នាយករដ្ឋមន្រ្តីអ៊ីរ៉ាក់ គ្រោងទៅជួបលោកចូ បៃដិន ដើម្បីនិយាយគ្នាអំពីការដកទ័ពចេញពីអ៊ីរ៉ាក់
ចុះផ្សាយនៅថ្ងៃ៖
មិនខុសពីអាហ្វហ្កានីស្ថាន ចរន្តនយោបាយមួយចំនួននៅអ៊ីរ៉ាក់ កំពុងតែព្យាយាមជំរុញ ឲ្យអាមេរិក ត្រូវដកទ័ពឲ្យអស់ ចេញពីទឹកដីខ្លួន។ កងទ័ពអ៊ីរ៉ាក់ ធ្លាប់បានអះអាងកាលពីខែមេសាកន្លងទៅថា សហរដ្ឋអាមេរិក លែងមានហេតុផលអ្វី ក្នុងការបន្ត ទុកកងទ័ពឲ្យឈរជើងនៅអ៊ីរ៉ាក់ទៀតហើយ ព្រោះក្រុមភេរវកម្មជីហាត អង្គការរដ្ឋអ៊ីស្លាម ត្រូវបានវាយកំទេចអស់ហើយ។ តែយ៉ាងណា កាលពីថ្ងៃចន្ទដើមសប្តាហ៍នេះ អ៊ីរ៉ាក់ទើបតែបានរងនូវការវាយប្រហារភេរវកម្ម បង្កឡើងដោយក្រុមជីហាតអង្គការរដ្ឋអ៊ីស្លាម បណ្តាលឲ្យស្លាប់មនុស្ស ប្រមាណ២៨នាក់ នៅទីក្រុងបាកដាត។ ទោះជាយ៉ាងនេះក្តី លោកនាយករដ្ឋមន្ត្រីអ៊ីរ៉ាក់ បានប្រកាសថា លោកនឹងទៅជួបលោកប្រធានាធិបតី ចូ បៃដិន នៅទីក្រុងវ៉ាស៊ីនតោន នៅថ្ងៃចន្ទដើមសប្តាហ៍ក្រោយនេះ ដើម្បីនិយាយគ្នាអំពីការដកទ័ពអាមេរិក ពីអ៊ីរ៉ាក់។
ស្ថានភាពសន្តិសុខនៅអ៊ីរ៉ាក់ មិនទាន់ល្អប្រសើរទាំងស្រុងទេ។ ក្រុមជីហាតអង្គការរដ្ឋអ៊ីស្លាម បាត់បង់ទឹកដីគ្រប់គ្រងមែន តែក្រុមនេះនៅតែមានកម្លាំងប្រយុទ្ធរាយប៉ាយ និងធ្វើភេរវកម្មដដែល។ ជាក់ស្តែងភេរវកម្ម កាលពីថ្ងៃចន្ទទី១៩កក្កដា នៅក្រុងបាកដាដ បណ្តាលឲ្យស្លាប់មនុស្សប្រមាណ២៨នាក់។
តែយ៉ាងណា ស្ថានភាពនៅអ៊ីរ៉ាក់មានលក្ខណៈមិនដូចគ្នាទេ បើប្រៀបធៀបទៅអាហ្វហ្កានីស្ថាន។ កងទ័ពអាមេរិក នៅអាហ្វហ្កានីស្ថាន មានប្រតិបត្តិការជួយផ្នែកផ្លូវអាកាសបានច្រើនណាស់។ ដែលប្រការនេះ គឺធ្វើឲ្យកងទ័ពជាតិអាហ្វហ្កានីស្ថាន បាត់បង់បង្អែកមួយដ៏សំខាន់ នៅពេលដែលអស់វត្តមាន របស់កងទ័ពអាមេរិក។
ដោយឡែក នៅអ៊ីរ៉ាក់វិញ កងទ័ពអាមេរិកដែលត្រូវបានបញ្ជូនទៅធ្វើប្រតិបត្តិការបោសសំអាតក្រុមជីហាតអង្គការរដ្ឋអ៊ីស្លាម កាលពីឆ្នាំ២០១៤នោះ ត្រូវបានដកចេញវិញសឹងទាំងអស់ហើយ ក្នុងអាណត្តិលោកដូណាល់ ត្រាំ។ បច្ចុប្បន្ន វត្តមានកងទ័ពអាមេរិក ឈរជើងនៅអ៊ីរ៉ាក់ នៅសល់តែចំនួន២៥០០នាក់ទេ តែមិនមែនជាក្រុមបេសកកម្មប្រយុទ្ធទេ។ ទាហានអាមេរិក២៥០០នាក់នេះ គឺជាក្រុមជំនួយផ្នែកប្រឹក្សាយោបល់ និងហ្វឹកហាត់តែប៉ុណ្ណោះ។ ដូច្នេះ កម្លាំងការពារសន្តិសុខ ប្រយុទ្ធនឹងក្រុមភេរវកម្ម នៅអ៊ីរ៉ាក់ គឺពឹងផ្អែកខ្លាំងទៅលើសមត្ថភាពកងទ័ពអ៊ីរ៉ាក់ខ្លួនឯង ហើយដែលក្នុងនោះ មានមានក្រុម Hachd al-Chaabi ដែលជាក្រុមប្រដាប់អាវុធកូនចៅអ៊ីរ៉ង់។
ឃោសនានយោបាយ
លោក មូស្តាហ្វា អាល់កាហ្ស៊ីមី នាយករដ្ឋមន្ត្រីអ៊ីរ៉ាក់ កំពុងតែរកវិធី ពង្រឹងនយោបាយខ្លួនឯង ខណៈដែលការបោះឆ្នោតសភានៅខែតុលា កាន់តែខិតជិតមកដល់។ ទោះចង់មិនចង់ វត្តមានរបស់កងទ័ពអាមេរិក នៅអ៊ីរ៉ាក់ គឺជានិម្មិតរូប នៃការឈរជើង ព្រមទាំងឥទ្ធិពលរបស់អាមេរិក ទៅលើកម្លាំងកងទ័ពអ៊ីរ៉ាក់។ ជានិម្មិតរូប ដែលក្រុមចរន្តនយោបាយ គាំទ្រដោយអ៊ីរ៉ង់ ជាក់ស្តែង គឺក្រុមប្រដាប់អាវុធ Hachd al-Chaabi នេះ មិនគាំទ្រទេ។ ក្រុមទាំងនេះ បានអះអាងថា អាមេរិក លែងមានហេតុផលអ្វី ទុកកងទ័ពនៅអ៊ីរ៉ាក់ទៀតហើយ។
ដូចយើងដឹងហើយ ថាអ៊ីរ៉ាក់ ជាប្រទេសដែលត្រូវប្រទាញប្រទង់គ្នាខ្លាំងណាស់ រវាងចរន្តនយោបាយនៅខាងអ៊ីរ៉ង់ និង នៅខាងអាមេរិក។ បញ្ហានេះ វាជះឥទ្ធិពលយ៉ាងខ្លាំង ទៅលើមតិសាធារណៈប្រជាជនអ៊ីរ៉ាក់ នៅក្នុងពេលបោះឆ្នោតម្តងៗ។ លោក Ramzy Mardini អ្នកជំនាញនៅវិទ្យាស្ថាន Pearson Institute សកលវិទ្យាល័យឈីកាហ្គោ បានលើកឡើងថា ដំណើររបស់លោក មូស្តាហ្វា អាល់កាហ្ស៊ីមី នាយករដ្ឋមន្ត្រីអ៊ីរ៉ាក់ ទៅជួបលោកចូ បៃដិន នៅថ្ងៃចន្ទក្រោយនេះ គឺវាជាផ្នែកមួយ នៃការឃោសនានយោបាយ របស់លោកនាយករដ្ឋមន្ត្រីអ៊ីរ៉ាក់ ដើម្បីយកឈ្នះការបោះឆ្នោតនៅខែតុលា ហើយបន្តដឹកនាំរដ្ឋាភិបាលតទៅទៀត។
លោកមូស្តាហ្វា អាល់កាហ្ស៊ីមី ត្រូវការបង្ហាញប្រាប់ទៅប្រជាជនអ៊ីរ៉ាក់ ក៏ដូចជាចរន្តនយោបាយដែលស្អប់អាមេរិកនៅអ៊ីរ៉ាក់ ថាលោកមិនព្រងើយកន្តើយទេ លោកក៏ចង់ជំរុញ ឲ្យអាមេរិក ដកទ័ពឲ្យអស់ ចេញពីអ៊ីរ៉ាក់ដែរ។ ធាតុពិតជាក់ស្តែង នៅក្រោយការទៅនិយាយជាមួយលោក ចូ បៃដិន អំពីបញ្ហាការដកទ័ពអាមេរិកនេះ គឺលោកនាយករដ្ឋមន្ត្រីអ៊ីរ៉ាក់ ចង់កេងចំណេញនយោបាយ ទាំងដែលដឹងច្បាស់ក្នុងចិត្តថា រដ្ឋាភិបាលលោកចូ បៃដិន ប្រាដកជាមិនដកទ័ព២៥០០ដែលនៅសេសសល់នោះ ចេញពីអ៊ីរ៉ាក់ទេ។ នេះ បើផ្អែកតាមការវិភាគ របស់លោក Ramzy Mardini។
រដ្ឋាភិបាលលោក ចូ បៃដិន នឹងមិនដកទ័ពចេញពីអ៊ីរ៉ាក់ទេ
បើផ្អែកតាមការវិភាគ របស់អ្នកជំនាញ គឺគេមិនរំពឹងថាលោកចូ បៃដិន នឹងសម្រេចដកទ័ពអាមេរិក ចេញពីអ៊ីរ៉ាក់ទេ។ គេអាចនឹងនិយាយគ្នា អំពីផែនការ កាលវិភាគ នៃការដកកម្លាំង ឬក៏អាចជាការកំណត់កម្មវត្ថុឡើងវិញ របស់វត្តមានកងទ័ពអាមេរិកនៅអ៊ីរ៉ាក់។ ប្រភពពីមន្ត្រីការទូតបញ្ចឹមប្រទេសម្នាក់ ប្រចាំនៅអ៊ីរ៉ាក់ បានលើកឡើងថា អាមេរិកមិនចង់ស្តាយក្រោយ នៅពេលដែលដកទ័ពអស់ ស្រាប់តែថ្ងៃមុខ ក្រុមជីហាតអង្គការរដ្ឋអ៊ីស្លាម កើនកម្លាំងឡើងវិញនៅអ៊ីរ៉ាក់។ សម្រាប់ពេលនេះ គេមានហេតុផលច្រើនណាស់ ដែលត្រូវព្រួយបារម្ភ អំពីការស្ទុះងើបឡើងវិញ នៃក្រុមភេរវកម្មជីហាតអង្គការរដ្ឋអ៊ីស្លាមនេះ។
តែយ៉ាងណា លោក Sajad Jiyad អ្នកវិភាគម្នាក់នៅអ៊ីរ៉ាក់ បានប្រាប់អ្នកយកព័ត៌មានបារាំងថា លោកបារម្ភ ក្រែងបញ្ហាចលាចល អស្ថិរភាពនយោបាយ និងសន្តិសុខ នឹងកើនមានកាន់តែខ្លាំង ប្រសិនបើគ្មានការប្រកាសជាក់ច្បាស់ណាមួយ ថាអាមេរិកនឹងដកទ័ពចេញទេនោះ។ ជាការព្រួយបារម្ភ ដែលត្រូវបានមេក្រុមប្រដាប់អាវុធគាំទ្រអ៊ីរ៉ង់ម្នាក់ ឈ្មោះ Assaïb Ahl al-Haq បានទទួលស្គាល់ដែរថា ក្រុមគេនឹងបើកការវាយប្រហារ ប្រឆាំងនឹងវត្តមានរបស់កងទ័ពអាមេរិក រហូតទាល់តែអាមេរិកសម្រេចដកទ័ពចេញ ឲ្យអស់ពីអ៊ីរ៉ាក់។
នៅក្នុងបរិបទ អស្ថិរភាពខ្លាំងនេះហើយ បើតាមការរបស់លោក Sajad Jiyad គឺលោកនាយករដ្ឋមន្ត្រីអ៊ីរ៉ាក់ នឹងទៅនិយាយជាមួយលោកចូ បៃដិន ដើម្បីសុំជំនួយគាំទ្រខ្លះៗ ដើម្បីបញ្ចៀសកុំឲ្យស្ថានភាពកាន់តែដុនដាបវឹកវរ។ ជំនួយគាំទ្រ ដែលអាេមរិក អាចនឹងធ្វើ តាមរយៈការបន្ធូរបន្ថយខ្លះ ឲ្យអ៊ីរ៉ាក់ អាចធ្វើជំនួញជាមួយអ៊ីរ៉ង់។ អ៊ីរ៉ាក់កំពុងជួបវិបត្តិសេដ្ឋកិច្ច និងសុខាភិបាល ដោយសារកូវីដ១៩ ហើយជាងនេះទៀត អ៊ីរ៉ង់បានកាត់ផ្តាច់ការផ្គត់ផ្គង់ថាមពលហ្កាស កាលពីខែមិថុនាទៀត ដោយសារតែអ៊ីរ៉ាក់ ជំពាក់ប្រាក់ចំនួន៦ពាន់លានដុល្លារ។ ដូច្នេះ បើអាមេរិក ព្រមបើកច្រក ដង្ហើមសេដ្ឋកិច្ចខ្លះ រវាងអ៊ីរ៉ាក់ និងអ៊ីរ៉ង់ គឺវាអាចជួយសម្រាលស្ថានការណ៍បានទាំងសងខាង ហើយលោកនាយករដ្ឋមន្ត្រី មូស្តាហ្វា អាល់កាហ្ស៊ីមី ក៏ចំណេញនយោបាយ អាចឈ្នះឆ្នោតដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ