អាហ្វហ្កានីស្ថាន៖ កម្លាំងតស៊ូនៅខេត្តប៉ាន់ឆៀរ ជាពន្លឺនៃក្តីសង្ឃឹមថ្មីដើម្បីប្រឆាំងនឹងក្រុមតាលីបង់?
ចុះផ្សាយនៅថ្ងៃ៖
ស្តាប់ - ០៦:៤៥
ខណៈដែលក្រុមតាលីបង់ កំពុងតែឈានមកកាន់កាប់អំណាច នៅអាហ្វហ្កានីស្ថាន មានក្រុមចលនាតស៊ូមួយ កំពុងតែប្រឹងប្រែងប្រយុទ្ធ មិនចុះញ៉ម នឹងក្រុមតាលីបង់។ ចលនាតស៊ូនេះ មានមូលដ្ឋាននៅក្នុងខេត្ត ប៉ាន់ឆៀរ ដែលស្ថិតនៅខាងជើងឆៀងខាងកើត រដ្ឋធានីកាប៊ូល ហើយដែលខេត្តនេះ ក្រុមតាលីបង់ នៅមិនទាន់វាយដណ្តើមបាននៅឡើយទេ។ តើក្រុមចលនាតស៊ូនៅខេត្តប៉ាន់ឆៀរនេះ អាចនឹងមានសង្ឃឹមកម្រិតណា ក្នុងការយកឈ្នះក្រុមតាលីបង់ ឬមួយនេះ គឺជាចំណុចចាប់ផ្តើម នៃការផុសផុលរើបំរះ ប្រឆាំងនឹងក្រុមតាលីបង់ នៅអាហ្វហ្កានីស្ថាន?
ចលនាតស៊ូ ដឹកនាំដោយកូនប្រុសរបស់លោកអតីតមេបញ្ជាការដ៏ល្បី ឈ្មោះ Massoud
បច្ចុប្បន្ននេះ ខេត្តប៉ាន់ឆៀរ (Panchir-Panjshir) គឺជាក្តីសង្ឃឹមចុងក្រោយ នៃការតស៊ូប្រយុទ្ធជាមួយនឹងក្រុមតាលីបង់។ ចលនាតស៊ូនេះ មានឈ្មោះថា “សម្ព័ន្ធជាតិនៃការតស៊ូ” ដែលដឹកនាំដោយ មនុស្សម្នាក់ឈ្មោះ Ahmad Massoud ដែលជាកូនប្រុស របស់លោកអតីតមេបញ្ជាការដ៏ល្បី ឈ្មោះ Massoud ដែលត្រូវបានក្រុមអាល់កៃដាសម្លាប់ កាលពីខែកញ្ញាឆ្នាំ២០០១ ប៉ុន្មានថ្ងៃមុនភេរវកម្មនៅ World Trad Center ក្រុងញូយ៉ក។
លោក Ali Maisam Nazary អ្នកនាំពាក្យរបស់ចលនាតស៊ូនេះ បានអះអាងប្រាប់អ្នកយកព័ត៌មានបារាំងថា ចលនានេះ មានកម្លាំងប្រមាណ៩០០០នាក់។ យោងតាមរូបថតខ្លះ ផ្សាយដោយទីភ្នាក់ងារព័ត៌មានបារាំង AFP គេឃើញសមាជិកកងកម្លាំងនេះ កំពុងហាត់សម ត្រៀមប្រយុទ្ធ អមដោយសម្ភារៈសិកមួយចំនួន ដូចជារថពាសដែកជាដើម។
ចំណែក លោក Amrullah Saleh អតីតអនុប្រធានាធិបតី របស់រដ្ឋាភិបាលលោកប្រធានាធិបតី Ashraf Ghani ក៏បានរត់ទៅខេត្តប៉ាន់ឆៀរនេះដែរ ជាមួយនឹងមនុស្សប្រមាណមួយពាន់នាក់ទៀត ដែលភាគច្រើន សុទ្ធតែជាបញ្ញាវន្ត សកម្មជនការពារសិទ្ធិមនុស្ស និងអ្នកនយោបាយ។ ពួកគេបានរត់ចូលទៅក្នុងខេត្តប៉ាន់ឆៀរ ដើម្បីគេចចេញពីក្រុមតាលីបង់ ព្រោះថាខេត្តនេះ គឺជាដែនដីចុងក្រោយ ដែលក្រុមតាលីបង់ មិនទាន់អាចវាយដណ្តើមបាន។
ក្រុមតាលីបង់ មិនទាន់បើកការប្រយុទ្ធ
យោងតាមប្រភពព័ត៌មានភាគច្រើន គឺក្រុមតាលីបង់ មិនទាន់បើកការប្រយុទ្ធ ក្នុងទ្រង់ទ្រាយធំ ដើម្បីដណ្តើមយកខេត្តប៉ាន់ឆៀរនេះទេ។ ក្រុមតាលីបង់ កំពុងតែជាប់ដៃ មមាញឹក ជាមួយនឹងភាពចលាចលខ្លាំង នៅតំបន់ក្រុងកាប៊ូល។ យ៉ាងណាមិញ លោក Serguei Lavrov រដ្ឋមន្ត្រីការបរទេសរុស្ស៊ី បានអះអាងថា តំបន់ជ្រលងភ្នំក្នុងខេត្តប៉ាន់ឆៀរ ដែលស្ថិតនៅភាគខាងជើងឆៀងខាងកើត ក្រុងកាប៊ុល គឺមិនទាន់ស្ថិតក្រោមការកាន់កាប់ របស់ក្រុមតាលីបង់ទេ។ ក៏ប៉ុន្តែ មិនមែនមានន័យថា មានការវាយប្រយុទ្ធគ្នា នៅតំបន់នោះដែរ។
លោក Gilles Dorronsoro សាស្ត្រាចារ្យវិទ្យាសាស្ត្រនយោបាយ នៅសកលវិទ្យាល័យ Paris Panthéon Sorbonne បានលើកឡើងថា មកទល់ពេលនេះ ក្រុមតាលីបង់ មិនទាន់បើកការប្រយុទ្ធ ដើម្បីដណ្តើមយកខេត្តប៉ាន់ឆៀរទេ ព្រោះថាអ្វីដែលក្រុមតាលីបង់ ចង់បង្ហាញប្រាប់ពិភពលោក គឺថាក្រុមខ្លួនមិនចង់បង្ហូរឈាម និងឈានទៅគ្រប់គ្រងអំណាចដោយសន្តិវិធី។
តែយ៉ាងណា លោក Abdul Sayed អ្នកជំនាញនៅសកលវិទ្យាល័យ Lund ប្រទេសស៊ុយអែត បានលើកឡើងថា តាមពិតខេត្តប៉ាន់ឆៀរ ត្រូវក្រុមតាលីបង់ ឡោមព័ទ្ធជិតទៅហើយ។ ហើយយោងតាម អង្គការមនុស្សធម៌អ៊ីតាលីមួយ ឈ្មោះ Emergency បានអះអាងកាលពីថ្ងៃពុធកន្លងទៅ ថានៅមន្ទីរពេទ្យរបស់គេ ក្នុងតំបន់ប៉ានឆៀរ គឺចាប់ផ្តើមមានមនុស្សរបួសដោយការប្រយុទ្ធច្រើនណាស់។ ដូចគ្នាដែរ ជនជាតិបារាំងម្នាក់ ដែលធ្លាប់ចូលរួមប្រយុទ្ធនៅខេត្តប៉ាន់ឆៀរនេះ កាលពីទសវត្សឆ្នាំ៩០ បានលើលឡើងថា បច្ចុប្បន្ននេះពុំទាន់មានសមរភូមិប្រយុទ្ធមែន តែអាចមានការប៉ះទង្គិចគ្នាខ្លះ រវាងក្រុមតាលីបង់ និងចលនាតស៊ូនៅខេត្តប៉ាន់ឆៀរ ដែលដឹកនាំដោយកូនប្រុស របស់លោកអតីតមេបញ្ជាការ Massoud។
យុទ្ធនាការផ្សព្វផ្សាយឃោសនា
សម្រាប់ពេលនេះ ចលនាតស៊ូនៅខេត្តប៉ាន់ឆៀរនេះ កំពុងបើកយុទ្ធនាការផ្សព្វផ្សាយ ជាពាក្យសំដី និង ឃោសនាតាមបណ្តាញសង្គម ដើម្បីប្រកូកប្រកាស ឲ្យមានការចូលរួមគាំទ្រ ឲ្យបានច្រើន។ យ៉ាងណាមិញ កាលពីថ្ងៃសុក្រ លោក អាប់ឌូឡា អាប់ឌូឡា អតីតប្រធានាធិបតីអាហ្វហ្កានីស្ថាន បានបង្ហោះរូបថតប៉ុន្មានសន្លឹក នៅលើ Facebook ដែលគេឃើញ គាត់និងលោក ហាមីដ កាហ្សៃ ជួបគ្នាជាមួយនឹងតំណាង របស់ក្រុមចលនាតស៊ូ នៅខេត្តប៉ាន់ឆៀរ។
ដូច្នេះ យើងឃើញថា ទោះចង់មិនចង់ ចលនាតស៊ូនៅខេត្តប៉ាន់ឆៀរ បានក្លាយជាពន្លកនៃការតស៊ូប្រយុទ្ធជាមួយក្រុមតាលីបង់ហើយ។ ក៏ប៉ុន្តែ បើនិយាយពីកម្លាំងប្រយុទ្ធ គឺគេសង្ឃឹមតិចណាស់ ថានឹងក្រុមនេះ អាចនឹងឈានទៅយកឈ្នះក្រុមតាលីបង់នោះ។ លោក Ahmad Massoud ដែលដឹកនាំចលនាតស៊ូនេះ ធ្លាប់បានអំពាវនាវ ឲ្យសហរដ្ឋអាមេរិកជួយខ្លួន តាមរយៈការជួយផ្តល់អាវុធយុទ្ធភណ្ឌជាដើម។ លោក Nazary អ្នកនាំពាក្យចលនានេះ បានអះអាងថា ក្រុមខ្លួន នឹងប្រឹងប្រែងប្រយុទ្ធរយៈពេលវែង ប្រសិនបើគ្មានការស្រុះស្រួលណាមួយ ជាមួយក្រុមតាលីបង់ទេនោះ។
ចរចាជាមួយក្រុមតាលីបង់ ដើម្បីបង្កើតរដ្ឋសហព័ន្ធ
បើតាមការវិភាគរបស់អ្នកជំនាញ កម្មវត្ថុចំបង គឺមិនមែនយកជ័យជំនះលើក្រុមតាលីបង់ទេ ព្រោះគេដឹងថាទៅមិនរួច។ អ្វីដែលចលនានេះ ចង់បានគឺឈានទៅចរចា ជាមួយក្រុមតាលីបង់ ដើម្បីរៀបចំការបែងចែងអំណាច។ យ៉ាងណាមិញ ការដែលលោក អាប់ឌូឡា អាប់ឌូឡា និងលោក ហាមីដ កាហ្សៃ បានជួបជាមួយមេដឹកនាំចលនាខេត្តប៉ាន់ឆៀរនេះ គឺវាមានន័យថា ក្រុមអ្នកនយោបាយអាហ្វហ្កានីស្ថាន កំពុងប្រើចលនានេះ ដើម្បីជាកូនអុក ដាក់សំពាធទៅលើក្រុមតាលីបង់ ដើម្បីចរចាបែងចែងអំណាច។
លោក Nazary អ្នកនាំពាក្យចលនាតស៊ូខេត្តប៉ាន់ឆៀរ បានអះអាងថា អ្វីដែលចលនាខ្លួនចង់បានគឺ ការបង្កើតរដ្ឋអាហ្វហ្កានីស្ថាន ជារដ្ឋសហព័ន្ធ មានការបែងចែកអំណាច និងស្វ័យភាព ទៅឲ្យតំបន់នីមួយៗ និងក្រុមជនជាតិនីមួយ ដោយស្មើភាព និងយុត្តិធម៌។ តែបញ្ហាចោទសួរថា តើសហគមអន្តរជាតិ ប្រទេសមហាអំណាច ជាពិសេសសហរដ្ឋអាមេរិក មានជំហរបែបណា ចំពោះក្រុមចលនាតស៊ូនៅខេត្តប៉ាន់ឆៀរនេះ។ តើគាំទ្រ ទំនុកបំរុង ឬ មិនចាប់អារម្មណ៍?
អាមេរិក និងប្រទេសលោកខាងលិច កំពុងប្រយ័ត្នខ្លាំងណាស់ ខ្លាចក្រុមតាលីបង់បើទ្វារអាហ្វហ្កានីស្ថាន ឲ្យក្លាយជាជង្រុកសំបុកពួកភេរវកម្មអ៊ីស្លាមជ្រុលនិយម។ ដូច្នេះ ប្រសិនអាចទប់បាន កាត់បន្ថយឥទ្ធិពលរបស់ក្រុមតាលីបង់ គឺគេអាចពិចារណា គាំទ្រខាងក្រុមចលានតស៊ូនៅខេត្តប៉ាន់ឆៀរនេះ។ តែវាទាល់តែក្រុមអ្នកនយោបាយអាហ្វហ្កានីស្ថាន ខ្លួនឯង រួមកម្លាំងសាមគ្គីគ្នាដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ