អាមេរិកបន្តប្រតិបត្តិការយ៉ាងសស្រាក់សស្រាំជម្លៀសពលរដ្ឋនិងសម្ព័ន្ធមិត្តចេញពីក្រុងកាប៊ុល
ចុះផ្សាយនៅថ្ងៃ៖
ស្តាប់ - ០៧:៤៧
៦ ថ្ងៃក្រោយទីក្រុងកាប៊ុលធ្លាក់ក្នុងដៃក្រុមតាលីបង់ លំហូរនៃមនុស្សដែលរត់ភៀសខ្លួននៅតែមានច្រើនលើសលុប។ ចំណែកសហរដ្ឋអាមេរិកវិញ កំពុងបន្តប្រតិបត្តិការជម្លៀសពលរដ្ឋខ្លួន និងសម្ព័ន្ធមិត្តយ៉ាងសស្រាក់សស្រាំចេញពីក្រុងកាប៊ុល។ ដោយឡែកខណៈភាពជ្រួលច្របល់បន្តកើតមានខ្លាំងឯព្រលានយន្តហោះការហ្សៃ ប្រធានាធិបតីអាមេរិកលោកចូ បៃដិន បាននិយាយថាគ្រោះថ្នាក់ផ្សេងៗអាចនឹងកើតមានក្នុងកាលៈទេសៈតានតឹងបែបនេះ។
អន្តរាគមន៍របស់លោកចូ បៃដិនជុំវិញការជម្លៀសពលរដ្ឋអាមេរិកនិងសម្ព័ន្ធមិត្តចេញពីអាហ្វហ្កានីស្ថាន
៦ ថ្ងៃ តាំងពីក្រុមតាលីបង់ត្រលប់ទៅក្តោបក្តាប់អំណាចវិញសាជាថ្មី ភាពជ្រួលច្របល់នៅតែបន្តកើតមានយ៉ាងខ្លាំងដដែលក្នុងប្រទេសអាហ្វហា្កនីស្ថាន។ នាខណៈពេលនេះ ថ្នាក់ដឹកនាំកំពូលតាលីបង់កំពុងតែគិតគូរនិងពិភាក្សាជាមួយភាគីជាច្រើន ដើម្បីបង្កើតរដ្ឋាភិបាលចម្រុះ។ ចំណែកសហរដ្ឋអាមេរិកឯណោះវិញ កំពុងបន្តប្រតិបត្តិការជម្លៀសពលរដ្ឋអាមេរិកាំង និងសម្ព័ន្ធមិត្តអាហ្វហ្កានីស្ថានដែលធ្លាប់បម្រើការងារឲ្យខ្លួនយ៉ាងសស្រាក់សស្រាំជាទីបំផុត។
ស្របពេលដែលប្រតិបត្តិការជម្លៀសកំពុងបន្តធ្វើ ប្រធានាធិបតីអាមេរិកលោក ចូ បៃដិន បានមុខថ្លែងជាថ្មីពីស្ថានការណ៍ក្នុងប្រទេសអាហ្វហ្កានីស្ថាន កាលពីថ្ងៃសុក្រម្សិលមិញនេះ។ នៅក្នុងអន្តរាគមន៍ជាលើកទី២ ក្រោយក្រុងកាប៊ុលធ្លាក់ក្នុងដៃពួកតាលីបង់ លោកបៃដិន បានគូសបញ្ជាក់ឲ្យដឹងថា សហរដ្ឋអាមេរិកជម្លៀសមនុស្សបានចំនួនប្រមាណ ១ម៉ឺន ៣ ពាន់នាក់ហើយ។
ថ្លែងចេញពីសេតវិមាន លោកបៃដិន ថា ការជម្លៀសមនុស្សចេញពីអាហ្វហ្កានីស្ថាន គឺជាប្រតិបត្តិការដ៏ធំ និងជាប្រតិបត្តិការដ៏ពិបាកមួយក្នុងប្រវត្តសាស្ត្រ។ ក៏ប៉ុន្តែលោកថា ការជម្លៀសពលរដ្ឋអាមេរិកដែលជាអាទិភាពចំបងគេរបស់ក្រុងវ៉ាស៊ីនតាន មិនត្រូវបានរារាំងដោយក្រុមតាលីបង់ឡើយ។
“ជនជាតិអាមេរិកណាម្នាក់ដែលចង់ត្រលប់មកស្រុកកំណើតវិញ យើងនឹងនាំអ្នកមកផ្ទះវិញ”។ នេះជាការលើកឡើងរបស់ម្ចាស់សេតវិមានអាមេរិក។
តើអាមេរិកបានប្តេជ្ញាដូចម្តេចខ្លះក្នុងការជម្លៀសសម្ព័ន្ធមិត្តអាហ្វហ្កានីស្ថានចេញពីក្រុងកាប៊ុល?
នៅក្នុងអន្តរាគមន៍របស់លោកចូ បៃដិន កាលពីថ្ងៃសុក្រម្សិលមិញ ក្រុមអ្នកយកព័តមានជាច្រើន ក៏បានចោទសួរលោក អំពីការប្តេជ្ញាចិត្តរបស់ប្រទេសអាមេរិក ក្នុងការជម្លៀសអ្នកធ្លាប់ធ្វើការឲ្យខ្លួនចេញពីប្រទេសអាហ្វហ្កានីស្ថាន។
សំណួរដ៏សំខាន់មួយ ដែលអ្នកកាសែតចោទសួរលោកបៃដិន និងដែលមានចុះផ្សាយលើសារព័ត៌មាន BBC គឺថាតើសហរដ្ឋអាមេរិក ប្តេជ្ញាចិត្តខ្លាំងដូចគ្នាឬក៏អត់ ក្នុងការជម្លៀសសម្ព័ន្ធមិត្តអាហ្វហ្កានីស្ថាន ចំនួនប្រមាណជា ៥ ម៉ឺន ទៅ ៦ ម៉ឺន ៥ ពាន់នាក់ចេញពីរដ្ឋធានទីកាប៊ុល ដូចគ្នាទៅនឹងការជម្លៀសពលរដ្ឋអាមេរិក?
លោកចូ បៃដិន បានលើកឡើងថាការជម្លៀសប្រជាជនយ៉ាងច្រើនចេញពីទីក្រុងកាប៊ុលនៃប្រទេសអាហ្វហ្កានីស្ថាន គឺជាប្រតិបត្តិដ៏ធំនិងដ៏គ្រោះថ្នាក់មួយនៅក្នុងប្រវត្តិសាស្ត្រ។ ស្ថិតក្នុងកាលៈទេសៈដូចពេលនេះ លោកថាហានិភ័យឬគ្រោះថ្នាក់រហូតបណ្តាលឲ្យមានការបាត់បង់ជីវិត ទំនងជារឿងដែលអាចនឹងកើតមានឡើងក៏ថាបាន។
លោកបៃដិន សង្កត់ធ្ងន់ដែរថាលោកមិនអាចនិយាយសន្យាជាមុននោះទេ ថាលទ្ធផលចុងក្រោយ នឹងទៅជាយ៉ាងណា ឬថាវានឹងគ្មានហានិភ័យ ឬគ្មានគ្រោះថ្នាក់ដល់អាយុជីវិតមនុស្សកើតឡើងនោះ។ ប៉ុន្តែយ៉ាងណាក៏ដោយ ប្រមុខដឹកនាអាមេរិករូបនេះបានប្តេជ្ញាថា នឹងជម្លៀសពលរដ្ឋអាមេរិក និងដៃគូពាក់ព័ន្ធទាំងអស់ចេញពីក្រុងកាប៊ុលឲ្យបាន ទោះបីជាត្រូវជួបឧបស្គអ្វីក៏ដោយចុះ។
ជាការគួរឲ្យកត់សម្គាល់ដែរ លោកចូ បៃដិន នៅតែបន្តការពារនូវសេចក្តីសម្រេចចិត្តរបស់លោក ក្នុងការដកកងទ័ពចេញពីអាហ្វហ្កានីស្ថានដដែល និងបានឆ្លៀតលើកបញ្ជាក់ពីចំណុចដែលសហរដ្ឋអាមេរិកបានឈ្មុសឈ្មុលនិងអាចជម្លៀសមនុស្សបានជាច្រើន ចាប់តាំងពីភាពជ្រួលច្របល់ បានផ្ទុះឡើងនៅអាកាសយានដ្ឋានការហ្សៃ ក្នុងទីក្រុង កាប៊ុល នៅថ្ងៃចន្ទដើមសប្តាហ៍នេះមក។
កិត្តិសព្ទអាមេរិកធ្លាក់ចុះ?
ចង់ឬមិនចង់ វិបត្តិនៅក្នុងប្រទេសអាហ្វហ្កានីស្ថានពេលនេះបានក្លាយទៅជាស្រមោលមួយទៀត តាមអន្ទងគ្របដណ្តប់ពីលើឋានៈរបស់សហរដ្ឋអាមេរិក ក្នុងមានជាកំពូលមហាអំណាចពិភពលោក និងសមត្ថភាពរបស់អាមេរិកក្នុងការជួយសម្ព័ន្ធមិត្ត ឬក៏ក្រុមអ្នកដែលធ្លាប់បម្រើការងារឲ្យអាមេរិក នៅជុំវិញពិភពលោក។
ក្រុមតាលីបង់ វាយលុកដណ្តើមយកបានរដ្ឋធានីកាប៊ុល កាលពីសប្តាហ៍មុន ហើយវា បានទៅបិទបញ្ចប់សង្គ្រាមរយៈពេល ២០ ឆ្នាំ ទាំងដែលរដ្ឋបាលរបស់លោកចូ បៃដិន នៅមិនទាន់បានដកកងទ័ពចេញទាំងស្រុងពីអាហ្វហ្កានីស្ថានផង។ ការដកកងទ័ពអាមេរិកចេញអស់ទាំងអស់គ្រោងធ្វើរហូតដល់ថ្ងៃទី ៣១ ខែសីហានេះ។
លោកប្រធានាធិបតីអាមេរិកចូ បៃដិន និងសម្ព័ន្ធមិត្តអាមេរិកផ្សេងទៀត មានការភ្ញាក់ផ្អើលយ៉ាងខ្លាំង ដោយសឹងមិនជឿនោះទេ ថាពួកតាលីបង់ អាចវាយចូលកាន់កាប់ក្រុងកាប៊ុលយ៉ាងងាយស្រួល ដោយចំណាយពេលមិនដល់១០ថ្ងៃ និងមិនបាច់ប្រយុទ្ធ និងគ្មានការបង្ហូរឈាមមួយដំណក់។
ក្រុមតាលីបង់ បានសន្យាថានឹងដឹកនាំអាហ្វហ្កានីស្ថានឆ្ពោះទៅរកចំណុចវិជ្ជមាន ខុសកាលសម័យកាន់អំណាចរបស់ខ្លួនក្នុងឆ្នាំ ១៩៩៦-២០០១ ដែលកាលណោះ តាលីបង់ មានកេរ្តិ៍ឈ្មោះល្បាញល្បីខ្លាំងក្នុងការអនុវត្តច្បាប់អ៊ីស្លាមជ្រុលនិយមតឹងតែងខ្លាំង និងមានកំណត់ត្រាសិទ្ធិមនុស្សអាក្រក់ខ្លាំងក្នុងពិភពលោក។
ស្ត្រីអាហ្វហ្កានីស្ថាន ត្រូវបានគេហាមឃាតមិនឲ្យធ្វើការក្នុងសង្គមបាន ក្មេងស្រីត្រូវបានហាមឃាត់មិនឲ្យចូលសាលា ហើយចំពោះអ្នកដែលប្រព្រឹត្តទង្វើអំពើផិតក្បត់វិញ ត្រូវគេប្រហារជីវិតដោយគប់នឹងដុំថ្មរហូតដល់ស្លាប់។
ភ្លាមៗក្រោយវាយដណ្តើមគ្រប់គ្រងអាហ្វហ្កានីស្ថាន ពួកតាលីបង់ បានប្តេជ្ញាមិនសងសឹកគូប្រជែង សន្យាគោរពសិទ្ធិសេរីភាពសារព័ត៌មាន និងគោរពសិទ្ធិស្ត្រី ប៉ុន្តែត្រូវស្ថិតនៅក្នុងរង្វង់នៃច្បាប់អ៊ីស្លាម។ ពួកគេ សន្យាថា នឹងលើកលែងទោស ចំពោះក្រុមអ្នកធ្លាប់ ធ្វើការជាមួយរដ្ឋាភិបាលចាស់ដែលគាំទ្រដោយសហរដ្ឋអាមេរិក។
ប៉ុន្តែរបាយការណ៍របស់អង្គការសហប្រជាជាតិបង្ហាញថា ក្រុមតាលីបង់ បាននិងកំពុងតាមប្រមាញ់រកមុខអតីតមន្រ្តីរដ្ឋាភិបាលក្រុងកាប៊ុល និងក្រុមអ្នកដែលធ្លាប់ធ្វើការជាមួយកម្លាំងអាមេរិក និងណាតូ។
យោងតាមឯកសារសម្ងាត់ដោយទីប្រឹក្សាវាយតម្លៃការគំរាមកំហែងរបស់អង្គការសហប្រជាជាតិ ដែលត្រូវបានឃើញដោយទីភ្នាក់ងារព័ត៌មាន AFP ក្រុមតាលបីង ក៏កំពុងតាមត្រួតពិនិត្យឆែកឆេរយ៉ាងខ្លាំងដែរលើមនុស្សនៅតាមផ្លូវទៅអាកាសយានដ្ឋានក្រុងកាប៊ុល។
អ្នកនាំពាក្យរដ្ឋាភិបាលក្រុងប៊ែរឡាំង បាននិយាយកាលពីថ្ងៃសុក្រម្សិលមិញថាមានជនស៊ីវិលអាល្លឺម៉ង់ម្នាក់ត្រូវបានគេបាញ់ និងរងរបួសនៅពេលធ្វើដំណើរទៅអាកាសយានដ្ឋានការហ្សៃ។
ជាមួយគ្នានេះ ប្រព័ន្ធផ្សព្វផ្សាយអាល្លឺម៉ង់ Deutsche Welle បានរាយការណ៍កាលពីព្រហស្បតិ៍ទី១៩សីហាដែរថា ទាហានតាលីបង់បានសម្លាប់សាច់ញាតិរបស់អ្នកកាសែតម្នាក់ដែលកំពុងធ្វើការឲ្យទូរទស្សន៍រដ្ឋអាល្លឺម៉ង់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ