អភិបាលរដ្ឋញូវយ៉ក ចុះចេញពីតំណែងក្រោយជាប់រឿងអាស្រូវផ្លូវភេទ
ចុះផ្សាយនៅថ្ងៃ៖
ស្តាប់ - ០៦:៥៦
អភិបាលរដ្ឋញូវយ៉ក លោក អេនឌ្រូ កួម៉ូ បានប្រកាសលាឈប់ពីតំណែង ក្រោយរងការចោទប្រកាន់ពីបទរំលោភបំពានផ្លូវភេទ លើស្ត្រីជាច្រើនរូប។ សេចក្តីប្រកាសនេះ គឺជាការបិទបញ្ចប់សករាជគ្រប់គ្រង់រដ្ឋរបស់លោក កួម៉ូ ដែលមានរយៈពេល ១២ ឆ្នាំមកហើយ។ នៅគ្រាកន្លងមក លោកអភិបាលរដ្ឋញូវយ៉ក កួម៉ូ បានបដិសេធ ថានឹងមិនចុះចេញពីតំណែងឡើយ។ ចុះហេតុអ្វី លោកប្រកាសចុះចេញពីតំណែង នៅពេលនេះ? ហើយថាតើអ្នកណា ដែលនឹងឡើងមកគ្រប់គ្រងតំណែងជាអភិបាលរដ្ឋញូវយ៉កបន្ទាប់?
ហេតុអ្វីលោកអេនឌ្រូ កួម៉ូប្រកាសចុះចេញពីតំណែង?
លោក អេនឌ្រូ កួម៉ូ បានប្រកាសលាឈប់ពីតំណែងជាអភិបាលរដ្ឋញូវយ៉កកាលពីថ្ងៃអង្គារ ១០ សីហាម្សិលមិញ នៅមួយសប្តាហ៍ក្រោយរដ្ឋអាជ្ញានៃរដ្ឋញូវយ៉កទម្លាយរបាយការណ៍ស៊ើបអង្កេតមួយ។ របាយការណ៍នេះ បង្ហាញថា លោកពិតជាបានបៀតបៀនផ្លូវភេទលើស្ត្រីចំនួន ១១ រូបមែន ហើយក្នុងចំណោមនោះមានបុគ្គលិកស្ត្រីបម្រើការនៅរដ្ឋញូវយ៉កជាច្រើននាក់ផងដែរ។ ការលាលែងនេះ នឹងចូលជាធរមានក្នុងរយៈពេល ១៤ ថ្ងៃ។
ទាក់ទិនរឿងនេះ គេគួរដឹងថា ការចោទប្រកាន់ប្រឆាំងនឹងលោក កួម៉ូ ផ្ទុះឡើងដំបូងកាលពីចុងខែកុម្ភៈ ឆ្នាំ ២០២១។ ស្ត្រីរងគ្រោះ បានចោទប្រកាន់លោក ថាបានប្រើពាក្យសម្តីមិនសមគួរបែបបំពានផ្លូវភេទ ប៉ះពាល់ ឬលូកលាន់ស្ទាបរាងកាយរបស់ពួកគេ និងថើបពួកគេដោយគ្មានកាអនុញ្ញាត។
បន្ទាប់មក ការិយាល័យរដ្ឋអាជ្ញានៃរដ្ឋញូវយ៉ក បានចាប់បើកការស៊ើបអង្កេតឯករាជ្យមួយ ហើយកាលពីសប្តាហ៍មុន របាយការណ៍នៃការអង្កេតនេះត្រូវបានប្រកាសដោយលោកស្រីរដ្ឋអាជ្ញានៃរដ្ឋញូវយ៉ក លែទីត្យា ជេមស៍ (Laeticia James)។
បើពិនិត្យឲ្យស៊ីជម្រៅ ការប្រកាសលាលែងពីតំណែងរបស់លោក កួម៉ូ ធ្វើឡើងទាំងបង្ខំចិត្ត។ លោកគ្មានជម្រើសអ្វីផ្សេងក្រៅពីនេះទៀតទេ ព្រោះក្រោយរបាយការណ៍ខាងលើ ចេញផ្សាយភ្លាម លោក កួម៉ូ បានទទួលគំនាបសង្កត់ខ្លាំងឡើងៗឲ្យដើរចេញពីកៅអីអភិបាលរដ្ឋញូវយ៉ក។
លោកបានទទួលរងសម្ពាធខ្លាំងបំផុតកាលពីសប្តាហ៍មុន ពីសមាជិកគណបក្សប្រជាធិបតេយ្យរួមមានតាំងពីប្រធានរដ្ឋសភាអ្នកស្រីណានស៊ី ប៉េឡូស៊ី (Nancy Pelosi) ប្រមុខបក្សប្រជាធិបតេយ្យនៅព្រឹទ្ធសភា លោកឈុក ស្កុម៉េ (Chuck Schumer) និង លោកប្រធានាធិបតី ចូ បៃដិន ផងដែរ។
នៅពេលថ្លែងសុន្ទរកថាពីញូវយ៉ក លោកអភិបាល កួម៉ូ បាននិយាយថា ស្ថិតក្នុងកាលៈទេសៈនេះ វិធីដ៏ល្អបំផុត ដែលលោកអាចធ្វើទៅបានគឺមានតែដើរចេញប៉ុណ្ណោះ។
ខណៈនៅបន្តអះអាងថា មិនបានប្រព្រឹត្តខុស អភិបាលរូបនេះ បានគូសបញ្ជាក់ទៀតថា ការដែលលោកសម្រេចចិត្តដើរចេញជំនួសឲ្យការនៅបន្តតស៊ូប្រឆាំង ព្រោះថា បើលោក នៅតស៊ូប្រឆាំងនឹងការចោទប្រកាន់ នោះរឿងនេះ នឹងនៅអូសបន្លាយ ជាច្រើនខែ ហើយវា នឹងធ្វើឲ្យខាតបង់ថវិការបស់អ្នកបង់ពន្ធចំនួនរាប់លានដុល្លារ។
លោក កួម៉ូ បានបដិសេធម្តងហើយម្តងទៀតចំពោះការអះអាងដែលថាលោកបានបៀតបៀនផ្លូវភេទ ដូចមានចែងនៅក្នុងរបាយការណ៍របស់ ការិយាល័យនៃរដ្ឋអាជ្ញាញូវយ៉ក។ ដូច្នោះហើយតើអ្វីជាមូលហេតុពិតប្រាកដនៅពីក្រោយរឿងចោទប្រកាន់ប្រឆាំងនឹងរូបលោកនេះ?
លោកអេនឌ្រូ កួម៉ូ ដែលបច្ចុប្បន្នមានវ័យ ៦៣ ឆ្នាំ ត្រូវបានគេបោះឆ្នោតជ្រើសរើស ជាអភិបាលរដ្ឋញូវយ៉ក ក្នុងឆ្នាំ ២០១០ និងបានយកឈ្នះការបោះឆ្នោតជាថ្មីទៀតយ៉ាងស្រួល កាលពីឆ្នាំ ២០១៤ និង ឆ្នាំ ២០១៨ ដែលជាអាណត្តិទី៣។
កូដប្រជាប្រិយភាពរបស់លោក កួម៉ូ បានកើនឡើងខ្លាំងក្នុងរយៈពេលប្រមាណជាមួយឆ្នាំចុងក្រោយនេះ។ ការយកចិត្តទុកដាក់របស់លោក អំពីការរីករាលដាលនៃជំងឺកូវីដ១៩ ត្រូវបានគេ កោតសរសើរយ៉ាងខ្លាំងនៅទូទាំងប្រទេសអាមេរិកដែលជាហេតុនាំឲ្យគេទស្សទាយដែរថា លោកអាចបោះជំហាន ចូលក្នុងការប្រកួតប្រជែងដណ្តើមយកតំណែងប្រធានាធិបតីអាមេរិកកាលពីឆ្នាំ ២០២០ ទល់នឹងលោក ដូណាល់ ត្រាំ។
ក៏ប៉ុន្តែនៅទីបំផុត លោក កួម៉ូ បានសម្រេចចិត្តមិនឈរឈ្មោះនៅសេតវិមានទេ ហើយ លោកគ្រោងឈរឈ្មោះ ជាអភិបាលរដ្ឋញូវយ៉កជាថ្មី និងជាលើកទី៤ នៅឆ្នាំក្រោយ។ ប៉ុន្តែ នៅពេលនេះ សំណុំរឿងអាស្រូវផ្លូវភេទ បានក្លាយជាភ្លើងដុតបំផ្លាញគម្រោងផែនការរបស់លោកឲ្យរលាយអស់រលីង។
ដូចគេដឹងស្រាប់ហើយថា តាំងពីដំបូងអឺយមកម្ល៉េះ លោក កួម៉ូ តែងបដិសេធ ថាមិនបានប្រព្រឹត្តអំពើបំពារបំពានផ្លូវភេទឡើយ។ ដូចគ្នាចឹងដែរ ក្នុងពេលថ្លែងពន្យល់ពីមូលហេតុ ចុះចេញពីតំណែង កាលពីម្សិលមិញ លោក កួម៉ូ បានបញ្ជាក់អះអាងជាថ្មី ថាមិនបានធ្វើខុស ហើយលោកបានឆ្លៀតគូសបញ្ជាក់ដែរ ពីជំនឿជាក់របស់លោក ដែលថា ភាពចម្រូងចម្រាស រឿងអាស្រូវដែលកំពុងរុំព័ទ្ធរូបលោកនេះ មានពាក់ព័ន្ធមូលហេតុនយោបាយ។ យ៉ាងណាក៏ដោយ លោកអភិបាលរដ្ឋញូវយ៉ក មិនបានបញ្ជាក់ប្រាប់លម្អិតនោះទេ ថាតើជាចេតនានយោបាយអ្វីឲ្យប្រាកដនោះ។
តើអ្នកណាជាអ្នកជំនួសតំណែងលោកអេនឌ្រូ កូម៉ូ?
លោកស្រី ខាធី ហូឈុល (Kathy Hochul)។ មានវ័យ ៦២ ឆ្នាំ លោកស្រី គឺជាអ្នកនយោបាយ និងជាមេធាវីមួយរូបបម្រើការជាអភិបាលរង រដ្ឋញូវយ៉កចាប់តាំងពីឆ្នាំ ២០១៥ មក។ លោកស្រី ហូឈុល នឹងក្លាយជាអភិបាលរដ្ឋស្ត្រីដំបូងគេបង្អស់របស់ញូវយ៉ក ដែលជារដ្ឋមានប្រជាជនច្រើនជាងគេបំផុតលំដាប់ ទី៤ របស់សហរដ្ឋអាមេរិក។
លោកស្រី នឹងចូលអង្គុយកៅអី អភិបាលរដ្ឋញូវយ៉ក ជាផ្លូវការ នៅថ្ងៃទី ២៤ សីហា បន្ទាប់ពីពីការលាលែងរបស់លោក កួម៉ូ ចាប់ចូលជាធរមាន។ តាមពិតទៅ លោកស្រី ហូឈុល មិនមែនជា មនុស្សជំនិត ឬស្និទ្ធគ្នាខ្លាំង នឹងលោក កួម៉ូនោះទេ ប៉ុន្តែ លោកអភិបាលរដ្ឋបាននិយាយថាលោកស្រីគឺជាស្ត្រីដែលវៃឆ្លាត និងមានសមត្ថភាព។
ចំណែក លោកស្រី ហូឈុល ដែលជាអ្នកបានចូលរួមជាមួយ ឥស្សរជននយោបាយអាមេរិកជាច្រើន ថ្កោលទោសលោក អេនឌ្រូ កួម៉ូ បាននិយាយថា ការលាលែងគឺជារឿងដែលលោក កួម៉ូ ត្រូវធ្វើ និងថាលោកស្រីបានត្រៀមខ្លួនរួចជាស្រេចហើយ ដើម្បីដឹកនាំក្នុងនាមជាអភិបាល ទី ៥៧ នៃរដ្ឋញូវយ៉ក។
ពីខាងសេតវិមានវិញ លោកប្រធានាធិបតីចូ បៃដិន ដែលបានអំពាវនាវឲ្យលោកអភិបាល កូម៉ូ លាលែងពីតំណែងកាលពីសប្តាហ៍មុននោះ បានអត្ថាធិប្បាយយ៉ាងខ្លីកាលពីថ្ងៃអង្គារម្សិលមិញថាលោកគោរពចំពោះការសម្រេចចិត្តរបស់អភិបាលរដ្ឋរូបនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ