ដើម្បីប្រយុទ្ធនឹងអសមភាពនៃការចាក់វ៉ាក់សាំងប្រឆាំងកូវីដ១៩ តើគួរឬមិនគួរព្យួរកម្មសិទ្ធិបញ្ញា?
ចុះផ្សាយនៅថ្ងៃ៖
ស្តាប់ - ០៧:១២
ថ្ងៃទី២៦មេសានេះ គឺជាទិវាអន្តរជាតិ នៃសិទ្ធិកម្មសិទ្ធិបញ្ញា ដែលការពារ រាល់ស្នាដៃការងារ ឬលទ្ធផលស្រាវជ្រាវ របកគំហើញ របស់បុគ្គល ឬ សហគ្រាសណាមួយ។ ដោយឡែក អង្គការ និងប្រទេសមួយចំនួន បានលើកឡើងនូវគំនិត ចង់ឲ្យអង្គការពាណិជ្ជកម្មពិភពលោក ព្យួរនូវសិទ្ធិកម្មសិទិ្ធបញ្ញា របស់មន្ទីរពិសោធន៍ផលិតឱសថ ដែលបានស្រាវជ្រាវរកឃើញវ៉ាក់សាំងប្រឆាំងកូវីដ១៩។ ធ្វើបែបនេះ គឺដើម្បីឲ្យសហគ្រាសផលិតឱសថផ្សេងទៀត អាចមានសិទ្ធិផលិតវ៉ាក់សាំងបាន ហើយចែកចាយឲ្យបានទូលំទូលាយ ជាពិសេសទៅដល់ប្រទេសក្រីក្រ។ តែយ៉ាងណា សហគ្រាសផលិតឱសថធំៗ ដែលជាម្ចាស់កម្មសិទ្ធិបញ្ញានៃវ៉ាក់សាំងប្រឆាំងកូវីដ១៩ បានសំដែងការប្រឆាំងដាច់ខាត ទៅនឹងគំនិតនេះ។
ព្យួរកម្មសិទ្ធិបញ្ញារបស់វ៉ាក់សាំង ដើម្បីពន្លឿនការផលិត ចែកចាយតាមប្រទេសក្រីក្រ?
គំនិតព្យួរកម្មសិទ្ធិបញ្ញា នៃវ៉ាក់សាំងប្រឆាំងកូវីដ១៩ បានផុសផុលឡើងកាន់តែច្រើន នាពេលបច្ចុប្បន្ននេះ។ ប្រទេសដែលបានចេញមុខខ្លាំងជាងគេ ស្នើគំនិតព្យួរកម្មសិទ្ធិបញ្ញា វ៉ាក់សាំងប្រឆាំងកូវីដ១៩នេះ គឺមានឥណ្ឌា និង អាហ្វ្រិកខាងត្បូង។ ប្រទេស២នេះ បានស្នើគំនិតនេះ ទៅកាន់អង្គការពាណិជ្ជកម្មពិភពលោក ហើយឥឡូវក៏មាន ប្រទេសមួយចំនួន និងអង្គការក្រៅរដ្ឋាភិបាលខ្លះ គាំទ្រដែរ។
លោក Cyril Ramaphosa ប្រធានាធិបតីអាហ្វ្រិកខាងត្បូង បានលើកឡើងកាលពីថ្ងៃសុក្រកន្លងទៅនេះ ថាវ៉ាក់សាំងគឺជាសម្បត្តិរួមរបស់មហាជន។ លោកបានអំពាវនាវ ឲ្យពិភពលោករួមគ្នា ប្រយុទ្ធនឹងបញ្ហាអសមភាព នៃការចាក់វ៉ាក់សាំងប្រឆាំងកូវីដ១៩ ព្រោះថា ប្រទេសអ្នកមានមួយក្តាប់តូច បានប្រមូលទិញវ៉ាក់សាំងសឹងទាំងអស់ រីឯប្រទេសកំពុងអភិវឌ្ឍន៍ ប្រទេសក្រីក្រវិញ គ្មានវ៉ាក់សាំងចាក់ឲ្យប្រជាជនទេ។
ប្រធានាធិបតីអាហ្វ្រិកខាងត្បូង បានលើកឡើងនៅក្នុងកិច្ចប្រជុំមួយ របស់អង្គការសុខភាពពិភពលោក ថាត្រូវតែព្យួរកម្មសិទ្ធិបញ្ញារបស់មន្ទីរពិសោធន៍ ដែលស្រាវជ្រាវរកឃើញវ៉ាក់សាំងប្រឆាំងកូវីដ១៩។ ធ្វើបែបនេះ គឺដើម្បីបើកផ្លូវ ឲ្យមន្ទីរពិសោធន៍ សហគ្រាសផលិតឱសថផ្សេងទៀត អាចមានសិទ្ធិផលិតវ៉ាក់សាំងបានដែរ។ ដូច្នេះ វានឹងអាចពន្លឿនយុទ្ធនាការចាក់វ៉ាក់សាំង ឲ្យបានទូលំទូលាយបំផុត ជាពិសេសតាមប្រទេសក្រីក្រ។ លោកអះអាងថា គេមិនអាចនៅតែក្តាប់ការពារកម្មសិទិ្ធបញ្ញានេះ ហើយទុកឲ្យមនុស្សស្លាប់ដោយកូវីដ១៩នោះទេ។
មិនអាចលេងសើចជាមួយគុណភាពវ៉ាក់សាំង
ក៏ប៉ុន្តែ ក្រុមសហគ្រាសផលិតឱសថធំៗ ទាំងអស់ ដែលជាម្ចាស់កម្មសិទិ្ធបញ្ញា របស់វ៉ាក់សាំង ប្រឆាំងកូវីដ១៩ បានបដិសេធគំនិតព្យួរកម្មសិទ្ធិបញ្ញានេះទាំងស្រុង។ បណ្តាមន្ទីរពិសោធន៍ សហគ្រាសផលិតឱសថ ដែលជាម្ចាស់កម្មសិទ្ធិបញ្ញា របស់វ៉ាក់សាំងប្រឆាំងកូវីដ១៩ បានលើកឡើងព្រមៗគ្នា ទៅកាន់បណ្តាញសារព័ត៌មានថា រឿងនេះមិនមែនជារឿងល្អទេ សូមកុំយល់ច្រឡំ។
លោក Sai Prasad ប្រធានបណ្តាញសហគ្រាសផលិតវ៉ាក់សាំាំង តាមប្រទេសកំពុងអភិវឌ្ឍន៍ (Developing Countries Vaccine Manufacturers' Network) បានលើកឡើងថា ការផលិតវ៉ាក់សាំងមិនមែនជារឿងលេងសើចទេ។ វាគឺជាការងារដែលលំបាក ស្មុគស្មាញ និងបច្ចេកទេសខ្លាំងណាស់ ដែលតោងសហគ្រាសនីមួយៗ មានសមត្ថភាពត្រឹមត្រូវ ជាក់ច្បាស់ក្នុងការផលិត។ វាគឺជាបញ្ហាសុខភាព អាយុជីវិតរបស់មនុស្សដែលទទួលវ៉ាក់សាំងនេះ។ ដូច្នេះ គេមិនអាចចេះតែបើកទ្វារចំហរ ឲ្យគ្រប់សហគ្រាសផលិតឱសថ ចេះតែអាចផលិតបាន ដោយគ្មានការប្រុងប្រយ័ត្ននោះទេ។
ដូចគ្នាដែរ លោកស្រី Michelle McMurry-Heath ប្រធានអង្គការ Biotechnology Innovation បានលើកឡើងថា កាលៈទេសៈពេលនេះ គឺត្រូវតែការពារគុណភាព និងទំនុកចិត្តរបស់ប្រជាជនទូទៅ ចំពោះវ៉ាក់សាំង។ វ៉ាក់សាំងប្រឆាំងកូវីដ១៩ ដែលត្រូវបានស្រាវជ្រាវ និងផលិតដោយសហគ្រាសធំៗ នៅប្រជាជនមិនចង់ទុកចិត្ត ចុះទំរាំតែយកវា ទៅឲ្យសហគ្រាសតូចតាច នៅតាមប្រទេសផ្សេងៗ ផលិតដោយសេរី គឺវាមិនកាន់តែវីវរទៅហើយទេ។
សហគ្រាសមន្ទីរពិសោធន៍ម្ចាស់កម្មសិទ្ធិបញ្ញា ក៏ដូចជាអ្នកជំនាញផ្សេងទៀត បានលើកឡើងថា កាព្យួរកម្មសិទិ្ធបញ្ញារបស់វ៉ាក់សាំង ដើម្បីបើកផ្លូវឲ្យសហគ្រាសផលិតឱសថ ទូទាំងពិភពលោក ផលិតវ៉ាក់សាំងប្រឆាំងកូវីដ១៩ គឺវាជារឿងគ្រោះថា្នាក់ណាស់ ហើយវាក៏នឹងមិនអាច ទៅពន្លឿនការផលិតវ៉ាក់សាំង ឲ្យបានច្រើនជាងបច្ចុប្បន្ននេះដែរ។ រាល់ថ្ងៃនេះ មន្ទីរពិសោធន៍ធំៗ ធ្វើការ មួយថ្ងៃ២៤ម៉ោង គ្មានពេលឈប់សម្រាកផង នៅផលិតមិនចង់ទាន់។ ហើយបើត្រូវបំបែកក្រុមអ្នកជំនាញ ឲ្យទៅបណ្តុះបណ្តាលបច្ចេកទេស ដល់សហគ្រាសផ្សេងទៀត គឺវាកាន់តែខាតពេល ការផលិតកាន់តែយឺតយ៉ាវ។
បញ្ហាខ្វះវត្ថុធាតុដើម សារធាតុផ្សំចាំបាច់ក្នុងវ៉ាក់សាំង
លោក Thomas Cueni ប្រធានសហព័ន្ធអន្តរជាតិនៃឧស្សាហកម្មផលិតឱសថ បានលើកឡើងចំពោះមុខអ្នកកាសែត ថារឿងផលិតវ៉ាក់សាំង បានលឿនរហ័សឬមិនរហ័ស វាមិនមែនអាស្រ័យទៅលើបញ្ហាកម្មសិទ្ធិបញ្ញានោះទេ។ លោកអះអាងថា មន្ទីរពិសោធន៍ម្ចាស់កម្មសិទ្ធិបញ្ញាទាំងអស់ ចង់ផលិតឲ្យបានលឿនរហ័សណាស់ តែតោងតែមានសារធាតុផ្សំគ្រប់គ្រាន់ដែរ យកមកផលិតដែរ។
លោកបានបញ្ជាក់ថា គិតមកទល់ពេលនេះ មន្ទីរពិសោធន៍ម្ចាស់កម្មសិទិ្ធបញ្ញាវ៉ាក់សាំងប្រឆាំងកូវីដ១៩ បានចុះកិច្ចព្រមព្រៀងចំនួន២៧៥រួចទៅហើយ ជាមួយសហគ្រាសផលិតឱសថផ្សេងៗទៀត នៅទូទាំងពិភពលោក ដើម្បីធ្វើយ៉ាងណាផលិតឲ្យបានលឿន។ ហើយពេលខ្លះទៀតនោះ គឺគេចុះកិច្ចព្រមព្រៀង ជាមួយសហគ្រាសដែលជាគូប្រជែងថែមទៀតផង។ តែគេមិនខ្វល់គិតច្រើនទេ សំខាន់ធ្វើយ៉ាងណា សម្រេចកម្មវត្ថុ ផលិតឲ្យបាន១០ពាន់លានដូស នៅដំណាច់ឆ្នាំ២០២១នេះ។
សហគ្រាសផលិតឱសថ បានលើកឡើងថា បញ្ហាចំបងដែលអាចជាឧបសគ្គ ធ្វើឲ្យការផលិតវ៉ាក់សាំងមានភាពយឺតយ៉ាង គឺបញ្ហាខ្វះទំនិញមួយចំនួន ដែលជាសារធាតុផ្សំ ឬក៏ជាវត្ថុធាតុដើមខ្លះ ដែលចាំបាច់ ដើម្បីធ្វើវ៉ាក់សាំង។ បញ្ហាទាំងនេះ វាអាចមកពីការផលិតមិនទាន់ ដឹកមកមិនទាន់ ឬក៏ដោយសារបញ្ហាពន្ធគយនាំចូលអីជាដើម។ ដូច្នេះតែខ្វះវត្ថុធាតុដើម ឬគ្រឿងផ្សំណាមួយ គឺសង្វាក់ផលិតកម្មនឹងត្រូវតែផ្អាក។
អ្នកជំនាញបានលើកឡើងថា បច្ចុប្បន្ននេះ មានសារធាតុផ្សំចំនួនជាង១០០មុខ ដែលចាំបាច់ក្នុងការផលិតវ៉ាក់សាំងប្រឆាំងកូវីដ១៩ ដែលពិបាកនឹងរកទិញណាស់។ ចំនួនកាន់ខ្សត់ទៅៗ។ តួយ៉ាងសារធាតុ លីពីត (Lipides) ដែលត្រូវការចាំបាច់ ក្នុងវ៉ាក់សាំងARN messager របស់មន្ទីរពិសោធន៍ Pfizer-BioNTech និង Moderna។
ទាក់ទិននឹងបញ្ហានេះដែរលោក Stéphane Bancel នាយកមន្ទីរពិសោធន៍ Moderna បានទាញសញ្ញាអាសន្នថា ក្នុងករណីបើកចំហរកម្មសិទ្ធិបញ្ញា ឲ្យគ្រប់គ្នាអាចផលិតវ៉ាក់សាំងប្រឆាំងកូវីដ១៩ គឺវានឹងហុចផលអវិជ្ជមាន ផ្ទុយទៅវិញទេ ព្រោះថាសារធាតុផ្សំកំពុងតែខ្វះផង។ ដូច្នេះបើបើកឲ្យផលិតច្រើនគ្នា គឺមានន័យថាកាន់តែដណ្តើមគ្នាទិញ គឺវាកាន់តែខ្វះ។ ជាងនេះទៀត អ្នកដណ្តើមទិញទៅនោះ ក៏មិនប្រាកដថា អាចយកទៅផលិត ចេញជាវ៉ាក់សាំង ដែលមានគុណភាពល្អ ដូចមន្ទីរពិសោធន៍ដើមគេដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ