កូរ៉េខាងជើងប្រកាសបិទផ្លូវ មិនចរចា និងចោទនយោបាយការទូតរបស់លោកចូ បៃដិន ថាមិនស្មោះត្រង់
ចុះផ្សាយនៅថ្ងៃ៖
ស្តាប់ - ០៥:៤០
បន្ទាប់ពីលោក ចូ បៃដិន បានប្រកាសថា លោកនឹងប្រើប្រាស់នយោបាយការទូត ដើម្បីដោះស្រាយវិបត្តិនុយក្លេអ៊ែរ ជាមួយកូរ៉េខាងជើង ស្រាប់តែភាគីកូរ៉េខាងជើង បានឆ្លើយតបមកវិញ នៅថ្ងៃទី២ឧសភា ដោយបានចាត់ទុក នយោបាយការទូតរបស់រដ្ឋាភិបាលអាេមរិក ថាគ្មានភាពស្មោះត្រង់ និងពោរពេញដោយល្បិចស្នៀត។ តើតាមរយៈការប្រកាសនេះ គឺកូរ៉េខាងជើង ចង់ច្រានចោលទាំងស្រុង នូវការបើកផ្លូវចរចាផ្នែកការទូត ជាមួយសហរដ្ឋអាមេរិក ឬយ៉ាងណា?
« ដំណោះស្រាយផ្លូវការទូត ដែលបោកប្រាស់ »
លោកចូ បៃដិន ទើបតែបានប្រកាសនៅចំពោះមុខសភាខុនហ្ក្រេស ថា លោកនឹងអនុវត្តគោលនយោបាយផ្លូវការទូត អមដោយការដាក់សំពាធផង ដើម្បីដោះស្រាយបញ្ហា ជាមួយកូរ៉េខាងជើង។ ក៏ប៉ុន្តែស្រាប់តែនៅថ្ងៃនេះ កូរ៉េខាងជើង បានចេញលិខិតប្រកាស ចោទថាគោលនយោបាយការទូតរបស់លោក ចូ បៃដិន គឺជាគោលនយោបាយបោកប្រាស់ គ្មានភាពស្មោះត្រង់។
បណ្តាញព័ត៌មានផ្លូវការកូរ៉េខាងជើង KCNA បានចេញផ្សាយលិខិតប្រកាស របស់របបផ្តាច់ការព្យុងយ៉ាង នៅថ្ងៃអាទិត្យនេះ ដែលបានលើកឡើងថា លោកចូ បៃដិន បានធ្វើអំពើមួយខុសឆ្គងធំណាស់ ដោយបានមើលស្រាលកូរ៉េខាងជើង ហើយចង់ប្រើយុទ្ធសាស្ត្រ ដែលកូរ៉េខាងជើង ដឹងពីល្បិចស្នៀតនេះអស់ទៅហើយ។
មន្ត្រីក្រសួងការបរទេសកូរ៉េខាងជើង ឈ្មោះ Kwon Jung Gun បានលើកឡើងថា សម្តីប្រកាសរបស់លោក ចូ បៃដិន គឺបានសបង្ហាញយ៉ាងច្បាស់ អំពីឆន្ទៈបន្តគោលនយោបាយ រករឿង បង្កបញ្ហាជាមួយកូរ៉េខាងជើង ដដែលជាដដែល ពោលគឺជាស្នៀតរបស់អាមេរិក ប្រមាណកន្លះសតវត្សមកហើយ។
មន្ត្រីដដែលនេះ បន្ថែមថា ពាក្យថា នយោបាយផ្លូវការទូត ដែលរដ្ឋបាលលោកចូ បៃដិន បានប្រកាសនោះ គឺគ្រាន់តែជាពាក្យបោកប្រាស់ ដើម្បីបិទបាំង អំពើអាក្រក់ រករឿងធ្វើបាបកូរ៉េខាងជើងតែប៉ុណ្ណោះ។ ហើយពាក្យថា ដាក់សំពាធ វិញ គឺមានន័យថាអាមេរិក នឹងបន្តគំរាមមកលើកូរ៉េខាងជើង ឲ្យបោះបង់កម្មវិធីនុយក្លេអ៊ែរ។ លិខិតប្រកាសនេះបន្ថែមថា ចាប់ពីពេលនេះ គេដឹងល្បិចស្នៀតរបស់អាមេរិកច្បាស់ហើយ ដូច្នេះកូរ៉េខាងជើងនឹងត្រូវតែចាត់វិធានការតបវិញ ឲ្យសមស្រប។
ចរចាតាមផ្លូវការទូត ដោយឈរលើតថៈភាពជាក់ស្តែង
តាមការពន្យល់លំអិតពីសំណាក់ លោកស្រី ជែន សាគី អ្នកនាំពាក្យសេតវិមានអាមេរិក បានឲ្យដឹងថា លោក ចូ បៃដិន ត្រៀមទទួលយល់ព្រម ចំពោះការប្រើគោលនយោបាយការទូត ដែលឆ្លើយតប នឹងតថៈភាពជាក់ស្តែង មួយដំណាក់កាលទៅមួយដំណាក់កាល។
លោកស្រី ជែន សាគី បានលើកឡើងថា កម្មវត្ថុធំរបស់រដ្ឋបាលលោកចូ បៃដិន គឺឈានទៅបិទកម្មវិធីនុយក្លេអ៊ែររបស់កូរ៉េខាងជើង ទាំងស្រុងតែម្តង។ ក៏ប៉ុន្តែ យុទ្ធសាស្ត្ររបស់រដ្ឋបាលលោកចូ បៃដិន គឺ មិនចង់ទៅបង្ខំដោយតក់ក្រហល់ ដើម្បីឲ្យបានកិច្ចព្រមព្រៀងធំមួយ ជាមួយកូរ៉េខាងជើង ដូចដែល រដ្ឋបាលលោកដូណាល់ ត្រាំ ធ្លាប់ធ្វើនោះទេ។ ហើយក៏មិនសំងំស្ងៀម អត់ធ្មត់ទុកពេល ដូចកាលពីសម័យលោកអូបាម៉ាដែរ។
ក្នុងន័យនេះ គឺមានន័យថា រដ្ឋបាលលោកចូ បៃដិន នឹងជ្រើសយកផ្លូវកណ្តាល ពោលគឺព្យាយាម បើកផ្លូវគ្រប់ច្រក ដើម្បីចរចាការទូត តែទន្ទឹមនឹងនេះ ក៏មិនបន្ថយដៃ ក្នុងការដាក់សំពាធដែរ។ រដ្ឋបាលលោក ចូ បៃដិន បានលើកឡើងផងដែរ ថានឹងពិគ្រោះ សិក្សាជាមួយ ភាគីកូរ៉េខាងត្បូង និងជប៉ុន ឲ្យបានច្រើនបំផុត ដើម្បីវែកផ្លូវចរចា ជាមួយកូរ៉េខាងជើង។ យ៉ាងណាមិញ នៅថ្ងៃទី២១ឧសភា ខាងមុខ លោកមូន ជាអ៊ីន ប្រធានាធិបតីកូរ៉េខាងត្បូង នឹងធ្វើដំណើរទៅជួបលោក ចូ បៃដិន នៅវ៉ាស៊ីនតោន ដើម្បីនិយាយរឿងកូរ៉េខាងជើងនេះឯង។
ប្រកែកមិនទទួល ដើម្បីទាមទារសម្បទាន
ជាមួយនឹងការប្រកាសរបស់កូរ៉េខាងជើង នៅថ្ងៃនេះ គឺវាហាក់មានន័យថា កូរ៉េខាងជើង បិទផ្លូវចរចាទាំងស្រុងតែម្តង ជាមួយសហរដ្ឋអាេមរិក។ សម្រាប់ពេលនេះ កូរ៉េខាងជើង បានប្រកាស មិនទទួលយកការចរចាការទូតជាមួយសហរដ្ឋអាមេរិកទេ ព្រោះកូរ៉េខាងជើង ចាត់ទុកថាជាល្បិចស្នៀតរបស់អាមេរិក។ យ៉ាងណាមិញ ប្រមាណ៣ខែមកនេះ ចាប់តាំងពីលោក ចូ បៃដិនបានចូលកាន់តំណែង គឺភាគីអាមេរិក បានព្យាយាមទាក់ទងទៅកូរ៉េខាងជើងច្រើនដងហើយ ដើម្បីបើកផ្លូវចរចា។ ក៏ប៉ុន្តែកូរ៉េខាងជើង បានធ្វើមិនដឹងមិនឮ រហូត។ នេះបើតាមការអះអាង របស់លោកស្រី Jalina Porter អ្នកនាំពាក្យក្រសួងការបរទេសអាេមរិក។
ក៏ប៉ុន្តែ ការប្រកាសបិទផ្លូវចរចា ពីសំណាក់កូរ៉េខាងជើង នាពេលនេះ វាអាចមានន័យថា ជាការទារថ្លៃខ្លួនក៏ថាបាន។ ពោលគឺ កូរ៉េខាងជើង ត្រូវការឲ្យរដ្ឋបាលថ្មីរបស់អាមេរិក ធ្វើសម្បទានខ្លះសិន មុននឹងសុខចិត្តចរចា។ សម្បទាន នោះ គឺវាអាចជាការដកទណ្ឌកម្មខ្លះ និងការផ្អាកឈប់ធ្វើសមយុទ្ធយោធាជាមួយកូរ៉េខាងត្បូង ជាដើម។
ហើយមួយវិញទៀត កូរ៉េខាងជើងដំឡើងសំឡេង ក្អេងក្អាងខ្លាំងនាពេលនេះ ក៏អាចមានពាក់ព័ន្ធជាមួយនឹងចិនដែរ។ ដូចយើងដឹងកន្លងមកហើយ ថាចិនមានទំនាក់ទំនង ចាំជួយទំនុកបំរុងរបបផ្តាច់ការព្យុងយ៉ាងរហូត។ ហើយនៅក្នុងសំណុំរឿងកូរ៉េខាងជើងនេះ រដ្ឋបាលលោកចូ បៃដិន ដូចជាគ្មានចេតនាចង់ពឹងចិន ឲ្យជួយវែកផ្លូវ ចរចាជាមួយកូរ៉េខាងជើងទេ។ រដ្ឋបាលលោកចូ បៃដិន បានបង្ហាញជំហរប្រជែងជាមួយចិនខ្លាំងណាស់ ដោយបានប្រមូលគៀងគរប្រទេសក្នុងតំបន់អាស៊ីប៉ាស៊ីហ្វិក ឲ្យរួមគ្នាទប់ទល់ជាមួយចិន។ សម្បទានដែលកូរ៉េខាងជើងទាមទារ ចង់ឲ្យអាមេរិកយល់ព្រម ក៏ជាផលប្រយោជន៍របស់ចិនដែរ។ ដូច្នេះ កូរ៉េខាងជើង ព្រមចរចា ឬមិនចរចា ទៅថ្ងៃមុខ គឺវាអាស្រ័យ ទៅលើការសម្រេចរបស់ចិនប៉េកាំងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ