មុនខួប១០០ឆ្នាំរបស់បក្សកុម្មុយនិស្តចិន លោកស៊ី ជីនពីងប្រាប់ឲ្យគេចុះចូលក្នុងលទ្ធិម៉ាក់ស៊ីសនិយមបែបចិន
ចុះផ្សាយនៅថ្ងៃ៖
ស្តាប់ - ០៧:៣០
ប្រទេសចិនបានរៀបចំបណ្តើរៗកម្មវិធី និងពិធីបុណ្យជាច្រើន ដើម្បីប្រារព្ធខួប ១០០ឆ្នាំនៃការបង្កើតបក្សកុម្មុយនិស្តចិន ដែលត្រូវធ្វើជាផ្លូវការ នៅថ្ងៃព្រហស្បតិ៍ទី ១កក្កដា។ នៅយប់ថ្ងៃចន្ទទី ២៨មិថុនា ទស្សនីយភាពដ៏ធំមួយ ត្រូវបានរៀបចំឡើងនៅស្តាតអូឡាំពិកក្នុងទីក្រុងប៉េកាំង ក្រោមអធិបតីភាពរបស់លោកប្រធានាធិបតីចិន ស៊ី ជីនពីង។ នៅក្នុងពិធីបុណ្យ កាលពីថ្ងៃចន្ទ បក្សកុម្មុយនិស្តចិនបានផ្តោតច្រើនទៅលើស្នាដៃសំខាន់របស់បក្ស នោះ គឺការដោះស្រាយវិបត្តិកូវីដ ដែលបានធ្វើឲ្យចិនគ្រប់គ្រងបានស្ថានការណ៍ទាំងស្រុងលើជំងឺកូវីដ។
នៅថ្ងៃព្រហស្បតិ៍ ទី ១កក្កដា ខានស្អែក ចិននឹងប្រារព្ធខួប គម្រប់ ១០០ឆ្នាំ នៃការបង្កើតបក្សកុម្មុយនិស្ត ប៉ុន្តែ នៅប៉ុន្មានថ្ងៃមុនេះ ប្រទេសចិនបានចាប់ផ្តើមរៀបចំពិធីជាបន្តបន្ទាប់ ដូចជានៅយប់ថ្ងៃចន្ទម្សិលមិញ មហាទស្សនីយភាព ត្រូវបានរៀបចំឡើង នៅស្តាតអូឡាំពិកក្នុងទីក្រុងប៉េកាំង។
ដោយរៀបចំពិធីបុណ្យធំៗ តាំងពីពេលឥលូវនេះទៅ អាជ្ញាធរចិនបានផ្តល់សារៈសំខាន់ខ្លាំងនៃពិធីបុណ្យខួបគម្រប់ ១០០ឆ្នាំ នៃការបង្កើតបក្សកុម្មុយនិស្តចិន។ នៅក្នុងឱកាស ពិធីបុណ្យខួប ១០០ឆ្នាំរបស់បក្សកុម្មុយនិស្តចិន រដ្ឋអំណាចប៉េកាំងបានចំណាយថវិកា ថាមពលច្រើនណាស់ សម្រាប់ រៀបចំកម្មវិធីនានា ដើម្បីលើកតម្កើងតម្លៃបក្សកុម្មុយនិស្តចិន។ ជាក់ស្តែង នៅ បីថ្ងៃ មុន ត្រូវប្រារព្ធខួប១០០ឆ្នាំ នៃការបង្កើត បក្សកុម្មុយនិស្តចិន ចិនបានរៀបចំ មហាទស្សនីយភាពមួយ នៅស្តាតអូឡាំពិក ដែលនៅក្នុងនោះ សិល្បករ រាប់រយនាក់ បានចេញសំដែង លើកសរសើរពី វីរភាព និងការតស៊ូ របស់ថ្នាក់ដឹកនាំសំខាន់ៗ របស់បក្សកុម្មុយនិស្តចិន។
ទស្សនីយភាព ដ៏មហាអស្ចារ្យ មិនត្រូវបានចាក់ផ្សាយបន្តផ្ទាល់តាមទូរទស្សន៍ចិននោះទេ។ ប៉ុន្តែ បើតាមការចុះផ្សាយរបស់ទីភ្នាក់ងារព័ត៌មានអន្តរជាតិ ដូចជា AFP ឬ Reuters ជាដើម ទស្សនីយភាព ដែលមានចំណងជើងថា ដំណើរដ៏មហាអស្ចារ្យ ផ្តោតសំខាន់ទៅលើប្រវត្តិរបស់បក្សកុម្មុយនិស្តចិន និងកំណែទម្រង់សេដ្ឋកិច្ចចិន នៅក្នុងរយៈពេល ៤០ឆ្នាំចុងក្រោយនេះ។ ដោយមានការចាក់បញ្ចាំង បង្ហាញ មុខមេដឹកនាំចិន តាំងពី ប្រមុខដឹកនាំ ម៉ៅសេទុង រហូតដល់លោកស៊ី ជីនពីង ដែលជាប្រធានាធិបីចិនសព្វថ្ងៃ ពិធីបុណ្យមុនថ្ងៃរំលឹកខួប ១០០ឆ្នាំនៃការបង្កើតបក្សកុម្មុយនិស្តចិនជាឱកាសបង្ហាញស្នាដៃល្អៗរបស់បក្សកុម្មុយនិស្តចិន មិនបានបង្ហាញ ចំណុចអវិជ្ជមានរបស់បក្សកុម្មុយនិស្តចិន ដូចជាបដិវត្តវប្បធម៌ គ្រោះទុរ្ភិក្សដែលកើតឡើងដោយសារតែនយោបាយដំណើរបង្ខំរបស់បក្សកុម្មុយនិស្តចិន នៅទសវត្សរ៍ឆ្នាំ ១៩៥៨នោះទេ។
ទស្សនីយភាពផ្តោតសារៈសំខាន់ខ្លាំងជាងគេ ទៅលើការប្រយុទ្ធប្រឆាំងយកឈ្នះ លើជំងឺកូវីដ នៅប្រទេសចិន។ អាជ្ញាធរចិនចង់បញ្ជាក់ថា បក្សកុម្មុយនិស្តបាន កសាងស្នាដៃដ៏សំខាន់មួយ នោះ គឺបានដោះស្រាយ គ្រប់គ្រងបានទាំងស្រុងវិបត្តិកូវីដ ហើយនិងបានជំរុញសេដ្ឋកិច្ចចិនឲ្យដើរទៅមុខ មិនឲ្យជាប់គាំង នៅក្រោយ ចាកចេញវិបត្តិកូវីដនោះទេ។ ចម្រៀងដែលកងរំពងជាងគេ នៅក្នុងទស្សនីយភាព មានឈ្មោះថា បើគ្មានបក្សកុម្មុយនិស្តចិន ក៏គ្មានដែរប្រទេសចិនថ្មី។
ស្នាដៃរបស់បក្សកុម្មុយនិស្តចិន ឬស្នាដៃរបស់ លោកប្រធានាធិបតី ចិន ស៊ី ជីនពីង?
លោកប្រធានាធិបតីស៊ី ជីនពីង ធ្លាប់និយាយអួតបង្ហាញថា ការប្រយុទ្ធយកឈ្នះលើជំងឺកូវីដ គឺជាជោគជ័យដ៏ធំមួយរបស់បក្សកុម្មុយនិស្ត និងជាអំណះអំណាងមួយដែលបញ្ជាក់ថា ចិនក្រោមការដឹកនាំរបស់លោក គឺ មានសមត្ថភាពទប់ទល់នឹងវិបត្តិកូវីដ។ ជំងឺកូវីដបានផុតរលត់ស្ទើរទាំងស្រុងនៅប្រទេសចិន ជាទីដែលសេដ្ឋកិច្ចបានចាប់ផ្តើមដំណើរការធម្មតាឡើងវិញ តាំងពីពាក់កណ្តាលឆ្នាំមុន។
យកឈ្នះ លើវិបត្តិកូវីដ ប្រយុទ្ធប្រឆាំងអំពើពុករលួយ និងបានលុបបំបាត់ភាពក្រីក្រ នៅប្រទេស ចិន។ ស្នាដៃទាំងនេះ បានធ្វើឲ្យលោកប្រធានាធិបតីចិន ស៊ី ជីនពីង បានទទួលការគោរពកោតសរសើរច្រើន ក្នុងប្រទេស។ ក្នុងរយៈពេលដឹកនាំ ចិន ៩ឆ្នាំមកនេះទៀតសោត លោកស៊ី ជីនពីង បានឆ្លៀតបង្កើនឥទ្ធិពលរបស់លោកនៅក្នុងជួរបក្ស រហូតធ្វើឲ្យលោកក្លាយជាមេដឹកនាំចិន ដ៏មានអំណាចខ្លាំងម្នាក់ នៅប្រទេសចិន គឺបន្ទាប់ពី លោកម៉ៅ សេទុង ដែលជាស្ថាបនិកសាធារណរដ្ឋប្រជាមានិតចិន។ មួយវិញទៀត ខុសពីប្រធានាធិបតីចិនមុនៗ លោកស៊ី ជីនពីង ដែលមានអាយុ ៦៨ឆ្នាំ នឹងអាចដឹកនាំប្រទេសចិន ដោយគ្មានកាលកំណត់ ដូចជាប្រមុខម៉ៅ សេទុង។
ក្រៅតែពីបង្រ្កាបក្រុមប្រឆាំង ក្នុងជួរបក្ស ឬក្នុងប្រទេស ដើម្បី ពង្រឹងអំណាចរបស់ខ្លួនក្នុងប្រទេស លោកប្រធានាធិបតី ស៊ី ជីនពីង កំពុងនាំប្រទេសចិន ឲ្យចេញមុខខ្លាំងណាស់ដែរ ក្នុងឆាកអន្តរជាតិ។ នៅក្នុងនយោបាយការបរទេស លោកស៊ី ជីនពីង បានពង្រីកឥទ្ធិពលរបស់ចិន ដើម្បី ចូលគ្រប់គ្រងសមុទ្រចិនខាងត្បូង គំរាមកំហែងកោះតៃវ៉ាន់ ហើយនិងរួមដៃជាមួយរុស្ស៊ី ដើម្បីទប់ទល់ ប្រជែងឥទ្ធិពលប្រទេសលោកខាងលិច ជាពិសេស អាមេរិក និង នៅក្នុងសំណុំរឿងអន្តរជាតិ។
លោកស៊ី ជីនពីងបានអំពាវនាវឲ្យគេចូលរួមក្នុងលទ្ធិម៉ាក្សស៊ីសនិយម តាមបែបចិន
នៅក្នុងពិធីបំពាក់មេដាយដល់ សមាជិកដែលស្មោះស្ម័គ្ររបស់បក្សកុម្មុយនិស្តចិន នៅថ្ងៃអង្គារទី ២៩ មិថុនា លោកប្រធានាធិបតីចិន ស៊ី ជីនពីង បានអំពាវនាវឲ្យគេចូលរួម និងជឿជាក់លើលទិ្ធម៉ាក្សស៊ីសនិយម និងលទ្ធិសង្គមនិយមតាមបែបចិន។ លោកស៊ី ជីនពីង ចង់ឲ្យប្រជាជនចិនចាត់ទុក លទ្ធិទាំងពីរដែលប្រកាន់ខ្ជាប់ដោយបក្សកុម្មុយនិស្តចិន ជាគោលដៅសំខាន់របស់ពួកគេ នៅក្នុងជីវិត។
ខុសពីប្រទេសផ្សេងទៀត ដែលគោរពតាមលទ្ធិសេរី ប្រជាធិបតេយ្យ ចិនដែលគ្រប់គ្រងដោយឯកបក្ស កុម្មុយនិស្តចិន នៅតែប្រកាន់ខ្ជាប់លទ្ធិម៉ាក្សស៊ីស និងសង្គមនិយម។ គ្មានទេ ក្រុមហ៊ុនឧស្សាហកម្មឯកជន។ បក្សកុម្មុយនិស្តចិនក្តោបក្តាប់ជាប់ គ្រប់វិស័យ មិនថា អំណាចនយោបាយ និងគោលនយោបាយសម្រាប់គ្រប់គ្រង ក្រុមហ៊ុនរដ្ឋ។
សាររបស់ស៊ី ជីនពីងសំខាន់ណាស់ ព្រោះថា បក្សកុម្មុយនិស្តចិនសព្វថ្ងៃមាន សមាជិកប្រមាណ ៩២លាននាក់ ប្រហែល៦%ភាគរយនៃប្រជាជនចិនសរុប ១៤០០លាននាក់។ សមាជិកបក្សកុម្មុយនិស្តភាគច្រើន ជាមន្រ្តីរដ្ឋាភិបាល ឬជាមេដឹកនាំក្រុមហ៊ុនឧស្សាហកម្មរដ្ឋ។ បក្សកុម្មុយនិស្តចិនចង់បង្ហាញថា ថ្នាក់ដឹកនាំភាគច្រើន នៅប្រទេសចិន គឺមកពីក្រុមតែមួយ ដែលមាននិន្នាការតែមួយ គឺដើរតាមលទ្ធិសង្គមនិយម និងម៉ាក្សស៊ីសនិយម មិនដូចជាប្រទេសដទៃ ដូចជាអាមេរិកដែលមានបែងចែក ក្រុម បក្សពួកច្រើននោះទេ។
នៅក្នុងឱកាសត្រៀមរៀបចំ បុណ្យខួប១០០ឆ្នាំ នៃការបង្កើតបក្សកុម្មុយនិស្តនេះ បក្សកុម្មុយនិស្តចិនបានជំរុញឲ្យប្រព័ន្ធផ្សព្វផ្សាយទាំងអស់នៅចិន លើកសរសើរស្នាដៃរបស់បក្ស ហើយជាមួយគ្នានោះ ក៏ត្រូវសរសេរបកអាក្រាតពី រឿងរើសអើងពូជសាសន៍ អសមភាព ហើយនិង បញ្ហាសង្គមជាច្រើនទៀតនៅប្រទេសលោកខាងលិច។ យុទ្ធសាស្រ្តរបស់បក្សកុម្មុយនិស្តចិនគឺចង់បង្ហាញថា ប្រទេសលោកខាងលិច ដែលពូកែ រិះគន់ចិន ពីរឿងធ្វើទុក្ខបុកម្នេញលើប្រជាជនអ៊ុយហ្គួរ និងសិទ្ធិសេរីភាពនៅហុងកុង ប៉ុន្តែតាមពិតក៏កំពុងមានបញ្ហាក្នុងប្រទេស មិនអាចដោះស្រាយចេញបានទេ។
ជារួម បក្សកុម្មុយនិស្តចិនចង់បង្ហាញថា គ្មានអ្នកណាបានកសាងស្នាដៃល្អ មហាអស្ចារ្យ ដូចជាបក្សកុម្មុយនិស្តចិននោះទេ។ កំណែទម្រង់សេដ្ឋកិច្ច ក្នុងរយៈពេល៤០ឆ្នាំ ចុងក្រោយនេះ បានធ្វើឲ្យចិនក្លាយជាមហាអំណាចសេដ្ឋកិច្ចលេខ២ ក្នុងពិភពលោក។ ការអភិវឌ្ឍន៍កម្មវិធីអវកាសរហូតឈានទៅសាងសង់ស្ថានីយ៍អវកាសដោយខ្លួនឯង គោលនយោបាយសេដ្ឋកិច្ច ដូចជា ផ្លូវមួយខ្សែក្រវ៉ាត់មួយរបស់ចិន ហើយនិងការប្រយុទ្ធយកឈ្នះ គ្រប់គ្រងទាំងស្រុងវិបត្តិកូវីដ។ ទាំងនេះជាស្នាដៃធំៗរបស់បក្សកុម្មុយនិស្តចិន ក្រោមការដឹកនាំរបស់លោកស៊ី ជីនពីង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ