ប្រមុខការបរទេសអាមេរិកធ្វើទស្សនកិច្ចផ្លូវការជាលើកដំបូងទៅកាន់ប្រទេសឥណ្ឌា
ចុះផ្សាយនៅថ្ងៃ៖
ស្តាប់ - ០៨:០៨
នៅថ្ងៃពុធ ទី២៨ កក្កដានេះ ប្រមុខការបរទេសអាមេរិកលោក អង់តូនី ប្ល៊ីងកិន កំពុងមានវត្តមាននៅក្នុងទីក្រុងញូវដែលី សម្រាប់ទស្សនកិច្ចជាផ្លូវការលើកដំបូងបង្អស់របស់លោកនៅក្នុងប្រទេសឥណ្ឌា។ កិច្ចពិភាក្សារវាងលោក ប្ល៊ីងកិន និងសម្ព័ន្ធមិត្តឥណ្ឌានឹងផ្តោតជាសំខាន់លើបញ្ហាប្រឈមមុខគ្នាជាមួយចិន បញ្ហាអាហ្វហ្កានីស្ថាន ក៏ដូចជាបញ្ហាសិទ្ធិមនុស្សនិងប្រជាធិបតេយ្យនៅឥណ្ឌា។
បញ្ហាប្រឈមជាមួយចិន
សម្រាប់កិច្ចពិភាក្សាជាផ្លូវការជាមួយប្រមុខការបរទេសអាមេរិក លោក អង់តូនី ប្ល៊ីងកិន នៅថ្ងៃពុធ ទី ២៨ កក្កដានេះ គេរំពឹងថាមន្ត្រីរដ្ឋាភិបាលឥណ្ឌា នឹងសម្តែងការព្រួយបារម្ភរបស់ខ្លួនចំពោះការដំឡើងសាច់ដុំកាន់តែខ្លាំងឡើងរបស់ចិន។
ឥណ្ឌារបស់លោកនាយករដ្ឋមន្ត្រី ណារិនដ្រា ម៉ូឌី ចង់ចរចាជំរុញឲ្យមានការគាំទ្របន្ថែមទៀតពីសហរដ្ឋអាមេរិក ដើម្បីប្រឆាំងទល់នឹងប្រទេសចិនជុំវិញភាពតានតឹងនៅតាមព្រំដែន។
តាមពិតទៅទំនាក់ទំនងរវាងសហរដ្ឋអាមេរិកនិងឥណ្ឌា ធ្លាប់មានបញ្ហារកាំរកូសនឹងគ្នាដែរ ក៏ប៉ុន្តែការលេចត្រដែតឡើងរបស់មហាយក្សចិន បានរុញច្រានឲ្យពួកគេខិតកាន់តែជិតចូលគ្នា។ ជាពិសេសចាប់តាំងពីមានការប៉ះទង្គិចគ្នាដ៏សាហាវកាលពីឆ្នាំមុនរវាងទាហានចិននិងឥណ្ឌានៅតាមព្រំដែនលើជួរភ្នំហិម៉ាឡៃ។
ប្រទេសឥណ្ឌាគឺជាផ្នែកមួយនៃសម្ព័ន្ធភាពចតុភាគី “Quad” ជាមួយសហរដ្ឋអាមេរិក ជប៉ុននិងអូស្ត្រាលី។ ឥណ្ឌាត្រូវបានគេមើលឃើញថាគឺជាកម្លាំងរុញច្រានដ៏សំខាន់មួយជួយក្រុងវ៉ាស៊ីនតោនក្នុងការប្រឆាំងរាំងខ្ទប់ឥទ្ធិពលចិន។
ក៏ប៉ុន្តែ បើយោងតាមអ្នកជំនាញកិច្ចការយុទ្ធសាស្ត្រនៅមជ្ឈមណ្ឌលស្រាវជ្រាវគោលនយោបាយឥណ្ឌា លោក ប្រាម៉ា ឆេឡាណី (Brahma Chellaney) ការគាំទ្ររបស់សហរដ្ឋអាមេរិកចំពោះទីក្រុងញូវដែលីបានធ្លាក់ចុះ ចាប់តាំងពីលោកចូ បៃដិនបានឡើងកាន់អំណាចជំនួសលោកដូណាល់ត្រាំក្នុងនាមជាប្រធានាធិបតីរួចមក។
ហេតុអ្វីប្រធានាធិបតីអាមេរិកចូ បៃដិន មិនសូវបង្ហាញការគាំទ្រខ្លាំងចំពោះឥណ្ឌា?
ប្រទេសឥណ្ឌាស្ថិតនៅក្នុងស្ថានភាព ប្រឈមមុខជាមួយប្រទេសចិននៅតាមព្រំដែន។ កាលពីសម័យគ្រប់គ្រងរដ្ឋរបស់លោក ដូណាល់ ត្រាំ សហរដ្ឋអាមេរិកបានចេញមុខថ្កោលទោសជាសាធារណៈចំពោះការឈ្លានពានរបស់ចិន និងបានបង្ហាញពីការគាំទ្រយ៉ាងពេញទំហឹងចំពោះឥណ្ឌា។
ផ្ទុយទៅវិញរហូតមកដល់ពេលនេះ គេនៅមិនទាន់ឃើញមន្ត្រីរដ្ឋាភិបាលអាមេរិកថ្មីរូបណាមួយក្រោយរដ្ឋបាលលោក ចូ បៃដិន ចេញមុខផ្តល់ការគាំទ្រដោយបើកចំហ ដល់ប្រទេសឥណ្ឌាឡើយ។ នេះបើតាមសម្តីរបស់ លោក ប្រាម៉ា ឆេឡាណី ដែលជាអ្នកជំនាញកិច្ចការនយោបាយប្រាប់ទៅកាន់ទីភ្នាក់ងារព័ត៌មាន AFP។
មូលហេតុនេះហើយដែលធ្វើឲ្យឥណ្ឌារសាប់រសល់ មិនស្រណុកក្នុងចិត្ត និងបានត្រៀមខ្លួនរួចជាស្រេចជួបចរចា ជាមួយលោករដ្ឋមន្ត្រីការបរទេសអាមេរិក លោក ប្ល៊ីងកិន ដើម្បីទាញអាមេរិកឲ្យងាកបែរមកគាំទ្រខ្លួនខ្លាំងដូចមុនវិញ។
មន្ត្រីសេតវិមានអាមេរិកបច្ចុប្បន្នមិនដែលបានចេញមុខផ្តល់ការគាំទ្រ ដោយបើកចំហដល់ប្រទេសឥណ្ឌានោះទេ ពាក់ព័ន្ធបញ្ហាប្រឈមរបស់ឥណ្ឌាជាមួយចិន ជាពិសេសនៅក្រោយមានការប៉ះទង្គិចគ្នារវាងទាហានឥណ្ឌា និងចិននៅព្រំប្រទល់ដែន រវាងប្រទេសទាំងពីររួចមក។
ការដែលរដ្ឋបាលរបស់លោកចូ បៃដិន មិនសូវបង្ហាញការយកចិត្តទុកដាក់ខ្វល់ខ្វាយខ្លាំងនឹងឥណ្ឌានេះ ទំនងមកពីបញ្ហាទាក់ទិនសិទ្ធិមនុស្ស និងលទ្ធិប្រជាធិបតេយ្យនៅឥណ្ឌា។
នៅមួយរយៈពេលចុងក្រោយនេះ រឿងអាស្រូវទាក់ទងនឹងបញ្ហារឹតត្បិតសិទ្ធិសេរីភាព កំពុងផ្ទុះខ្លាំងនៅក្នុងប្រទេសឥណ្ឌា។ នៅក្រោមការគ្រប់គ្រងរបស់លោកនាយករដ្ឋមន្ត្រី ណារិនដ្រា ម៉ូឌី រដ្ឋាភិបាលក្រុងញូវដែលីបានបង្កើនការប្រើច្បាប់ប្រឆាំងទល់នឹងអំពើភេរវកម្មនិងការ“ បះបោរ” ដើម្បីចាប់ខ្លួនមនុស្សជាច្រើន។
ក្រុមសិទិ្ធមនុស្សបាននិយាយថាសេរីភាពស៊ីវិលនិងក្រុមអ្នកប្រឆាំងកំពុងតែរងការវាយប្រហារកាន់តែខ្លាំងឡើងនៅក្នុងប្រទេសប្រជាធិបតេយ្យដ៏ធំបំផុតរបស់ពិភពលោក ក្រោមការដឹកនាំរបស់រដ្ឋាភិបាលលោកនាយករដ្ឋមន្រ្តីម៉ូឌី ដែលជាអ្នកហិឌ្ឌូនិយម។ ក្រុមអ្នករិះគន់បាននិយាយថារដ្ឋអំណាចឥណ្ឌាបានយកច្បាប់ប្រឆាំងទល់នឹងអំពើភេរវកម្ម និងការបះបោរនេះ ជាលេសដើម្បីបំបិទសំឡេងក្រុមអ្នកប្រឆាំង សកម្មជនសិទ្ធិមនុស្ស និងអ្នកកាសែតជាដើម។
រដ្ឋាភិបាលជាតិនិយមហិណ្ឌូរបស់លោកម៉ូឌី ក៏បានតាក់តែងផងដែរនូវច្បាប់ដែលក្រុមអ្នកប្រឆាំងនិយាយថាជាការរើសអើងចំពោះជនជាតិភាគតិចកាន់សាសនាអ៊ីស្លាមចំនួនប្រមាណ ១៧០ លាននាក់ដែលកំពុងរស់នៅក្នុងប្រទេសឥណ្ឌា។
ក៏ប៉ុន្តែ រដ្ឋាភិបាលឥណ្ឌាបានបដិសេដចំពោះការលើកឡើងនេះ។ លោកនាយករដ្ឋមន្ត្រីម៉ូឌី បានឆ្លើយតបដោយសង្កត់ធ្ងន់ថា ប្រជាពលរដ្ឋឥណ្ឌាគ្រប់ស្រទាប់វណ្ណៈទាំងអស់ មិនថាអ្នកមាន អ្នកក្រ អ្នកមាននិន្នាការនយោបាយណា ឬអ្នកកាន់សាសនាណានោះទេ គឺសុទ្ធមានសិទ្ធិសេរីភាពស្មើគ្នាទាំងអស់។
ជារួម រឿងអាស្រូវទាក់ទងនឹងបញ្ហារឹតត្បិតសិទ្ធិសេរីភាពនិងលទ្ធិប្រជាធិបតេយ្យនេះ ហើយដែលគេមើលឃើញថា ជាចំណុចធ្វើឲ្យប្រធានាធិបតីលោកចូ បៃដិន ថ្នាក់ថ្នឹងចិត្តនឹងឥណ្ឌា ពីព្រោះថាលោកបៃដិន ដែលជាប្រធានាធិបតីអាមេរិកមកពីបក្សប្រជាធិបតេយ្យ ឲ្យតម្លៃខ្លាំងណាស់ទៅលើគុណតម្លៃនៃលទ្ធិលប្រជាធិតេយ្យ និងសិទ្ធិសេរីភាព។
ជាកស្តែង នៅមុនជួបពិភាក្សាជាមួយនាយករដ្ឋមន្ត្រី និងរដ្ឋមន្ត្រីការបរទេសឥណ្ឌានាពុធនេះ ប្រមុខការបរទេសអាមេរិកលោកប្ល៊ីងកិន បានចេញសេចក្តីព្រមានមួយអំពីការដើរថយក្រោយនៃលទ្ធិប្រជាធិបតេយ្យរបស់ឥណ្ឌា។ ទន្ទឹមគ្នានេះលោក ប្ល៊ីងកិនក៏បានប្រាប់ក្រុមសង្គមស៊ីវិលដែថាសហរដ្ឋអាមេរិកនិងឥណ្ឌាត្រូវបានចងផ្សារភ្ជាប់ ដោយគុណតម្លៃរួមគ្នា ដូចជាក្រមវិន័យច្បាប់និងសេរីភាពនៃសាសនាជាដើម។
បញ្ហាអាហ្វហ្កានីស្ថាន
បញ្ហាទាក់ទិនអាហ្វហ្កានីស្ថានគឺជាចំណុចដ៏សំខាន់មួយដែរដែលឥណ្ឌាចាំបាច់ត្រូវការជជែកពិភាក្សាជាមួយលោកប្ល៊ីងកិន។ សហរដ្ឋអាមេរិកបានធ្វើឲ្យក្រុងញូវដែលី ខ្វល់ខ្វាយចិត្តនឹងការចាកចេញយ៉ាងរហ័សពេករបស់កងទ័ពអាមេរិកពីប្រទេសអាហ្វហ្កានីស្ថាន។
ឥណ្ឌាដែលជាខ្នងបង្អែកដ៏ធំមួយរបស់រដ្ឋាភិបាលក្រុងកាប៊ុល កំពុងព្រួយបារម្ភខ្លាចថា ការវាយដណ្តើមកាន់កាប់បានទីតាំងភូមិសាស្ត្រជាច្រើនដោយពួកតាលីបង់នៅក្នុងប្រទេសអាហ្វហា្កនីស្ថានគឺជាគ្រោះថ្នាក់ធំណាស់សម្រាប់ឥណ្ឌា។
ពួកតាលីបង់ត្រូវបានឥណ្ឌាមើលឃើញថាទទួលបានការគាំទ្រពីគូប្រជែងរបស់ខ្លួនប៉ាគីស្ថាន ដូច្នោះហើយរដ្ឋាភិបាលឥណ្ឌា ខ្លាចថា ក្នុងករណីពួកតាលីបង់ គ្រប់គ្រង់អាហ្វហ្កានីស្ថានបាន នោះ ពួកគេនឹងប្រែក្លាយប្រទេសមួយនេះទៅជាមូលដ្ឋានសម្រាប់ពួកសកម្មប្រយុទ្ធដើម្បីវាយប្រហារមកលើឥណ្ឌា។
នៅចុងបញ្ចប់នេះ គួរជម្រាបជូនដែរថា ក្រៅពីបញ្ហាប្រឈមមុខគ្នាជាមួយចិន បញ្ហាអាហ្វហ្កានីស្ថាន បញ្ហាសិទ្ធិមនុស្សនិងប្រជាធិបតេយ្យនៅឥណ្ឌា ក្នុងអំឡុងពេលបំពេញទស្សនកិច្ចជាផ្លូវការនៅឥណ្ឌាលើកនេះ ប្រមុខការបរទេសអាមេរិក លោកអង់តូនិ ប្ល៊ីងកិន ក៏នឹងជជែកពិភាក្សាជាមួយភាគីឥណ្ឌាផងដែរស្តីអំពីកិច្ចខិតខំប្រឹងប្រែងរួមគ្នាលើការផលិតវ៉ាក់សាំងកូវីដ និងបញ្ហាស្តីអំពីការប្រែប្រួលអាកាសធាតុ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ