អាមេរិក ដាក់ទណ្ឌកម្មហិរញ្ញវត្ថុ លើប៉ូលិសគុយបា ហើយ ថ្នាក់ដឹកនាំច្រើននាក់ក្នុងបញ្ជីខ្មៅ
ចុះផ្សាយនៅថ្ងៃ៖
ស្តាប់ - ០៧:៥៤
ប្រធានាធិបតី សហរដ្ឋអាមេរិក ចូ បៃដិន ពីថ្ងៃទី៣០កក្កដា បានប្រកាសដាក់ទណ្ឌកម្មហិរញ្ញវត្ថុ លើមេប៉ូលិសគុយបា ២នាក់ ហើយ មន្ត្រីគុយបាជាច្រើននាក់ទៀត នៅក្រសួងមហាផ្ទៃ ត្រូវដាក់ឈ្មោះចូលបញ្ជីខ្មៅអាមេរិក។ ទណ្ឌកម្មនេះ គឺសំដៅលើថ្នាក់ដឹកនាំធំៗគុយបា ដែលចូលរួមបង្គ្រាបបាតុករ។ បាតុកម្ម ប្រឆាំងរដ្ឋាភិបាលនៅគុយបា បានកើតឡើងប្រមាណ២០ថ្ងៃមកហើយ តែត្រូវរងការបង្គ្រាបយ៉ាងធ្ងន់ធ្ងរពីសំណាក់ក្រុមអាជ្ញាធរ។ ចំណែក អ្នកធ្វើបាតុកម្ម បានអំពាវនាវសុំអាមេរិកជួយ។ សហរដ្ឋអាមេរិកបានថ្លែងគាំទ្របាតុករគុយបា និងបានដាក់ទណ្ឌកម្មជាបន្តបន្ទាប់ចំពោះថ្នាក់ដឹកនាំគុយបា។
អ្នកវិភាគខ្លះ មើលឃើញថា រដ្ឋបាលអាមេរិក ត្រូវរងសម្ពាធបន្ថែម ទើបសម្រេចចិត្តដាក់ទណ្ឌកម្មបន្ថែមដែរ ទៅលើថ្នាក់ដឹកនាំគុយបា។
លោក ចូ បៃដិន និងរដ្ឋបាលអាមេរិក ត្រូវគេមើលឃើញថា មានការជំរុញបន្ថែមជាខ្លាំង ពីសំណាក់ អ្នកតំណាងរាស្ត្រនៅក្នុងសភា Congrès និងអ្នកនយោបាយអាមេរិក ដែលមានដើមកំណើត គុយបា។
បើគិតពីចំនួនប្រជាជន គឺ គុយបា សព្វថ្ងៃ មានចំនួនជាង ១១លាន ៣សែននាក់។ ពលរដ្ឋអាមេរិកដើមកំណើតគុយបា រស់នៅលើទឹកដីអាមេរិក មានប្រហែលជាង ២លាន៣សែននាក់ ដែលភាគច្រើនរស់នៅ រដ្ឋ Florida ។ ចំនួននេះ ត្រូវគេចាត់ទុកថា ជាសហគមន៍ធំ លំដាប់ទី៣ នៅសហរដ្ឋអាមេរិក។ ពលរដ្ឋគុយបា មានទម្ងន់ខាងនយោបាយនៅអាមេរិក ដ្បិតថាកាលពីពេលឃោសនាបោះឆ្នោត លោក ចូ បៃដិន ក៏បានសន្យាជួយរកមធ្យោបាយជាច្រើនចំណុច ដើម្បីគិតគូរដល់គុយបាដែរ។ ដូច្នេះពេលនេះ ជាវេលាដែលលោកប្រធានាធិបតី ចូ បៃដិន ត្រូវធ្វើអ្វីខ្លះ ដើម្បីឆ្លើយតបនឹងការសន្យារបស់គាត់។
ស្ថានការណ៍តម្រូវចំម៉ាច់តែម្តង។ ចាប់ពីថ្ងៃទី១១-១២កក្កដា មក ពលរដ្ឋគុយបា រាប់រយពាន់នាក់ ចុះផ្លូវតស៊ូប្រឆាំងនឹងរដ្ឋអំណាច។ ស្រែកត្អូញត្អែពីការលំបាកក្រោមការដឹកនាំរបស់រដ្ឋអំណាចបច្ចុប្បន្ន។ បាតុករខ្លះស្រែកត្អូញពីភាពក្រខ្សត់ អត់ឃ្លាន និងថែមស្រែកចោទប្រកាន់រដ្ឋាភិបាលថា ផ្តាច់ការ ហើយនិងទាមទារអ្នកដឹកនាំចុះចេញពីអំណាច ជាដើម។
បើតាមការសង្កេតរបស់ ក្រុមបក្សប្រឆាំងនិងអង្គការសង្គមស៊ីវិល ដែលនិន្នាការជំទាស់ គឺ នេះជាមហាបាតុកម្ម និងជាព្រឹត្តិការណ៍តស៊ូមតិដ៏ធំ មិនធ្លាប់មាននៅក្នុងសង្គមគុយបា បើគិតរយៈពេលជាង៦០ឆ្នាំចុងក្រោយនេះ ឬបើរាប់ពីបដិវត្តគុយបា ឆ្នាំ ១៩៥៩មក។
បាតុករជាច្រើននាក់ ត្រូវប៉ូលិសបង្ក្រាបនិងចាប់ខ្លួន។ សហរដ្ឋអាមេរិកបានថ្កោលជាបន្តបន្ទាប់ចំពោះចំណាត់ការរបស់រដ្ឋអំណាចគុយបា ហើយនិងចាត់ទុកថាទង្វើរបស់កម្លាំងសមត្ថកិច្ចគុយបា ជាការរឹតត្បិតសិទ្ធិសេរីភាពសម្តែងមតិ។
លោក ចូ បៃដិន សម្តែងសមានចិត្តគាំទ្របាតុករគុយបា និងមានប្រសាសន៍ក្នុងសេចក្តីថ្លែងការណ៍ថា «យើងបានឮសម្រែករបស់អ្នក គឺសម្រែកទាមទារសេរីភាព។» រដ្ឋបាលរបស់លោក បានដាក់ទណ្ឌកម្មលើថ្នាក់ដឹកនាំគុយបា ។
ទណ្ឌកម្មសហរដ្ឋអាមេរិកទៅលើ គុយបា នៅពេលនេះ គឺអ្វីខ្លះ?
១០ថ្ងៃក្រោយការផ្ទុះបាតុកម្ម គឺថ្ងៃទី២២ រតនាគារជាតិអាមេរិក បានដាក់ទណ្ឌកម្មផ្នែកហិរញ្ញវត្ថុ សំដៅបុគ្គល គឺដាក់ទណ្ឌកម្មផ្នែកហិរញ្ញវត្ថុទៅលើរដ្ឋមន្ត្រីការពារជាតិ ហើយនិង បុគ្គលថ្នាក់ដឹកនាំជាច្រើននាក់ផ្សេងទៀត នៅក្រសួងមហាផ្ទៃគុយបា។ នៅក្រសួងមហាផ្ទៃ ប្រហែលជាមិនសូវមានឈ្មោះថ្មី សម្រាប់ក្នុងបញ្ជីខ្មៅទៀតទេ ព្រោះថា កន្លងមក មន្ត្រីមហាផ្ទៃគុយបា ជាច្រើននាក់ គឺឋិតក្នុងបញ្ជីខ្មៅអាមេរិកស្រេចស្រាប់ទៅហើយ តាំងតែពីច្រើនទសវត្សរ៍មក។
ចំណាត់ការ ដែលដាក់ចេញបន្ថែមនៅថ្ងៃសុក្រ គឺទណ្ឌកម្មផ្នែកហិរញ្ញវត្ថុ ចំពោះថ្នាក់ដឹកនាំ ខាងប៉ូលិស យោធា និងមន្ត្រី ក្រសួងមហាផ្ទៃ ។ និយាយឲ្យចំ សម្រាប់ពេលនេះ គឺរដ្ឋបាលអាមេរិកនឹងពិនិត្យឲ្យលម្អិតទៅលើចរន្តផ្ទេរប្រាក់ ពីបរទេសចូលទៅកាន់ប្រទេសគុយបា ពិសេស ពីអាមេរិកទៅគុយបា ហើយនិងពីក្រុមហ៊ុនដែលពាក់ព័ន្ធនឹងអាមេរិក។ ជាទូទៅ គេសង្កេតឃើញថា ប្រាក់ដែលហូរចូលគុយបា គឺមួយផ្នែកធំ ត្រូវផ្ទេរចូលហោបៅរបស់ពួកក្រុមយោធាគុយបា និងអ្នកមានអំណាចនៅគុយបា។ គេត្រូវរកផ្លូវធានាថា ប្រាក់ដែលផ្ទេរពីបងប្អូនគ្រួសារនៅក្រៅប្រទេស ទៅឲ្យសាច់ញាតិគេនៅក្នុងស្រុក បានទៅដល់គោលដៅដោយសុវត្ថិភាព។
លើសពីនេះ សហរដ្ឋអាមេរិក ក៏កំពុងតែពិចារណាដែរ ថាតើត្រូវរឹតត្បិតការប្រើប្រាស់ប្រព័ន្ធអ៊ិនធឺនែត នៅកោះគុយបា ឬក៏យ៉ាងណា។ ការប្រើប្រាស់ប្រព័ន្ធអ៊ីនធ័រនែត គឺជាតម្រូវការដ៏ចាំបាច់មួយសម្រាប់ជីវិតប្រចាំថ្ងៃ ទាំងក្នុងវិស័យសាធារណៈនិងវិស័យឯកជន។ ប្រសិនបើ អាមេរិកបិទអ៊ីនធ័រនែតនៅគុយបា មែន គឺច្បាស់ជាសម្ពាធមួយដ៏ធំ ធ្វើឲ្យថ្នាក់ដឹកនាំគុយបា រអាចិត្តខ្លះដែរ។
ទាំងលោកចូបៃដិន និងទាំងរដ្ឋបាលរបស់គាត់ក្តី សុទ្ធតែអះអាងថា ទណ្ឌកម្មផ្សេងៗ គឺនឹងបន្តមានជាយូរហែទៅទៀត ដែលសំដៅឲ្យមានការផ្លាសប្តូរអ្វីមួយ នៅគុយបា។
កាលៈទេសៈសម័យកូវីដ តើទណ្ឌកម្មលើគុយបា មានប្រសិទ្ធភាព?
ទណ្ឌកម្មរបស់អាមេរិកចំពោះគុយបា មិនមែនជារឿងថ្មីទេ។ ថ្នាក់ដឹកនាំគុយបា ជាច្រើននាក់ ជាប់ក្នុងបញ្ជីខ្មៅស្រេចយូរមកហើយ ហើយជាង១ឆ្នាំកន្លះហើយ ដែលរដ្ឋាភិបាលអាមេរិកដាក់ទណ្ឌកម្មគុយបា ដោយហាមឃាត់ការលក់ស្បៀងអាហារ មិនលក់ថ្នាំសង្កូវ គ្រឿងបរិក្ខារពេទ្យ ទៅឲ្យគុយបា។ ការហាមឃាត់ គ្រឿងចាំបាច់ទាំងនេះ ចំដំណាក់កាលរីករាតត្បាតជំងឺកូវីដបែបទៀតនេះ គឺរឿងលំបាកខ្លាំងចំពោះពលរដ្ឋគុយបា ។ នេះបើតាមការសង្កេតមើលរបស់កាសែតបារាំង Courrier international និងកាសែត អេស្ប៉ាញ Público។
កាសែតអេស្ប៉ាញ មើលឃើញថា ដំណាក់កាលដំបូង ទណ្ឌកម្មអាមេរិកចំពោះគុយបា ផលប៉ះពាល់គឺទៅលើប្រជាជនទៅវិញទេ។ វាមិនអាចធ្វើឲ្យថ្នាក់ដឹកនាំគុយបាព្រឺរោមខ្លាំងឡើយ។ ការដាក់សម្ពាធលើអស់លោកអ្នកធំគុយបា គឺ អ្នករងគ្រោះ ផ្ទាល់ និងអ្នកអត់ឃ្លាន គឺពលរដ្ឋគុយបា ឯណោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ