ក្រុមប្រទេសមហាឧស្សាហកម្មG7 ស្រាក់កម្លាំងគ្នាដើម្បីទប់ទល់ឥទ្ធិពលរបស់ចិន
ចុះផ្សាយនៅថ្ងៃ៖
ស្តាប់ - ០៧:៤២
ជំនួបកំពូលនៃក្រុមប្រទេសមហាអំណាចឧស្សាហកម្ម G7បានឈានដល់ថ្ងៃបិទបញ្ចប់ នៅថ្ងៃអាទិត្យទី ១៣មិថុនា ២០២១។ ជំនួបកំពូល របស់ក្រុមប្រទេសG7 នៅប្រទេសអង់គ្លេស ដែលមានការចូលរួមសំខាន់ពីប្រធានាធិបតីអាមេរិកថ្មី គឺលោកចូ បៃដិន ត្រូវបានកត់សំគាល់ ដោយការរួបរួមមតិ គ្នា ជាធ្លុង របស់ក្រុមប្រទេសអ្នកមាន នៅគ្រប់សំណុំរឿង តាំងការប្រយុទ្ធប្រឆាំងនឹងជំងឺរាតត្បាត បញ្ហាអាកាសធាតុ និងចុងក្រោយ គឺការបង្កើតគម្រោងថ្មី សម្រាប់ប្រជែងគម្រោងផ្លូវមួយ ខ្សែក្រវ៉ាត់មួយ របស់ចិន។
នៅក្នុងជំនួបកំពូល កាលពីថ្ងៃសៅរ៍ទី ១២មិថុនា ក្រុមប្រទេស មហាឧស្សាហកម្មទាំង៧ នៅទីបំផុតទៅ បានយល់ព្រមព្រៀងគ្នា គាំទ្រឲ្យបង្កើតគម្រោងវិនិយោគមហាសាលមួយ ដើម្បីប្រជែងជាមួយគម្រោងសេដ្ឋកិច្ចរបស់ចិន ផ្លូវមួយ ខ្សែក្រវ៉ាត់មួយ។
ទៅតាមគំនិតផ្តួចផ្តើមរបស់ប្រធានាធិបតីអាមេរិក គម្រោងវិនិយោគថ្មី ដើម្បីប្រជែងនឹងគម្រោងផ្លូវមួយ ខ្សែក្រវ៉ាត់មួយរបស់ចិន មានឈ្មោះ ថា Build Back Better World (B3W) ដែលប្រែសម្រួលជាភាសាខ្មែរថា “កសាងឡើងវិញ ពិភពលោកឲ្យល្អជាងមុន”។ ឈ្មោះនេះយកលំនាំតាមពាក្យឃោសនាបោះឆ្នោតរបស់លោកចូ បៃដិនកន្លងមក។
គម្រោងការរបស់អាមេរិក ដែលគាំទ្រដោយបណ្តាប្រទេសមហាអំណាចឧស្សាហកម្ម ផ្តោតសំខាន់លើការសាងសង់ហេដ្ឋារចនាសម្ព័ន្ធ នៅតាមប្រទេសដែលមានប្រាក់ចំណូលទាប និងមធ្យម ពីនេះដល់ឆ្នាំ ២០៣៥ ដោយត្រូវការប្រាក់វិនិយោគប្រមាណ ៤០ ទ្រីលានដុល្លារ។
នៅថ្ងៃសៅរ៍ ក្រុមប្រទេសG7 មិនបានលម្អិតថា តើពួកគេ នឹងត្រូវចូលរួមថវិកា ម្នាក់ៗ ប៉ុន្មាននោះទេ។ គេគ្រាន់តែដឹងថា ក្រុមប្រទេស G7 និងប្រទេសសម្ព័ន្ធមិត្ត ដូចជា អូស្ត្រាលី ឥណ្ឌា កូរ៉េខាងត្បូង និងអាហ្វ្រិកខាងត្បូងដែលបានចូលរួមនៅក្នុងជំនួបកំពូល នៅថ្ងៃសៅរ៍ បានសម្រេចរួមគ្នាថា នឹងជំរុញលើកទឹកចិត្តឲ្យមានការវិនិយោគច្រើន ពីក្រុមហ៊ុនឯកជន ទៅតាមមុខព្រួញមួយចំនួន ដូចជា អាកាសធាតុ សុខភាព សន្តិសុខ សុខាភិបាល បច្ចេកវិទ្យា។ មានន័យថា ជាជាង ពឹងផ្អែកទាំងស្រុង លើថវិការដ្ឋ ក្រុមហ៊ុនឯកជននឹងចូលរួមសកម្ម ក្នុងគម្រោងហេដ្ឋារចនាសម្ព័ន្ធថ្មី ស្នើឡើងដោយអាមេរិកលើកនេះ។
រដ្ឋបាលលោកចូ បៃដិនបានបញ្ជាក់រួចហើយថា ក្រុមហ៊ុនឯកជនអាចចូលរួម ចំណែក ក្នុងទំហំទឹកប្រាក់រាប់ពាន់លានដុល្លារ ក្នុងគម្រោងសាងសង់ហេដ្ឋារចនាសម្ព័ន្ធ នៅតាមបណ្តាប្រទេសក្រីក្រ និងប្រាក់ចំណូលមធ្យម នៅទឹកដីអាហ្វ្រិក អាស៊ី និងនៅអាមេរិកខាងត្បូង ជាទីដែល ផ្លូវមួយខ្សែក្រវ៉ាត់មួយរបស់ចិន កំពុងឆ្លងកាត់រួចហើយ។
សម្រាប់ រដ្ឋបាលអាមេរិក គេមិនបានបង្កើតគម្រោងនេះឡើង ក្នុងន័យប្រឆាំងនឹងចិននោះទេ។ ប៉ុន្តែ រហូតមក ក្រៅតែពី គម្រោងផ្លូវមួយ ខ្សែក្រវ៉ាត់មួយ គេគ្មានគម្រោងណាផ្សេង ដែលមានលក្ខណៈប្រជាធិបតេយ្យ ផ្តល់ប្រយោជន៍ ពិតប្រាកដដល់ប្រទេសក្រីក្រ និងប្រទេសមានប្រាក់ចំណូលមធ្យមនោះទេ។ រដ្ឋបាលអាមេរិក ចង់សំដៅដល់ បំណុលវណ្ឌក ការធ្លាក់ខ្លួនក្រោមឥទ្ធិពលរបស់ចិន របស់បណ្តាប្រទេស ដែលមានឆ្លងកាត់គម្រោងវិនិយោគផ្លូវមួយ ខ្សែក្រវ៉ាត់មួយរបស់ចិន។ តាមអាមេរិក ផ្ទុយពីគម្រោងផ្លូវមួយខ្សែក្រវ៉ាត់មួយរបស់ចិន គម្រោងវិនិយោគ ថ្មីរបស់ក្រុមប្រទេស G7 នឹងមានតម្លាភាព ឲ្យតម្លៃ សំខាន់ទៅលើក្រិត្យក្រមបរិស្ថាន និងការគោរពសិទ្ធិមនុស្ស ពោលគឺជារបៀបធ្វើជំនួញ ដែលគ្មានការកេងប្រវ័ញ្ច យកប្រយោជន៍ និង ដោយគ្មានគិតបញ្ហាគោរពសិទ្ធិមនុស្ស ដូចប្រទេសចិននោះទេ។ សម្រាប់អាមេរិក គេមិនអាចធ្វើជំនួញដោយស្មើភាពជាមួយចិននោះទេ ព្រោះថា ចិនបានប្រើកម្លាំងពលកម្ម ដែលបានមកពីការងារចាប់បង្ខំទៅលើជនជាតិអ៊ុយហ្គួរ នៅខេត្តស៊ីនជាំង។
មួយវិញទៀត ជាមួយនឹងគម្រោងថ្មីរបស់ក្រុមប្រទេស G7 ប្រទេសនីមួយៗ អាចមានជម្រើសច្រើនជាងមុន ពោលគឺ គេអាចសម្រេចថា តើយកគម្រោង របស់ចិន ឬគម្រោង របស់ក្រុមប្រទេស G7។
នៅថ្ងៃបិទបញ្ចប់ជំនួបកំពូល G7 លោកចូ បៃដិនបានមានប្រសាសន៍ថា គម្រោងសាងសង់ហេដ្ឋារចនាសម្ព័ន្ធ ដែលដូចគ្នានឹងគម្រោងផ្លូវមួយ ខ្សែក្រវ៉ាត់មួយរបស់ចិន នឹងផ្តល់យុត្តិធម៌ ផ្តល់ប្រយោជន៍ដោយស្មើភាគគ្នា មិនដូច ករណីរបស់ចិននោះទេ។
ចិន៖ សម័យកាលដែលក្រុមប្រទេសមួយក្តាប់តូច សម្រេចជោគវាសនាពិភពលោកបានចប់យូរហើយ
ក្រុមប្រទេសមហាអំណាចឧស្សាហកម្ម G7យល់ព្រមព្រៀង រួមគ្នា ដើម្បីបង្កើតគម្រោងសាងសង់ហេរដ្ឋារចនាសម្ព័ន្ធ ថ្មីមួយ ដើម្បីទប់ទល់ឥទ្ធិពលរបស់ចិន នៅក្នុងពិភពលោក។ ប្រតិកម្មទៅនឹងរឿងនេះ អ្នកនាំពាក្យរបស់ស្ថានទូតចិន ប្រចាំទីក្រុងឡុងដ៍ បាននិយាយថា សម័យដែលក្រុមប្រទេសមួយក្តាប់តូច សម្រេចជោគវាសនារបស់ពិភពលោក គឺបិទបញ្ចប់ តាំងពីយូរណាស់មកហើយ។ “ចិនជឿថា ប្រទេសក្នុងពិភពលោក មិនថា ប្រទេសធំ តូច ខ្លាំង ឬខ្សោយ ក្រ ឬអ្នកមាននោះទេ គឺសុទ្ធតែស្មើភាពគ្នា ហើយការសម្រេច កិច្ចការពិភពលោក គឺត្រូវ ឆ្លងកាត់តាមរយៈការពិភាក្សា រវាងគ្រប់ប្រទេស” នេះជាប្រសាសន៍របស់ អ្នកនាំពាក្យរបស់ស្ថានទូតចិន នៅប្រទេសអង់គ្លេស ដែលដកស្រង់សំដី ដោយទីភ្នាក់ងារព័ត៌មានអង់គ្លេស Reuters។
គម្រោងការរបស់ក្រុមប្រទេស G7 អាចប្រជែងឈ្នះគម្រោងផ្លូវមួយ ខ្សែក្រវ៉ាត់មួយ របស់ចិនដែរឬទេ?
គម្រោងផ្លូវសូត្រថ្មី ឬផ្លូវមួយ ខ្សែក្រវ៉ាត់ មួយ របស់ចិន ត្រូវបានលោកប្រធានាធិបតី ចិន ស៊ី ជីនពីង ចាប់ផ្តើមបង្កើតឡើង នៅឆ្នាំ ២០១៣ សម្រាប់សម្រេចមហិច្ឆតាសេដ្ឋកិច្ចចិន។ គិតរហូតមកដល់ពេលនេះ មានប្រទេសប្រមាណ ១៣០ ក្នុងពិភពលោក តាំងពីអាស៊ី អាហ្វ្រិក អឺរ៉ុប រហូត ដល់ទឹកដីអាមេរិកខាងត្បូង បានចុះកិច្ចព្រមព្រៀងជាមួយចិន ដើម្បីអភិវឌ្ឍគម្រោងសាងសង់ហេដ្ឋារចនាសម្ព័ន្ធ ដូចជា ផ្លូវដែក ស្ពាន ផ្លូវថ្នល់ កំពង់ផែ និងហេដ្ឋារចនាសម្ព័ន្ធផ្សេងទៀត។
តាម តួលេខរបស់ទីភ្នាក់ងារRifinitiv មានគម្រោង ជាង ២៦០០ ដែលតំណាង ឲ្យទឹកប្រាក់វិនិយោគរបស់ចិន ប្រមាណ ៣,៧ទ្រីលានដុល្លារ ដែលមានជាប់ក្នុងគម្រោងផ្លូវមួយ ខ្សែក្រវ៉ាត់មួយរបស់ចិន។
បើនិយាយពីទឹកប្រាក់វិនិយោគ ក្រុមប្រទេស G7 មានសមត្ថភាព ប្រកួតប្រជែងជាមួយចិន។ រដ្ឋបាលអាមេរិកធ្លាប់បានវាយតម្លៃហើយថា គម្រោងហេដ្ឋារចនាសម្ព័ន្ធថ្មី ដែលស្នើឡើងដោយអាមេរិក នឹងអាចមានតម្លៃ ប្រមាណ ៤០ទ្រីលានឯណោះ។
បើនិយាយពីទិដ្ឋភាពហិរញ្ញវត្ថុ ក្រុមប្រទេស G7មានធនធាន ហូរហៀ សម្រាប់ប្រកួតប្រជែងជាមួយចិន។ ប៉ុន្តែ បញ្ហាចោទ នៅត្រង់ថា តើនឹងមានប្រទេសណាខ្លះ ដែលហ៊ានចេញមុខ តតាំងខ្លួន ជាសត្រូវរបស់ចិន តាមរយៈ ការចូលរួមក្នុងគម្រោងវិនិយោគ ស្នើឡើងដោយអាមេរិក ដែលនឹងទៅប្រកួតប្រជែងនឹងគម្រោងផ្លូវមួយ ខ្សែក្រវ៉ាត់មួយរបស់ចិននោះ។
តាមទីភ្នាក់ងារព័ត៌មានAP ដែលបានដកស្រង់សំដីរបស់មន្រ្តីអាមេរិក ក្នុងចំណោមប្រទេស G7 ក៏មានការបែកបាក់រួចទៅហើយ។ នៅពេល បារាំង អង់គ្លេស និងកាណាដា ប្រកាសគាំទ្រគម្រោងការរបស់អាមេរិកភ្លាម អាល្លឺម៉ង់ ជប៉ុននិងអ៊ីតាលី បានបង្ហាញការរារែកច្រើន ព្រោះតែគេខ្លាចថា គម្រោងការរបស់អាមេរិក នឹងទាក់ទាញ កំហឹងសងសឹករបស់ចិន។
អាល្លឺម៉ង់ នៅត្រូវការទីផ្សារចិន សម្រាប់រថយន្តរបស់ខ្លួន។ ជប៉ុនវិញ ថ្វីត្បិតថា ជាគូប្រជែងជាមួយចិន ប៉ុន្តែ នៅតែត្រូវការចិន សម្រាប់ការដោះដូរសេដ្ឋកិច្ចរបស់ខ្លួន។ ចំណែកអ៊ីតាលីវិញ រឹតតែ យ៉ាប់ទៅទៀត ព្រោះថា អ៊ីតាលី ជាប្រទេសសមាជិកសហភាព អឺរ៉ុបដំបូងគេដែលបានចុះកិច្ចព្រមព្រៀង នៅឆ្នាំ ២០១៩ ដើម្បីចូលរួមក្នុងគម្រោងផ្លូវមួយ ខ្សែក្រវ៉ាត់មួយរបស់ចិន ដែលក្រុមប្រទេស G7 កំពុងចង់ប្រកួតប្រជែងនៅពេលនេះ។
ប្រទេសមហាអំណាចឧស្សាហកម្មអាចប្រកួតបានជាមួយចិន តែមិនប្រាកដថា នឹងអាចយកឈ្នះភ្លាមបានទេ ព្រោះថា ចិន បានបុកចាក់គ្រឹះ ជាយូរមកហើយ និងចាយលុយ រាប់ពាន់លានដុល្លារ។ ប៉ុន្តែ រឿងនេះមិនសំខាន់នោះទេ។ អ្វីដែលសំខាន់ គឺ អំណើះតទៅ ក្រុមប្រទេសក្រីក្រ ក្រុមប្រទេសមានប្រាក់ចំណូលមធ្យម ដែលត្រូវការទុន សម្រាប់អភិវឌ្ឍហេដ្ឋារចនាសម្ព័ន្ធក្នុងស្រុក មានជម្រើសច្រើន ជាងមុន គឺក្រៅពីជម្រើស ផ្លូវមួយ ខ្សែក្រវ៉ាត់មួយ របស់ចិន នៅមាន គម្រោងរបស់ក្រុមប្រទេស G7ស្នើឡើងដោយអាមេរិក មួយទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ