លោកចូ បៃដិនបើកចំហឯកសារសំងាត់ ដែលបង្ហាញការពាក់ព័ន្ធរបស់អារ៉ាប៊ីសាអូឌីត នៅក្នុងភេរវកម្ម ១១កញ្ញា
ចុះផ្សាយនៅថ្ងៃ៖
ស្តាប់ - ០៧:៣០
កាលពីថ្ងៃសៅរ៍ទិ១១កញ្ញា សហរដ្ឋអាេមរិក បានប្រារព្ធពិធីរំលឹកខួប២០ឆ្នាំ នៃការវាយប្រហារភេរវកម្ម ថ្ងៃទី១១កញ្ញា២០០១។ ខួប២០ឆ្នាំនៃភេរវកម្ម១១កញ្ញា គឺពោរពេញដោយចំណោទចោទសួរ អំពីបរាជ័យរបស់សហរដ្ឋអាមេរិក បូកបន្ថែមជាមួយនឹងវិបត្តិបាក់បែកផ្ទៃក្នុង នៅក្នុងសង្គមនិងនយោបាយអាមេរិក ថែមទៀតផង។ ទន្ទឹមគ្នានេះ សំឡេងហៅរកយុត្តិធម៌ របស់គ្រួសារជនរងគ្រោះដែលស្លាប់នៅថ្ងៃ១១កញ្ញា នៅតែបន្តដង្ហើយ ទាមទារឲ្យវែកញែករកការពិត។ ឆ្លើយតបទៅនឹងការទាមទារនេះ លោកចូ បៃដិន បានសម្រេចកាលពីថ្ងៃទី១១កញ្ញា បើកចំហឯកសារសំងាត់មួយរបស់ FBI ដែលទាក់ទិននឹងការស្រាវជ្រាវ ស្តីពីអ្នកនៅពីក្រោយអំពើភេរវកម្ម ថ្ងៃ១១កញ្ញា២០០១។
កំណត់ហេតុFBI ចុះឆ្នាំ២០១៦
លោក ចូ បៃដិន បានសម្រេចបើកចំហឯកសារ ដែលជារបាយការណ៍កំណត់ហេតុ របស់ទីភ្នាក់ងារ FBI ដែលត្រូវបានសរសេរ នៅថ្ងៃទី៤ មេសា ឆ្នាំ២០១៦។ ជាកំណត់ហេតុ ដែលផ្អែកលើ ការឆ្លងឆ្លើយសួរនាំគ្នា រវាងភ្នាក់ងារ FBI ជាមួយនឹងប្រភពម្នាក់របស់FBI ដែលគេមិនបញ្ចេញឈ្មោះ នៅរវាងឆ្នាំ២០០៩ ដល់ឆ្នាំ២០១៥។ កំណត់ហេតុបានរំលេចឲ្យឃើញ នូវ ទំនាក់ទំនងស្អិតរមួត រវាងមនុស្សម្នាក់ ឈ្មោះ Omar al-Bayoumi ជាមួយនឹងជនជីហាត២នាក់ ឈ្មោះ Nawaf al-Hazmi និង Khalid al-Mihdhar ដែលជាអ្នកប្លន់យន្តហោះបើកទៅបុក អាគារ World Trad Center។
យោងតាមប្រភពច្បាស់ការណ៍នេះ គឺជនឈ្មោះ Omar al-Bayoumi ជានិស្សិតជនជាតិអារ៉ាប៊ីសាអូឌីត មករៀននៅអាមេរិក តែព្រមពេលជាមួយគ្នានេះ គឺជននេះជាក៏ភ្នាក់ងារចារកិច្ច របស់អារ៉ាប៊ីសាអូឌីត ហើយថែមទាំងមានមុខតំណែងសំខាន់មួយ នៅក្នុងស្ថានកុងស៊ុលអារ៉ាប៊ីសាអូឌីតនៅកាលីហ្វ័រញ៉ា។ នៅពេលដែលជនជីហាតទាំង២ខាងលើ បានធ្វើដំណើរមកដល់ភាគខាងត្បូងរដ្ឋកាលីហ្វ័រញ៉ានៅឆ្នាំ២០០០ ដើម្បីត្រៀមរៀបចំធ្វើភេរវកម្ម គឺជនឈ្មោះ Omar al-Bayoumi នេះឯង ដែលជាអ្នកជួយជ្រោមជ្រែង ជួយបកប្រែ ជូនទៅនេះទៅនោះ ផ្តល់កន្លែងស្នាក់នៅ និងប្រាក់កាសជាដើម។
កំណត់ហេតុ ក៏បានបង្ហាញឲ្យឃើញផងដែរ នូវទំនាក់ទំនង រវាងជនជីហាតទាំង២ ជាមួយគ្រូគង្វាលអ៊ីស្លាមម្នាក់ ឈ្មោះFahad al-Thumairy។ គ្រូគង្វាលអ៊ីស្លាមនេះ ប្រចាំការនៅវិហារអ៊ីស្លាមក្រុង Los Angeles ហើយក៏ធ្លាប់ជាមន្ត្រីទូតផ្លូវការម្នាក់ របស់ស្ថានកុងស៊ុលអារ៉ាប៊ីសាអូឌីតដែរ នៅរវាងចុងទសវត្សឆ្នាំ៩០។ មិនត្រឹមតែប៉ុណ្ណោះ ភ្នាក់ងារFBI បានកត់ត្រា ថាគេបានរកឃើញថា ជនឈ្មោះ Omar al-Bayoumi រួមជាមួយគ្រូគង្វាលអ៊ីស្លាមFahad al-Thumairy ធ្លាប់បានជួបប្រជុំគ្នា និងនិយាយទូរស័ព្ទ ជាមួយជនម្នាក់ទៀត ឈ្មោះ Anouar al-Aulaqi ដែលជាជនជាតិអាមេរិក ដើមកំណើតយេម៉ែន ហើយដែលគេស្គាល់ថាជាមេឃោសនាអូសទាញរបស់បណ្តាញអាល់កៃដា ប្រចាំនៅឧបទ្វីបអារ៉ាប់។ ជននេះត្រូវបានទាហានអាមេរិកបញ្ជាយានដ្រូនទំលាក់គ្រាប់សម្លាប់កាលពីខែកញ្ញាឆ្នាំ២០១១។
រដ្ឋាភិបាលអារ៉ាប៊ីសាអូឌីត ជាអ្នកទំនុកបំរុងក្រុមភេរវកម្ម?
ផ្អែកតាមប្រភពរបស់ FBI នេះ គឺថា ជនឈ្មោះ Omar al-Bayoumi ដែលជាអ្នកជួយជនជីហាតទាំង២ គឺជាភ្នាក់ងារចារកិច្ច ហើយមានមុខតំណែង នៅក្នុងស្ថានកុងស៊ុលអារ៉ាប៊ីសាអូឌីតទៀត។ ហើយទន្ទឹមគ្នានេះ ជននេះក៏មានទំនាក់ទំនងស្អិតរមួត មានការឆ្លងឆ្លើយទូរស័ព្ទញឹកញាប់ និងការជួបប្រជុំគ្នា ជាមួយនឹងគ្រូគង្វាលអ៊ីស្លាម ដែលធ្លាប់ជាមន្ត្រីទូតរបស់អារ៉ាប៊ីសាអូឌីតទៀត។ ប្រភពរបស់ FBI គឺជាមនុស្សស្គាល់ស្និទ ជាមួយ Omar al-Bayoumi នឹងធ្លាប់សហការ ជួយជនជីហាតទាំង២ ដែលបើកយន្តហោះបុកអាគារ World Trad Center ដែរ។
ណាមួយទៀត វាមិនមែនជាលើកទី១ទេ ដែលមានលេចចេញនូវតម្រុយមួយចំនួន ចង្អុលទៅកាន់ប្រទេសអារ៉ាប៊ីសាអូឌីត ថាជាអ្នកនៅពីក្រោយ អំពើភេរវកម្ម ថ្ងៃទី១១ កញ្ញា ២០០១។ ជាក់ស្តែង ក្នុងចំណោមជនជីហាត ទាំង១៩នាក់ ដែលធ្វើសកម្មភាពប្លន់យន្តហោះ ដើម្បីធ្វើប្រតិបត្តិការភេរវកម្មនៅថ្ងៃទី១១កញ្ញាហ្នឹង គឺមាន១៥នាក់ ដែលជាជនជាតិអារ៉ាប៊ីសាអូឌីត។ ហើយ ប៊ីនឡាដិន មេក្លោងធំរបស់អាល់កៃដា ក៏ជាជនជាតិអារ៉ាប៊ីសាអូឌីតដែរ។
ក៏ប៉ុន្តែយ៉ាងណាក៏ដោយ យោងតាមឯកសារកំណត់ហេតុនេះ គឺភ្នាក់ងារ FBI មិនបានសរសេរ សន្និដ្ឋានឲ្យច្បាស់ប្រាកដ អំពីទំនាក់ទំនងដោយផ្ទាល់ រវាងរដ្ឋាភិបាលរបស់អារ៉ាប៊ីសាអូឌីត ជាមួយក្រុមភេរជនទេ។ វាអាចថា មនុស្សទាំងនោះជាជនជាតិអារ៉ាប៊ីសាអូឌីត ជាមន្ត្រីការទូត ឬក៏ភ្នាក់ងារចារកិច្ចរបស់អារ៉ាប៊ីសាអូឌីតមែន តែពួកគេអាចឃុបឃិតគ្នាធ្វើសកម្មភាពភេរវកម្ម ក្រៅក្របខណ្ឌរដ្ឋាភិបាល របស់អារ៉ាប៊ីសាអូឌីត ក៏ថាបានដែរ។
រដ្ឋាភិបាលអារ៉ាប៊ីសាអូឌីត ក៏ធ្លាប់បានច្រានចោលការសង្ស័យទាំងអស់ដែរ។ ហើយកាលពីឆ្នាំ២០០៤ គណកម្មការស៊ើបអង្កេតមួយ របស់សភាអាមេរិក ក៏បានសន្និដ្ឋានដែរ ថា រដ្ឋាភិបាលអារ៉ាប៊ីសាអូឌីត គ្មានអ្វីពាក់ព័ន្ធជាមួយនឹងភេរវកម្ម ថ្ងៃទី១១កញ្ញា ឆ្នាំ២០០១ទេ។
លោក ចូ បៃដិន រងសំពាធពីការទាមទាររបស់ក្រុមគ្រួសារជនរងគ្រោះ
ការដែលលោក ចូ បៃដិន សម្រេចបើកចំហឯកសារសំងាត់នេះ ជាសាធារណៈ គឺដោយសារតែរងសំពាធ និងការទាមទារខ្លាំង ពីក្រុមគ្រួសារជនរងគ្រោះមួយចំនួន។ ពួកគេបានដាក់ពាក្យប្តឹង រដ្ឋាភិបាលអារ៉ាប៊ីសាអូឌីតតែម្តង នៅចំពោះមុខតុលាការអាមេរិក។ អស់ជាច្រើនឆ្នាំមកហើយ ដែលក្រុមគ្រួសារជនរងគ្រោះ ទាមទារឲ្យរដ្ឋាភិបាលទំលាយឯកសារ ដែលជាឯកសារសំងាត់ ដើម្បីឲ្យមហាជនបានយល់ដឹង នឹងឈានទៅស្វែងរកការពិតទាំងឡាយ ជុំវិញបណ្តាញភេរវកម្ម ដែលបានវាយប្រហារនៅថ្ងៃទី១១កញ្ញាឆ្នាំ២០០១ ស្លាប់មនុស្សដល់ទៅជិត៣០០០នាក់។
តាមពិត កន្លងមក ទាំងក្នុងអាណត្តិលោកអូបាម៉ា អាណត្តិលោកដូណាល់ ត្រាំ គឺគេបានព្យាយាមបិទខ្ទប់ មិនទំលាយឯកសារនេះទេ ព្រោះថាមិនចង់បង្កើត ឲ្យមានភាពតានតឹង មើលមុខគ្នាមិនត្រង់ រវាងអាមេរិក និងរដ្ឋាភិបាលអារ៉ាប៊ីសាអូឌីត។
ចង់មិនចង់ ឯកសារសំងាត់របស់ FBI គឺវាបានមកដាស់ការសង្ស័យ ទៅលើរដ្ឋាភិបាលអារ៉ាប៊ីសាអូឌីត។ លោក Jim Kreindler មេធាវីដ៏សំខាន់ម្នាក់ តំណាងក្រុមគ្រួសារជនរងគ្រោះ ដែលបានដាក់ពាក្យប្តឹង អារ៉ាប៊ីសាអូឌីត បានលើកឡើងថា ខ្លឹមសារនៃកំណត់ហេតុនេះ បានមកបញ្ជាក់ភាពប្រត្យក្ស ដល់ការសង្ស័យកន្លងមក ថារដ្ឋាភិបាលអារ៉ាប៊ីសាអូឌីត ពិតជាបានទំនុកបំរុងពួកភេរវជន ដែលធ្វើសកម្មភាពថ្ងៃទី១១កញ្ញា។ លោកបន្ថែមថា ២០ឆ្នាំមកហើយ ដែលអារ៉ាប៊ីសាអូឌីត បានសំងំពួននៅពីក្រោយការជួយលាក់បាំង របស់រដ្ឋាភិបាលអាមេរិក។ តែពេលនេះ គឺដល់ពេលត្រូវចប់ហើយ។ ក្រុមគ្រួសារជនរងគ្រោះទាំងអស់ ត្រូវការចង់ឃើញឯកសារ និងភស្តុតាងទាំងអស់។ យោងតាមលោកមេធាវីនេះ នៅរវាង៦ខែទៀត លោកប្រធានាធិបតីចូ បៃដិន អាចនឹងនឹងត្រូវបើកចំហឯកសារសំងាត់ផ្សេងៗទៀត ទាក់ទិននឹងសំណុំរឿងនេះ។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ