយ និងបង្កអសន្តិសុខជាតិ។ លោក Bassem Awadallah អតីតសមាជិករដ្ឋាភិបាល និងជាអតីតទីប្រឹក្សារបស់ព្រះចៅអាប់ដាឡាទី២ មានប្រធានាតុលាការ និងមន្ត្រីសន្តិសុខច្រើននាក់ទៀត ក៏មានឈ្មោះក្នុងបញ្ជីចោទនេះដែរ។ ក៏ប៉ុន្តែ លិខិតរបស់រដ្ឋាភិបាលហ្សកដានីនេះ មិនបានបញ្ជាក់ថា ជាផែនការសកម្មភាពអ្វីឲ្យពិតប្រាកដទេ ហើយគេក៏មិនប្រើពាក្យ រដ្ឋប្រហារឲ្យចំដែរ។
ព្រះអង្គម្ចាស់ ហាំហ្សា បេន ហ៊ូសេន (Hamza Ben Hussein) ប្អូនប្រុសឪពុកតែមួយម្តាយទីទៃ របស់ព្រះចៅអាប់ដាឡាទី២ ត្រូវក្រុមកងទ័ពដាក់ឲ្យនៅក្នុងដំណាក់ ហាមចេញក្រៅ។ ក្រោយព្រឹត្តិការណ៍នេះ ប្រទេសនៅក្នុងតំបន់ និងប្រទេសសម្ព័ន្ធមិត្តហ្សកដានី មានសហរដ្ឋអាមេរិក អ៊ីស្រាអែល អារ៉ាប៊ីសាអូឌីត និងអេមៀរ៉ាតអារ៉ាប់រួមជាដើម បានបង្ហាញជំហរ គាំទ្រ កងទ័ពនឹងរដ្ឋាភិបាលហ្សកដានី ក្នុងការការពាររក្សាស្ថិរភាពនយោបាយ។
ប្រឌិតរឿង ដើម្បីបំបិទសំឡេងរិះគន់?
នៅក្នុងស្រុកហ្សកដានី គឺប្រជាជន ក៏ដូចជាអ្នកវិភាគនយោបាយ មានការងឿងឆ្ងល់ខ្លាំងណាស់។ ប្រភពពីមនុស្សម្នាក់ ដែលស្និទនឹងក្រុមគ្រួសារស្តេចហ្សកដានី បានលើកឡើងថា ព្រះអង្គម្ចាស់ហាំហ្សា អាចត្រូវគេយកធ្វើជាចំណាប់ខ្មាំង ចោទប្រកាន់ថាមានគំរោងក្បត់ ដែលតាមការពិត គឺជាយុទ្ធសាស្ត្ររបស់រដ្ឋាភិបាល និងក្រុមស្និទនឹងព្រះចៅអាប់ដាឡា ដើម្បីបំបិតសំឡេងប្រឆាំងរិះគន់ទាំងអស់ នៅក្នុងស្រុកតែប៉ុណ្ណោះ។ បច្ចុប្បន្ននេះ ដោយសារវិបតិ្តសេដ្ឋកិច្ច វិបត្តិកូវីដផង មានការរិះគន់កាន់តែខ្លាំង ទៅលើការដឹកនាំ និងជាពិសេសគឺអំពើពុករលួយ បក្សពួកនិយម។
រឿងដែលកាន់តែធ្វើឲ្យមានការងឿងឆ្ងល់ គឺ ពាក់ព័ន្ធរវាងព្រះអង្គម្ចាស់ ហាំហ្សា និង លោក Bassem Awadallah។ លោកOsama Al-Sharif អ្នកកាសែតម្នាក់នៅហ្សកដានី បានអះអាងថា មិនអាចទៅរួចទេ ដែលព្រះអង្គម្ចាស់ហាំហ្សា ទៅសេពគប់និងក្រុមបក្សពួករបស់លោក Bassem Awadallah។ លោក Bassem Awadallah អតីតអ្នកនយោបាយចូលរួមក្នុងអំពើពុករលួយជាច្រើន ដែលប្រជាជនហ្សកដានីស្អប់ណាស់ គ្មាននរណាចូលចិត្តទេ។ ផ្ទុយទៅវិញ ព្រះអង្គម្ចាស់ហាំហ្សា ត្រូវប្រជាជនហ្សកដានីគោរពស្រលាញ់ណាស់ ដោយសារព្រះអង្គតែរិះគន់ លើកឡើងអំពីបញ្ហាសង្គម ភាពក្រីក្រ រឿងពុករលួយបក្សពួកនិយមជាដើម។ មួយវិញទៀតលោកBassem Awadallah គ្មានបណ្តាញអ្វីធំដុំក្នុងក្រុមកងទ័ព ដើម្បីជាបង្អែក ធ្វើរឿងបែបនេះទេ។
ប្រជាជនគោរពស្រលាញ់ ព្រះអង្គម្ចាស់ ហាំហ្សា
បើផ្អែកតាមវីដេអូ ដែលមេធាវី របស់ព្រះអង្គម្ចាស់ហាំហ្សា បានផ្ញើទៅបណ្តាញទូរទស្សន៍ BBC កាលពីថ្ងៃអាទិត្យ ព្រះអង្គម្ចាស់ហាំហ្សា បាននិយាយថា គេចោទព្រះអង្គថាបានចូលរួម ក្នុងកម្មវិធីប្រជុំមួយ ដែលក្នុងពេលប្រជុំនោះ គេនាំគ្នានិយាយដើម និងរិះគន់រដ្ឋាភិបាល ព្រមទាំងការដឹកនាំរបស់ព្រះចៅអាប់ដាឡា។ ព្រះអង្គម្ចាស់ហាំហ្សា បានលើកឡើងថា គ្មានការផ្សំគំនិត ឃុបឃិត រៀបគំរោងអ្វីណាមួយនោះទេ។
តែយ៉ាងណា យោងតាមលោក Osama Al-Sharif គឺ ប្រជាជនហ្សកដានី ស្រលាញ់ព្រះអង្គម្ចាស់ហាំហ្សាខ្លាំងទៅៗ ដោយសង្កេតឃើញថា ព្រះអង្គម្ចាស់អង្គនេះ មានភាពម៉ឺងម៉ាត់ ទៀងត្រង់ ចេះដាក់ខ្លួន និងជាពិសេសនោះ គឺហ៊ាននិយាយរិះគន់អំពីបញ្ហា សង្គម នយោបាយ បញ្ហាពុករលួយ និងភាពក្រីក្ររបស់ប្រជាជនជាដើម។ ដូច្នេះ វាអាចមានភាពច្រណែន មើលបំណាំគ្នា រវាងក្រុមមនុស្ស ដែលតាមដង្ហែព្រះចៅអាប់ដាឡា និង ក្រុមមនុស្សដែលគាំទ្រព្រះអង្គម្ចាស់ហាំហ្សា។
នៅមុនពេលសោយទីវង្គត់ នៅឆ្នាំ១៩៩៩ ព្រះចៅហ៊ូសេន បានសម្រេចប្រគល់រាជបល្ល័ង្គទៅឲ្យព្រះចៅអាប់ដាឡា ដែលជាបុត្រច្បង តែព្រះចៅអាប់ដាឡា ត្រូវសន្យាថានឹងប្រគល់រាជបល្ល័ង្គបន្ត ទៅឲ្យព្រះអង្គម្ចាស់ហាំហ្សាដែលជាប្អូន។ ក៏ប៉ុន្តែកាលពីឆ្នាំ២០០៤ ព្រះចៅអាបដាឡាទី២ បានសម្រេចរាជបល្ល័ង្គ នឹងធ្លាក់ទៅលើកូនប្រុសច្បងរបស់ព្រះអង្គវិញ។ តែតាំងពីនោះមក ព្រះអង្គម្ចាស់ហាំហ្សា មិនដែលបង្ហាញជំហរជំទាស់ ឬប្រឆាំងនឹងការដឹកនាំរបស់ចាត់ចែង របស់ព្រះចៅអាប់ដាឡាទេ។ ព្រះអង្គម្ចាស់ហាំហ្សា បានដកខ្លួនឆ្ងាយ ពីកិច្ចការនយោបាយ ដោយព្រះអង្គទៅរៀននៅសាលាបណ្ឌិតយោធា ហើយបានធ្វើការជាអ្នកបើកយន្តហោះ នៅអាមៀរ៉ាតអារ៉ាប់រួម មុននឹងត្រលប់ចូលស្រុកវិញ។
ក្រុមអ្នករិះគន់បក្សពួកព្រះចៅអាប់ដាឡា សម្លឹងឃើញក្តីសង្ឃឹមលើព្រះអង្គម្ចាស់ហាំហ្សា
ប៉ុន្មានឆ្នាំចុងក្រោយនេះ ព្រះអង្គម្ចាស់ ហាំហ្សា ហាក់បានចេញមុខបញ្ចេញមតិយោបល់ និងរិះគន់ ទៅលើបញ្ហានយោបាយច្រើន តាមរយៈសារ នៅលើទំព័រTwitter ជាដើម។ ផ្អែកតាមការអះអាង របស់លោក Amer Al-Sabaileh អ្នកវិភាគនយោបាយម្នាក់នៅហ្សកដានី គឺព្រះអង្គម្ចាស់ហាំហ្សា ឧស្សាហ៍ជួបជាមួយមេក្រុមកុលសម្ព័ន្ធនៅហ្សកដានីណាស់។ ហើយមួយរយៈចុងក្រោយនេះ គឺមានមេដឹកនាំក្រុមកុលសម្ព័ន្ធជាច្រើន បានផុសផុលប្រឆាំងនឹងការដឹកនាំរបស់បក្សពួករបស់ព្រះចៅអាប់ដាឡាទី២ ដោយសារបញ្ហាសេដ្ឋកិច្ច អំពើពុករលួយ។
អ្នកស្និទនឹងគ្រួសារស្តេចហ្សកដានីម្នាក់ អះអាងថា វាអាចដែរ ដែលក្រុមអ្នករិះគន់ព្រះចៅអាប់ដាឡា សម្លឹងមើលឃើញថា ព្រះអង្គម្ចាស់ហាំហ្សា គឺជាក្តីសង្ឃឹមថ្មី ហើយរាជបល្ល័ង្គ សមណាតែធ្លាក់មកលើដៃព្រះអង្គម្ចាស់អង្គនេះ។ យោងតាមតាមខ្សែអាត់សំឡេងចុងក្រោយ នៅយប់ថ្ងៃអាទិត្យ ព្រះអង្គម្ចាស់ហាំហ្សា បាននិយាយថា ព្រះអង្គនឹងមិននៅស្ងៀម សំងំនៅក្នុងដំណាក់ តាមគេបញ្ជាឡើយ។ ការឃុំខ្លួន និងចោទប្រកាន់នេះ អាចនឹងរុញឲ្យព្រះអង្គម្ចាស់ហាំហ្សា ចេញមុខប្រឆាំងពេញទីតែម្តង។
អ្វីដែលយើងអាចនិយាយបាននាពេលនេះ គឺថាវិបត្តិនយោបាយនេះ ទើបតែចាប់ផ្តើមប៉ុណ្ណោះ។ មេក្រុមកុលសម្ព័ន្ធជាច្រើនបានចេញមុខ ចាត់ទុកការចាប់ខ្លួនមនុស្ស និងឃាត់ខ្លួនព្រះអង្គម្ចាស់ហាំហ្សានេះ ថាជារឿងខុសច្បាប់។ ចង់មិនចង់ ពេលនេះ បរិយាកាសនយោបាយនៅហ្សកដានី កំពុងតែពុះចែកជា២ហើយ។ លោក Amer Al-Sabaileh បានលើកឡើង ថាក្នុងវិបត្តិនេះ បើសិនជាមិនដោះស្រាយដោយថ្លឹងថ្លែងឲ្យច្បាស់ទេ គឺ ហ្សកដានី ពិតជាអាច ធ្លាក់ទៅក្នុងសង្រ្គាមស៊ីវីលដណ្តើមអំណាច ម្ខាងក្រុមព្រះចៅអាប់ដាឡា ម្ខាងក្រុមព្រះអង្គម្ចាស់ហាំហ្សា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ