ទោះកូវីដរំខាន តែព្រឹត្តិការណ៍អូឡាំពិក នៅតូក្យូ ត្រូវបិទបញ្ចប់ ដោយរលូន
ចុះផ្សាយនៅថ្ងៃ៖
ស្តាប់ - ០៧:៤៥
ព្រឹត្តិការណ៍អូឡាំពិករដូវក្តៅ លើកទី ៣២ នៅប្រទេសជប៉ុន នឹងត្រូវបិទបញ្ចប់ នៅយប់ថ្ងៃទី៨ខែសីហានេះ។ ការរៀបចំប្រកួតកីឡាលំដាប់ពិភពលោក នៅក្នុងបរិបទផ្ទុះមេរោគរាតត្បាតកូវីដ១៩នេះ គឺពុំមែនជាការងាយស្រួលឡើយចំពោះជប៉ុនជាម្ចាស់ផ្ទះ។ ឆ្លងកាត់ការប្រកួត ចំនួន១៦ថ្ងៃមក គឺ ការរៀបចំបានប្រព្រឹត្តទៅយ៉ាងរលូន ទោះបីជាមានការប្រឆាំងពីពលរដ្ឋជប៉ុនខ្លះៗ។
គណៈកម្មាធិការរៀបចំការប្រកួត បានអះអាងថា បញ្ហាឆ្លងកូវីដ ក្នុងការប្រកួតនេះ មានតិចតួចណាស់។
មុនចាប់ផ្តើមប្រកួត គឺពលរដ្ឋជប៉ុន ធ្វើបាតុកម្មប្រឆាំងសម្បើមណាស់។ គេមិនចង់ឲ្យរៀបចំប្រកួតទេ ព្រោះខ្លាចឆ្លងកូវីដរឹតតែខ្លាំង ដ្បិតកីឡាករនិងប្រតិភូផ្សេងៗ មកពីគ្រប់ទិសទីនៃពិភពលោក។ បាតុករបារម្ភទៀតថា ព្រោះតែរឿងប្រកួតកីឡានេះ គឺនឹងធ្វើឲ្យតូក្យូក្លាយជាជង្រុកមេរោគកូវីដ១៩ និងធ្វើឲ្យការឆ្លងកាន់តែដុបដាបខ្លាំងនៅស្រុកយីពុន។
ឆ្លងកាត់ជាង២សប្តាហ៍មក គឺគេអាចចាត់ទុកថា ជាជោគជ័យមួយដែរ សម្រាប់អ្នករៀបចំកម្មវិធីប្រកួតកីឡាអូឡាំពិក និងជាស្នាដៃមួយល្អរបស់រដ្ឋបាលក្រុងតូក្យូ។ បើតាមរបាយការណ៍ពីអ្នករៀបចំការប្រកួតតូក្យូអូឡាំពិក គឺចាប់ពីថ្ងៃទី១ខែកក្កដា រហូតដល់ថ្ងៃទី ៨ខែសីហា គេបានរកឃើញករណីឆ្លងកូវីដ ចំនួនតែ ៤៣០ ករណីប៉ុណ្ណោះ ក្នុងចំណោមកីឡាករ ប្រតិភូ បណ្តាអ្នកកាសែត រួមទាំងអ្នកស្ម័គ្រចិត្តនានា ប្រមាណ ៥ម៉ឺន២ពាន់នាក់។ បើគិតជាមធ្យម ក្នុងមួយថ្ងៃៗ ករណីឆ្លងវិជ្ជមានកូវីដ មានត្រឹមតែ០,០២ភាគរយប៉ុណ្ណោះ។
គេអាចរៀបចំទប់ស្កាត់ការឆ្លងកូវីដនៅពេលប្រកួតនេះបានយ៉ាងល្អដូច្នេះ ពីព្រោះថា អ្នករៀបចំការប្រកួតតូក្យូអូឡាំពិក និងម្ចាស់ផ្ទះជប៉ុន បានរឹតបន្តឹងវិធានការខ្លាំងសម្បើមណាស់។ ជាក់ស្តែង ការប្រកួតនេះ ជាការ«ប្រកួតបិទទ្វារ» ក្នុងន័យថា គ្មានទស្សនិកជនអ្នកគាំទ្រទៅមើលផ្ទាល់នោះទេ។ មុននឹងចូលប្រកួត ហើយក្នុងដំណាក់កាលររៀបចំការប្រកួត នៅតូក្យូនេះ គឺគេមានធ្វើតេស្តជំងឺកូវីដ យ៉ាងតឹងតែង និងទៀងទាត់ណាស់។
ម្យ៉ាងទៀត កីឡាករណាដែលរកឃើញថា វិជ្ជមានកូវីដ១៩ហើយ គឺដាច់ខាត មិនឲ្យចូលប្រកួតឡើយ។ មានកីឡាករ មិនតិចទេ ដែលខកខាន ហើយអ្នកខ្លះ មិនទាំងបានមកដល់ស្រុកយីពុនផង ព្រោះឆ្លងកូវីដនៅស្រុករបស់ខ្លួនរួចស្រេចទៅហើយ។ កំណត់សម្គាល់មួយទៀត ចំពោះករណីធ្វើច័ត្តាឡីស័ក ដែលជាវិធានកំណត់ដោយរដ្ឋបាលជប៉ុន គឺតឹងតែងណាស់។ កីឡាករបរទេសខ្លះ ត្អូញត្អែរ ថាដូចជាមន្ទីរឃុំឃាំងដូច្នោះដែរ។
ជារួម គ្មានផលរមាស់ច្រើនទេ ហើយក៏គ្មានការលើកការប្រកួតលើវិញ្ញាសាណាមួយ ឬក៏លុបចោលការប្រកាសលទ្ធផល ព្រោះតែរំខានដោយកូវីដ ទេ។ អ្វីៗបានប្រព្រឹត្តទៅ ដូចតាមការគ្រោងទុក។
ទិដ្ឋភាពនយោបាយ ក្រៅស្រុក ដែលបង្កឡើងដោយកីឡាករ ពិសេសគឺកីឡាកររបស់ ចិន និង បេឡារុស។
ទិដ្ឋភាពនយោបាយ ដែលហូរចូលមកក្នុងព្រឹត្តិការណ៍ប្រកួតនេះ មានរឿងពីរដែលល្បីកក្រើក។ ទី១ គឺកីឡាការីនី ជាតិបេឡារុសម្នាក់ ដែលបានរិះគន់សហព័ន្ធកីឡាជាតិរបស់ខ្លួន ហើយនាងមិនហ៊ានត្រឡប់ចូលស្រុកកំណើតវិញ ព្រោះខ្លាចបារម្ភពីសុវត្តិភាព ហើយប្រទេសនាងក៏កំពុងមានវិបត្តិនយោបាយស្រាប់ផង។ មេបក្សប្រឆាំងកំពុងភៀសខ្លួននៅក្រៅស្រុក ហើយប្រទេសជាតិត្រូវដឹកនាំដោយបុរសខ្លាំង លូកាឆិនកូ កាន់អំណាច ជាច្រើនឆ្នាំមកហើយ។ នៅពេលនេះ នាងកីឡាការិនីបេឡារុសម្នាក់នោះ បានរត់ភៀសខ្លួន ឆ្ពោះទៅប្រទេសប៉ូឡូញ ហើយប្តីរបស់នាងក៏ត្រូវរដ្ឋាភិបាលប៉ូឡូញប្រកាសផ្តល់ទិដ្ឋាការមនុស្សធម៌ដែរ។
រឿងរំខានទី២ គឺកីឡាករចិនពីរនាក់ ឈ្នះមេដាយ តែបានពាក់សញ្ញា ស្លាកទង់តូចមួយនៅអាវ និមិត្តសញ្ញា តំណាងអំណាចមេដឹកនាំ ម៉ៅ សេទុង និងបដិវត្តន៍វប្បធម៌ចិន។ យើងដឹងហើយថា ព្រោះតែនយោបាយបដិវត្តន៍វប្បធម៌ ក្រោមការដឹកនាំរបស់ ម៉ៅ សេទុង ពីអតីតកាល គឺបណ្តាលឲ្យមនុស្សស្លាប់រាប់ពាន់នាក់ នៅស្រុកចិន។ ជាគោលការណ៍ដែលមានចែងនៅក្នុងធម្មនុញ្ញរបស់កីឡាអូឡាំពិក គឺមិនអនុញ្ញាតឲ្យឃោសនាមនោគមន៍វិជ្ជានយោបាយ ឬឃោសនានាំឲ្យរើសអើងពូជសាសន៍ ជាដើមទេ។ នៅទីបំផុត ខាងសហព័ន្ធកីឡាចិន បានចេញមុខសុំទោស និងសន្យាប្រាប់អ្នករៀបចំកម្មវិធីថា នឹងមិនរឿងបែបនេះកើតមានជាថ្មីទេ។
ការប្រកួតនេះ ចិននិងអាមេរិកប្រកួតប្រជែងមេដាយគ្នាខ្លាំង។
សហរដ្ឋអាមេរិក នាំមុខគេ ទទួលបានមេដាយមាសច្រើនបំផុត រហូតដល់ ៣៩ មេដាយមាស ឯចិនវិញ ទទួលបានមេដាយមាសចំនួន ៣៨។ គឺមានលក្ខណៈប្រកៀកប្រកិតគ្នាខ្លាំងណាស់។
ចិនឈ្នះនាំមុខគេកីឡាអូឡាំពិក នៅឆ្នាំ២០០៨ ពេលដែលចិនរៀបចំធ្វើម្ចាស់ផ្ទះ ក្រៅពីនោះ គឺតាំងពីការបង្កើតកីឡានេះមក មានតែ សហរដ្ឋអាមេរិក និងសហភាពសូវៀត ទេ ដែលជាអ្នកកាន់តំណែងឈានមុខរហូតមក។ លើកនេះ រុស្ស៊ី ជាប់បំរាម។ ដូច្នេះ ចិននិងអាមេរិក ប្រកួតប្រជែងគ្នាលើដីយីពុន។ គេកត់សម្គាល់ថា ចិននាំមុខគេជាប់ៗប្រមាណជាមួយអាទិត្យមុន។ ពេលនេះ បើគិតតែមេដាយមាស គឺអាមេរិកឈ្នះលើសចិនតែ១មេដាយមាស។
រីឯ ជប៉ុនជាម្ចាស់ផ្ទះវិញ ទទួលបានមេដាយមាសចំនួន ២៧។ ចក្រភពអង់គ្លេស ទទួលបានមេដាយមាសចំនួន ២២។ ប្រទេសអឺរ៉ុបបួន គឺបារាំង អាល្លឺម៉ង់ អីតាលី ហូឡង់ គឺបានមេដាយមាស ១០ស្មើគ្នា។ ការសម្គាល់ដែរ បារាំង បានមេដាយសរុប ៣៣ តែបានមេដាយមាសតែ១០ទេ។ នៅបារាំង បណ្តាញព័ត៌មានក្នុងស្រុក បានផ្សាយសម្បើមណាស់ ពឹតអួតពីជាតិខ្លួន ជាពិសេសគឺក្រុមកីឡាការិនី ដែលទទួលបានមេដាយមាស សម្រាប់វិញ្ញាសា Handball ឬ បាល់គប់។ លើកនេះរឹតតែពិសេសណាស់ ដ្បិតថា វិញ្ញាសាបាល់គប់ ទាំងក្រុមនារី និងទាំងក្រុមបុរសបារាំង គឺសុទ្ធតែឈ្នះព្រមៗគ្នា។ នេះជាមោទនភាពជាតិមួយសម្រាប់នគរបារាំងសេស។ រឿងនេះ ក៏ជាឧបករណ៍ឃោសនាមួយទៀតសម្រាប់បារាំង ពីព្រោះថា ការរៀបចំការប្រកួតកីឡាអូឡាំពិក លើកក្រោយ ឆ្នាំ២០២៤ គឺស្រុកបារាំងនឹងធ្វើជាម្ចាស់ផ្ទះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ