ហេតុអ្វីតំបន់អាកទិកក្លាយជាចំណុចប្រកួតប្រជែងគ្នាខ្លាំងនៅពេលនេះ?
ចុះផ្សាយនៅថ្ងៃ៖
ស្តាប់ - ០៧:៥៤
នៅប្រទេសអ៊ីស្លង់ រដ្ឋសមាជិកតំបន់អាកទិកបើកធ្វើជំនួបកំពូលនៅថ្ងៃព្រហស្បតិ៍ ទី២០ ឧសភានេះ ដើម្បីពិភាក្សាអំពីកិច្ចសហប្រតិបត្តិការដោយសន្តិវិធីនៅក្នុងតំបន់។ កិច្ចប្រជុំនៃក្រុមប្រឹក្សាអាកទិក កើតឡើងចំពេលដែលកម្តៅនិងភាពតានតឹងជុំវិញតំបន់នេះកំពុងកើនឡើងខ្លាំងជាពិសេសរវាងរុស្ស៊ី និងសហរដ្ឋអាមេរិក។តើអ្វីទៅជាក្រុមប្រឹក្សាអាកទិក? តើប្រទេសណាខ្លះជាសមាជិកនៃក្រុមប្រឹក្សានេះ? ហើយថាតើហេតុអ្វីបានជាតំបន់អាកទិកក្លាយជាចំណុចប្រកួតប្រជែងគ្នាខ្លាំងនៅពេលនេះ?
តើអ្វីទៅជាក្រុមប្រឹក្សាអាកទិក?
ក្រុមប្រឹក្សាអាកទិកគឺជាវេទិកាអន្តររដ្ឋាភិបាលកម្រិតខ្ពស់មួយដែលត្រូវបានបង្កើតឡើងនៅថ្ងៃទី ១៩ ខែកញ្ញា ឆ្នាំ១៩៩៦ ក្នុងទីក្រុងអូតាវ៉ាប្រទេសកាណាដា។ កម្មវត្ថុក្នុងការបង្កើតក្រុមប្រឹក្សានេះគឺដើម្បីជំរុញលើកកម្ពស់កិច្ចសហប្រតិបត្តិការក្នុងចំណោមរដ្ឋអាកទិក ជនជាតិដើមភាគតិច និងប្រជាជនរស់នៅតំបន់អាកទិកដទៃទៀតឲ្យរួមគ្នាកម្លាំងគ្នា ដោះស្រោយ បញ្ហាពាក់ព័ន្ធតំបន់ ជាពិសេសបញ្ហាស្តីអំពីការអភិវឌ្ឍប្រកបដោយចីរភាព និងការការពារបរិស្ថាននៅក្នុងតំបន់។
សេចក្តីប្រកាសទីក្រុងអូតាវ៉ា បានកំណត់ប្រទេសចំនួន ៨ ជាសមាជិកនៃក្រុមប្រឹក្សាតំបន់អាកទិក ក្នុងនោះរួមមានប្រទេសកាណាដា ដាណឺម៉ាក ហ្វាំងឡង់ អ៊ីស្លង់ ន័រវែស រុស្ស៊ី ស៊ុយអែត និងសហរដ្ឋអាមេរិក។
រដ្ឋជាសមាជិកទាំង៨ តែងតែប្រជុំគ្នារៀងរាល់ ២ ឆ្នាំម្តង នៅក្រុមប្រឹក្សាតំបន់អាកទិក ហើយ ប្រធានក្រុមប្រឹក្សានៃតំបន់ក៏ត្រូវវិលផ្លាស់វេនគ្នារៀងរាល់ពីរឆ្នាំម្តងដែរ ក្នុងចំណោមរដ្ឋជាសមាជិកទាំងអស់។ ប្រទេសដំបូងដែលធ្វើជាប្រធានក្រុមប្រឹក្សាតំបន់អាក់ទិកគឺកាណាដានៅក្នុងឆ្នាំ ១៩៩៦-១៩៩៨។
ចំណែក អ៊ីស្លង់គឺជាប្រធានក្រុមប្រឹក្សាតំបន់អាកទិកសម្រាប់ឆ្នាំ ២០១៩-២០២១ ដូច្នោះហើយបានជារដ្ឋសមាជិកតំបន់អាកទិកបើកធ្វើជំនួបកំពូលក្នុងទីក្រុងរ៉ៃក្យាវិក ប្រទេសអ៊ីស្លង់នាថ្ងៃព្រហស្បតិ៍ ទី២០ ឧសភានេះ។
ជំនួបកំពូលក្រុមប្រឹក្សានៃតំបន់អាកទិក
បញ្ហាកើនឡើងកំដៅផែនដី ការកើនឡើងនូវវត្តមានទ័ពរបស់រុស្ស៊ី ព្រមទាំងអនាគតប្រជាជនរស់នៅក្នុងតំបន់អាកទិកគឺជាប្រធានបទសំខាន់ដែលមានក្នុងមានរបៀបវារៈនៃជំនួបកំពូល សម្រាប់រដ្ឋមន្រ្តីការបរទេសរបស់ប្រទេសសមាជិកទាំង៨ ដែលបានទៅជួបប្រជុំគ្នានៅប្រទេសអ៊ីស្លង់ក្នុងថ្ងៃព្រហស្បតិ៍នេះ។
ជាការគួរឲ្យកត់សម្គាល់ កិច្ចប្រជុំក្រុមប្រឹក្សាអាកទិកនៅថ្ងៃនេះ កើតឡើងក្នុងពេលដែលភាពតានតឹងកំពុងកើតមានខ្លាំងរវាងរុស្ស៊ី និងអាមេរិក។ ប្រទេសរុស្ស៊ីដែលនឹងត្រូវឡើងក្លាយជាប្រធានក្រុមប្រឹក្សាតំបន់អាកទិកថ្មីសម្រាប់ឆ្នាំ ២០២១-២០២៣ មានបំណងចង់ជំរុញកិច្ចពិភាក្សា ស្របពេលដែលកំពុងបង្កើនកម្លាំងយោធារបស់ខ្លួននៅក្នុងតំបន់។
នាពេលថ្មីៗនេះ រដ្ឋមន្ត្រីការបរទេសរុស្ស៊ី បានចេញមុខប្រកាសថាតំបន់អាកទិកដែលស្ថិតនៅប៉ូលខាងជើងនៃផែនដីគឺជាតំបន់ស្ថិតក្រោមការកាន់កាប់របស់រុស្ស៊ី។ ទន្ទឹមនឹងការអះអាងនេះ គេឃើញរុស្ស៊ីកាន់តែបង្ហាញសកម្មភាពយោធាខ្លាំងឡើងនៅក្នុងតំបន់ ដោយចេះតែបង្កើនការដាក់តាំងគ្រឿងសព្វាវុធ ការចល័តទ័ព និងមូលដ្ឋានទ័ពរហូតធ្វើឲ្យគេមានការបារម្ភខ្លាចអំពីលទ្ធភាពផ្ទុះការតតាំងគ្នាណាមួយនៅក្នុងតំបន់នាពេលអនាគត។
នៅមុនជំនួបកំពូល ប្រមុខការបរទេសអាមេរិកលោក អង់តូនី ប្ល៊ីងកិន បានអំពាវនាវ ឲ្យប្រទេសដែលមានព្រំប្រទល់ជាប់តំបន់អាក់ទិក គោរពគ្នា ពួតដៃធ្វើការនឹងគ្នាប្រកដោយកិច្ចសហប្រតិបត្តិការខ្ពស់ដើម្បីរក្សាស្ថិរភាព សន្តិភាព និងជៀសវាងនូវសកម្មភាពប្រកួតប្រជែងគ្នាដែលធ្វើឲ្យតំបន់នេះក្លាយជាកន្លែងប្រកួតប្រជែងគ្នាខ្លាំង។
ទន្ទឹមគ្នានេះ ប្រមុខការបរទេសអាមេរិកបានលើកឡើងថា ប្រសិនណាបើមេដឹកនាំរុស្ស៊ី និងអាមេរិកធ្វើការរួមគ្នា សហការគ្នា ...នោះ ពិភពលោកអាចជាកន្លែងដែលមានសុវត្ថិភាព និងសុខដុមរមនាជាងមុន។ ក៏ប៉ុន្តែ លោកប្ល៊ីងកិនក៏បានព្រមានដែរថា ក្រុងវ៉ាស៊ីនតោនមិនអាចឱបដៃឈរមើលរុស្ស៊ីធ្វើអ្វីផ្តេសផ្តាសនោះទេ និងថានឹងឆ្លើយតបចំពោះរាល់ការឈ្លានពានរបស់រុស្ស៊ី។
ក្រោយបានឭការលើកឡើងរបស់ប្រមុខការបរទេសអាមេរិក លោក Sergey Lavrov រដ្ឋមន្ត្រីការបរទេសរុស្ស៊ីបានឆ្លើយតបវិញថា ប្រទេសរុស្ស៊ីបានត្រៀមខ្លួនរួចជាស្រេច ដើម្បីពិភាក្សាលើគ្រប់បញ្ហាទាំងអស់ដោយគ្មានការលើកលែងប្រសិនបើការពិភាក្សានោះ មានភាពស្មោះត្រង់ និងអាចទុកចិត្តបាន។
តើហេតុអ្វីបានជា តំបន់អាកទិក ក្លាយជាចំណុចប្រកួតប្រជែងគ្នាខ្លាំងម្ល៉េះ នៅពេលនេះ?
ប្រទេសរុស្ស៊ីដែលមើលឃើញថា អាមេរិកមានចំណាប់អារម្មណ៍ខ្លាំងឡើង លើតំបន់អាកទិក បានខំពង្រឹងវត្តមានយោធារបស់ខ្លួនជាបណ្តើរៗ ក្នុងរយៈពេលប៉ុន្មានឆ្នាំថ្មីៗនេះ ដោយបើកដំណើរការ និងធ្វើទំនើបកម្មមូលដ្ឋាន និងវាលអាកាសជាច្រើននៅក្នុងតំបន់ ដែលត្រូវបានគេបោះបង់ចោលចាប់តាំងពីចុងសម័យអតីតសហភាពសូវៀត។
សហរដ្ឋអាមេរិក បានសម្តែងការព្រួយបារម្ភចំពោះការបង្កើនសកម្មភាពយោធារុស្ស៊ីនៅក្នុងតំបន់ និងចោទប្រកាន់ទីក្រុងម៉ូស្គូពីការធ្វើនយោបាយយោធានិយមនៅអាកទិក។ ចំណែកពីមន្ត្រីរុស្ស៊ីវិញ និយាយថាសកម្មភាពយោធារបស់ណាតូ និងអាមេរិកនៅក្នុងតំបន់នេះគឺពិតណាស់ជាសកម្មភាពបង្កហេតុ និងជាសកម្មភាពដែលមិនត្រូវបានគេឃើញនោះទេចាប់តាំងពីសង្គ្រាមលោកលើកទី ២ មក។
ជាការពិត តំបន់អាកទិក កំពុងតែក្លាយជាចំណុចប្រកួតប្រជែងគ្នាក្តៅគគុកមួយ រវាងរុស្ស៊ី និងសហរដ្ឋអាមេរិកក៏ដូចជាអង្គការណាតូដែរ។ ហេតុអ្វី?
អាកទិក ដែនដីនៃឱកាស
តំបន់អាកទិក មានទំហំប្រមាណ ២១លានគីឡូម៉ែត្រការ៉េ គ្របដណ្តប់ទៅលើសមុទ្រ អាកទិក ហើយតំបនភាគខាងជើងជារបស់រុស្ស៊ី។ ដោយសារអ្នកវិទ្យាសាស្រ្តព្រមានពីការរលាយទឹកកកក្នុងល្បឿនដ៏លឿន នៅតំបន់ប៉ូលអាកទិក តំបន់នេះក៏ក្លាយជាមន្ទីរពិសោធន៍ដ៏សំខាន់មួយសម្រាប់កិច្ចសហប្រតិបត្តិការ ក្នុងការប្រយុទ្ធប្រឆាំងនឹងការកើនឡើងកំដៅផែនដី។
កត្តានេះ បានធ្វើឲ្យរុស្ស៊ីបារម្ភ ហើយរដ្ឋមន្ត្រីការបរទេសរុស្ស៊ី បានចេញសេចក្តីព្រមានជាពាក្យសំដីខ្លាំងៗប្រឆាំងនឹងមហិច្ឆតារបស់លោកខាងលិច ដោយទទូចអះអាងថា អាកទិចជាទឹកដីរបស់ខ្លួន។ ហើយថាសកម្មភាពយោធារបស់រុស្ស៊ីនៅក្នុងតំបន់គឺ“ ស្របច្បាប់”។
មួយវិញទៀត ប្រទេសជាច្រើនកំពុង សំឡឹងឃើញពីឱកាសថាការរលាយទឹកកនៅ តំបន់អាកទិកអាចហុចផលល្អដល់ការរុករក។ ក្រៅពីនេះ គេប្រមើលឃើញថាអាកទិក អាចក្លាយជាតំបន់ខ្សែផ្លូវទឹកដឹកជញ្ជូន សម្រាប់ដោះដូរពាណិជ្ជកម្ម រួមបញ្ចូលទាំងការនាំចេញប្រេងនិងឧស្ម័នបម្រុងនៅក្រោមសមុទ្រនៅទីនេះ។
ហេតុដូចនេះហើយទើបប្រទេសអ្នកមានជាច្រើនក្រៅពីអាមេរិក និងរុស្ស៊ី ក៏មានចិនដែរ ចាប់អារម្មណ៍ចង់ទៅរុករក និងកាន់កាប់តំបន់អាកទិករហូតធ្វើឲ្យតំបន់នេះ ក្លាយជាចំណុចប្រកួតប្រជែងគ្នាខ្លាំងនៅពេលបច្ចុប្បន្ននេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ