ហ្កាហ្សា៖ ទីបំផុត អ៊ីស្រាអែល និង ក្រុមហាម៉ាសប៉ាឡេស្ទីន ព្រមទទួលយកបទឈប់បាញ់
ចុះផ្សាយនៅថ្ងៃ៖
ស្តាប់ - ០៦:៤៣
បន្ទាប់ពីបាញ់ប្លោងគ្រាប់ដាក់គ្នា រយៈពេល១១ថ្ងៃ នៅតំបន់ហ្កាហ្សា ទីបំផុតទៅ កងទ័ពអ៊ីស្រាអែល និងក្រុមហាម៉ាសប៉ាឡេស្ទីន បានសុខចិត្តទទួលយកបទឈប់បាញ់ ដែលចូលជាធរមាន ចាប់ពីថ្ងៃទី២១ឧសភានេះទៅ។ តែយ៉ាងណា នេះគឺជាបទឈប់បាញ់ដ៏ផុតស្រួយបំផុត ព្រោះភាគីទាំងសងខាង សុទ្ធតែបានអះអាងថា អាចនឹងបើកការវាយប្រហារវិញ ប្រសិនបើមានភាគីម្ខាងទៀត រំលោភបំពាន។ ការបាញ់ប្លោងប្រមាណ១១ថ្ងៃមកនេះ បានផ្តាច់ជីវិតមនុស្សចំនួន២៣២នាក់ នៅតំបន់ហ្កាហ្សា ក្នុងនោះមានកុមារ៦៥នាក់ ចំណែកខាងអ៊ីស្រាអែលវិញ មានស្លាប់១២នាក់។ តើភាពស្ងប់ស្ងាត់ គ្មានសំឡេងស៊ីរ៉ែន និងសំឡេងគ្រាប់ផ្ទុះនេះ អាចនឹងមានយូរដល់ពេលណា?
« អរគុណអេហ្ស៊ីប »
នេះជាបទឈប់បាញ់ដែលគ្រប់គ្នា គ្មានសង្ឃឹមថាអាចមានពិតនោះទេ កាលពីព្រឹកថ្ងៃព្រហស្បតិ តែទីបំផុតនៅវេលាយប់ ភាគីទាំងសងខាង គឺកងទ័ពអ៊ីស្រាអែល និង ក្រុមហាម៉ាស និងក្រុមជីហាតអ៊ីស្លាម នៅតំបន់ហ្កាហ្សា បានប្រកាសថាសុខចិត្តទទួលយកបទឈប់បាញ់។ បទឈប់បាញ់ បានចូលជាធរមាន នៅវេលាម៉ោង ២រំលងអាធ្រាត្រ ហើយនៅព្រឹកថ្ងៃសុក្រទី២១ឧសភា គេសង្កេតឃើញថា គ្មានយន្តហោះចម្បាំងអ៊ីស្រាអែល ហោះឆ្វែលឆ្ងាត់ទៀតទេ។
នេះគឺជាលទ្ធផលនៃការប្រឹងប្រែង បញ្ចុះបញ្ចូល នាំពាក្យសម្តី របស់ក្រុមមន្ត្រីការទូតប្រទេសអេហ្ស៊ីប។ អេហ្ស៊ីបមានទំនាក់ទំនងល្អជាមួយអ៊ីស្រាអែលផង និងជាមួយក្រុយហាម៉ាសនៅហ្កាហ្សាផង។ នៅយប់ថ្ងៃព្រហស្បតិ៍ ខុទ្ទកាល័យសន្តិសុខរបស់អ៊ីស្រាអែល ដែលដឹកនាំដោយលោកនាយករដ្ឋមន្ត្រីណេតាន់យ៉ាហ៊ូ បានប្រកាសថា គេបានសុខចិត្តជាឯកច្ឆ័ន ទទួលយកបទឈប់បាញ់ ដែលអេហ្ស៊ីបបានស្នើ។ ហើយស្របពេលគ្នានេះដែរ ក្រុមហាម៉ាស និងក្រុមជីហាតអ៊ីស្លាម នៅហ្កាហ្សា ក៏បានប្រកាសដែរថា គេព្រមទទួលសំណើបទឈប់បាញ់ ដែលអេហ្ស៊ីបបានស្នើ។
លោកចូ បៃដិន ក៏បានថ្លែងអរគុណអេហ្ស៊ីបដែរ ដែលបានប្រឹងប្រែង ធ្វើឲ្យបទឈប់បាញ់នេះ ក្លាយជាការពិត។ លោកប្រធានាធិបតីអាមេរិកបានបន្ថែមថា លោកសង្ឃឹមថា បទឈប់បាញ់នេះ នឹងក្លាយជាឱកាសថ្មី ដ៏ល្អ សម្រាប់អ៊ីស្រាអែល និងប៉ាឡេស្ទីន ក្នុងការឈានទៅចាប់ដៃគ្នា កសាងសន្តិភាពពិតប្រាកដ ព្រោះថា ទាំងប្រជាជនអ៊ីស្រាអែល ទាំងប្រជាជនប៉ាឡេស្ទីន គឺសុទ្ធតែមានសិទ្ធិស្មើគ្នា ក្នុងការទទួលបាននូវសុខសន្តិភាព សេរីភាព ប្រជាធិបតេយ្យ និងការរីកចម្រើន។
ប្រកាសឈ្នះរៀងខ្លួន
បទឈប់បាញ់នេះ ជាបទឈប់បាញ់ ដែលគ្មានលក្ខខណ្ឌអ្វីទាំងអស់។ ពោលគឺឈរលើគោលការស្ម័គ្រចិត្ត ទទួលយល់ព្រមរបស់ភាគីទាំងសងខាង។ បើតាមការវិភាគមើលទៅ គឺម្ខាងៗ ហាក់បានសម្រេចកម្មវត្ថុខ្លួនរៀងៗខ្លួនដែរ បានជាគេសុខចិត្តឈប់បាញ់។
កម្មវត្ថុរបស់ក្រុមហាម៉ាស គឺឆក់ឱកាសវាយប្រហារបាញ់គ្រាប់រ៉ូកែត ទៅលើអ៊ីស្រាអែល ដើម្បីបង្ហាញថា ខ្លួនគឺជាអ្នកការពារផលប្រយោជន៍ប្រជាជនប៉ាឡេស្ទីន ហ៊ានចេញមុខធ្វើសង្គ្រាមជាមួយអ៊ីស្រាអែល ដែលជាសត្រូវឈ្លានពាន។ ធ្វើបែបនេះ គឺដើម្បីប្រជែងជាមួយលោកម៉ាសមូដ អាបាស និងក្រុមហ្វាតា ដែលដឹកនាំអាជ្ញាធរប៉ាឡេស្ទីន នៅតំបន់ស៊ីហ្សកដានី។ ផ្ទុះសង្គ្រាម១១ថ្ងៃមកនេះ លោកម៉ាសមូដ អាបាស គ្មានចេញមុខទាល់តែសោះ ព្រោះថាធាតុពិតគឺគ្មានលទ្ធភាពធ្វើអ្វីបាន។
១១ថ្ងៃមកនេះ ក្រុមហាម៉ាសបានបាញ់រ៉ូកែត ប្រមាណ៤៣០០គ្រាប់ បើទោះបីដឹងថា ៩០%ត្រូវប្រព័ន្ធខែលមីស៊ីលស្ទាក់ជាប់ក៏ដោយ តែកម្មវត្ថុគេគឺធ្វើបែបនេះ ដើម្បីបង្ហាញថាគេតស៊ូ។ យ៉ាងណាមិញ នៅថ្ងៃនេះ ក្រុមហាម៉ាស បានប្រកាសថាខ្លួនបានជ័យជំនះ ដែលបានតស៊ូទប់ទល់ជាមួយអ៊ីស្រាអែល។ ដូច្នេះ អំណេះតទៅ ក្នុងទឹកចិត្តប្រជាជនប៉ាឡេស្ទីនទូទៅ មិនថាអ្នកនៅហ្កាហ្សា អ្នកនៅហ្សេរុយសាឡឹម ឬស៊ីសហ្សកដានីទេ គឺគេគិតថា ក្រុមហាម៉ាសក្លាហាន និងមានការតស៊ូ ក្នុងការការពារបុព្វហេតុប៉ាឡេស្ទីន មិនដូចក្រុមហ្វាតារបស់លោកម៉ាសមូដអាបាសទេ។
ដោយឡែក កម្មវត្ថុអ៊ីស្រាអែល គឺកំទេចសមត្ថភាពប្រយុទ្ធ និងក្បាលម៉ាស៊ីននយោបាយរបស់ក្រុមហាម៉ាស។យោងតាមលិខិតប្រកាសរបស់កងទ័ពអ៊ីស្រាអែល ១១ថ្ងៃមកនេះ អ៊ីស្រាអែល បានសម្លាប់មេក្រុមហាម៉ាស ចំនួន២៥នាក់ កំទេចរូងក្រោមដីដែលជាច្រកចេញចូល ដឹកជញ្ជូនអាវុធ ចំនួនជាង១០០គីឡូម៉ែត្រ និងបានកំទេចអាគារជាង១០អាគារ ដែលជាទីតាំងស្តុកអាវុធ និងប្រតិបត្តិការរបស់ក្រុមហាម៉ាស។ ដូច្នេះ សម្រាប់ភាគីអ៊ីស្រាអែល គេក៏បានសម្រេចកម្មវត្ថុមួយផ្នែកធំរបស់គេដែរ បើទោះបីជាត្រូវខូចឈ្មោះ លើឆាកអន្តរជាតិបន្តិចក៏ដោយ ថាជាអ្នកធ្វើបាប សម្លាប់ប្រជាជាស្លូតត្រង់នៅហ្កាហ្សា។
បទឈប់បាញ់ដ៏ផុយស្រួយ
បើយើងប្រមើល ក្នុងអតីតកាល ក្រុមហាម៉ាស និងអ៊ីស្រាអែល បានផ្ទុះសង្គ្រាមនឹងគ្នា៤ដងហើយ ទាំងលើកនេះ គឺនៅឆ្នាំ ២០០៩ ២០១២ ២០១៤ ហើយនឹងលើកនេះ។ កាលពីឆ្នាំ២០១៨ ភាគីទាំងពីរបានសុខចិត្ត ឈប់បាញ់ម្តងដែរ ហើយបានសន្យាកសាងអភិវឌ្ឍន៍តំបន់ហ្កាហ្សា តែទីបំផុតនៅតែ ផ្ទុះសង្គ្រាមសារជាថ្មី។ ដូច្នេះ បទឈប់បាញ់នេះ វាមានលក្ខណៈផុយស្រួយណាស់។
យ៉ាងណាមិញ ភាគីទាំងសងខាង សុទ្ធតែអះអាងហើយ ថាបើមានម្ខាងរំលោភបំពាន គឺគេនឹងចាប់ផ្តើមបាញ់ប្លោងគ្រាប់ឡើងវិញ។ លោក Ezzat el Rechiq សមាជិកការិយាល័យនយោបាយ របស់ក្រុមហាម៉ាស បាននិយាយកាលពីយប់មិញថា ក្រុមហាម៉ាស ត្រៀមបាញ់គ្រាប់រ៉ូកែតជាថ្មីជានិច្ច ប្រសិនបើអ៊ីស្រាអែលធ្វើអ្វីមិនល្អ។ មេក្រុមហាម៉ាសម្នាក់នេះ បានប្រាប់បណ្តាញព័ត៌មាន Reuters ថាក្រុមហាម៉ាស ប្តេជ្ញាការពារវិហារអ៊ីស្លាមAl-Aqsa នៅក្រុងហ្សេរុយសាឡឹម ហើយប្រឆាំងដាច់ខាត នូវការដែលអាជ្ញាធរអ៊ីស្រាអែល ធ្វើបាបប្រជាជនប៉ាឡេស្ទីន នៅក្រុងហ្សេរុយសាឡឹម។ ក្នុងន័យនេះ គឺថាបើថ្ងៃមុខ អ៊ីស្រាអែលធ្វើការរឹបអូសផ្ទះ ឬដីរបស់គ្រួសារប៉ាឡេស្ទីន នៅហ្សេរុយសាឡឹម គឺមានន័យថា ក្រុមហាម៉ាសអាចនឹងបាញ់គ្រាប់រ៉ូកែតមកជាថ្មី។
នៅខាងអ៊ីស្រាអែល គេក៏បារម្ភដែរ ថាក្រុមហាម៉ាស នឹងមិនគោរពបទឈប់បាញ់នេះយូរនោះទេ។ ចៅហ្វាយក្រុងម្នាក់នៅអ៊ីស្រាអែល ឈ្មោះ Alon Davidi បាននិយាយតាមវិទ្យុថា កុំល្ងង់ជឿថាក្រុមហាម៉ាស នឹងឈប់បាញ់រ៉ូកែតជារៀងរហូតនោះ។ នៅពេលណាក្រុមនេះ មានគ្រឿងសព្វាវុធច្រើនមកវិញ គឺគេចាប់ផ្តើមទៀត។ លោកម្នាក់នេះ បានថ្លែងសោកស្តាយថា អ៊ីស្រាអែលឆាប់យល់ព្រមទទួលយកបទឈប់បាញ់ពេក គួរណាតែបន្តវាយប្រហារទៀត ដើម្បីឲ្យក្រុមហាម៉ាសវិនាសតែម្តង ទើបចប់រឿង។
យ៉ាងណាក៏ដោយ ក្នុងពេលឆាប់ៗនេះ អេហ្ស៊ីប នឹងបញ្ជូនគណប្រតិភូទៅចំនួន២ ដើម្បីឃ្លាំតាមដានមើល ការគោរពបទឈប់បាញ់នេះ។ ការប្រឹងប្រែងផ្នែកការទូត មិនទាន់ចប់ត្រឹមនេះទេ គឺនៅវែងឆ្ងាយទៀតណាស់ ដើម្បីឈានទៅរកសន្តិភាពពិតប្រាកដ រវាងអ៊ីស្រាអែល ប៉ាឡេស្ទីន។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ