ហុងកុងចាប់ខ្លួនមនុស្ស និងហាមឃាត់ការជួបជុំរំលឹកខួប៣២ឆ្នាំ នៃការបង្រ្កាបបាតុកម្ម នៅទីលានធានអានមេន
ចុះផ្សាយនៅថ្ងៃ៖
ស្តាប់ - ០៧:៣១
ថ្ងៃទី៤មិថុនានេះ គឺជាថ្ងៃគម្រប់ខួប៣២ឆ្នាំ នៃការបង្រ្កាបបាតុកម្មនៅទីលានធានអានមេន ទីក្រុងប៉េកាំង។ រហូតមកទល់ពេលនេះ រដ្ឋាភិបាលកុម្មុយនីស្តចិន នៅតែមិនបង្ហាញតួលេខ អំពីចំនួនមនុស្ស ដែលត្រូវបានកងទ័ពចិនសម្លាប់ និងចាប់ដាក់ឃុំ ក្នុងហេតុការណ៍នេះទេ។ កន្លង៣២ឆ្នាំមកនេះ ការជួបជុំ រំលឹកវិញ្ញាណក្ខន្ធអ្នកស្លាប់ ត្រូវបានគេហាមឃាត់យ៉ាងតឹងតែងបំផុត នៅលើទឹកដីចិន លើកលែងតែនៅ ម៉ាកាវ និងហុងកុងប៉ុណ្ណោះ។ ក៏ប៉ុន្តែ ដោយលើកឡើងពីបរិបទកូវីដ១៩ អាជ្ញាធរហុងកុង បានហាមឃាត់ការជួបជុំ នៅថ្ងៃទី៤មិថុនា ព្រមទាំងបានចាប់ខ្លួន សកម្មជនប្រជាធិបតេយ្យមួយចំនួនផង។
ហាមឃាត់ការជួបជុំ ដោយហេតុផលកូវីដ
អាជ្ញាធរហុងកុង បានចេញប្រកាស ថាការជួបជុំទាំងអស់ ត្រូវហាមឃាត់។ អ្នកដែលល្មើស អាចប្រឈមនឹងទោសជាប់ពន្ធនាគារ៥ឆ្នាំ។ ដូចកាលពីឆ្នាំមុន គឺអាជ្ញាធរហុងកុង បានលើកឡើងពីហេតុផលថា ដើម្បីបង្ការការឆ្លងរាលដាលកូវីដ១៩។ តែធាតុពិត ការហាមឃាត់នេះ គឺវាស្ថិតនៅក្នុងបរិបទ នៃការគាបសង្កត់ ប្រើអំណាចកាន់តែខ្លាំងឡើង របស់ចិនប៉េកាំង មកលើប្រជាជនហុងកុង ជាក់ស្តែង តាមរយៈច្បាប់សន្តិសុខជាតិ ដែលច្បាប់នេះ គឺមានសុពលភាពហាមឃាត់ រាល់ការតវ៉ានយោបាយ គ្រប់ទំរង់ទាំងអស់តែម្តង។
ដូចយើងបានដឹង ការរំលឹកខួប នៃការសម្លាប់រង្គាលនៅទីលានធានអានមេន ថ្ងៃទី៤ មិថុនា ១៩៨៩ ត្រូវបានរដ្ឋចិនប៉េកាំង ហាមឃាត់ដាច់ខាត នៅលើទឹកដីចិន។ កន្លងមកមានតែនៅ ម៉ាកាវ និងហុងកុងទេ ដែលមានការអនុញ្ញាតឲ្យមានការជួបជុំរំលឹកវិញ្ញាណក្ខន្ធ។ តែយូរៗទៅ ម៉ាកាវ ត្រូវបានរដ្ឋអំណាចចិនប៉េកាំងសង្គ្រប់បានទាំងស្រុង។ ហើយសម្រាប់ហុងកុងវិញ លើកនេះជាឆ្នាំទី២ហើយ ដែលគេហាមឃាត់ ដោយលើកឡើងពីហេតុផលកូវីដ១៩។
កាលពីឆ្នាំមុន បើទោះបីជាមានការហាមឃាត់ តែប្រជាជនហុងកុងរាប់ពាន់នាក់ បានជួបជុំគ្នាអុជភ្លើងទៀន នៅទីលាន វិកតូរីយ៉ា កណ្តាលក្រុងហុងកុង។ សមត្ថកិច្ច មិនបានបំបែក បង្រ្កាបការជួបជុំនេះទេ តែក្រោយមក គេបានចាប់ខ្លួន សកម្មជននយោបាយប្រជាធិបតេយ្យ សរុបជាង១០០នាក់ ដោយចោទថាបានញុះញង់ បំផុសបំផុល ឲ្យមានការជួបជុំ បំពាននឹងច្បាប់ហាមឃាត់។ នៅព្រឹកថ្ងៃសុក្រទី៤មិថុនា២០២១ សមត្ថកិច្ចហុងកុង បានពង្រាយកំលាំងនគរបាល ប្រមាណ៧០០០នាក់ ដើម្បីបញ្ចេញសាច់ដុំ គំរាមទុកជាមុន ថាបើមានការជួបជុំណាមួយ គឺគេនឹងប្រើកម្លាំងបំបែក។ ចំណែកនៅទីក្រុងប៉េកាំងវិញ យោងតាមដំណឹង ផ្តល់ឲ្យដោយអ្នកយកព័ត៌មានបារាំង AFP នៅថ្ងៃនេះ គឺមានការយាមកាមតឹងតែងបំផុត នៅទីលានធានអានមេន។ អ្នកចេញចូលឆ្លងកាត់ទីលានធានអានមេន គឺត្រូវសមត្ថកិច្ចឆែកឆេរអត្តសញ្ញាណ យ៉ាងហ្មត់ចត់ណាស់។
ចាប់ខ្លួនអ្នកផ្សព្វផ្សាយសារ អំពាវនាវឲ្យរំលឹកខួបធានអានមេន
នៅព្រឹកថ្ងៃសុក្រនេះ លោកស្រី Chow Hang-tun មេធាវី អាយុ៣៧ឆ្នាំ និងជាអនុប្រធានចលនា សម្ព័ន្ធភាពហុងកុង Alliance Hong Kong ត្រូវបានសមត្ថកិច្ចឃាត់ខ្លួន។ នគរបាល៤នាក់ បានចុះមកចាប់លោកស្រី នៅការិយាល័យធ្វើការផ្ទាល់ រួមជាមួយមនុស្សប្រុសម្នាក់ទៀត អាយុជាង២០ឆ្នាំ ដោយចោទថាបានសរសេរសារ ផ្សព្វផ្សាយតាមបណ្តាញសង្គម បំផុសបំផុល ឲ្យមានការជួបជុំរំលឹកវិញ្ញាណក្ខន្ធអ្នកស្លាប់ នៅទីលានធានអានមេន។ នៅចំពោះមុខអ្នកកាសែត តំណាងសមត្ថកិច្ចនគរបាលហុងកុងម្នាក់ បានលើកឡើងថា សាររបស់លោកស្រី Chow Hang-tun គឺមានខ្លឹមសារ ផ្សព្វផ្សាយ ញុះញង់ ជំរុញ ឲ្យមនុស្ស ធ្វើសកម្មភាពនៅទីសាធារណៈ ដោយបំពាននឹងការហាមឃាត់ជាធរមាន។
គួរបញ្ជាក់ថា តាមពិត Alliance Hong Kong មិនបានចេញមុខរៀបចំ កម្មវិធីជួបជុំណាមួយ នៅថ្ងៃនេះទេ។ តែលោកស្រី Chow Hang-tun បានសរសេរសារលើ Facebook ដោយបានអំពាវនាវ ឲ្យប្រជាជនហុងកុងទាំងអស់ ដែលមានចិត្តចង់ចូលរួមរំលឹកវិញ្ញាណក្ខន្ធ ដល់អ្នកស្លាប់នៅទីលានធានអានមេន ត្រូវអុជទាន ឬបើកពន្លឺពិលទូរស័ព្ទ នៅតាមបង្អួច តាមផ្ទះរៀងៗខ្លួន នៅយប់ថ្ងៃសុក្រទី៤មិថុនា។ សម្រាប់លោកស្រី លោកស្រីមានបំណងទៅទីលានវិកតូរីយ៉ា ដើម្បីអុជទៀន ក្នុងនាមផ្ទាល់ខ្លួនប៉ុណ្ណោះ។
ដោយឡែក លោក Lee Cheuk-yan អតីតសមាជិកសភាហុងកុង និងជាប្រធានAlliance Hong Kong ហើយដែលបច្ចុប្បន្ន កំពុងជាប់ឃុំនោះ បានសរសេរលើ Facebook ថា « របបផ្តាច់ការ អាចហាមឃាត់ការជួបជុំមែន តែមិនអាចមកហាមឃាត់ កម្លាំងតវ៉ាពុះកញ្ជ្រោល ដែលមាននៅក្នុងទឹកចិត្ត របស់មនុស្សម្នាក់ៗបានឡើយ »។ ឃ្លានេះ ហាក់មានន័យប្រាប់ទៅប្រជាជនហុងកុង ថាទោះបីមិនអាចទៅជួបជុំគ្នាដូចសព្វមួយដង ដើម្បីរំលឹកខួបនៃការសម្លាប់រង្គាល នៅទីលានធានអានមេន ក៏ដោយ តែប្រជាជនហុងកុងម្នាក់ៗ មិនត្រូវភ្លេចថ្ងៃនេះទេ ហើយត្រូវតែមានទឹកចិត្តតវ៉ា ដើម្បីសិទ្ធិសេរីភាពជានិច្ច។
តៃវ៉ាន់ អាមេរិក រួមគ្នា រិះគន់ចិន
រឿងរ៉ាវបង្ក្រាបបាតុកម្មនៅទីលានធានអានមេន គឺជាស្នូលនៃភាពខុសគ្នា ជាមូលដ្ឋានតែម្តង នៃរបបដឹកនាំចិនប៉េកាំង និងរបបដឹកនាំតៃវ៉ាន់។ តៃវ៉ាន់បានព្យាយាមនៅឆ្ងាយពីចិនកុម្មុយនិស្តដោយសារថ្នាក់ដឹកនាំ និងប្រជាជនតៃវ៉ាន់ គឺសុទ្ធតែជាអ្នកស្រលាញ់ សិទ្ធិសេរីភាព លទ្ធិប្រជាធិបតេយ្យ។ ដូច្នេះ វាជារឿងធម្មតាបំផុត ដែលតៃវ៉ាន់ បរិហារចិនប៉េកាំង ដែលបានសម្លាប់បាតុករ តវ៉ានៅទីលានធានអានមេន រាប់ពាន់នាក់ កាលពីឆ្នាំ១៩៨៩។
សម្រាប់ខួបលើកទី៣២នេះ លោកស្រី ឆៃ អ៊ីងវែន ប្រមុខរដ្ឋាភិបាលតៃវ៉ាន់ បានសរសេរលើ Facebook ថា លោកស្រីជឿជាក់ថា ប្រជាជនតៃវ៉ាន់ មានមោទនភាពណាស់ ដែលរស់នៅលើទឹកដីមួយ មានសិទ្ធិសេរីភាព មានប្រជាធិបតេយ្យ ហើយប្រជាជនតៃវ៉ាន់ មិនអាចភ្លេចបានជាដាច់ខាត ថ្ងៃទី ៤ មិថុនា ឆ្នាំ១៩៨៩ ថ្ងៃដែលកងទ័ពចិន បានសម្លាប់បាតុករនៅទីលានធានអានមេន។ ប្រជាជនតៃវ៉ាន់ ចងចាំថ្ងៃនេះ ហើយតាំងចិត្តជានិច្ច ដោយមិនខ្លាចញញើត។ សម្តីនេះ គឺលោកស្រី ឆៃ អ៊ីងវែន បានសំដៅដោយចំតែម្តង ទាន់ទិននឹងការគំរាមកាន់តែខ្លាំងឡើងៗ ពីសំណាក់ចិន ដែលចង់ដណ្តើមគ្រប់គ្រងកោះតៃវ៉ាន់។
ដោយឡែក មិនមែនតែតៃវ៉ាន់ទេ ដែលយកថ្ងៃនេះ ដើម្បីរិះគន់ចិន។ សហរដ្ឋអាមេរិក ក៏បានយកឱកាសនេះ ទាមទារឲ្យចិនទទួលស្គាល់ការពិត និងកំហុសអតីតកាលដែរ។ លោក អង់តូនី ប្លីងកិន ប្រមុខការទូតអាមេរិក បានលើកឡើងថា សហរដ្ឋអាមេរិក នៅឈរជាមួយប្រជាជនចិនជានិច្ច ហើយទាមទារ ឲ្យរដ្ឋាភិបាលកុម្មុយនិស្តចិន គោរពសិទ្ធិមនុស្ស។ លោកបន្ថែមថា សហរដ្ឋអាមេរិក សូមរំលឹកវិញ្ញាណក្ខន្ធ របស់អ្នកស្លាប់ទាំងអស់ នៅក្នុងហេតុការណ៍ ៤ មិថុនា ១៩៨៩ និងសូមអបអរចំពោះភាពក្លាហាន របស់សកម្មជនប្រជាធិបតេយ្យទាំងឡាយ ដែលបន្តការតស៊ូនាពេលបច្ចុប្បន្ននេះ ប្រឈមជាមួយនឹងអំណាចផ្តាច់ការរបស់ប៉េកាំង។
លោកក៏បានអំពាវនាវផងដែរ ថាចិនត្រូវតែបង្ហាញតម្លាភាព ទទួលស្គាល់ការពិត បញ្ចេញតួលេខពិតប្រាកដ ថាមានមនុស្សប៉ុន្មាននាក់ ដែលបានស្លាប់នៅទីលានធានអានមេន។ យោងតាមឯកសារអង់គ្លេស នៅយប់ថ្ងៃទី៤ ឈានចូលថ្ងៃទី៥ មិថុនា ឆ្នាំ១៩៨៩ កងទ័ពចិន បានសម្លាប់បាតុករ នៅទីលានធានអានមេន យ៉ាងហោច ១ម៉ឺននាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ