ជំនួបកំពូលអូតង់៖ លោកចូ បៃដិននិងសម្ព័ន្ធមិត្តផ្តោតការពិភាក្សាពីរុស្ស៊ី និងចិន
ចុះផ្សាយនៅថ្ងៃ៖
ស្តាប់ - ០៦:៥០
ក្រោយជំនួបកំពូលនៃក្រុមប្រទេសមហាអំណាចឧស្សាហកម្ម G7 បិទបញ្ចប់ ប្រធានាធិបតីអាមេរិកលោកចូ បៃដិន នៅបន្តបេសកកម្មដ៏សំខាន់មួយទៀត។ លោក បានចាកចេញពីប្រទេសអង់គ្លេស ទៅកាន់ទីក្រុងព្រុចសែលប្រទេសប៊ែលហ្ស៊ិក ដែលជាកន្លែងលោកនឹងជួបជាមួយដៃគូអូតង់នាថ្ងៃចន្ទ ទី១៤ មិថុនានេះ។ ខុសពីលោក ដូណាល់ ត្រាំ លោកចូ បៃដិន បានអះអាងយ៉ាងមុតមាំនូវការគាំទ្ររបស់អាមេរិកចំពោះសម្ព័ន្ធអូតង់ដែលមានអាយុ ៧២ ឆ្នាំ។
ជំនួបកំពូលអូតង់បើកជាផ្លូវការនៅថ្ងៃទី ១៤ មិថុនា ឆ្នាំ២០២១នេះ
ក្រោយបានចំណាយពេលនៅក្នុងប្រទេសអង់គ្លេស ៤ ថ្ងៃ នៅឯកិច្ចប្រជុំកំពូលនៃក្រុមប្រទេសមហាអំណាចឧស្សាហកម្ម G7 លោកប្រធានាធិបតីអាមេរិកចូ បៃដិន នៅមិនទាន់វិលត្រលប់ទៅកាន់សេតវិមាននៅឡើយនោះទេ។
កិច្ចប្រជុំក្រុមប្រទេសG7 បិទបញ្ចប់កាលពីថ្ងៃអាទិត្យម្សិលមិញភ្លាម លោកបៃដិន បានបន្តបេសកកម្មដ៏សំខាន់មួយទៅកាន់ទីក្រុងព្រុចសែលប្រទេសប៊ែលហ្ស៊ិកដើម្បីចូលរួមក្នុងជំនួបកំពូលអូតង់ដែលត្រូវបើកជាផ្លូវការនៅថ្ងៃចន្ទ ទី១៤ មិថុនា ឆ្នាំ ២០២១នេះ។
ខុសពីអតីតប្រធានាធិបតីអាមេរិកលោកដូណាល់ ត្រាំ ដែលបានធ្វើឲ្យទំនាក់ទំនងរវាងសហរដ្ឋអាមេរិក និងសម្ព័ន្ធមិត្តអូតង់រង្គោះរង្គើខ្លាំង លោកចូ បៃដិន បានបង្ហាញពីចេតនាមុតមាំក្នុងការពង្រឹងចំណងទំនាក់ទំនងល្អនឹងគ្នាឡើងវិញជាមួយអូតង់។
ជាក់ស្តែង នៅមុនជំនួបកំពូលអូតង់ដែលត្រូវបើកនៅថ្ងៃចន្ទនេះ លោកចូ បៃដិន បានធានាជាមុនរួចហើយស្រេចដល់អូតង់នូវការប្តេជ្ញាចិត្តដ៏រឹងមាំរបស់សហរដ្ឋអាមេរិក ចំពោះសម្ព័ន្ធអូតង់ដែលមានអាយុ ៧២ ឆ្នាំ។
លោកបៃដិនបានសង្កត់ធ្ងន់ថា សហរដ្ឋអាមេរិកត្រលប់មកវិញហើយ អាមេរិកមានកាតព្វកិច្ចដ៏ចំបងចំពោះសម្ព័ន្ធមិត្ត និងត្រូវចូលរួមការពារដៃគូអឺរ៉ុបរបស់ខ្លួន។
ក្នុងកិច្ចប្រជុំនៅឯទីស្នាក់ការកណ្តាលរបស់អង្គការអូតង់ ក្នុងទីក្រុងព្រុចសែល គេរំពឹងថា មេដឹកនាំនិងប្រមុខរដ្ឋនៃសមាជិកអង្គការអូតង់មកពី ៣០ ប្រទេស នឹងធ្វើការឯកភាពគ្នាលើសេចក្តីថ្លែងការណ៍មួយដោយសង្កត់ធ្ងន់ពីស្ថិរភាពនៅក្នុងប្រទេសអាហ្វហ្គានីស្ថាន ក្រោយការដកកទ័ពរបស់អាមេរិក និងអូតង់។
ក្រៅពីនេះ គេរំពឹងដែរថា ប្រធានបទទាក់ទងនឹងគូប្រជែងពីរគឺរុស្ស៊ី និងចិន ក៏នឹងក្លាយជាប្រធានបទស្នូល ដែលក្រុមសម្ព័ន្ធមិត្តអូតង់លើកយកទៅជជែកពិភក្សានឹងគ្នាផងដែរ។
ការប្រឈមមុខទល់នឹងរុស្ស៊ីនៅតែជាចំណុចអាទិភាពរបស់សម្ព័ន្ធអូតង់
ក្រុមអ្នកការទូតអឺរ៉ុបជាច្រើនរូប បានលើកឡើងថាការប្រឈមមុខទល់នឹងប្រទេសរុស្ស៊ី នៅតែជាអាទិភាពទីមួយសម្រាប់សម្ព័ន្ធអូតង់។ អូតង់ដែលត្រូវបានបង្កើតឡើងដើម្បីទប់ទល់នឹងការគំរាមកំហែងរបស់សូវៀតនៅឆ្នាំ ១៩៤៩ ពោលគឺបន្ទាប់ពីសង្គ្រាមលោកលើកទី ២ បិទបញ្ចប់។
សម្រាប់ជំនួបកំពូលអូតង់នៅថ្ងៃចន្ទនេះ ក្រុមអ្នកវិភាគបានលើកឡើងថា សម្ព័ន្ធមិត្តអូតង់ នឹងពិភាក្សាអំពីការពង្រឹងការការពាររួមរបស់សមាជិកអូតង់ ដើម្បីឆ្លើយតបនឹងសកម្មភាពយោធាដែលមានសន្ធឹកកាន់តែខ្លាំងរបស់រុស្ស៊ីនៅប៉ុន្មានឆ្នាំចុងក្រោយនេះ ជាពិសេសនៅតាមតំបន់ព្រំដែនអ៊ុយក្រែន។
កាលពីឆ្នាំទៅមិញ ប្រទេសរុស្ស៊ីបានចល័តទ័ពចំនួនប្រមាណ ១៥ ០០០ នៅតំបន់ព្រំដែនជាប់ជាមួយប្រទេសអ៊ុយក្រែន។ សកម្មភាពយោធារបស់រុស្ស៊ី បានជំរុញឲ្យអង្គការអូតង់ ចេញមុខព្រមានរុស្ស៊ីជាថ្មីថាបើនៅតែបន្ត “ការឈ្លានពាន” បែបនេះ នោះរុស្ស៊ីនឹងជួបផលវិបាកជាមិនខាន។
ការខ្វែងគំនិតគ្នាមួយទៀត រវាងរដ្ឋាភិបាលលោកខាងលិចនិងរុស្ស៊ីក៏បានកើនឡើងផងដែរ កាលពីខែសីហាជុំវិញករណីបំពុលលោកណាវ៉ាល់នី ដែលជាអ្នករិះគន់ វិមានក្រឹមឡាំងដ៏លេចធ្លោម្នាក់។
ដោយឡែក នៅកិច្ចប្រជុំកំពូលអូតង់នាពេលនេះ សហរដ្ឋអាមេរិក ទំនងជានឹងត្រូវសម្ព័ន្ធមិត្តចោទសួរដែរថាតើបានត្រៀមខ្លួនហើយឬនៅ ដើម្បីដាក់កងទ័ព រថក្រោះ និងប្រព័ន្ធការពារអាកាសបន្ថែមទៀតនៅទ្វីបអឺរ៉ុប។ លោក Jamie Shea អតីតបុគ្គលិកម្នាក់របស់អង្គការអូតង់ បានមានប្រសាសន៍ថាប្រទេសមួយចំនួនមានដូចជា រូម៉ានី ប៊ុលហ្គារី ជាដើម ពិតជាចង់ឃើញវិស័យការពារជាតិអាមេរិកាំងរឹងមាំនៅក្នុងតំបន់អឺរ៉ុប ដើម្បីការពារសម្ព័ន្ធអឺរ៉ុបពីការឈ្លានពានណាមួយ។
តើបញ្ហាអ្វីខ្លះដែលចិនបង្កជាក្តីព្រួយបារម្ភចំពោះសម្ព័ន្ធអូតង់?
បញ្ហាសំខាន់ៗដែលចិនធ្វើឲ្យសម្ព័ន្ធអូតង់ព្រួយបារម្ភខ្លាំង គឺការប៉ុនប៉ងរបស់ទីក្រុងប៉េកាំង ដើម្បីគ្រប់គ្រងហេដ្ឋារចនាសម្ព័ន្ធសំខាន់ៗនៅអឺរ៉ុប បញ្ហាសិទ្ធិមនុស្ស និងការចំណាយយ៉ាងច្រើនរបស់ចិនទៅលើសញ្វាវុធទំនើបៗ។
ឆ្លើយតបទៅនឹងមហិច្ឆតារបស់ចិន ដើម្បីគ្រប់គ្រង់ហេដ្ឋារចនាសម្ព័ន្ធសំខាន់ៗនៅអឺរ៉ុប នៅឯជំនួបកំពូល កាលពីថ្ងៃសៅរ៍ទី ១២មិថុនាកន្លងទៅ ក្រុមប្រទេសមហាឧស្សាហកម្មទាំង៧ ក៏បានយល់ព្រមព្រៀងគ្នាដែរ គាំទ្រឲ្យបង្កើតគម្រោងវិនិយោគមហាសាលមួយ ដើម្បីប្រជែងនឹងគម្រោងផ្លូវមួយ ខ្សែក្រវ៉ាត់មួយរបស់ចិន។
ចំណែកទាក់ទងនឹងបញ្ហាសិទ្ធិមនុស្សវិញ សម្ព័នអូតង់បានថ្កោលទោសចំពោះការរំលោភសិទ្ធិមនុស្សរបស់ចិន រួមមានទាំងការបង្ក្រាបប្រឆាំងនឹងក្រុមអ្នកបាតុករនៅហុងកុង ការធ្វើទុក្ខបុកម្នេញ លើជនជាតិភាគតិចអ៊ុយហ្គួរ ដែលភាគច្រើនជាអ្នកកាន់សាសនាអ៊ីស្លាមរស់នៅក្នុងតំបន់ស៊ីនជាំង។
ការព្រួយបារម្ភផ្សេងទៀតរបស់អូតង់ រួមមានការគំរាមកំហែងរបស់ចិន ក្នុងការចូលលុកលុយកោះតៃវ៉ាន់ ការបង្កើនកម្លាំងយោធា និងមហិច្ឆតាបង្កើនឥទ្ធិពលកាន់តែខ្លាំងឡើងរបស់ចិននៅក្នុងតំបន់ឥណ្ឌូប៉ាស៊ីហ្វិក។
មន្ត្រីក្រសួងការពារជាតិអាមេរិក បានពណ៌នាសកម្មភាពរបស់ចិនខាងលើថា គឺជាការបង្ខិតបង្ខំ និងឈ្លានពានកាន់តែខ្លាំងឡើង មិនអាចមើលរំលងបានឡើយ។ ក្រុមអ្នកវិភាគបានលើកឡើងថា សកម្មភាពរបស់ចិន ការងើបត្រដែតឡើងរបស់ចិន មិនថានៅអាស៊ី ឬអឺរ៉ុប បាននឹងកំពុងដាស់សហរដ្ឋអាមេរិក និងសម័្ពន្ធមិត្តឲ្យប្រុងប្រយ័ត្នខ្ពស់ ត្រៀមខ្លួនប្រឈម ក៏ដូចជាទប់ទប់ឥទ្ធិពលរបស់ចិនដែលហាក់កាន់តែលេចត្រដែតខ្លាំឡើងឡើងនៅលើឆាកអន្តរជាតិ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ