រ៉ូកែត៥គ្រាប់ហោះសំដៅមកព្រលានយន្តហោះក្រុងកាប៊ុល ខណៈទាហានអាមេរិកកំពុងបង្កើយការជម្លៀសមនុស្ស
ចុះផ្សាយនៅថ្ងៃ៖
ស្តាប់ - ០៦:០២
ថ្ងៃ៣១សីហាស្អែកនេះ គឺជាថ្ងៃចុងក្រោយ ដែលកងទ័ពអាមេរិក ត្រូវតែចាកចេញឲ្យអស់ពីអាហ្វហ្កានីស្ថាន។ នៅព្រលានយន្តហោះទីក្រុងកាប៊ុល កងទ័ពអាមេរិកកំពុងប្រឹងប្រែងជម្លៀសមនុស្ស ដែលនៅសេសសល់ ក្នុងបរិយាកាសសន្តិសុខដ៏តានតឹងបំផុត ដោយខ្លាចក្រែងមានការវាយប្រហារភេរវកម្មជាថ្មីទៀត។ យ៉ាងណាមិញ នៅព្រឹកថ្ងៃចន្ទទី៣០សីហា មានគ្រាប់រ៉ូកែតយ៉ាងហោច ចំនួន៥គ្រាប់ ត្រូវបានបាញ់សំដៅមកព្រលានយន្តហោះ តែត្រូវបានប្រព័ន្ធខែលមីស៊ីលអាមេរិក ចាប់ស្ទាក់បាន។ ២ថ្ងៃមុនផុតឱសានុវាទ ស្ថានភាពនៅព្រលានយន្តហោះក្រុងកាប៊ុល កាន់តែចលាចលជ្រួលច្របល់ ប្រកបដោយការភ័យខ្លាច ខណៈមានប្រជាជនអាហ្វហ្កានីស្ថានជាច្រើនពាន់នាក់ កំពុងរងចាំ និងស្វែងរកវិធី ដើម្បីអាចចាកចេញពីប្រទេសនេះ។
អាមេរិកស្ទាក់កំទេចរ៉ូកែត៥គ្រាប់ ដែលហោះសំដៅមកព្រលានយន្តហោះ
ភាពភ័យខ្លាចជ្រួលច្របល់ មានកានតែធំ ដោយម្នាក់ភ័យបារម្ភអំពីការវាយប្រហារភេរវកម្មជាថ្មីទៀត នៅតំបន់ក្បែរព្រលានយន្តហោះទីក្រុងកាប៊ុល។ ជាក់ស្តែង នៅព្រឹកថ្ងៃចន្ទនេះ យោងតាមការបញ្ជាក់ពីមន្ត្រីយោធាអាមេរិក គឺមានគ្រាប់រ៉ូកែត យ៉ាងហោចចំនួន៥គ្រាប់ ត្រូវបានគេបាញ់បង្ហោះ សំដៅមកព្រលានយន្តហោះតែម្តង។ តែជាសំណាងល្អ ប្រពន្ធ័ខែលមីស៊ីលរបស់កងទ័ពអាមេរិក បានស្ទាក់កំទេចបាន។
យោងតាមការចុះផ្សាយរបស់បណ្តាញព័ត៌មានអាហ្វហ្កានីស្ថាន គឺពិតជាមានគ្រាប់រ៉ូកែតច្រើនគ្រាប់ ត្រូវបានបាញ់ចេញពីរថយន្តមួយ ស្ថិតនៅមិនឆ្ងាយប៉ុន្មានពីក្រុងកាប៊ុល។ ទីភ្នាក់ងារព័ត៌មានPajhwok បានចុះផ្សាយថា គ្រាប់រ៉ូកែតជាច្រើនគ្រាប់ បានធ្លាក់ទៅលើសង្កាត់មួយចំនួន ក្នុងក្រុងកាប៊ុលថែមទៀតផង។
កាលពីថ្ងៃអាទិត្យ កងទ័ពអាមេរិកបានប្រើយានដ្រូន បាញ់កម្ទេចរថយន្តមួយគ្រឿង ដែលផ្ទុកដោយគ្រាប់ផ្ទុះ។ រថយន្តនោះ កំពុងបើកសំដៅទៅព្រលានយន្តហោះក្រុងកាប៊ុល ស្ថិតនៅចំងាយប្រមាណ២គីឡូម៉ែត្រ។ យោងតាមការចុះផ្សាយរបស់ ទូរទស្សន៍CNN គឺមានគ្រួសារប្រជាជនអាហ្វហ្កានីស្ថានមានសមាជិក៩នាក់បានស្លាប់ ក្នុងនោះក្មេងមាន៦នាក់។ ក្រសួងការពារជាតិអាេមរិក បានបញ្ជាក់ថា គេកំពុងស៊ើបអង្កេតលំអិត លើករណីនេះ។ គេបានទទួលស្គាល់ថា ដោយសារតែរថយន្តរបស់ក្រុមភេរវកម្ម មានផ្ទុកគ្រាប់ផ្ទុះច្រើន ទើបបានបណ្តាលឲ្យផ្ទុះខ្លាំង ហើយអាចបង្កឲ្យមានគ្រោះថ្នាក់ ទៅលើមនុស្សស្ថិតនៅក្បែរនោះ។
ស្ថានការណ៍នៅក្រុងកាប៊ុល ជាពិសេសនៅព្រលានយន្តហោះតែម្តង គឺមានភាពតានតឹង ប្រកបដោយការភ័យបារម្ភខ្លាំងណាស់។ តែយ៉ាងណា សេតវិមានអាេមរិក បានអះអាងថា គេនៅតែបន្ត ប្រឹងប្រែងធ្វើប្រតិបត្តិជម្លៀសមនុស្ស តាមយន្តហោះ ដោយឥតមានរអាក់រអួលទេ ព្រោះនៅសល់ពេលតែថ្ងៃនេះ និងថ្ងៃស្អែក ទី៣១សីហាតែប៉ុណ្ណោះ។
ជម្លៀសបាន ១១៤៤០០នាក់
យោងតាមតួលេខផ្តល់ឲ្យដោយសេតវិមាន គឺ មានមនុស្សប្រមាណ ១១៤៤០០នាក់ ត្រូវបានជម្លៀសចេញពីក្រុងកាប៊ុលតាមយន្តហោះ ទៅកាន់ប្រទេសផ្សេងៗ គិតចាប់ពីថ្ងៃទី១៤សីហាមក។ ក្នុងចំណោមអ្នកដែលគេជម្លៀសចេញរួចរាល់ គឺមានជនជាតិអាេមរិក ចំនួន៥៥០០នាក់។ ក្រៅពីនោះគឺមានបុគ្គលិកស្ថានទូតបរទេស អ្នកកាសែត បុគ្គលិកអង្គការសហប្រជាជាតិ និងបុគ្គលិករបស់អង្គការអូតង់ជាដើម។ តែភាគច្រើនលើសលុប គឺប្រជាជនអាហ្វហ្កានីស្ថាន ដែលប្រឈមនឹងគ្រោះថ្នាក់។
តាមការបញ្ជាក់ពីលោក អង់តូនី ប្លីងកិន រដ្ឋមន្ត្រីការបរទេសអាេមរិក កាលពីល្ងាចថ្ងៃអាទិត្យម្សិលមិញ តាមកញ្ចក់ទូរទស្សន៍ ABC បច្ចុប្បន្ននេះគឺនៅមានសល់ ជនជាតិអាមេរិក ចំនួន៣០០នាក់ទៀត។ ក៏ប៉ុន្តែ នៅមានប្រជាជនអាហ្វហ្កានីស្ថាន ច្រើនពាន់នាក់ណាស់ ដែលកំពុងរងចាំ សុំឲ្យគេជម្លៀសតាមយន្តហោះ។ ក្រសួងការបរទេសអង់គ្លេស បញ្ជាក់ថាគេនៅសល់ប្រជាជនអាហ្វហ្កានីស្ថានប្រមាណ ១១០០នាក់ទៀត ដែលត្រូវជម្លៀសមកអង់គ្លេស តែមិនបានធ្វើទាន់ពេលវេលា។
យ៉ាងណាមិញ មន្ត្រីអាមេរិក២នាក់ នៅក្រុងកាប៊ុល បានបញ្ជាក់ប្រាប់ទីភ្នាក់ងារព័ត៌មាន Reuters ថា ប្រទេសសម្ព័ន្ធមិត្តបានសំណូមពរ និងដាក់ឯកសារជាច្រើន ប៉ុន្មានថ្ងៃចុងក្រោយនេះ ដើម្បីឲ្យអាមេរិកជួយជម្លៀសប្រជាជនអាហ្វហ្កានីស្ថាន ដែលត្រូវគេចាត់ទុកថាជាអ្នកប្រឈមគ្រោះថ្នាក់។
ក្រុមតាលីបង់បដិសេធបង្កើត « តំបន់សុវត្ថិភាព »
ក្រុមប្រឹក្សាសន្តិសុខនៃអង្គការសហប្រជាជាតិ នឹងបើកការប្រជុំនៅថ្ងៃចន្ទនេះ ឆ្លើយតបទៅនឹងការស្នើសុំរបស់បារាំងនឹងអង់គ្លេស ឲ្យបង្កើតតំបន់សុវត្ថិភាព នៅព្រលានយន្តហោះក្រុងកាប៊ុល។ ការបង្កើតតំបន់សុវត្ថិភាពពិសេស គឺមានន័យថា ត្រូវតែមានកងកម្លាំងអន្តរជាតិ ទៅយាមការពារសន្តិសុខ។
ក្រុមតាលីបង់ តាមរយៈអ្នកនាំពាក្យឈ្មោះ Souhail Shaheen បានប្រកាសថា ក្រុមគេ នឹងមិនអនុញ្ញាត ឲ្យបង្កើតតំបន់សុវត្ថិភាពនេះទេ។ ក្រុមតាលីបង់បានអះអាងថា មិនមានប្រយោជន៍ទេ ព្រោះថាពួកគេ នឹងមិនទៅរារាំង មិនឲ្យមនុស្សធ្វើដំណើរ ចាប់ពីថ្ងៃទី១កញ្ញាទៅទេ។ ដូច្នេះមិនចាំបាច់មានតំបន់សុវត្ថិភាពពិសេសអ្វីទេ។
យ៉ាងណាមិញ កាលពីថ្ងៃអាទិត្យ សហរដ្ឋអាមេរិក និងសម្ព័ន្ធមិត្តបានចេញលិខិតមួយ ដោយលើកឡើងថា ក្រុមតាលីបង់ពិតជាបានធានាអះអាងប្រាប់ទៅគេមែន ថានៅក្រោយថ្ងៃទី៣១សីហា គឺប្រជាជនអាហ្វហ្កានីស្ថាន នៅតែអាចធ្វើដំណើរចាកចេញពីប្រទេសបាន ដោយសុវត្ថិភាពធម្មតាទេ ឲ្យតែអ្នកនោះមានឯកសារធ្វើដំណើរត្រឹមត្រូវ។
គឺនៅក្រោយការធានាអះអាង របស់ក្រុមតាលីបង់នេះហើយ បានជានៅថ្ងៃចន្ទនេះ រដ្ឋមន្ត្រីការបរទេសសហរដ្ឋអាមេរិក បានបើកការប្រជុំមួយ តាមប្រព័ន្ធវីដេអូខុនហ្វឺរិនស៍ ជាមួយនឹងរដ្ឋមន្ត្រីក្រសួងការបរទេសប្រទេសសម្ព័ន្ធមិត្ត មានដូចជា បារាំង កាណាដា អាល្លឺម៉ង់ អ៊ីតាលី ជប៉ុន អង់គ្លេស តួកគី កាតា ព្រមទាំងសហភាពអឺរ៉ុប និងអង្គការអូតង់ផង។ យោងតាមលិខិតប្រកាស របស់ក្រសួងការបរទេសអាេមរិក គឺអាមេរិកនិយាយមួយប្រទេសសម្ព័ន្ធមិត្តសំខាន់ៗទាំងនេះ ដើម្បីគូសវាសវិធានការ ក៏ដូចជារៀបចំការងារ ត្រូវធ្វើយ៉ាងណាខ្លះ នៅក្រោយថ្ងៃទី៣១សីហា នៅពេលដែលទាហានអាមេរិកចាកចេញអស់។
ដោយឡែក បើផ្អែកតាមប្រសាសន៍ របស់លោកម៉ាក្រុង កាលពីថ្ងៃអាទិត្យម្សិលមិញ គឺគេបានពឹងប្រទេសកាតា ដោយជួយសម្រួល និយាយជាមួយក្រុមតាលីបង់ ដើម្បីបន្តការងារដឹកជម្លៀសប្រជាជនអាហ្វហ្កានីស្ថាន ដែលនៅសេសសល់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ