សំណុំរឿងលីបង់៖ សន្នីសីទអន្តរជាតិ រំពឹងប្រមូលលុយជំនួយ ៣៥០លានដុល្លារ
ចុះផ្សាយនៅថ្ងៃ៖
ស្តាប់ - ០៧:១៦
ថ្ងៃទី៤សីហានេះ គឺជាខួបមួយឆ្នាំក្រោយការផ្ទុះនៅកំពង់ផែក្រុងបេរូត ប្រទេសលីបង់។ ការស៊ើបអង្កេតពីព្រឹត្តិការណ៍ផ្ទុះ ក៏មិនលឿន ហើយនយោបាយលីបង់ ក៏ជាប់គាំង។ ដើម្បីរកច្រកចេញពីវិបត្តិ ប្រធានាធិបតីបារាំង លោក ម៉ាក្រុង បានស្វះស្វែងរកការគាំទ្រពីសំណាក់សហគមន៍អន្តរជាតិផង និងដាក់សម្ពាធលើមេដឹកនាំលីបង់ផង។
« បារាំង គឺដៃម្ខាង ហុចការ៉ុត ហើយ ដៃម្ខាងយារដំបង »
ក្រៅពីអំពាវនាវរកលុយជួយ បារាំងក៏ដាក់គំនាបលើលីបង់ខ្លាំង។ ដាក់សម្ពាធ ពីព្រោះថា ជាច្រើនខែមកហើយ ដែលរដ្ឋបារាំង ប្រើវីធីសាស្ត្រការទូត ដើម្បីឲ្យអ្នកនយោបាយលីបង់រួមរួបគ្នា និងរកដំណោះស្រាយជាឯកច្ឆន្ទ នៅក្នុងស្រុក។ ប៉ុន្តែដូចជាគ្មានផលសោះ។ មិនបានផល ព្រោះនយោបាយផ្ទៃក្នុងលីបង់ ហាក់មិនដើរទៅមុខ។ សហគមន៍អន្តរជាតិ ទាំងបារាំងក្តី ទាំងសហរដ្ឋអាមេរិកក្តី សុទ្ធសឹងតែ អំពាវនាវជំរុញឲ្យលីបង់បង្កើតរដ្ឋាភិបាល ឲ្យបានឆាប់ ហើយជារដ្ឋាភិបាលដែលកែទម្រង់ផង ដើម្បីដោះស្រាយវិបត្តិ ចំពោះមុខ និងសម្រាប់មានភាពស្របច្បាប់ ក្នុងការចរចានឹងសហគមន៍អន្តរជាតិ។
អ្នកនយោបាយ លីបង់ ហាក់រកផ្លូវឯកភាពគ្នាមិនឃើញសោះ។ រដ្ឋាភិបាលលីបង់ បង្កើតមិនចេញសោះ ជាច្រើនខែមកហើយ។ នាយករដ្ឋមន្ត្រី ២នាក់ហើយត្រូវតែងតាំងពីប្រធានាធិបតី តែរាល់តែលើក គឺបង្កើតរដ្ឋាភិបាលមិនកើត។ ជាងមួយឆ្នាំហើយ ដែល លីបង់ គ្មាននាយករដ្ឋមន្ត្រី និងគ្មានគណៈរដ្ឋមន្ត្រីច្បាស់លាស់ទេ។
នៅពេលនេះ បារាំងប្តូរយុទ្ធសាស្ត្រ។ គឺចាប់បង្ខំ ដាក់សម្ពាធម្តង។ ប្រភពព័ត៌មាននៅស្រុកបារាំង បានឲ្យដឹងថា ក្រសួងការបរទេសបារាំងបានកំណត់ឈ្មោះថ្នាក់ដឹកនាំលីបង់មួយចំនួន ដាក់ក្នុងបញ្ជីខ្មៅ មិនឲ្យធ្វើដំណើរជាន់ទឹកដីបារាំងទេ។ ហើយរដ្ឋាភិបាលបារាំង ក៏កំពុងតែគៀងគរ ប្រទេសសមាជិកសហភាពអឺរ៉ុប ផ្សេងទៀត ដើម្បីដាក់ទណ្ឌកម្ម ឬដាក់សម្ពាធជារួម ក្នុងសំឡេងតែមួយរបស់ សហភាពអឺរ៉ុប ដើម្បីជំរុញអ្នកនយោបាយលីបង់។
ស្ថានភាពសង្គមនិងសេដ្ឋកិច្ចរបស់លីបង់ បច្ចុប្បន្ននេះ ដុបដាបខ្លាំង។ បញ្ហាកើតមានគ្រប់កន្លែង ទាំង វិបត្តិសុខភាពសាធារណៈ ការអត់ការងារ បញ្ហាអតិផរណាទំនិញ រាប់តាំងតម្លៃទឹក ភ្លើង ប្រេងសាំង ឡើងថ្លៃយ៉ាងគំហុក...។ វេទិកាអន្តរជាតិ លើកទី៣នេះ ប្រធានាធិបតីបារាំង រំពឹងថានឹងប្រមូលប្រាក់ ឲ្យបាន ៣៥០លានដុល្លារ ដើម្បីជួយពលរដ្ឋលីបង់។
គេឃើញកន្លងមក ថា ប្រទេសបារាំង បានស្ទុះស្ទារច្រើន រៀបចំសន្នីសីទអន្តរជាតិ ម្តងជាពីរដង ដើម្បីប្រមូលវិភាគទានជួយប្រជាពលរដ្ឋលីបង់ ដែលរងគ្រោះដោយសារតែព្រឹត្តិការណ៍ផ្ទុះនៅកំពង់ផែផង ហើយដែលកំពុងតែរងគ្រោះ ព្រោះតែកូវីដ១៩មួយជាន់ទៀត។
សន្នីសីទលើកនេះ បារាំងរំពឹងថា ប្រមូលថវិកាប្រមាណ២៩៥លានអឺរ៉ូ ប្រហែល៣៥០លានដុល្លារ។ គួររម្លឹកដែរ ថា កាលពីឆ្នាំមុន គឺសន្នីសីទអន្តរជាតិ គឺប្រមូលលុយបាន ២៨០លានដុល្លារ។
សន្នីសីទអន្តរជាតិ រៀបចំតាមប្រព័ន្ធអ៊ីនធ័រនែត ដែលមានការចូលរួមពី អគ្គលេខាធិការអង្គការសហប្រជាជាតិ ប្រធានាធិបតីអាមេរិក ប្រធានាធិបតីបារាំង និងថ្នាក់ដឹកនាំប្រទេស ចំនួន៤០ទៀត ដូចជា អេហ្ស៊ីប ហ្ស័កដង់ អ៊ីរ៉ាក់ និងកាណាដា ជាដើម។ អង់គ្លេស គឺ រដ្ឋមន្ត្រីការបរទេស ជាអ្នកតំណាង។
ពីបុរីវ៉ាទីកង់ សម្តេច ប៉ាប ហ្វ្រង់ស័រ បានចេញព្រះភ័ក្ត្រ ជាលើកទីមួយ បន្ទាប់ពីសម្រាកព្យាបាលជំងឺ នៅខែកក្កដាមក។ ទ្រង់បានសម្តែងអាណិតអាសូរចំពោះពលរដ្ឋលីបង់ដែលរងគ្រោះ ហើយសម្តេចប៉ាប បានថ្លែងគាំទ្រប្រទេសបារាំងនិងអង្គការសហប្រជាជាតិ ដែលរៀបចំសន្នីសីទអន្តរជាតិដើម្បីបុព្វហេតុលីបង់។ ព្រះអង្គ ក៏បានដាស់តឿនថា ”កុំគ្រាន់តែពោលតែពាក្យឥតប្រយោជន៍ គឺត្រូវឲ្យបញ្ចេញសកម្មភាពជាក់ស្តែងច្បាស់លាស់ ដើម្បីជួយស្រោចស្រង់លីបង់។”
ចំពោះព្រឹត្តិការណ៍ផ្ទុះនៅកំពង់ផែបេរូត ការស៊ើបអង្កេត ហាក់មិនសូវជឿនលឿនសោះ។ តើមកពីហេតុអ្វី?
ចំពោះរឿងស៊ើបអង្កេតនេះ គឺអ្នកកាសែតអន្តរជាតិ និង អង្គការសង្គមស៊ីវិល ជាច្រើន បានទម្លាក់កំហុសលើអ្នកនយោបាយលីបង់ ដែលមិនចុះសម្រុងគ្នា និង គេចវេសពីការទទួលខុសត្រូវ ហើយម្នាក់ៗហាក់ដោះដៃ យករួចខ្លួន។
ជាក់ស្តែង ចៅក្រមស៊ើប របស់លីបង់ ដែលកាន់សំណុំរឿងអង្កេតនេះ គឺលោកបានដាក់សំណើទៅរដ្ឋសភា ដើម្បីសុំដកអភ័យឯកសិទ្ធអ្នកតំណាងរាស្ត្រ និង សុំដកអភិយឯកសិទ្ធថ្នាក់ដឹកនាំរដ្ឋាភិបាល មួយចំនួន ដើម្បីឲ្យពួកគេចូលរួមសហការ ក្នុងការស៊ើបអង្កេត និងរកការពិតចំពោះសោដនាដកម្មផ្ទុះនៅកំពង់ផែនោះ។ សំណើសុំដកអភ័យឯកសិទ្ធនេះ ហាក់នៅគាំងទ្រឹង។ ជារួម ការស៊ើបអង្កេត ត្រូវគេមើលឃើញថា មានការលំបាកនិងជាប់គាំង ព្រោះតែ មានការរាំងស្ទះជាច្រើន។
ការិយាល័យ អង្គការ Human Rights Watch ប្រចាំលីបង់ បានចេញរបាយការណ៍ និងចង្អុលមុខអ្នកដឹកនាំលីបង់ ជាច្រើននាក់ ពីរឿងធ្វេសប្រហែស ពុករលួយ អសមត្ថភាព និងរំលោភបំពានសិទ្ធិជនរងគ្រោះ។ Human Rights Watch មិនទុកចិត្តយន្តការស៊ើបអង្កេតនៅក្នុងស្រុកទេ ហើយស្នើសុំអង្គការសហប្រជាជាតិ ឲ្យបើកយន្តការស៊ើបអង្កេតជាលក្ខណៈអន្តរជាតិវិញ។
អ្នកឆ្លើយឆ្លងវិទ្យុបារាំងRFIនៅលីបង់ បានឲ្យដឹងថា ដោយអស់សង្ឃឹមចំពោះអ្នកនយោបាយ គឺ ប្រជាជនលីបង់មួយចំនួន ដែលជា អ្នកមានលទ្ធភាព មានលុយកាក់ និងមានចំណេះចេះដឹង ដូចជា គ្រូពេទ្យ គ្រូបង្រៀន សាស្ត្រាចារ្យ និងនិស្សិតបញ្ញវន្ត បានសម្រេចចិត្តចាកចេញពីប្រទេស ហើយ ភៀសខ្លួនទៅនៅបរទេស អស់ជាច្រើននាក់មកហើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ