អឺរ៉ុបប្រជុំរដ្ឋមន្ត្រីការបរទេសបន្ទាន់ ដោយសារតែបញ្ហាភាពតានតឹងជាមួយរុស្ស៊ី ច្រើនសំណុំរឿង
ចុះផ្សាយនៅថ្ងៃ៖
ស្តាប់ - ០៧:១៣
សហភាពអឺរ៉ុប កំពុងតែស្ថិតក្នុងកាលៈទេសៈលំបាក ប្រឈមជាមួយរុស្ស៊ីកាន់តែខ្លាំង មួយរយៈចុងក្រោយនេះ។ មានសំណុំរឿងជាច្រើន ដែលបង្កភាពតានតឹង ក្នុងនោះមានដូចជា បញ្ហាអ៊ុយក្រែន ដែលរុស្ស៊ីហាក់កំពុងតែត្រៀមកម្លាំងទ័ព ចង់ចូលមកឈ្លានពាន និងបញ្ហាសុខភាព របស់លោក អាឡិចសី ណាវ៉ាល់នី ដែលមានជំងឺធ្ងន់ធ្ងរក្នុងមន្ទីរឃុំឃាំង ហើយដែលអឺរ៉ុបខំខ្នះខ្នែងជួយឈឺឆ្អាល។ ហើយចុងក្រោយនេះ គេបញ្ហាវិបត្តិការទូត ដែលទើបតែឆេះឡើង រវាងរុស្ស៊ី ជាមួយនឹងសាធារណរដ្ឋឆែក ដែលជាសមាជិករបស់សហភាពអឺរ៉ុប។ នៅថ្ងៃចន្ទទី១៩មេសា រដ្ឋមន្ត្រីការបរទេស នៃប្រទេសសមាជិកសហភាពអឺរ៉ុបទាំង២៧ កំពុងតែបើកការប្រជុំបន្ទាន់មួយ ដើម្បីនិយាយគ្នាលើបញ្ហាទាំងអំបាលម៉ាណនេះ។
អឺរ៉ុបចេញមុខឈឺឆ្អាល ចង់ជួយសង្គ្រោះជីវិតលោកណាវ៉ាល់នី
ស្ថានភាពសុខភាពរបស់លោកអាឡិចសី ណាវ៉ាល់នី កំពុងស្ថិតក្នុងដំណាក់កាលគ្រោះថ្នាក់បំផុត នេះបើផ្អែកតាមប្រភពពីក្រុមគ្រួសារ និងមនុស្សស្និទស្នាលនឹងលោក។ ក៏ប៉ុន្តែ អាជ្ញាធរមន្ទីរឃុំឃាំងរុស្ស៊ី មិនព្រមយកលោក ចេញទៅព្យាបាលនៅមន្ទីរពេទ្យទេ។ កាលពីសប្តាហ៍មុន ភរិយាលោកណាវ៉ាល់នី ដែលបានចូលទៅជួបលោកក្នុងមន្ទីរឃុំឃាំង បានអះអាង លោកណាវ៉ាល់នីបានស្រកទម្ងន់ ប្រមាណ១០គីឡូក្រាមហើយ។
លោកណាវ៉ាល់នី ដែលជាប់ឃុំនៅមន្ទីរឃុំឃាំង Pekrov ចំងាយប្រមាណជិត១០០គីឡូម៉ែត្រ ខាងកើតក្រុងម៉ូស្គូ មានជំងឺឆ្អឺងខ្នងធ្ងន់ធ្ងរ។ លោកបានទាមទារសុំឲ្យគ្រូពេទ្យដែលលោកទុកចិត្ត ចូលមកពិនិត្យ និងផ្តល់ថ្នាំឲ្យលោក តែមន្ទីរឃុំឃាំងមិនព្រមទេ។ ហេតុដូច្នេះហើយ លោកក៏បានសម្រេចចិត្តធ្វើកូដកម្មបង្អត់អាហារ តាំងតែពីថ្ងៃទី៣១មីនាម្លេះ។ អ្វីដែលគ្រូពេទ្យជំនិតរបស់លោកណាវ៉ាល់នីព្រួយបារម្ភនោះ គឺកម្រិតជាតិប៉ូតាស្យូមក្នុងឈាមរបស់គាត់ ឡើងខ្ពស់ខ្លាំង ហើយអាចធ្វើឲ្យគាំងបេះដូងគ្រប់ពេលវេលា។ តែយ៉ាងណាអាជ្ញាធរមន្ទីរឃុំឃាំង នៅតែមិនព្រមឲ្យគ្រូពេទ្យចូលទៅជួប ឬ ក៏បញ្ជូនដឹកលោកណាវ៉ាល់នី មកព្យាបាលនៅខាងក្រៅទេ។
កាលពីល្ងាចទី១៨មេសា លោក Josep Borrell ប្រមុខការទូតអឺរ៉ុប បានអំពាវនាវ ឲ្យអាជ្ញាធររុស្ស៊ីត្រូវតែយល់ព្រមជាបន្ទាន់ ឲ្យគ្រូពេទ្យម្នាក់ដែលលោកណាវ៉ាល់នីទុកចិត្ត អាចចូលទៅពិនិត្យសុខភាព និងព្យាបាលលោកណាវ៉ាល់នី។ ចំណែក លោករដ្ឋមន្ត្រីការបរទេសបារាំង បានលើកឡើងថា អាជ្ញាធររុស្ស៊ី ជាពិសេសគឺលោកប្រធានធិបតីពូទីនតែម្តង ដែលជាអ្នកទទួលខុសត្រូវ លើអាយុជីវិតរបស់លោកអាឡិចសី ណាវ៉ាល់នី។
នៅថ្ងៃចន្ទទី១៩មេសានេះ រដ្ឋមន្ត្រីការបរទេសនៃសហភាពអឺរ៉ុប បានបើកការប្រជុំបន្ទាន់ ដើម្បីរកវិធីធ្វើយ៉ាងណា ជួយសង្គ្រោះជីវិតលោកណាវ៉ាល់នី។ បើតាមការចុះផ្សាយរបស់បណ្តាញព័ត៌មានអាល្លឺម៉ង់ លោក Heiko Maas រដ្ឋមន្ត្រីការបរទេសអាល្លឺម៉ង់ ដែលជាអ្នកដឹកនាំការប្រជុំបន្ទាន់នេះ បានលើកឡើងថា គេនឹងរៀបចំធ្វើលិខិតផ្លូវការ ស្នើសុំឲ្យអាជ្ញាធររុស្ស៊ី ត្រូវផ្តល់ជូនលោកអាឡិចសី ណាវ៉ាល់នី នូវការព្យាបាលសុខភាព ដែលត្រឹមត្រូវ និងដោយបន្ទាន់បំផុត ព្រោះថាដំណាក់កាលនេះ ជារឿងស្លាប់រស់។
ទណ្ឌកម្មបន្ថែមលើរុស្ស៊ី?
អ្វីដែលសហភាពអឺរ៉ុប អាចធ្វើបានបន្ថែមពីនេះ បើតាមការស្មាន គឺគ្មានអ្វីក្រៅពីសម្រេចដាក់ទណ្ឌកម្មលើរុស្ស៊ីនោះទេ។ លោក Jean-Yves Le Drian រដ្ឋមន្ត្រីការបរទេសបារាំង ដែលបាននិយាយនៅតាមកញ្ចក់ទូរទស្សន៍ជាតិប៉ុស្តិលេខ៣ កាលពីយប់ម្សិលមិញ បានលើកឡើងថា ក្នុងសំណុំរឿងដាក់ថ្នាំបំពុលលោកណាវ៉ាល់នី គឺសហភាពអឺរ៉ុប បានចេញវិធានការទណ្ឌកម្ម ទៅលើរុស្ស៊ី ចំនួន៣វិធានការរួចហើយ។ វិធានការនេះច្រើនគួរសមហើយ តែប្រសិនបើចាំបាច់ ត្រូវបន្ថែមទណ្ឌកម្មទៀត គឺអឺរ៉ុបអាចនឹងបន្ថែម ដើម្បីដាក់សំពាធលើរុស្ស៊ី ឲ្យសង្គ្រោះជីវិតលោកណាវ៉ាល់នី។ លោកអះអាងថា លោកចង់ឲ្យអឺរ៉ុបបន្ថែទណ្ឌកម្មលើរុស្ស៊ី ដើម្បីស្រោចស្រង់ជីវិតលោកណាវ៉ាល់នី។
ដូចគ្នាដែរ អ្នកនាំពាក្យសេតវិមានអាមេរិក លោក Jake Sullivan វិញ បាននិយាយនៅតាមកញ្ចក់ទូរទស្សន៍CNN កាលពីម្សិលមិញដែរ ថាប្រសិនបើលោកអាឡិចសី ណាវ៉ាល់នី ស្លាប់ នោះ រុស្ស៊ីប្រាកដជាមិនអាចគេចផុត ពីទណ្ឌកម្មរបស់អាមេរិកឡើយ។
ដោយឡែក លោកAndreï Kéline អគ្គរដ្ឋទូតរុស្ស៊ីប្រចាំនៅទីក្រុងឡុងដ៍ បានថ្លែងនៅតាមកញ្ចក់ទូរទស្សន៍ BBC កាលពីថ្ងៃអាទិត្យថា លោកណាវ៉ាល់នី ថាជាអ្នកបង្កបញ្ហាព្រោះចង់ល្បី ចង់ឲ្យពិភពលោកចាប់អារម្មណ៍តែប៉ុណ្ណោះ។ លោកទូតរុស្ស៊ីរូបនេះ បានបន្ថែមថា កុំភ័យពេក រុស្ស៊ីនឹងមិនបណ្តោយលោកណាវ៉ាល់នី ស្លាប់ក្នុងគុកទេ។
អ៊ុយក្រែន ឆែក សុទ្ធតែមានបញ្ហាជាមួយរុស្ស៊ី
ក្នុងសំណុំរឿងវិបត្តិការទូតរវាងរុស្ស៊ី និងសាធារណរដ្ឋឆែក គឺវាពាក់ព័ន្ធជាមួយសហភាពអឺរ៉ុប ដោយផ្ទាល់ ព្រោះថា សាធារណរដ្ឋឆែក គឺជាប្រទេសសមាជិកសហភាពអឺរ៉ុប។ បញ្ហាបានកើតឡើង បន្ទាប់ពីរដ្ឋាភិបាលឆែក បានបណ្តេញមន្ត្រីទូតរុស្ស៊ីចំនួន១៨នាក់ចេញពីប្រទេស។ អាជ្ញាធរឆេកចោទថាមន្ត្រីទូតរុស្ស៊ីទាំងនេះ ជាគិញសម្ងាត់របស់រុស្ស៊ី ហើយដែលជាអ្នកទទួលខុសត្រូវ លើករណីផ្ទុះឃ្លាំងស្តុកអាវុធនិងគ្រាប់ផ្ទុះមួយកន្លែង កាលពីឆ្នាំ២០១៤។ ជាការឆ្លើយតបវិញ កាលពីអាទិត្យទីូ១៨មេសា រុស្ស៊ីបានបណ្តេញមន្ត្រីទូតឆែក ចំនួន២០នាក់។
ចំណែកបញ្ហាអ៊ុយក្រែន ជារឿងដ៏ធំដែរ ដែលអឺរ៉ុបមិនអាចមិនឈឺឆ្អាលបានទេ ព្រោះអ៊ុយក្រែនជាសម្ព័ន្ធមិត្តខ្លួន ហើយជាសម្ព័ន្ធមិត្តអង្គការអូតង់ទៀត។ អ៊ុយក្រែនកំពុងតែភ័យ ដោយសារតែរុស្ស៊ី ចល័តទ័ព ព័ទ្ធអ៊ុយក្រែននៅភាគខាងកើត និងក្នុងសមុទ្រខ្មៅ។
តែយ៉ាងណា សម្រាប់ពេលនេះ សហភាពអឺរ៉ុប កំពុងជជែកគ្នា ថាអាចធ្វើអ្វីបាន ដើម្បីជួយ។ សហភាពអឺរ៉ុបចង់ជួយ តែក៏មិនអាចចេញមុខតតាំងខ្លាំងជាមួយរុស្ស៊ីដែរ។ លោក Josep Borrell ប្រមុខការទូតអឺរ៉ុប បានទទួលស្គាល់នៅពេលបើកកិច្ចប្រជុំព្រឹកមិញនេះ មានរឿងកាន់តែច្រើន ដែលអឺរ៉ុប និងរុស្ស៊ី ត្រូវមើលមុខគ្នាលែងត្រង់ ភាពតានតឹង កាន់តែកើនឡើងជាលំដាប់។ បញ្ហាចោទ សួរថា តើប្រទេសអឺរ៉ុបទាំង២៧ អាចប្រមូលកម្លាំងសាមគ្គីគ្នាជាធ្លុងមួយ ដើម្បីតតាំងជាមួយរុស្ស៊ីដែរឬទេ?
មិនចង់បើកដៃឲ្យរុស្ស៊ីមានលេសឈ្លានពានអ៊ុយក្រែន
លោកប្រធានាធិបតីអ៊ុយក្រែន បានសុំឲ្យសហភាពអឺរ៉ុប និងអង្គការអូតង់ ពន្លឿននីតិវិធី ឲ្យខ្លួន ក្លាយជាសមាជិកពេញសិទ្ធិ ដើម្បីជាសារផ្ញើទៅកាន់រុស្ស៊ី ថាហាមប៉ះពាល់អ៊ុយក្រែន។ តែសំណើរនេះ ត្រូវបានអឺរ៉ុប និងអូតង់ បដិសេធ ថាកុំប្រញ៉ាប់ពេក។ ក្នុងន័យនេះយើងឃើញថា ទាំងអឺរ៉ុប ទាំងអូតង់ សុទ្ធតែមិនហ៊ានប្រឈមមុខចំៗ ជាមួយរុស្ស៊ីទេ។
មន្ត្រីទូតនៅអឺរ៉ុបខ្លះលើកឡើងថា គេមិនចង់បើកដៃ ឲ្យរុស្ស៊ីបានលេស ដើម្បីឈ្លានពានអ៊ុយក្រែនទេ។ តាំងពីចប់សង្គ្រាមត្រជាក់មក អ៊ុយក្រែន គឺជាប្រទេសដែលយើងអាចចាត់ទុកបាន ថាស្ថិតនៅចំកណ្តាល ពុះចែករវាងរុស្ស៊ីនិងលោកសេរី។ ដូច្នេះបើអ៊ុយក្រែនហ៊ានតែផ្អៀងទៅខាងលោកសេរី មានន័យថាលែងមានអ្វីខណ្ឌចែកទៀតហើយ ដូច្នេះរុស្ស៊ីនឹងបានលេសនេះ ឈ្លានពានអ៊ុយក្រែនជាក់ជាមិនខាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ