ម៉ាលី៖ មេបញ្ជាការ ហ្កយតា ឡើងជាប្រធានាធិបតី ខណៈសហគមអន្តរជាតិ រង់ចាំការសន្យាអំពីការបោះឆ្នោត
ចុះផ្សាយនៅថ្ងៃ៖
ស្តាប់ - ០៧:៣៧
ថ្ងៃទី៧ មិថុនានេះ លោកមេបញ្ជាការ អាស៊ីមី ហ្កយតា ត្រូវស្បថចូលកាន់តំណែង ជាប្រធានាធិបតីបណ្តោះអាសន្ន បន្ទាប់ពីត្រូវបានក្រុមប្រឹក្សាធម្មនុញ្ញប្រទេសម៉ាលី សម្រេចអនុម័ត។ លោកមេបញ្ជាការរូបនេះ បានធ្វើរដ្ឋប្រហារ២ដងហើយ ក្នុងរវាង៩ខែចុងក្រោយនេះ ដោយបានអះអាងថា ដើម្បីរៀបចំប្រទេស ស្តារឯកភាពជាតិ និងសន្តិសុខ មុននឹងប្រគល់អំណាចទៅឲ្យរដ្ឋាភិបាលស៊ីវីលមួយ ដែលនឹងកើតឡើង ដោយការបោះឆ្នោត នៅថ្ងៃខាងមុខ។ យ៉ាងណាក៏ដោយ សហគមអន្តរជាតិ កំពុងរងចាំតាមដាន អំពីការប្រកាសសន្យា របស់លោកប្រធានាធិបតីថ្មីរូបនេះ ថាតើនឹងរៀបចំការបោះឆ្នោតដោយសេរី នៅពេលណា។ មានការព្រួយបារម្ភថា ប្រទេសម៉ាលី អាចនឹងស្ថិតក្រោមអំណាចយោធាជារៀងរហូត។
៩ខែ រដ្ឋប្រហារ២ដង
លោកមេបញ្ជាការ អាស៊ីមី ហ្កយតា ដែលបច្ចុប្បន្ន មានអាយុត្រឹមតែ ៣៧ឆ្នាំ គឺជាកូនប្រុស របស់អតីតមេបញ្ជាការកងអាវុធហ័តម៉ាលី ម្នាក់។ បន្ទាប់ពីបានរៀបចប់ សាលានាយទាហាន Prytanée នៅតំបន់ Kati នាយទាហានវ័យក្មេង អាស៊ីមី ហ្កយតា ត្រូវបានបញ្ជូនឲ្យទៅធ្វើបេសកកម្មនៅភាគខាងជើងម៉ាលី ចាប់ពីឆ្នាំ២០០២។ ពីមួយដំណាក់ ទៅមួយដំណាក់ នាយទាហាន អាស៊ីមី ហ្កយតា បានឡើងឋានន្តរៈសក្តិ ក្លាយជាមេញ្ជាការ បន្ទាប់ពីបានវាយប្រយុទ្ធ ជាមួយក្រុមឧទ្ទាមបំបែកទឹកដី និងក្រុមជីហាត នៅភាគខាងជើងម៉ាលី។
ដោយសារភាពស្វាហាប់ក្នុងការប្រយុទ្ធ និងការដឹកនាំកងទ័ព លោកមេបញ្ជាការ អាស៊ីមី ហ្កយតា បានកើនប្រជាប្រិយភាព កាន់តែខ្លាំងឡើង នៅក្នុងជួរកងទ័ពម៉ាលី។ គឺនៅឆ្នាំ ២០២០ ថ្ងៃទី១៩ ខែសីហា ដែលសហគមអន្តរជាតិ បានស្គាល់មុខលោក មេបញ្ជាការវ័យក្មេងរូបនេះ។ លោក អាស៊ីមី ហ្កយតា បានដឹកនាំរដ្ឋប្រហារយោធា ដោយបានទំលាក់ លោកប្រធានធិបតី Ibrahim Boubacar Keïta ចេញពីតំណែង បន្ទាប់ពីមានបាតុកម្មតវ៉ា អស់ជាច្រើនខែ ពីសំណាក់ក្រុមនយោបាយប្រឆាំង។
លោក អាស៊ីមី ហ្កយតា បានប្រកាសថា កងទ័ពម៉ាលី បានសម្រេចយកអំណាចដឹកនាំប្រទេសមកគ្រប់គ្រងមួយរយៈ ដើម្បីស្តារសណ្តាប់ធ្នាប់ និងស្ថិរភាព មុននឹងប្រគល់អំណាចនេះ ទៅឲ្យរដ្ឋាភិបាលស៊ីវីលបណ្តោះអាសន្នមួយ ហើយបន្ទាប់មកទៀត នឹងរៀបចំការបោះឆ្នោត។ សហគមអន្តរជាតិ បានទាមទារ ឲ្យកងទ័ពម៉ាលី ត្រូវតែរៀបចំការបោះឆ្នោត ក្នុងរវាង១៨ខែ ពោលគឺនៅខ្ទង់ខែកុម្ភៈ ឆ្នាំ២០២២។
ក៏ប៉ុន្តែ បានតែ៩ខែក្រោយមក គឺកាលពីថ្ងៃទី២៤ ឧសភា ថ្មីៗនេះ ស្រាប់តែ លោកមេបញ្ជាការ អាស៊ីមី ហ្កយតា បានធ្វើរដ្ឋប្រហារម្តងទៀត ដោយបានទំលាក់លោកប្រធានាធិបតី និងនាយករដ្ឋមន្ត្រី ដែលដឹកនាំរដ្ឋាភិបាលបណ្តោះអាសន្ន។ ហើយភ្លាមៗនោះ ក្រុមប្រឹក្សាធម្មនុញ្ញប្រទេសម៉ាលី ក៏បានសម្រេចតែងតាំង លោកមេបញ្ជាការ អាស៊ីមី ហ្កយតា ឲ្យធ្វើជាប្រធានាធិបតីបណ្តោះអាសន្នតែម្តង។
បារម្ភខ្លាចម៉ាលី ស្ថិតក្នុងដៃរបបយោធាជារៀងរហូត
អ្វីដែលសហគមអន្តរជាតិ ព្រួយបារម្ភ គឺគេខ្លាចថា ម៉ាលីនឹងធ្លាក់ចូលទៅក្នុងរបបសឹក ដឹកនាំដោយក្រុមកងទ័ពជារៀងរហូត។ ក្រុមកងទ័ពម៉ាលី ដែលដឹកនាំដោយ លោកមេបញ្ជាការ អាស៊ីមី ហ្កយតា នេះ ហាក់ដូចជាមានអំណាច អាចធ្វើផ្គរ ធ្វើភ្លៀងបានតាមចិត្ត។ ធ្វើរដ្ឋប្រហារម្តងហើយ ដោយសន្យាបើកផ្លូវឲ្យមានរដ្ឋាភិបាលស៊ីវីល បណ្តោះអាសន្នមួយ តែដោយមិនពេញចិត្តនឹងសមាសភាព នៃរដ្ឋាភិបាលបណ្តោះអាសន្ននោះ ក៏ស្រាប់តែធ្វើរដ្ឋប្រហារម្តងទៀត។ ទាំងនេះ វាបង្ហាញពីអស្ថិរភាព ដោយអ្វីៗ គឺហាក់អាស្រ័យទៅលើការពេញចិត្ត ឬមិនពេញចិត្តរបស់លោក អាស៊ីមី ហ្កយតា។
សម្រាប់ពេលនេះ សហគមអន្តរជាតិ មានការប្រុងប្រយ័ត្នណាស់។ យ៉ាងណាមិញ នៅក្នុងពិធីស្បថចូលកាន់តំណែង របស់លោក អាស៊ីមី ហ្កយតា គឺប្រទេសអឺរ៉ុប មិនបញ្ជូនឯកអគ្គរដ្ឋទូតឲ្យទៅចូលរួមទេ គឺគេបញ្ជូនតែមន្ត្រីទូតតូចតាចប៉ុណ្ណោះ ឲ្យតំណាង ដែលនេះបង្ហាញថា គេមិនសូវគាំទ្រ និងមិនទាន់ទុកចិត្ត លោកប្រធានាធិបតីថ្មីនេះទេ។ ដូចគ្នាដែរ ថ្វីបើប្រេសិតពិសេស របស់អង្គការសហប្រជាជាតិ ប្រចាំនៅម៉ាលី មានវត្តមាននៅក្នុងពិធីស្បថចូលកាន់តំណែងក្តី តែនេះជាគោលជំហរនៅកណ្តាល មិនមែនមានន័យថា អង្គការសហប្រជាជាតិ គាំទ្រការចូលកាន់តំណែង របស់លោកមេបញ្ជាការ អាស៊ីមី ហ្កយតា នេះទេ។
អ្វីដែលសហគមអន្តរជាតិ កំពុងរងចាំតាមដានបំផុតនោះ គឺការប្រកាសសន្យាច្បាស់ៗ របស់លោកប្រធានាធិបតីថ្មីរូបនេះ។ តើការបោះឆ្នោត នឹងត្រូវរៀបចំ នៅពេលណាឲ្យប្រាកដ? នៅខែកុម្ភៈ ឆ្នាំ២០២២ ដូចអ្វីដែលធ្លាប់បានសន្យា? ឬមួយក៏ប្រកាសបែប បើកចំហរ ថារៀបចំនៅក្នុងអំឡុងឆ្នាំ២០២២? តែកាលណា គ្មានកាលវិភាគនយោបាយច្បាស់លាស់ ពីសំណាក់លោកអាស៊ីមី ហ្កយតា គឺមានន័យថា ការព្រួយបារម្ភកាន់តែធំ។ លោកមេបញ្ជាការរូបនេះ អាចនឹងរកលេសអញ្ចេះអញ្ចោះ បន្តដឹកនាំរដ្ឋាភិបាលយោធារហូតតរៀងទៅ។ ម៉ាលី អាចនឹងស្ថិតក្នុងកណ្តាប់ដៃ របស់របបផ្តាច់ការ ដឹកនាំដោយពួកកងទ័ព។
មិនមានចលនាជំទាស់ផ្ទៃក្នុង តែរដ្ឋាភិបាលថ្មី ត្រូវប្រយុទ្ធនឹងក្រុមជីហាតអ៊ីស្លាម
បើនិយាយពីផ្ទៃក្នុងម៉ាលី លោកមេបញ្ជាការ អាស៊ីមី ហ្កយតា បានប្រមូលក្រុមឧទ្ទាមបំបែកទឹកដី នៅភាគខាងជើង ដែលមានឈ្មោះថា ក្រុមសហប្រតិបត្តិការចលនា Azawad (CMA) ឲ្យចូលរួមជាមួយ។ បន្ថែមពីនេះ បើតាមការរំពឹងទុក លោកអាស៊ីមី ហ្កយតា អាចនឹងតែងតាំងលោក Choguel Kokalla Maïga ឲ្យធ្វើជានាយករដ្ឋមន្ត្រី។ លោកម្នាក់នេះ គឺជាអ្នកនយោបាយជើងចាស់ នៃក្រុមមួយឈ្មោះថា ចលនាបង្រួបបង្រួមអ្នកស្នេហាជាតិ (M5/RFP)។ គឺក្រុមនេះហើយ ដែលបានចេញមុខ ដឹកនាំបាតុកម្មប្រឆាំង លោកប្រធានាធិបតី Ibrahim Boubacar Keïta កាលពីឆ្នាំ២០២០។
ដូច្នេះ បើតាមការសង្កេតទូទៅ គឺលោក មេបញ្ជាការ អាស៊ីមី ហ្កយតា បានធ្វើការថ្លែងថ្លែង បែកចែកអំណាច ជាមួយក្រុមឧទ្ទាមបំបែកទឹកដីនៅភាគខាងជើងផង និងក្រុមចលនានយោបាយស៊ីវីលផង។ បើនិយាយពីអារម្មណ៍របស់ប្រជាជនទូទៅវិញ អ្នកកាសែតបារាំង ដែលបានសម្ភាសន៍ សួរប្រជាជនខ្លះ នៅក្រុងបាម៉ាកូ គឺគេបានឆ្លើយថា គេមិនជំទាស់ នឹងការដែលលោក មេបញ្ជាការ អាស៊ីមី ហ្កយតា ឡើងធ្វើជាប្រធានាធិបតីទេ ព្រោះថាកន្លងមកគេធុញទ្រាន់ នឿយណាយណាស់ នឹងរដ្ឋាភិបាលស៊ីវីល ដែលពុករលួយ ស្រុកកាន់តែក្រីក្រី ហើយគ្មានសន្តិសុខ។ ដូច្នេះ ឲ្យពួកកងទ័ពមកគ្រប់គ្រងមួយរយៈ ក៏ល្អម្យ៉ាងដែរ។ នេះគឺជាការលើកឡើង របស់អ្នកក្រុងបាម៉ាកូខ្លះ។
ដោយឡែក បើទោះបីផ្ទៃក្នុងម៉ាលី លោកមេបញ្ជាការ អាស៊ីមី ហ្កយតា ហាក់មានបង្អែកមែន តែម៉ាលី ត្រូវប្រឈមនឹងសត្រូវមួយទៀតដ៏ធំ គឺក្រុមជីហាតអ៊ីស្លាម ដែលកំពុងតែធ្វើទុក្ខបុកម្នេញ នៅតំបន់សាហ៊ែលទាំងមូលតែម្តង។ កងទ័ពម៉ាលី ពុំសូវមានសមត្ថភាព គ្មានថវិកា ហើយពុំសូវមានសម្ភារៈសព្វាវុធទៀត។ ដូច្នេះ កងទ័ពម៉ាលី ត្រូវការជំនួយបច្ចេកទេស ពីសំណាក់ក្រុមប្រទេសអន្តរជាតិ គឺបារាំងតែម្តង។ បើគ្មានកងទ័ពបារាំងជួយ ម៉ាលី អាចនឹងរងទុក្ខកាន់តែធំ ដោយសារមិនអាចទប់ ក្រុមជីហាតអ៊ីស្លាមបាន។
ដោយឡែក បារាំងបានសម្រេចព្យួរ កិច្ចសហការជាមួយកងទ័ពម៉ាលីហើយ បន្ទាប់ពីលោក មេបញ្ជាការ អាស៊ីមី ហ្កយតា បានធ្វើរដ្ឋប្រហារជាលើកទី២។ ដូច្នេះ អ្វីៗគឺវាអាស្រ័យ លើការសន្យាជាក់ច្បាស់ របស់លោកមេបញ្ជាការ អាស៊ីមី ហ្កយតា ថាអាចធ្វើឲ្យបារាំងទុកចិត្តបានឬទេ។ បើបារាំងទុកចិត្ត គឺគេអាចបើកការសហការឡើងវិញ ដើម្បីបន្តប្រយុទ្ធ ជាមួយក្រុមជីហាតអ៊ីស្លាម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ