ជំនួបជាលើកទីមួយ រវាងលោករដ្ឋមន្ត្រីការបរទេសអាមេរិក និងរដ្ឋមន្ត្រីការបរទេសថ្មីអ៊ីស្រាអែល
ចុះផ្សាយនៅថ្ងៃ៖
ស្តាប់ - ០៧:១៨
នៅថ្ងៃអាទិត្យទី២៧មិថុនា លោករដ្ឋមន្ត្រីការបរទេសថ្មីរបស់ អ៊ីស្រាអែល យ៉ាអៀរ ឡាពីដ (Yaïr Lapid) បានធ្វើដំណើរទៅជួបជាមួយលោក អង់តូនី ប្លីងកិន រដ្ឋមន្ត្រីការបរទេសអាមេរិក នៅទីក្រុងរ៉ូមប្រទេសអ៊ីតាលី។ នេះគឺជាជំនួបលើកដំបូងបំផុត រវាងលោករដ្ឋមន្ត្រីការបរទេសទាំង២ បន្ទាប់ពីអ៊ីស្រាអែល បានរៀបចំបង្កើតរដ្ឋាភិបាលថ្មី ដោយគ្មានលោកប៊ីនយ៉ាមីន នេតាន់យ៉ាហ៊ូ។ មានសំណុំរឿងជាច្រើន ដែលសហរដ្ឋអាមេរិក ត្រូវនិយាយជាមួយនឹងរដ្ឋាភិបាលថ្មីរបស់អ៊ីស្រាអែល ទាក់ទិននឹងបញ្ហាសន្តិភាពជាមួយប៉ាឡេស្ទីន និងបញ្ហាអ៊ីរ៉ង់ជាដើម។
ស្តារទំនាក់ទំនង ទំនុកចិត្តជាមួយអាមេរិកឡើងវិញ
រដ្ឋាភិបាលថ្មីអ៊ីស្រាអ៊ែល ដែលជារដ្ឋាភិបាលចម្រុះ បង្កើតឡើងដោយច្រើនបក្សរួមគ្នានេះ បានផ្តល់សារៈសំខាន់ខ្លាំងណាស់ ដល់ទំនាក់ទំនង ជាមួយសហរដ្ឋអាមេរិក។ អាមេរិក គឺជាសម្ព័ន្ធមិត្តដ៏សំខាន់ របស់អ៊ីស្រាអែល។ ក៏ប៉ុន្តែ ប៉ុន្មានឆ្នាំចុងក្រោយនេះ ជាមួយនឹងការដឹកនាំ របស់លោកប៊ីនយ៉ាមីន នេតាន់យ៉ាហ៊ូ ដែលមានទំនោរស្តាំនិយម រឹងរូសខ្លាំង គឺវាបានធ្វើឲ្យក្រុមថ្នាក់ដឹកនាំនយោបាយអាមេរិក បក្សប្រជាធិបតេយ្យ ដកខ្លួនឈប់ស្និទស្នាល និងគាំទ្រអ៊ីស្រាអែល។
កាលពីអាណត្តិលោកដូណាល់ ត្រាំ រដ្ឋាភិបាលលោកនេតាន់យ៉ាហ៊ូ មានបង្អែក។ តែនៅពេលនេះ អស់លោកដូណាល់ ត្រាំ ហើយ ចំណែកលោកនេតាន់យ៉ាហ៊ូ ក៏លែងដឹកនាំអ៊ីស្រាអែលទៀតដែរ។ ដូច្នេះអាចចាត់ទុកបានថា កាលៈទេសៈពេលនេះ គឺរដ្ឋាភិបាលថ្មី ទាំងអាមេរិក ទាំងអ៊ីស្រាអែល ត្រូវមើលចិត្តគ្នា ស្វែងរកចំណុចប្រសព្វគ្នា ដើម្បីបង្កើតទំនុកចិត្តទៅវិញទៅមក។
ជាងនេះទៀត មិនមែនមានតែជាមួយអាមេរិកមួយទេ ដែលអ៊ីស្រាអែល ត្រូវកសាងស្តារទំនាក់ទំនង ឲ្យល្អឡើងវិញ។ ជាមួយក្រុមប្រទេសអឺរ៉ុប ក៏ដូចគ្នាដែរ។ ភាពរឹងរូស ការបាញ់ប្លោងគ្រាប់មីស៊ីលនៅតំបន់ហ្កាហ្សា កាលពីខែឧសភាកន្លងទៅ បានធ្វើឲ្យអតីតរដ្ឋាភិបាលលោកនេតាន់យ៉ាហ៊ូ ត្រូវសហគមអន្តរជាតិថ្កោលទោស និងរិះគន់មិនតិចទេ។
លោក យ៉ាអៀរ ឡាពីដ (Yaïr Lapi) រដ្ឋមន្ត្រីការបរទេសថ្មីរបស់អ៊ីស្រាអែល បានលើកឡើង នៅពេលចូលកាន់តំណែង កាលពីពាក់កណ្តាលខែមិថុនាថា លោកបេ្តជ្ញា ស្តារទំនាក់ទំនង សម្ព័ន្ធភាពឡើងវិញ ជាមួយគណបក្សប្រជាធិបតេយ្យអាមេរិក ព្រមទាំងជាមួយក្រុមប្រទេសអឺរ៉ុបផងដែរ។ ជាងនេះទៀត លោក យ៉ាអៀរ ឡាពីដ នឹងឡើងមកធ្វើនាយករដ្ឋមន្ត្រីអ៊ីស្រាអែល ក្នុងរវាង១ឆ្នាំកន្លះទៀត។
ដើរដោយសន្សឹមៗ ក្នុងសំណុំរឿងប៉ាឡេស្ទីន
ក្រៅពីការស្តារទំនាក់ទំនង ជាមួយសហរដ្ឋអាមេរិក សំណុំរឿងដែលគេរំពឹងរងចាំតាមដានបំផុតនោះ គឺបញ្ហាប៉ាឡេស្ទីន។ សំណុំរឿង ប៉ាឡេស្ទីន គឺជាស្នូលកណ្តាល នៃជំនួបនៅថ្ងៃនេះ។ ដូចខ្ញុំបាននិយាយពីខាងលើ គឺភាគីទាំង២ អ៊ីស្រាអែល និង អាមេរិក កំពុងមើលចិត្តគ្នា ស្ទាបស្ទង់ចិត្តគ្នាទៅវិញទៅមក ទាក់ទិននឹងបញ្ហាប៉ាឡេស្ទីននេះ។
តែយ៉ាងណាក៏ដោយ គេមិនរំពឹងថា ជំនួបនៅថ្ងៃនេះ នឹងអាចបោះជំហាន ចេញជាផែនការអ្វីធំដំទេ សម្រាប់សំណុំរឿងប៉ាឡេស្ទីន។ តាមការបញ្ជាក់ពីសេតវិមាន រដ្ឋាភិបាលលោក ចូ បៃដិន នឹងអនុញ្ញាតឲ្យបើក ការិយាល័យរបស់ អង្គការរំដោះប៉ាឡេស្ទីន OLP នៅទីក្រុងវ៉ាស៊ីនតោន ឡើងវិញ។ ការិយាល័យដែលជាតំណាងអង្គទូតប៉ាឡេស្ទីន ប្រចាំសហរដ្ឋអាមេរិកនេះ ត្រូវបានលោកដូណាល់ ត្រាំសម្រេចឲ្យបិទចោល កាលពីខែកញ្ញា ឆ្នាំ២០១៨។
រដ្ឋាភិបាលលោក ចូ បៃដិន ធ្លាប់បានបញ្ជាក់ឲ្យដឹងច្រើនដងហើយ ថាគេមិនចង់ ធ្វើរឿងអ្វីមួយដោយតក់ក្រហល់នោះទេ ថ្វីបើការពិតគេគាំទ្រ ការបង្កើតរដ្ឋប៉ាគេស្ទីនឯករាជ្យពេញសិទ្ធិមែន។ លោក អង់តូនី ប្លីងកិន បានលើកឡើងថា សម្រាប់ពេលនេះ លក្ខខណ្ឌមិនទាន់អាចអំណោយផល ឈានទៅចរចារៀបចំគម្រោង កិច្ចព្រមព្រៀងសន្តិភាព រវាងអ៊ីស្រាអែល និង ប៉ាឡេស្ទីននេោះទេ។ វានៅមានឧបសគ្គច្រើនណាស់ ដែលត្រូវឆ្លងកាត់។ លោកបានបញ្ជាក់ទៀតថា អ្វីដែលចាំបាច់នៅពេលនេះ គឺបញ្ចៀសឲ្យបាន នូវការផ្ទុះអំពើហិង្សា សង្គ្រាមទំលាក់គ្រាប់បែក ជាថ្មីម្តងទៀត រវាងអ៊ីស្រាអែល និងប៉ាឡេស្ទីន។ បន្ទាប់មកទៀត អាេមរិកនឹងព្យាយាម ធ្វើការ ដើម្បីឲ្យភាគីទាំង២ អ៊ីស្រាអែល ប៉ាឡេស្ទីន ចាប់ផ្តើមមានទំនុកចិត្តលើគ្នាទៅវិញទៅមក ទើបអាចឈានទៅចរចាសន្តិភាពបាន។
ដូច្នេះ បើតាមការប្រមើរមើលទៅ គឺក្នុងជំនួបនៅថ្ងៃនេះ រដ្ឋមន្ត្រីការបរទេសទាំង២ នឹងនិយាយគ្នា ដើម្បីធ្វើយ៉ាងណា ការពារកិច្ចព្រមព្រៀងឈប់បាញ់ ដែលអ៊ីស្រាអ៊ែល បានចុះជាមួយក្រុមហាម៉ាសប៉ាឡេស្ទីន កាលពីចុងខែឧសភា។ ភាពស្ងប់ស្ងាត់ គ្មានអំពើហិង្សា នៅតំបន់ផ្សេងទៀត ដូចជានៅក្រុងហ្សេរិយសាឡឹម ឬនៅតំបន់ស៊ីសហ្សកដានីជាដើម ក៏សំខាន់ណាស់ដែរ ព្រោះវានឹងជួយកសាងបរិកាសប្រសើរ អំណោយផលដល់ការចរចាសន្តិភាព។
អ៊ីស្រាអែល មិនគាំទ្រកិច្ចព្រមព្រៀងនុយក្លេអ៊ែរអ៊ីរ៉ង់
ដូចយើងដឹងកន្លងមកហើយ អ៊ីរ៉ង់ គឺជាសត្រូវធំបំផុត របស់អ៊ីស្រាអែល។ មិនថារដ្ឋាភិបាលមុន ឬរដ្ឋាភិបាលថ្មីនេះទេ គឺអ៊ីស្រាអែល នៅតែមានគោលជំហរ ប្រឆាំងជាមួយរបបដឹកនាំផ្តាច់ការ សាធារណរដ្ឋអ៊ីស្លាមអ៊ីរ៉ង់ជានិច្ច។ សម្រាប់អ៊ីស្រាអែល ការដែលអ៊ីរ៉ង់ មានអាវុធនុយក្លេអ៊ែរ គឺវានឹងបង្កគ្រោះថ្នាក់ដល់ខ្លួន។ កាលពីរដ្ឋាភិបាល លោកមេតាន់ យ៉ាហ៊ូ អ៊ីស្រាអែល បានបដិសេធ មិនគាំទ្រ កិច្ចព្រមព្រៀងនុុយក្លេអ៊ែរអ៊ីរ៉៉ង់ទេ ដោយគេបានលើកឡើងថា ជាកិច្ចព្រមព្រៀង ដែលអ៊ីរ៉ង់លេងខ្សែលើ ហើយបន្តលួចលាក់ ចំរាញ់ធាតុអ៊ុយរ៉ានីញូម ដើម្បីធ្វើគ្រាប់នុយក្លេអ៊ែរដដែល។ លោក ដូណាល់ ត្រាំ ក៏បានសម្រេចដកខ្លួនចេញពីកិច្ចព្រមព្រៀងនេះ ធ្វើឲ្យលោកនេតាន់យ៉ាហ៊ូ សប្បាយចិត្តមិនតិចទេ។
ក៏ប៉ុន្តែមកដល់ដំណាលកាលនេះ រដ្ឋាភិបាលថ្មីអាមេរិក ដឹកនាំដោយលោក ចូ បៃដិន បានប្រកាសថា ចង់មកចូលរួមក្នុងកិច្ចព្រមព្រៀងនេះវិញ។ ថ្វីត្បិតតែការចរចានៅទីក្រុងវីយែន មិនទាន់បានសម្រេចគោលដៅ ពិតមែន តែអាមេរិកពិតជាមានឆន្ទៈ ត្រលប់មកចូលរួមក្នុងកិច្ចព្រមព្រៀងនេះវិញ។ បញ្ហានេះ គឺវាធ្វើឲ្យអ៊ីស្រាអែល លែងមានបង្អែក។
ក៏ប៉ុន្តែ សួរថា តើរដ្ឋាភិបាលថ្មីរបស់អ៊ីស្រាអែល អាចនឹងទៅជំទាស់ បន្ទោសលោក ចូ បៃដិន ដែលចង់ត្រលប់ចូលរួម ក្នុងកិច្ចព្រមព្រៀងនុយក្លេអ៊ែរអ៊ីរ៉ង់ទេ? គឺមិនអាចទៅរួចទេ។ នៅក្នុងនយោបាយការបរទេស គឺវាមានចំណុចណាជាអាទិភាពជាងគេ ថ្វីបើសំខាន់ដូចគ្នាក៏ដោយ។ សម្រាប់រដ្ឋាភិបាលថ្មីអ៊ីស្រាអែល គឺគេបានផ្តល់អាទិភាព ដល់ការស្តារទំនាក់ទំនងសម្ព័ន្ធភាពជាមួយអាមេរិក។
ដូច្នេះ ពេលនេះ គឺអ៊ីស្រាអែល នឹងបិទមាត់នៅស្ងាត់សិន មិនជំទាស់រារាំង ក្នុងសំណុំរឿងកិច្ចព្រមព្រៀងនុយក្លេអ៊ែរអ៊ីរ៉ង់ទេ គឺទុកឲ្យអាមេរិកជាអ្នកចាត់ចែងសិន។ តែទន្ទឹមគ្នានេះ អ៊ីស្រាអ៊ែល នៅតែបន្តវាយឆ្មក់ ម្តងម្កាលទៅលើអ៊ីរ៉ង់ ដូចជាការទំលាក់គ្រាប់ ឬ ប្រើបច្ចេកវិទ្យា បំផ្លាញទីតាំងយុទ្ធសាស្ត្រមួយចំនួន របស់កងទ័ពអ៊ីរ៉ង់ជាដើម។ ទាក់ទិននឹងការវាយប្រហារលើអ៊ីរ៉ង់នេះ អ៊ីស្រាអែល ក៏បានទទួលការសហការគាំទ្រ ពីសំណាក់រដ្ឋាភិបាលអាមេរិកដែរ។ យ៉ាងណាមិញ ថ្ងៃទី២៣មិថុនា លោក Aviv Kohavi អគ្គមេបញ្ជាការកងទ័ពជាតិអ៊ីស្រាអ៊ែល បានលើកឡើងនៅក្នុងលិខិតប្រកាស ក្រោយជួបជាមួយលោក Jake Sullivan ទីប្រឹក្សាសន្តិសុខអាមេរិកថា កម្មវត្ថុរួម របស់អាមេរិក និងអ៊ីស្រាអែល គឺ ធ្វើយ៉ាងណា កំទេចសមត្ថភាពគំរាមកំហែង របស់អ៊ីរ៉ង់ ឲ្យបាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ