Pegasus៖ លោកម៉ាក្រុង កោះប្រជុំក្រុមប្រឹក្សាការពារជាតិ ក្រោយដំណឹង ករណីឈ្លបយកការណ៍មកលើបារាំង
ចុះផ្សាយនៅថ្ងៃ៖
ស្តាប់ - ០៨:១៥
រឿងអាស្រូវទាក់ទិននឹងការប្រើប្រាស់ កម្មវិធីបច្ចេកវិទ្យា ឈ្មោះ Pegasus ដើម្បីស៊ើបឈ្លបយកការណ៍ កំពុងតែធ្វើឲ្យរំជើបរំជួលជាខ្លាំង។ វាបានបង្ហាញ អំពីគ្រោះថ្នាក់មួយ ដែលបណ្តាលមកពីការបំពាន របស់រដ្ឋាភិបាលប្រទេសមួយចំនួន ដែលឈ្លបយកការណ៍តាមដាន មកលើថ្នាក់ដឹកនាំប្រទេសផ្សេង ឬមកលើអ្នកកាសែត និងសកម្មជនសិទ្ធិមនុស្សជាដើម។ យ៉ាងណាមិញ យោងតាមការចុះផ្សាយ របស់បណ្តាញព័ត៌មានបារាំង គឺទូរស័ព្ទរបស់លោកប្រធានាធិបតី ម៉ាក្រុង ព្រមទាំងថ្នាក់ដឹកនាំបារាំងច្រើននាក់ទៀត ត្រូវបានរងគ្រោះដោយបច្ចេកវិទ្យាឈ្លបយកការណ៍ ឈ្មោះ Pegasus នេះ។ ដោយមិនមើលស្រាលបញ្ហានេះ លោកប្រធានាធិបតីបារាំង បានកោះប្រជុំបន្ទាន់ ក្រុមប្រឹក្សាសន្តិសុខជាតិបារាំង នៅព្រឹកថ្ងៃព្រហស្បតិ៍ ទី២២កក្កដានេះ។
យោងតាមលោក Gabriel Attal អ្នកនាំពាក្យវិមានប្រធានាធិបតីបារាំង បានឲ្យដឹងកាលពីព្រឹកថ្ងៃព្រហស្បតិ៍ទី២២កក្កដា លោកម៉ាក្រុងបានកោះប្រជុំបន្ទាន់ ក្រុមប្រឹក្សាសន្តិសុខជាតិ ដើម្បីពិនិត្យលំអិត ជុំវិញបញ្ហានេះ ថាតើវាគ្រោះថ្នាក់កំរិតណា។ ក្រុមអ្នកជំនាញបារាំង នឹងស្រាវជ្រាវអង្កេតឲ្យច្បាស់លាស់ ថាតើ ទូរស័ព្ទដៃ របស់លោកប្រធានាធិបតីបារាំង អេម៉ានុយអែល ម៉ាក្រុង ពិតជាត្រូវបានគេប្រើបច្ចេកវិទ្យា Pegasus ឲ្យចូលមកឈ្លបយកការណ៍ ពិតមែនដែរឬទេ? ហើយបើពិតមែន តើទិន្នន័យ ឆ្លើយឆ្លង ឬឯកសារនានានៅក្នុងនោះ ត្រូវបានគេទាញស្រូបយកទៅ ដែរឬទេ? ក្រៅពីទូរស័ព្ទដៃ របស់លោកម៉ាក្រុង គឺបញ្ហានេះវាពាក់ព័ន្ធ ទៅលើរដ្ឋមន្ត្រី និងមន្ត្រីធំៗ ក្នុងជួរថ្នាក់ដឹកនាំបារាំង ទាំងអស់តែម្តង។
ផ្អែកតាមការចុះផ្សាយ របស់វិទ្យុជាតិបារាំង និងកាសែត Le Monde ដែលចូលរួមសហការ ក្នុងការស្រាវជ្រាវស៊ីជម្រៅ ជាមួយអង្គការ Amnesty International និង Forbiden Stories គឺក្រុមចារកិច្ចប្រទេសម៉ារ៉ុក ដែលជាអ្នកនៅពីក្រោយការប្រើប្រាស់ បច្ចេកវិទ្យា Pegasus នេះ ដើម្បីស៊ើបឈ្លបយកការណ៍ លើទូរស័ព្ទដៃរបស់លោកម៉ាក្រុង ព្រមទាំងអ្នកកាសែតបារាំងមួយចំនួនទៀត។
បារាំងធ្វេសប្រហែស?
ផ្អែកតាមមន្ត្រីជំនាញនៅសេតវិមានបារាំង ក្រៅពីទូរស័ព្ទដៃពិសេស ដែលបំពាក់ដោយបច្ចេកវិទ្យា ការពារទប់មិនឲ្យគេឈ្លបយកការណ៍បាន គឺលោកម៉ាក្រុង មានទូរស័ព្ទដៃផ្ទាល់ខ្លួន ច្រើនគ្រឿងផ្សេងទៀត។ តែគេអះអាងថា ទូរស័ព្ទទាំងនោះ ត្រូវដូរញឹកញាប់ និងត្រូវដាក់រនាំងការពារ មិនអាចទាញកម្មវិធីអ្វី មកដាក់ក្នុងនោះ ស្រួលៗទេ។ ធ្វើដូច្នេះ គឺដើម្បីបិទផ្លូវ កុំឲ្យមានកម្មវិធីបច្ចេកវិទ្យា លួចបន្លំចូលមកបាន។
ក្រុមហ៊ុនបច្ចេកវិទ្យាបារាំងមួយ ឈ្មោះ Thales គឺជាអ្នកផ្គត់ផ្គង់ ទូរស័ព្ទដៃពិសេស ដែលមានប្រព័ន្ធការពារខ្លាំង ឲ្យដល់មន្ត្រីរដ្ឋាភិបាលបារាំង ចំនួន៣០០នាក់។ ក៏ប៉ុន្តែ ជាទូទៅមិនសូវជាស្រួលប្រើប៉ុន្មានទេ ដោយសារតែវាស្មុគស្មាញពេក មានលេខកូដច្រើនពេក។ ហេតុដូច្នេះហើយ បានភាគច្រើន មន្ត្រីធំៗបារាំងច្រើនប្រើទូរស័ព្ទផ្ទាល់ខ្លួន ដើម្បីឆ្លើយឆ្លង ទំនាក់ទំនងគ្នា។
មួយវិញទៀតនោះ តាមវិធានកំណត់ ក្នុងពេលប្រជុំធំៗ ជាមួយប្រធានាធិបតីបារាំង តួយ៉ាងដូចជាប្រជុំគណរដ្ឋមន្ត្រី នៅរៀងរាល់ព្រឹកថ្ងៃពុធ គឺទាំងប្រធានាធិបតី ទាំងរដ្ឋមន្ត្រី ត្រូវទុកទូរស័ព្ទ នៅក្នុងប្រអប់ពិសេសមួយ ដែលមានសមត្ថភាព កាត់ផ្តាច់ការឈ្លបយកការណ៍ទាំងអស់។ តែនៅក្នុងការអនុវត្តជាក់ស្តែង គឺមិនដូច្នេះទេ ព្រោះគេធ្លាប់ឃើញ រូបភាពក្នុងពេលប្រជុំច្រើនដងហើយ ដែលរដ្ឋមន្ត្រីបារាំង ដាក់ទូរស័ព្ទដៃនៅលើតុប្រជុំ។ ដូច្នេះ ប្រការទាំងអស់នេះហើយ ដែលយើងអាចចាត់ទុកបានថា មានការធ្វេសប្រហែសខ្លះៗ នៅក្នុងការអនុវត្តវិធានការសន្តិសុខព័ត៌មានវិទ្យានេះ។
ម៉ារ៉ុក ថាមិនដែលទិញបច្ចេកវិទ្យា មកប្រើស៊ើបឈ្លបយកការណ៍ទេ
កាលពីថ្ងៃទី១៩ កក្កដា ទីភ្នាក់ងារព័ត៌មានផ្លូវការ របស់ប្រទេសម៉ារ៉ុក MAP បានចុះផ្សាយសេចក្តីប្រកាសរបស់រដ្ឋាភិបាលម៉ារ៉ុកថា ដែលបានអះអាងថា គេមិនដែលធ្លាប់បានទិញ បច្ចេកវិទ្យាណាមួយ យកមកប្រើ ដើម្បីឈ្លបយកការណ៍ នរណាទាំងអស់។
តែយ៉ាងណា បណ្តាញព័ត៌មានបារាំង កាសែត Le Monde បានចុះផ្សាយបន្ថែមថា គេមានភស្តុតាង និងទិន្នន័យច្រើនណាស់ ដែលបញ្ជាក់ថា ក្រុមចារកិច្ចរបស់ប្រទេសម៉ារ៉ុក ជាអ្នកនៅពីក្រោយការស៊ើបឈ្លបយកការណ៍ លើលេខទូរស័ព្ទមួយចំនួន នៅបារាំង ក្នុងនោះអាចមានលោកប្រធានាធិបតី ម៉ាក្រុង មន្ត្រីបារាំងខ្លះទៀត និងជាពិសេសនោះ គឺអ្នកកាសែត និងសកម្មជននយោបាយ ដែលគាំទ្រ ការទាមទារឯករាជ្យរបស់តំបន់សាហារ៉ាខាងលិច។ តំបន់នេះ ប្រទេសម៉ារ៉ុក កំពុងគ្រប់គ្រង និងអះអាងថាស្ថិតក្នុងដែនអធិបតេយ្យរបស់ខ្លួន។
“បានហើយ!”
ក្រុមហ៊ុនអ៊ីស្រាអែល NSO Group ដែលជាអ្នកផលិតបច្ចេកវិទ្យា Pegasus ក៏នៅតែប្រកែកដែរ ថាគេមិនបានផលិតបច្ចេកវិទ្យា លក់ទៅឲ្យប្រទេសផ្សេង យកទៅស៊ើបឈ្លបយកការណ៍ បំពានសិទ្ធិសេរីភាពសារព័ត៌មាន និងសិទ្ធិមនុស្សនោះទេ។ ក្រុមហ៊ុននេះលើកឡើងថា ការអង្កេតស្រាវជ្រាវ របស់បណ្តាញសារព័ត៌មាន ដោយសំអាងលើលេខទូរស័ព្ទ ប្រមាណ៥ម៉ឺនលេខ ដែលរងគ្រោះដោយកម្មវិធី Pegasus គឺជាការស៊ើបអង្កេត ដែលគ្មានអង្គហេតុ ដោយលំអៀង និងប្រាសចាកពីការពិត។
NSO Group អះអាងហើយ អះអាងទៀត ថាបច្ចេកវិទ្យាគេ គឺប្រើដើម្បីប្រឆាំងនឹងបណ្តាញឧក្រិដ្ឋកម្ម ឬបណ្តាញភេរវកម្មតែប៉ុណ្ណោះ។ ហើយកាលពីថ្ងៃទី២១កក្កដា NSO Group បានចេញលិខិតប្រកាសថ្មីមួយទៀត ដោយប្រើពាក្យថា “បានហើយ” ។ គេនឹងឈប់ឆ្លើយបកស្រាយអ្វីទាំងអស់ ចាប់ពីពេលនេះទៅ ព្រោះថាអ្វីដែលបណ្តាញសារព័ត៌មានកំពុងធ្វើ គឺគ្មានអ្វីក្រៅពីយុទ្ធនាការ រំខានរ៉ៅឆាន សំអុតកេរ្តិ៍ឈ្មោះរបស់ក្រុមហ៊ុនគេតែប៉ុណ្ណោះ។
អ៊ីស្រាអែល បង្កើតគណកម្មការពិសេស ដើម្បីពិនិត្យស្រាវជ្រាវ
ចង់មិនចង់ រឿងរ៉ាង Pegasus វាកំពុងតែធ្វើឲ្យប៉ះពាល់ ដល់កិត្តិយសមុខមាត់ របស់ប្រទេសអ៊ីស្រាអែល។ ជាងនេះទៀត បណ្តាញសារព័ត៌មាន ទាំងក្រុងនិងក្រៅស្រុកអ៊ីស្រាអែល បានលើកឡើងថា ក្រុមហ៊ុនបច្ចេកវិទ្យាអ៊ីស្រាអែល ធ្លាប់បានសហការយ៉ាងស្អិតរមួត ជាមួយក្រសួងការពារជាតិអ៊ីស្រាអែល ថែមទៀតផង ក្នុងការផលិតបច្ចេកវិទ្យាទំនើបផ្សេងៗ។
ក្រោយបែកធ្លាយដំណឹងនេះ លោកប៊ែរនី ហ្កាន់ស៍ រដ្ឋមន្ត្រីការពារជាតិអ៊ីស្រាអែល បានលើកឡើងថា ប្រទេសដែលទិញបច្ចេកវិទ្យាអ៊ីស្រាអែល យកទៅប្រើ គឺត្រូវតែគោរពបទវិធានអាជ្ញាបណ្ណ មិនត្រូវយកទៅប្រើដោយខុសកម្មវត្ថុនោះទេ។ អ៊ីស្រាអែល កំពុងតែពិនិត្យបញ្ហានេះ ដោយប្រុងប្រយ័ត្នបំផុត។
យោងតាមការចុះផ្សាយរបស់កាសែត ក្នុងស្រុកអ៊ីស្រាអែល គឺលោករដ្ឋមន្ត្រីក្រសួងការពារជាតិ អ៊ីស្រាអែល បានចាត់តាំង បង្កើតអង្គភាពអន្តរក្រសួងមួយ ដើម្បីតាមដានអង្កេតឲ្យបានស៊ីជម្រៅ ទាក់ទិននឹងផលវិបាក នៃការប្រើបច្ចេកវិទ្យា Pegasus ព្រមទាំងពិនិត្យមើលឡើងវិញ លើអាជ្ញាបណ្ណប្រតិបត្តិការ របស់ក្រុមហ៊ុន NSO Group។
ដោយឡែក នៅតាមវិទ្យុអ៊ីស្រាអែល លោក Shalev Hulio អគ្គនាយកក្រុមហ៊ុន NSO Group បានអះអាងថា ក្រុមហ៊ុនខ្លួនប្រយ័ត្នណាស់ មិនមែនចេះតែលក់បច្ចេកវិទ្យានេះឲ្យគេទេ។ បច្ចុប្បន្ននេះ NSO Group សហការតែជាមួយប្រទេស៤៥ប្រទេសទេ ហើយក្នុងរយៈពេល១១ឆ្នាំ ដែលក្រុមហ៊ុននេះរកស៊ី គឺគេធ្លាប់បានបដិសេធ មិនលក់បច្ចេកវិទ្យា ទៅឲ្យប្រទេសចំនួន ៩០ប្រទេសឯណោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ