ក្រុមប្រទេសG7 ផ្តោតពិភាក្សា លើយុទ្ធនាការឃោសនា ព័ត៌មានក្លែងក្លាយរបស់រុស្ស៊ីនិងចិន
ចុះផ្សាយនៅថ្ងៃ៖
ស្តាប់ - ០៩:១១
ក្រោយអាក់ខាន មិនបានជួបប្រជុំ ឃើញមុខគ្នាផ្ទាល់ អស់២ឆ្នាំ ដោយសារវិបត្តិកូវីដ រដ្ឋមន្រ្តីការបរទេសរបស់ក្រុមប្រទេសមហាអំណាចឧស្សាហកម្ម ទាំង៧ ត្រូវជួបគ្នាផ្ទាល់ នៅក្នុងកិច្ចប្រជុំ ដែលចាប់ផ្តើមបើក ចាប់ពីថ្ងៃចន្ទទី ៣ឧសភា ២០២១ នៅទីក្រុងឡុងដ៍ ប្រទេសអង់គ្លេស។ ការជំរុញសេដ្ឋកិច្ចចេញពីវិបត្តិកូវីដ និងការប្រយុទ្ធប្រឆាំងនឹងគំរាមកំហែងថ្មីនៅក្នុងពិភពលោក គឺជាសំណុំរឿងសំខាន់ នៅក្នុងកិច្ចពិភាក្សារបស់រដ្ឋមន្រ្តីការបរទេស នៃក្រុមប្រទេស G7។
នៅមុនបើកកិច្ចប្រជុំ នៅថ្ងៃនេះ រដ្ឋមន្រ្តីការបរទេសអង់គ្លេស ដែលជាម្ចាស់ផ្ទះ បានចេញសេចក្តីថ្លែងការណ៍ថា ក្រុមប្រទេសG7 នឹងសហការគ្នា ធ្វើយ៉ាងណាឲ្យមានការបែងចែក ស្មើភាពគ្នា វ៉ាក់សាំង បង្ការជំងឺកូវីដ ប្រយុទ្ធប្រឆាំង គ្រោះអត់ឃ្លាន ចាត់វិធានការខ្លាំងជាងមុន ក្នុងផ្នែកប្រយុទ្ធប្រឆាំងការប្រែប្រួលអាកាសធាតុ និងចុងក្រោយ គឺ សម្រេចឲ្យបានទិសដៅ របស់អង្គការសហប្រជាជាតិ ដើម្បី ឲ្យក្មេងស្រីបានទទួលការអប់រំ។ ប៉ុន្តែ អង់គ្លេសខ្លួនឯងផ្ទាល់ ទើបរងការរិះគន់ដោយសារតែកាត់ជំនួយ សម្រាប់ អង្គការយូនីសេហ្វ កាលពីសប្តាហ៍មុន។
អង់គ្លេសថា កិច្ចប្រជុំលើកនេះ នឹងផ្តោតសំខាន់ លើការបែងចែក វ៉ាក់សាំងឲ្យស្មើភាពគ្នាក្នុងពិភពលោក ដើម្បីប្រយុទ្ធប្រឆាំងភាពក្រីក្រ ប៉ុន្តែ នៅការពិតជាក់ស្តែង គឺមិនអីចឹងទេ។
អង់គ្លេសខ្លួនបានសម្រុកចាក់វ៉ាក់សាំងឲ្យប្រជាជនរបស់ខ្លួនបានច្រើនបំផុត ទាំងប្រទេសមួយចំនួនច្រើន គ្មានវ៉ាក់សាំងចាក់នឹងគេ។ នៅក្នុងរឿងប្រាក់ជំនួយអន្តរជាតិ រដ្ឋាភិបាលអង់គ្លេសបានសម្រេចកាត់បន្ថយ វិភាគទានរបស់ខ្លួន ពី ១៤ពាន់លានផោន មកនៅត្រឹម ១០ពាន់លានផោន គឺកាត់អស់ប្រមាណ ៥ពាន់លានដុល្លារ។ រដ្ឋមន្រ្តីការបរទេសអង់គ្លេស លោក Dominic Raab នៅថ្ងៃអាទិត្យម្សិលមិញ បាននិយាយការពារនយោបាយកាត់បន្ថយជំនួយរបស់រដ្ឋាភិបាលអង់គ្លេស ថា ធ្វើដោយបង្ខំចិត្ត ដោយសារតែបញ្ហាវិបត្តិកូវីដ១៩។ យ៉ាងណាក៏ដោយ ប្រមុខការបរទេសអង់គ្លេសនៅតែបញ្ជាក់ថា ទោះអង់គ្លេសកាត់បន្ថយ ប្រាក់ជំនួយ សម្រាប់កម្មវិធីរបស់អង្គការស្ប្រជាជាតិ ប៉ុន្តែ អង់គ្លេសនៅតែនាំមុខគេ ខាងផ្តល់ជំនួយអន្តរជាតិ។
នៅមុនអន្តរាគមន៍របស់រដ្ឋមន្រ្តីការបរទេសអង់គ្លេសទៅទៀត អង្គការចំនួន៣របស់អង្គការសហប្រជាជាតិ បាននិយាយព្រមានរួចហើយពីផលវិបាក ដោយសារតែអង់គ្លេស កាត់បន្ថយប្រាក់ជំនួយនេះ។ អង្គការយូនីសេហ្វេដែលធ្វើការផ្នែកអប់រំ របស់អង្គការសហប្រជាជាតិ អង្គការ UNAIDS បានសំដែងក្តីបារម្ភរបស់ខ្លួន នៅក្រោយ អង្គការ UNFPA ដែលធ្វើការទៅលើរឿងផ្លូវភេទ វាយតម្លៃថា ការកាត់បន្ថយជំនួយពីខាងប្រទេសអង់គ្លេសនឹងជំរុញឲ្យមានមនុស្ស ស្លាប់ ជាង ២សែននាក់ បន្ថែមទៀត ក្នុងពិភពលោក។
អង់គ្លេសស្នើឲ្យ ក្រុមប្រទេសG7 បង្កើតយន្តការដើម្បី ឆ្លើយតប ប្រឆាំង ជាបន្ទាន់ នឹងការឃោសនា ការផ្សព្វផ្សាយព័ត៌មានមិនពិត
រដ្ឋាភិបាលអង់គ្លេសចង់ឲ្យក្រុមប្រទេស G7 បង្កើតយន្តការរួមមួយ ដើម្បី វាយបកភ្លាមៗនឹងយុទ្ធនាការផ្សព្វផ្សាយព័ត៌មានមិនពិត ជាពិសេស ពីខាងរុស្ស៊ី និងចិន។ តាមរដ្ឋមន្រ្តីការបរទេសអង់គ្លេស នៅពេលគេឃើញ មានការផ្សាយព័ត៌មានភូតកុហក ព័ត៌មានមិនពិត និងបោកប្រាស់ យន្តការរបស់ក្រុមប្រទេសG7 នឹងអាចវាយបកបន្ទាន់ ដោយបង្កើតព័ត៌មានពិតប្រាកដ មិនថា សម្រាប់ប្រជាជនក្នុងប្រទេសដែលរងគ្រោះដោយសារយុទ្ធនាការឃោសនាព័ត៌មានមិនពិត ឬសម្រាប់ប្រជាជនរុស្ស៊ី និងប្រជាជនចិននោះទេ។
ប្រមុខការបរទេសអង់គ្លេស សំដៅចោទប្រកាន់ខ្លាំងភាគីរុស្ស៊ី ថា អ្នកបើកយុទ្ធនាការ ឃោសនា ផ្សព្វផ្សាយ ព័ត៌មានបោកប្រាស់។ តាមកាសែតអង់គ្លេស Sunday Times ការសិក្សាមួយ ដែលបានទទួលហិរញ្ញវត្ថុពីក្រសួងការបរទេសអង់គ្លេស បានបង្ហាញថា ក្រុមចោររុស្ស៊ីបានបន្លំខ្លួនជាពលរដ្ឋអង់គ្លេស ដើម្បីសរសេរខំមិន ក្នុងកាសែតអង់គ្លេស ថា ពួកគេ គាំទ្រ ឲ្យរុស្ស៊ីរំលោភឈ្លានពានទឹកដីអ៊ុយក្រែន។ ក្រោយមក កាសែតរុស្ស៊ី ក៏ដកស្រង់ ខំមិនទាំងអស់នោះ រហូតធ្វើឲ្យគេជឿថា ប្រជាជនអង់គ្លេស ឈរនៅខាងប្រទេសរុស្ស៊ី។ តាមការសិក្សាខាងលើ ក្រុមចោរព័ត៌មានវិទ្យារុស្ស៊ី បានបំភ្លៃ បំភ័ន មតិមហាជន តាមរយៈ បណ្តាញផ្សព្វផ្សាយក្នុងស្រុក នៅតាម ប្រទេសចំនួន ១៤ ដែលក្នុងមានផងដែរ ប្រទេសសមាជិករបស់ G7។ ថ្មីៗនេះ ក្រសួងការបរទេសអង់គ្លេសបានកោះហៅ ឯកអគ្គរដ្ឋទូតរុស្ស៊ី ម្តងហើយ ដើម្បី និយាយពីរឿងនេះ។ ក្រៅពីរុស្ស៊ី ចិនក៏ជាទិសដៅ ចោទប្រកាន់របស់អង់គ្លេស ដែរ ក្នុងរឿងដែលចិនជះលុយ ទៅលើប្រព័ន្ធផ្សព្វផ្សាយក្នុងបណ្តាប្រទេសដែលទទួលបានជំនួយលុយពីចិន។ តាមការសិក្សារបស់អង់គ្លេស ចិនបានផ្សព្វផ្សាយមិនពិតជាច្រើនទាក់ទងនឹងប្រសិទ្ធិភាពវ៉ាក់សាំងអង់គ្លេស ហើយនិងរឿង ប្រជាជនអ៊ុយហ្គួរ នៅខេត្តស៊ីនជាំង។ ការផ្សព្វផ្សាយឃោសនា ក្នុង និងក្រៅប្រទេសចិន និងរុស្ស៊ី ធ្វើឲ្យគេជឿថា គ្មានការរំលោភសិទ្ធិមនុស្សនៅប្រទេសចិន គ្មានគំរាមកំហែងរបស់រុស្ស៊ី លើអ៊ុយក្រែន។ បើតាមភាគីអង់គ្លេស យុទ្ធនាការឃោសនាផ្សព្វផ្សាយរបស់រុស្ស៊ី និងចិនបានធ្វើមហាជនជាច្រើន មិនជឿជាក់លើ វ៉ាក់សាំងរបស់អង់គ្លេស ឬវ៉ាក់សាំង អាមេរិក។ ធ្វើដូច្នេះ គឺដើម្បីផលប្រយោជន៍វ៉ាក់សាំងរបស់ចិន ឬវ៉ាក់សាំងរុស្ស៊ីខ្លួនឯង។
នៅក្នុងរឿង ចោទប្រកាន់ ប្រទេសរុស្ស៊ី និងចិន ថា ជាអ្នកផ្សព្វផ្សាយព័ត៌មានមិនពិតនេះ អង់គ្លេសនិងអាមេរិកនិយាយចុះសម្រុងគ្នាខ្លាំងណាស់។ នៅមុនធ្វើដំណើរទៅចូលរួមក្នុងកិច្ចប្រជុំនៅទីក្រុងឡុងដ៍ រដ្ឋមន្រ្តីការបរទេសអាមេរិក លោកអង់តូនី ប្លីងកិន នៅបានចោទប្រកាន់ផងដែរប្រទេសចិន ថា បានរំលោភកម្មសិទ្ធិបញ្ញា មិនគោរពច្បាប់ធ្វើពាណិជ្ជកម្ម។ ដូច្នេះ ចិនក៏ជាសំណុំរឿងសំខាន់ ដែលគេពិភាក្សាផងដែរ នៅក្នុងកិច្ចប្រជុំរបស់ G7នៅសប្តាហ៍ នេះ។
ការប្រជុំG 7 ដើម្បីនិយាយពីការគំរាមកំហែងរបស់ រុស្ស៊ី និងចិន
បារាំង អាល្លឺម៉ង់ អង់គ្លេស កាណាដា អ៊ីតាលី និងជប៉ុនសុទ្ធជាសម្ព័ន្ធមិត្តរបស់អាមេរិក ដែលអាចចាត់ទុកជាក្រុមប្រទេសលោកខាងលិច ដែលកំពុងពើបប្រទះនឹងការឡើងអំណាចរបស់ចិន និងរុស្ស៊ី។ និយាយប្រាប់អ្នកកាសែត កាលពីថ្ងៃអាទិត្យ រដ្ឋមន្រ្តីការបរទេសអង់គ្លេសនិយាយថា អង់គ្លេសរួមគ្នា អាចរៀបចំ ជំនួបកំពូលរបស់ក្រុមប្រទេសប្រជាធិបតេយ្យ នៅក្នុងលោក។ គេអាចកាត់យល់ថា ចិន និងរុស្ស៊ី ដែលគ្មានមុខនៅក្នុងជំនួបG7នៅសប្តាហ៍នេះ មិនមែនជាប្រទេសប្រជាធិបតេយ្យ ប៉ុន្តែ ជាប្រទេសផ្តាច់ការដែល ប្រទេសលោកខាងលិច កំពុងប្រកួតប្រជែងជាមួយ។
ពីមុន G8 មានរុស្ស៊ី ចូលរួមដែរ ដែលធ្វើឲ្យគេមិនសូវឃើញច្បាស់ ការបែងចែកបក្សពួកគ្នាជាក្រុមនោះទេ។ ប៉ុន្តែ នៅពេលរុស្ស៊ី លែងមានមុខនៅក្នុង ក្រុមប្រទេសមហាអំណាចឧស្សាហកម្ម តទៅទៀត ក្រុមប្រទេស G7 ត្រូវគេមើលឃើញច្បាស់ ថា ប្លុក ក្រុមប្រទេសអ្នកមាន លោកខាងលិច ដែលតំណាង ជិតពាក់កណ្តាល នៃទ្រព្យសម្បត្តិពិភពលោក គឺ ៤០ទ្រីលានដុល្លារ ដែលកំពុងបារម្ភភ័យខ្លាចបាត់បង់ប្រយោជន៍របស់ខ្លួន នៅចំពោះមុខចិន និងរុស្ស៊ី។ ចិន ដែលក្លាយជាប្រទេសមហាអំណាចសេដ្ឋកិច្ចលេខ២ក្នុងពិភពលោក ចំណែករុស្ស៊ី ដែលជាមហាអំណាចយោធាមានដែនដី ធំជាងគេក្នុងពិភពលោក។
ដើម្បីទប់ទល់នឹងចិន និងរុស្ស៊ី ភាគីអង់គ្លេសដែលជាម្ចាស់ផ្ទះរៀបចំ G7បានអញ្ជើញផងដែរ រដ្ឋមន្រ្តីឥណ្ឌា អគ្គលេខាធិការអាស៊ាន ជាដើម ដែលនៅក្នុងនោះ សមាជិកមួយចំនួនកំពុងមានជម្លោះជាមួយចិន នៅសមុទ្រចិនខាងត្បូង។
នៅក្នុងអាណត្តិលោកដូណាល់ ត្រាំ ក្រុមប្រទេសG7មិនសូវ ជាធ្វើការជាមួយគ្នាដោយរលូនទេ ដោយសារតែលោកដូណាល់ ត្រាំ ដើរឈ្លោះជាមួយគេឯង មិនថា ជាមួយ គូសត្រូវ ឬ សម្ព័ន្ធមិត្ត។ ប៉ុន្តែ ទោះបីជាអាមេរិកមានលោកចូ បៃដិន សន្យាត្រលប់មកពង្រឹងទំនាក់ទំនងជាមួយសម្ព័ន្ធមិត្តឡើងវិញ ដើម្បី ប្រឆាំង រដ្ឋអំណាចផ្តាច់ការ ប៉ុន្តែ គេមិនត្រូវសង្ឃឹម ថា អាមេរិកនឹងត្រលប់មកធ្វើជាមហាអំណាច ដឹកនាំគេដូចមុននោះ។
វិបត្តិកូវីដ រួមផ្សំនឹងនយោបាយមិនប្រាកដប្រជារបស់លោកដូណាល់ ត្រាំ នាពេលកន្លងមកបានធ្វើឲ្យប្រទេសជាច្រើន មិនថាធំ ឬតូច ងើបឈរ ចេះពង្រឹង ខ្លួនឯង ដោយកាត់បន្ថយការពឹងអាស្រ័យលើក្រុមប្រទេសអ្នកមាន។ គេបានរួមគ្នា នៅថ្នាក់មូលដ្ឋាន នៅថ្នាក់តំបន់ ពោល គឺលែងសូវ រង់ចាំ រំពឹងខ្លាំងពីជំនួយប្រទេសលោកខាងលិចដូចមុន។ ម្យ៉ាងទៀត នៅក្នុងកាលៈទេសៈ គ្រប់ប្រទេសក្នុងពិភពលោកកំពុង ស្រវេស្រវ៉ា ចង់ងើបចេញពីវិបត្តិសេដ្ឋកិច្ច វិបត្តិសុខភាពដោយសារជំងឺរាតត្បាតកូវីដនេះ ការរួមគ្នារបស់ក្រុមប្រទេសមហាអំណាចឧស្សាហកម្ម ដើម្បីតតាំងនឹងចិន និងរុស្ស៊ី មិនមែនជារឿងដែលគេត្រូវលើកមកនិយាយជាអាទិភាព នៅពេលនេះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ