អាមេរិកប្រកាសដាក់ទណ្ឌកម្មប្រឆាំងរុស្ស៊ី តែរុស្ស៊ីឆ្លើយបកថានឹងសងសឹកតបវិញ
ចុះផ្សាយនៅថ្ងៃ៖
ស្តាប់ - ០៧:៤១
សហរដ្ឋអាមេរិកបានប្រកាសដាក់ទណ្ឌកម្មប្រឆាំងនឹងរុស្ស៊ី និងបានបណ្តេញមន្ត្រីទូតរុស្ស៊ីចំនួន ១០រូបកាលពីថ្ងៃព្រហស្បតិ៍ ១៥ មេសាម្សិលមិញ ដើម្បីសងសឹកចំពោះទង្វើរបស់ក្រុងមូស្គូ។ ជាទង្វើ ដែលវ៉ាស៊ីនតោន ចង់សំដៅដល់ការលូកដៃរបស់វិមានក្រឹមឡាំង ចូលជ្រៀតជ្រែកក្នុងការបោះឆ្នោតអាមេរិក និងការវាយប្រហារតាមអ៊ីនធ័រនែត។ ចំណែករុស្ស៊ីវិញបាននិយាយថាប្រាកដណាស់ នឹងវាយបកទៅកាន់អាមេរិកវិញឲ្យសក្តិសម។
ទំនាក់ទំនងទ្វេភាគីរវាងអាមេរិក និងរុស្ស៊ីកំពុងកើនកម្តៅ
ចាប់តាំងពីលោកចូ បៃដិន បានឡើងកាន់តំណែងជាប្រធានាធីបតីអាមេរិកកាលពីចុងខែមករា ឆ្នាំ ២០២១ នេះមក គេសង្កេតឃើញថាទំនាក់ទំនងរវាងសហរដ្ឋអាមេរិក ហើយនិងប្រទេសរុស្ស៊ីបានចាប់កើនកម្តៅនឹងគ្នា។
លោកចូ បៃដិន មានលក្ខណៈពិសេសមួយខុសពីអតីតប្រធានាធិបតីអាមេរិកលោកដូណាល់ ត្រាំ។ ចំណុចពិសេសនោះនៅត្រង់ថាលោកដូណាល់ ត្រាំ មានគោលនយោបាយការបរទេសប្រឆាំងនឹងចិនខ្លាំង តែហាក់បីដូចជាយោគយល់រុស្ស៊ីច្រើន។
ចំណែកលោកបៃដិនវិញ រដ្ឋបាលអាមេរិករបស់លោកនៅតែប្រកាន់ជំហរប្រឆាំងចិន ហើយក៏មិនស្លូតដាក់រុស្ស៊ីដែរ ប្រសិនបើរុស្ស៊ីធ្វើអ្វីមួយប៉ះពាល់ដល់អាមេរិក។ នៅដើមសប្តាហ៍នេះ លោកបៃដិនបានគូសបញ្ជាក់ថា អាមេរិកមិនអាចអនុញ្ញាតឲ្យអំណាចបរទេសណាមួយជ្រៀតជ្រែកក្នុងដំណើរការប្រជាធិបតេយ្យរបស់អាមេរិកជាដាច់ខាត ហើយបើអ្នកណាហ៊ានបំពានអាមេរិក អ្នកនោះនឹងត្រូវតែបង់ថ្លៃចំពោះទង្វើពួកគេ។
កាលពីខែមុនលោកបៃដិនធ្លាប់បានលើកឡើងជាសាធារណៈថា ប្រធានាធិបតីរុស្ស៊ីលោកពូទីន ជាឃាតករហូតធ្វើឲ្យផ្ទុះវិបត្តិការទូតរវាងសហរដ្ឋអាមេរិកនិងរុស្ស៊ី។
ចំណែកនៅថ្ងៃព្រហស្បតិ៍ម្សិលមិញនេះវិញ លោកចូ បៃដិន បានចេញបញ្ជាឲ្យបណ្តេញមន្ត្រីការទូតរុស្ស៊ីចំនួន ១០រូបចេញពីប្រទេស ក្នុងនោះមានទាំងចារបុរសផង ។ បន្ថែមពីលើនេះ អាមេរិកក៏បានប្រកាសផងដែរដាក់ទណ្ឌកម្មនឹងប្រឆាំងក្រុមហ៊ុន ព្រមទាំងបុគ្គលជាច្រើនប្រមាណ ៣២ ដើម្បីសងសឹករុស្ស៊ី។
ជាការសងសឹកដែលក្រុងវ៉ាស៊ីនតោន និយាយថាវិមានក្រឹមឡាំងបានឲ្យប៉ះពាល់សហរដ្ឋអាមេរិក ដូចជាតាមរយៈ ការចូលជ្រៀតជ្រែកទៅក្នុងការបោះឆ្នោតប្រធានាធិបតីអាមេរិកឆ្នាំ ២០២០ ការវាយប្រហារតាមអ៊ីនធ័រនែតទ្រង់ទ្រាយធំ បូករួមទាំងសកម្មភាពអរិភាពផ្សេងទៀត។ សកម្មភាពអរិភាព គឺអាមេរិកចង់សំដៅដល់ទង្វើទាំងឡាយណាដែលរុស្ស៊ីធ្វើឡើង ក្នុងគោលបំណងប្រឆាំងទល់នឹងខ្លួន។
ចំណាត់ការថ្មីចុងក្រោយរបស់លោក ចូបៃដិនប្រឆាំងនឹងរុស្ស៊ី បានកើតឡើងតែពីរថ្ងៃប៉ុណ្ណោះ ក្រោយពេលដែលលោក បាននិយាយជាមួយលោកពូទីន។ កាលពីថ្ងៃអង្គារ លោកបៃដិន បានហៅទូរសព្ទទៅសមភាគីលោកពូទីន ដោយស្នើឲ្យមានជំនួបកំពូលដើម្បីដោះស្រាយជម្លោះ និងបានប្រាប់រដ្ឋាភិបាលក្រុងមូស្គូផងដែរឲ្យបន្ថូរបន្ថយភាពតានតឹងនៅអ៊ុយក្រែន ដោយសារតែការចល័តទ័ពរុស្ស៊ី។
តើរុស្ស៊ីមានប្រតិកម្មយ៉ាងណាឆ្លើយតបទៅអាមេរិក?
ដំបូងឡើងវិមានក្រឹមឡាំងបានផ្តល់ការឆ្លើយតបជាវិជ្ជមានចំពោះគំនិតរបស់លោកប្រធានាធិបតីអាមេរិកដែលស្នើឲ្យមានកិច្ចប្រជុំកំពូលទល់មុខគ្នារវាងលោកបៃដិន និងលោកពូទីនដើម្បីដោះស្រាយជម្លោះ និងកាត់បន្ថយទំនាក់ទំនងតានតឹងនឹងគ្នា។ ក៏ប៉ុន្តែ ក្រុងមូស្គូ បានព្រលយទុកមុនដែរថាការដាក់ទណ្ឌកម្មនឹងមិនអាចជួយដោះស្រាយបញ្ហាបាននោះទេ។
ប្រទេសរុស្ស៊ី បានបដិសេធរាល់ការចោទប្រកាន់ទាំងអស់របស់សហដ្ឋអាមេរិក និងបាននិយាយថាការវាយតបទៅវិញគឺរឿងដែលវិមានក្រឹមឡាំងត្រូវតែធ្វើដោយជៀសរួចឡើយ។ ភ្លាមៗក្រោយការប្រកាសដាក់ទណ្ឌកម្ម ក្រសួងការបរទេសរុស្ស៊ី បានហៅចំណាត់ការរបស់អាមេរិកនេះថាជាអំពើប្រឆាំងរុស្ស៊ី និងជាអំពើបង្កើនឲ្យមានការប្រឈមមុខដាក់គ្នាកាន់តែខ្លាំងឡើងរវាងប្រទេសទាំងពីរ។
តាមរយៈសេចក្តីថ្លែងការណ៍មួយ ក្រសួងការបរទេសរុស្ស៊ីបានលើកឡើងថា ការចាត់វិធានការកំរោលលរបស់អាមេរិកបែបនេះ ប្រាកដណាស់នឹងទទួលបានការឆ្លើយតបវិញយ៉ាងសក្តិសម។ ទន្ទឹមនេះ ឯកអគ្គរដ្ឋទូតអាមេរិក ក៏ត្រូវបានក្រសួងការបរទេសរុស្ស៊ី កោះហៅឲ្យទៅជួបផងដែរ។
ដោយឡែក សហភាពអឺរ៉ុប អង្គការអូតង់ និងប្រទេសអង់គ្លេសវិញ សុទ្ធតែបានចេញសេចក្តីថ្លែងការណ៍គាំទ្រវិធានការម៉ឺងម៉ាត់របស់អាមេរិកចំពោះរុស្ស៊ី។
អាមេរិកកំពុងប្រើធម៌ត្រជាក់ផងក្តៅផងជាមួយសមភាគីរុស្ស៊ី
លោកចូ បៃដិន កំពុងប្រើទាំងវិធានការក្តៅផង និងត្រជាក់ផងដាក់សមភាគីលោកពូទីន។
ស្របពេលដែលបោះដៃទៅរកមេដឹកនាំរុស្ស៊ីលោកពូទីន ដោយស្នើឲ្យមានជំនួបកំពូលនឹងគ្នា ដើម្បីដោះស្រាយវិបត្តិ លោកចូ បៃដិន ក៏បានទម្លាក់ទណ្ឌកម្មលើក្រុងមូស្គូដែរ។
កាលពីម្សិលមិញ លោកប្រធានាធិបតីអាមេរិករូបនេះ បានពិពណ៌នាអំពីការសម្រេចចិត្តរបស់លោកក្នុងការដាក់ទណ្ឌកម្មលើប្រទេសរុស្ស៊ីថាជា គឺជាការឆ្លើយតបមួយដែលមានសមាមាត្រហើយទៅនឹងអ្វីដែលរុស្ស៊ីបានធ្វើលើអាមេរិក។
ក្នុងពេលថ្លែងសុន្ទរកថានៅឯសេតវិមាន លោកបៃដិន បានឲ្យដឹងថា លោកបាននិយាយគ្នាច្បាស់លាស់ហើយជាមួយលោកពូទីន ថាអាមេរិក អាចធ្វើដាក់រុស្ស៊ីច្រើនជាងនេះទៅទៀត ប៉ុន្តែលោកបៃដិន បានជ្រើសរើសមិនធ្វើដូច្នោះទេ។
លោកប្រធានាធិបតីអាមេរិកទី ៤៦ ថាលោកបានជ្រើសរើសចំណាត់ការមួយដែលមាន សមាមាត្រ សក្តិសមទៅនឹងទង្វើដែលរុស្ស៊ីបានធ្វើចំពោះអាមេរិក មានដូចជា ការជ្រៀតជ្រែកចូលក្នុងការបោះឆ្នោតឆ្នាំ២០២០ ការលួចចូលក្នុងប្រព័ន្ធកំព្យូទ័រទីភ្នាក់ងារសហព័ន្ធអាមេរិក និងសកម្មភាពអរិភាពផ្សេងទៀត។
ទោះបីជាបានបង្ហាញចេតនាចង់បញ្ចៀសភាពតានតឹងដែលកំពុងកើនឡើងជាមួយក្រឹមឡាំងក្តី លោកបៃដិន បានបញ្ជាក់ប្រាប់ច្បាស់ៗថា លោកនឹងមិនស្ទាក់ស្ទើរឡើយ ក្នុងការចាត់វិធានការបន្ថែមទៀត ប្រឆាំងនឹងរុស្ស៊ីនាពេលអនាគត ប្រសិនបើរុស្ស៊ីនៅតែបន្តហ៊ានធ្វើសកម្មភាពណាមួយដែលប៉ះពាល់ដល់អាមេរិក ឬប្រសិនបើរុស្ស៊ីនៅតែបន្តធ្វើសកម្មភាពដែលបង្កឲ្យមានអស្ថិរភាពក្នុងពិភពលោក។
សរុបមក សេចក្តីប្រកាសដាក់ទណ្ឌកម្មលើរុស្ស៊ី ពីសំណាក់អាមេរិកកាលពីម្សិលមិញនេះ គឺជាជំហានមួយនៃជំហានគោលនយោបាយការបរទេសគួរឲ្យកត់សម្គាល់ដែលលោកប្រធានាធិបតីចូ បៃដិន បានអនុវត្តនៅសប្តាហ៍នេះ។ គោលនយោបាយការបរទេសទាំងនោះរួមមានការសម្រេចដកកងទ័ពទាំងអស់ចេញពីអាហ្វហ្គានីស្ថាន និងការបញ្ជូនគណៈប្រតិភូក្រៅផ្លូវការទៅកាន់កោះតៃវ៉ាន់ ដើម្បីបង្ហាញការគាំទ្ររបស់អាមេរិកចំពោះលទ្ធិប្រជាធិបតេយ្យនិងសន្តិសុខតៃវ៉ាន់។
វិធានាការថ្មីទាំងនេះ ត្រួវគេមើលឃើញថាគឺជាសញ្ញាបង្ហាញពីគោលជំហរដើរឆ្ពោះទៅរកពិភពលោកដែលមានសភាពកាន់តែស្វាហាប់ និងកាន់តែមានភាពច្បាស់លាស់ពីសណាក់សហរដ្ឋអាមេរិកក្រោមការដឹកនាំរបស់លោកប្រធានាធិបតីចូ បៃដិន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ