កីឡាអូឡាំពិកតូក្យូ២០២០៖ ក្រៅពីកូវីដ អ្នកជំនាញបារម្ភខ្លាំង ពីបញ្ហាសីតុណ្ហភាពក្តៅ និងគ្រោះធម្មជាតិ
ចុះផ្សាយនៅថ្ងៃ៖
ស្តាប់ - ០៩:០៥
កម្មវិធីប្រកួតកីឡាអូឡាំពិក នៅទីក្រុងតូក្យូ ប្រទេសជប៉ុន នឹងប្រព្រឹត្តិទៅ ចាប់ពីថ្ងៃទី ២៣កក្កដា រហូតដល់ ថ្ងៃទី ៨ សីហា ខាងមុខ។ ជាកម្មវិធីប្រកួតកីឡាអន្តរជាតិ ដែលស្ថិតក្នុងកាលៈទេសៈមួយដ៏លំបាក និងស្មុគស្មាញបំផុត សម្រាប់ជប៉ុន ខណៈដែលការឆ្លងរាលដាលកូវីដ១៩ គឺជាក្តីព្រួយបារម្ភធំបំផុតមួយ។ តែទន្ទឹមនឹងនេះ មិនមែនមានតែបញ្ហាកូវីដ មួយនោះទេ។ អ្នកជំនាញជាច្រើន បានលើកឡើងផងដែរ អំពីបញ្ហាប្រឈមផ្សេងទៀត តួយ៉ាង គឺបញ្ហាសីតុណ្ហភាពក្តៅខ្លាំង នៅទីក្រុងតូក្យូ ហើយនិងជាពិសេសនោះ គឺបញ្ហាគ្រោះធម្មជាតិតែម្តង ព្រោះថាជប៉ុន គឺជាប្រទេស ដែលតែងតែរងនូវគ្រោះធម្មជាតិ ញឹកញាប់បំផុត។
បញ្ហាកូវីដ១៩ នៅតែគំរាមកំហែងកម្មវិធីប្រកួតកីឡាអូឡាំពិកតូក្យូដដែល បើទោះបីជាបានលើកពេលមកមួយឆ្នាំក្តី។ ប៉ុន្មានថ្ងៃចុងក្រោយនេះ នៅក្រុងតូក្យូ មានករណីឆ្លងកូវីដថ្មី ចំនួនប្រមាណ៩០០នាក់ សឹងជារៀងរាល់ថ្ងៃ។ តែយ៉ាងណា គេមិនអាចលើកពេលម្តងទៀតឡើយ។ គណកម្មការរៀបចំកម្មវិធីនេះ បានសុខចិត្ត ដាក់វិធានការ យ៉ាងតឹងតែង ដើម្បីធ្វើយ៉ាងណា កុំឲ្យមានបញ្ហាឆ្លងរាលដាល នៅក្នុងពេលប្រកួត ដែលនឹងចាប់ផ្តើម នៅថ្ងៃទី ២៣ កក្កដា។
ការប្រកួតភាគច្រើន គឺត្រូវធ្វើដោយបិទទ្វារ គ្មានទស្សនិកជនចូលមើលទេ។ ក៏ប៉ុន្តែ ការព្រួយបារម្ភគឺវានៅតែមានដែរ ទាក់ទិននឹងការឆ្លងរាលដាលកូវីដ ក្នុងចំណោមក្រុមកីឡាករ និងគណប្រតិភូកីឡា ដែលមកចម្រុះពីគ្រប់ប្រទេសទាំងអស់។ ជាសរុប គឺមានមនុស្សយ៉ាងហោច ៧ម៉ឺននាក់ បើរាប់ទាំងកីឡាករ សមាជិកគណប្រតិភូ និងក្រុមអ្នកកាសែត។
ក្រុមកីឡាករចិន អះអាងថាការរៀបចំរបស់ជប៉ុនខ្វះចន្លោះ ទាក់ទិននឹងបញ្ហាកូវីដ
គណប្រតិភូកីឡាប្រណាំងទូកក្តោងរបស់ចិន ដែលទើបតែបានទៅដល់ទីក្រុងតូក្យូ បានលើកឡើងថា ការរៀបចំរបស់ភាគីជប៉ុនមានការខ្វះចន្លោះ។ យោងតាមការចុះផ្សាយ របស់ទីភ្នាក់ងារព័ត៌មានផ្លូវការចិន ក្រុមកីឡាទូកក្តោងចិន បានអះអាងថា សណ្ឋាគារដែលក្រុមខ្លួនស្នាក់នៅ នៅក្រុងតូក្យូ គឺវានៅលាយឡំជាមួយភ្ញៀវទេសចរណ៍ធម្មតា។ ថ្វីបើ គេបានត្រៀមបន្ទប់ នៅក្នុងមួយជាន់ដាច់ដោយឡែក សម្រាប់កីឡាករមែន តែការដែលមានវត្តមានភ្ញៀវទេសចរណ៍សាមញ្ញ នៅលាយឡំក្នុងសណ្ឋាគារ គឺវាអាចបង្កើតឲ្យមានករណីប្រឈមការឆ្លងរាលដាល តាមរយៈការប្រើប្រាស់ ទីតាំងរួម ដូចជាជណ្តើរយន្ត ទ្វារចេញចូល និងទីកន្លែងពិសារអាហារជាដើម។ ឥឡូវបញ្ហានេះ ត្រូវបានគេលើកទៅពិភាក្សា ជាមួយនឹងគណកម្មាធិការរៀបចំ របស់ជប៉ុនហើយ ដើម្បីរកដំណោះស្រាយ។
សីតុណ្ហភាពក្តៅ គំរាមសុខភាព-អាយុជីវិតកីឡាករ
សីតុណ្ហភាពក្តៅខ្លាំង គឺជាគ្រោះថ្នាក់សម្រាប់មនុស្សទូទៅរួចទៅហើយ។ តែសម្រាប់កីឡាករ ដែលប្រើកម្លាំង ហត់ខ្លាំងក្នុងពេលប្រកួត គឺវាកាន់តែគ្រោះថ្នាក់។ របាយការណ៍មួយ ចុះផ្សាយកាលពីខែឧសភា ដោយសមាគមអង់គ្លេស ដើម្បីកីឡានិរន្តរភាព (BASIS) បានលើកឡើងថា បញ្ហាសីតុណ្ហភាពក្តៅខ្លាំង ព្រមទាំងកម្រិតសំណើម ខ្ពស់ជ្រុល គឺជាគ្រោះថ្នាក់ខ្លាំងណាស់ ដល់អាយុជីវិត របស់កីឡាក្នុងពេលប្រកួតកីឡាអូឡាំពិក នៅក្រុងតូក្យូ។ ការប្រកួតកីឡាមួយចំនួន ដែលត្រូវធ្វើនៅទីហាលវាល ដូចជា កីឡាទ្រីអាត្លុង កីឡារត់ប្រណាំង និងកីឡាបាល់ទះលើដីខ្សាច់ជាដើម គឺកីឡាករ សុទ្ធតែប្រឈមខ្លាំង។ កន្លងមកយើងធ្លាប់បានឃើញហើយ មានកីឡាកររត់ប្រណាំងខ្លះ ពេលរត់មកដល់ទី ដេកស្តូកស្តឹងអស់កម្លាំង ដកដង្ហើមមិនដល់គ្នា ហើយអាចឈានទៅគាំងបេះដូងស្លាប់ ប្រសិនបើសីតុណ្ហភាពក្តៅជ្រុលពេក។
នរណាក៏ដឹងដែរ ថាក្រុងតូក្យូនៅរដូវក្តៅ គឺក្តៅខ្លាំងណាស់។ ខែកក្កដា ខែសីហា គឺជាខែក្តៅបំផុតតែម្តង នៅតូក្យូ។ កាលពីឆ្នាំ១៩៦៤ ទីក្រុងតូក្យូ ធ្លាប់ទទួលរៀបចំកីឡាអូឡាំពិកម្តងរួចហើយ តែកាលណោះ ដោយសីតុណ្ហភាពក្តៅខ្លាំងពេក គេបានលើកទៅធ្វើនៅខែតុលាវិញ។ យ៉ាងណាមិញ លោក Haruo Ozaki ប្រធានសមាគមវេជ្ជសាស្ត្រក្រុងតូក្យូ ធ្លាប់បានប្រាប់អ្នកកាសែតថា ការសម្រេចរៀបចំកីឡាអូឡាំពិក ក្នុងខែកក្កដា-សីហា នៅក្រុងតូក្យូនេះ ធ្លាប់ជាបញ្ហា ដែលត្រូវបានគេប្រកែកគ្នា តឹងសរសៃកខ្លាំងណាស់។
រដូវក្តៅឆ្នាំ២០១៩ នៅជប៉ុន មនុស្សប្រមាណ៧១០០០នាក់ បានទូរស័ព្ទហៅរកការជួយសង្គ្រោះបន្ទាន់។ ក្នុងចំណោមនេះ មានស្លាប់ ១១៨នាក់។ ឆ្នាំ២០២០ ដែលមនុស្សនៅតែក្នុងផ្ទះមិនចេញទៅណា ដោយសារតែកូវីដ ក៏មានស្លាប់ ១១២នាក់ដែរ បណ្តាលមកពីសីតុណ្ហភាពក្តៅខ្លាំងនេះ នៅជប៉ុន។ ជាងនេះទៀត សម្រាប់ឆ្នាំនេះ តាមការព្យាករណ៍ របស់អ្នកជំនាញឧត្តុនិយម គឺសីតុណ្ហភាពនៅតូក្យូ អាចនឹងឡើងក្តៅលើសឆ្នាំមុនៗផង។ នៅតូក្យូ សីតុណ្ហភាព អាចឡើងដល់ ៣៨ ឬ ៤០°c។
នៅក្នុងពេលប្រកួតសាកល្បង កាលពីឆ្នាំ២០១៩ គណកម្មការអូឡាំពិកជប៉ុន បានសាកល្បងអនុវត្តវិធានការមួយចំនួន ដើម្បីជួយសម្រាលការលំបាក ដល់ក្រុមកីឡាករ។ វិធានការទាំងនោះ មានជាអាទិ៍ ការដាក់ឲ្យដំណើរការម៉ាស៊ីន បញ្ចេញខ្យល់និងសំណើមទឹក ជាច្រើនទីតាំង រៀបចំឲ្យមានដំបូលម្លប់ច្រើនកន្លែង ព្រមទាំងបានត្រៀមចែកទឹកកក ចំនួនប្រមាណជាង១៣០០តោនផងដែរ។ តែប៉ុណ្នឹងហើយ នៅតែមានកីឡាករខ្លះ មានបញ្ហាសុខភាព សន្លប់បាត់ស្មារតីដែរ។ វិធានការទាំងនេះ អាចមិនគ្រប់គ្រាន់ហើយ ហើយវានៅមានបញ្ហា ពាក់ម៉ាសទៀត ដែលវាធ្វើឲ្យកាន់តែពិបាកដកដង្ហើម។ គណកម្មាធិការរៀបចំ បានអះអាងថា គេនឹងបន្ធូរបន្ថយខ្លះ ទាក់ទិននឹងកាតព្វកិច្ចពាក់ម៉ាសនេះ សម្រាប់កីឡាករ ក្នុងករណីដែលនៅវាលខាងក្រៅ និង ឆ្ងាយពីគ្នា២ម៉ែត្រឡើងទៅ។
គ្រោះមហន្តរាយធម្មជាតិ អាចកើតមានក្នុងពេលប្រកួត
យោងតាមលោក Hirotada Hirose អ្នកជំនាញសិក្សាការប្រឈមគ្រោះមហន្តរាយ បានលើកឡើងថា បញ្ហាកូវីដ១៩ គឺជារឿងដែលធ្វើឲ្យគណកម្មាធិការរៀបចំការប្រកួតមានការបារម្ភ។ តែទន្ទឹមនឹងនេះ គេមិនអាចភ្លេច បញ្ហា គ្រោះមហន្តរាយធម្មជាតិបានទេ ព្រោះថាជប៉ុនជាប្រទេសប្រឈមខ្លាំងណាស់។ ជប៉ុនស្ថិតនៅតាមបណ្តោយខ្សែក្រវ៉ាត់ភ្នំភ្លើង ដោយអាចប្រឈមទាំងករណីផ្ទុះភ្នំភ្លើង ករណីរញ្ជួយដី និងករណីរលកយក្សស៊ូណាមិទៀត។ ក្រៅពីនេះ គឺនៅមានករណីខ្យល់ព្យុះទីហ្វុង ដែលបោកបក់ញឹកញាប់ណាស់ នៅជប៉ុន ក្នុងរវាងខែកក្កដានេះ។ យ៉ាងណាមិញ កាលពីឆ្នាំ ២០១៩ នៅពេលជប៉ុនទទួលរៀបចំកីឡាបាល់អោបពិភពលោក មានកម្មវិធីប្រកួតចំនួន៣ ត្រូវបានអាក់ខាន ដោយសារតែខ្យល់ព្យុះទីហ្វុង។
ទាក់ទិនបញ្ហារញ្ជួយដី លោក Toshiyasu Nagao អ្នកជំនាញធរណីសាស្រ្ត នៅសកលវិទ្យាល័យ Tokai បានលើកឡើងថា គ្រោះថ្នាក់ប្រឈមគឺមានពិតមែន ដោយមិនអាចប្រកែកបាន។ គិតពីដើមឆ្នាំនេះមក ករណីរញ្ជួយដី កម្រិត ចន្លោះពី ៦ ទៅ ៧ រិឆទឺរ បានកើតឡើង៧ដងរួចមកហើយនៅជប៉ុន។ អ្នកជំនាញមិនភ្ញាក់ផ្អើលទេ ក្នុងករណីដែលមានគ្រោះរញ្ជួយដីនៅតូក្យូ ក្នុងពេលប្រកួតកីឡាអូឡាំពិក។
បញ្ហាសុវត្ថិភាព របស់គណប្រតិភូកីឡាបរទេស រាប់ម៉ឺននាក់ ក្នុងពេលប្រកួតកីឡាអូឡាំពិកនេះ គឺជាការយកចិត្តទុកដាក់ខ្ពស់បំផុត ពីសំណាក់រដ្ឋាភិបាលជប៉ុន។ សំណង់ ហេដ្ឋារចនាសម្ព័ន្ធកីឡានៅជប៉ុន គឺត្រូវបានគេសាងសង់ ដោយគិតគូរល្អិតល្អន់ណាស់ ដើម្បីការពារសុវត្ថិភាព ក្នុងករណីមានគ្រោះរញ្ជួយដី។ សាលាក្រុងតូក្យូក៏បានអះអាងដែរ ថាគេបានសាសង់ទំនប់ការពារ ក្នុងករណីមានរលកយក្សស៊ូណាមិ។
តែយ៉ាងណា ថ្វីបើ វិធានច្បាប់សំណង់ដ៏តឹងតែង និងបច្ចេកវិទ្យាដ៏ជឿនលឿនរបស់ជប៉ុន ក្នុងការទប់ទល់ជាមួយគ្រោះធម្មជាតិ ត្រូវបានគេទទួលស្គាល់យ៉ាងណាក៏ដោយ តែអ្វីៗមិនអាចមើលឃើញទេ ក្នុងករណីដែលគ្រោះធម្មជាតិ មានទំហំធំខ្លាំង។ ជាងនេះទៀត ក្នុងករណីមានការជន្លៀសបន្ទាន់ គឺវាអាចក្លាយទៅការឆោឡោ លែងមានការគោរពវិធានការអនាម័យ ទាក់ទិននឹងបញ្ហាកូវីដទៀត។ ប្រការទាំងអស់នេះ គឺវាគួបផ្សំគ្នា ធ្វើឲ្យគណកម្មាធិការរៀបចំកីឡាអូឡាំពិកជប៉ុន ត្រូវគិតគូរឲ្យបានល្អិតល្អន់ ខ្លាំងយកតែមែនទែនតែម្តង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ