បារាំងកោះហៅអគ្គរដ្ឋទូតខ្លួនប្រចាំវ៉ាស៊ីនតោន និងកង់បេរ៉ាឲ្យចូលស្រុក ដើម្បីបង្ហាញការខឹងសម្បារជាផ្លូវការ
ចុះផ្សាយនៅថ្ងៃ៖
វិបត្តិការទូតកំពុងតែកើតមានឡើង រវាងបារាំង និងសហរដ្ឋអាមេរិក បន្ទាប់ពីរដ្ឋាភិបាលអូស្ត្រាលី បានសម្រេចចិត្តបោះបង់ចោល កិច្ចសន្យាទិញនាវាមុជទឹកបាតសមុទ្រចំនួន១២គ្រឿងពីបារាំង ហើយងាកទៅទិញ នាវាមុជទឹកបាតសមុទ្ររបស់អាមេរិកវិញ។ លើសពីការនិយាយបាតដៃខ្នងដៃ របស់អូស្ត្រាលី បារាំងបានសម្តែងការខឹងសម្បារ ចំពោះការដែលអាមេរិក បានទៅចរចាអូសទាញអូស្ត្រាលី នៅពីក្រោយខ្នងបារាំង ទាំងដែលអាេមរិកតែងតែអះអាងជានិច្ច ថាខ្លួននិងបារាំង គឺជាសម្ព័ន្ធមិត្តអមតៈនឹងគ្នា។ កាលពីយប់ថ្ងៃសុក្រ ឈានចូលថ្ងៃសៅរ៍ ទី១៨កញ្ញានេះ រដ្ឋាភិបាលបារាំង បានសម្រេចកោះហៅឯកអគ្គរដ្ឋទូតខ្លួន ប្រចាំក្រុងវ៉ាស៊ីនតោន និងប្រចាំក្រុងកង់បេរ៉ា ឲ្យចូលស្រុកវិញ ដើម្បីជាការបង្ហាញ ភាពអាក់អន់ចិត្តជាផ្លូវការ។
ការសម្រេចចិត្តដ៏កម្រ ឆ្លើយតបនឹងភាពធ្ងន់ធ្ងរដ៏កម្រដែរ
នេះជាលើកទីមួយហើយ ដែលបារាំងកោះហៅឯកអគ្គរដ្ឋទូតខ្លួនប្រចាំនៅក្រុងវ៉ាស៊ីនតោន និងប្រចាំនៅកង់បេរ៉ា ឲ្យចូលស្រុកវិញ។ ឯករដ្ឋទូតបារាំងទាំង២ នឹងធ្វើដំណើរមកដល់បារាំងវិញ នៅថ្ងៃសោរ៍នេះ ដើម្បីទៅជួបប្រជុំជាមួយលោកប្រធានាធិបតីម៉ាក្រុង និងបន្តស្នាក់នៅក្នុងស្រុក រហូតទាល់តែមានចំណាត់ការថ្មីណាមួយទៀត ពីសំណាក់លោកប្រធានាធិបតី។
លោក Jean-Yves Le Drian រដ្ឋមន្ត្រីការបរទេសបារាំង បានបញ្ជាក់ឲ្យដឹងនៅព្រឹកថ្ងៃទី១៨កញ្ញាថា ការកោះហៅឯកអគ្គរដ្ឋទូតនេះ គឺជាការសម្រេចចិត្តដ៏ធំ និងកម្រណាស់។ តែគឺវាឆ្លើយតប ទៅនឹងភាពធ្ងន់ធ្ងរដ៏កម្រដែរ បន្ទាប់ពីអូស្ត្រាលីបានប្រកាសបោះបង់ចោលកិច្ចសន្យាទិញនាវាមុជទឹកបាតសមុទ្ររបស់បារាំងចំនួន១២គ្រឿង ដែលខ្លួនបានសន្យាតាំងតែពីឆ្នាំ២០១៦ ហើយងាកទៅចរចា ទិញនាវាមុជទឹកបាតសមុទ្រ ដើរដោយប្រព័ន្ធនុយក្លេអ៊ែរ របស់អាមេរិកវិញ។
សម្រាប់បារាំង គឺអាមេរិក បានលួចចរចាជាមួយអូស្ត្រាលីដោយសំងាត់ ពីក្រោយខ្នងបារាំង ដើម្បីឆក់ដណ្តើមយកកិច្ចសន្យាទំហំ៥ម៉ឺនលានដុល្លារនេះ។ រហូតមកទល់ពេលនេះ លោកប្រធានាធិបតីម៉ាក្រុង មិនបានថ្លែងប្រតិកម្មអ្វីជាសាធារណៈទេ។ ក៏ប៉ុន្តែបើតាមប្រភពស្និទនឹងវិមានអេលីហ៊្សេ គឺលោកម៉ាក្រុងផ្ទាល់តែម្តង ដែលកំពុងស្ថិតនៅទីក្រុងអាតែនប្រទេសក្រិក បានទូរស័ព្ទបញ្ជា ឲ្យកោះហៅឯកអគ្គរដ្ឋទូតបារាំងប្រចាំនៅវ៉ាស៊ីនតោន និងនៅកង់បេរ៉ា ឲ្យចូលស្រុកជាបន្ទាន់។ ការសម្រេចបែបនេះ គឺលោកប្រធានាធិបតីម៉ាក្រុង ចង់បង្ហាញការខឹងសម្បារ និងការអាក់អន់ចិត្តជាផ្លូវការតែម្តង ចំពោះទង្វើ បែបមើលងាយ គ្មានការគោរព ពីសំណាក់អូស្ត្រាលី និងអាមេរិក មកលើបារាំង។
អាមេរិក និងអូស្ត្រាលី នៅតែអះអាងថា បារាំងជាមិត្តល្អ
អ្នកនាំពាក្យសេតវិមានអាមេរិក បានលើកឡើងថា គេសោកស្តាយណាស់ ដែលបារាំងខឹង ហើយសម្រេចចិត្តកោះហៅឯកអគ្គរដ្ឋទូត ឲ្យចូលស្រុកវិញបែបនេះ។ តែយ៉ាងណាគេសន្យាថា គេនឹងប្រឹងប្រែង រកវិធីដើម្បីសម្រួលបញ្ហា ឲ្យត្រលប់មករកភាពប្រក្រតីវិញ។ កាលពីថ្ងៃសុក្រម្សិលមិញ លោក Jake Sullivan ទីប្រឹក្សាទទួលបន្ទុកសន្តិសុខជាតិអាេមរិក បានអញ្ជើញលោក Philippe Etienne ឯកអគ្គរដ្ឋទូតបារាំងប្រចាំក្រុងវ៉ាស៊ីនតោន ឲ្យទៅជួបនៅសេតវិមាន ដើម្បីសួរនាំពីបញ្ហា។
ប្រភពពីស្ថានទូតបារាំង ប្រចាំវ៉ាស៊ីនតោន បានឲ្យដឹងថា តាំងពីលោក បៃដិនចូលកាន់តំណែងតាំងពីខែមករាមក លោក Jake Sullivan នេះមិនដែលនឹកនា ចង់ជួបអគ្គរដ្ឋទូតបារាំងទេ ក្នុងនាមជាប្រទេសសម្ព័ន្ធមិត្ត។ ទើបតែមានបញ្ហានៅពេលនេះទេ បានអញ្ជើញឲ្យទៅជួបដល់ទៅ២ដង មិនដល់២ថ្ងៃផង។
ដោយឡែក ចំពោះអូស្ត្រាលីវិញ លោកនាយករដ្ឋមន្ត្រី Scott Morrison បានទទួលស្គាល់ថា លោកយល់ ពីផលប៉ះពាល់ដែលបង្កឡើងដោយបញ្ហានេះ រវាងបារាំងនឹងអូស្ត្រាលី។ តែលោកបានបញ្ជាក់ថា លោកធ្លាប់បានប្រាប់ទៅលោកម៉ាក្រុង តាំងតែពីខែមិថុនាម្លេះ ថាអូស្ត្រាលី ចង់ប្តូរចិត្ត រឿងកិច្ចព្រមព្រៀងទិញនាវាមុជទឹកបាតសមុទ្រ។
ហើយកាលពីថ្ងៃសុក្រម្សិលមិញ លោកស្រី Marise Payne រដ្ឋមន្ត្រីការបរទេសអូស្ត្រាលី បានថ្លែងនៅ American Enterprise Institute នៅឯក្រុងវ៉ាស៊ីនតោនថា លោកស្រីយល់យ៉ាងច្បាស់ អំពីការអាក់អន់ចិត្ត ខកបំណងរបស់បារាំង។ តែយ៉ាងណាលោកស្រីអះអាងថា បារាំងនៅតែជាដៃគូសម្ព័ន្ធមិត្តដ៏មានតម្លៃ សម្រាប់អូស្ត្រាលី។
មិត្តទ្រុសមិត្ត
តែយ៉ាងណា នៅក្នុងអារម្មណ៍ ផ្លូវចិត្តរបស់រដ្ឋាភិបាលបារាំង គឺអាេមរិក និងអូស្ត្រាលី បានក្បត់សម្ព័ន្ធមិត្តនេះទៅហើយ។ ចង់មិនចង់ ស្នាមប្រេះស្រាំ គឺមានកាន់តែធំទៅៗ ធ្វើឲ្យទំនាក់ទំនងសម្ព័ន្ធមិត្ត រវាងបារាំង និងអាមេរិក កាន់តែលែងរឹងមាំដូចមុន។ បារាំងបានសង្កេតឃើញថា រដ្ឋាភិបាលអាេមរិក ដឹកនាំដោយលោកចូ បៃដិន បច្ចុប្បន្ននេះ គឺមិនខុសគ្នាណាប៉ុន្មានទេ ពីរដ្ឋាភិបាលមុន ដែលដឹកនាំដោយលោកដូណាល់ ត្រាំដែរ។ ពោលគឺអាមេរិក និយាយបាតដៃខ្នងដៃ មាត់ថាស្រលាញ់រាប់អានបារាំងណាស់ ជាមិត្តល្អ ជាថសម្ព័ន្ធមិត្តអមតៈ តែនៅពីក្រោយខ្នង អាមេរិកធ្វើផ្សេងទៅវិញ ដើម្បីតែប្រយោជន៍សួនតួ។
លោកចូ បៃដិន ធ្លាប់បានអះអាងថា លោកនឹងលើកដំកើងពហុភាគីនិយម ពង្រឹងសម្ព័ន្ធភាពជាមួយប្រទេសដៃគូសំខាន់ៗទាំងអស់ឡើងវិញ។ តែផ្ទុយទៅវិញ លោក ចូ បៃដិន បានធ្វើឲ្យបារាំង ក៏ដូចជាប្រទេសសម្ព័ន្ធមិត្តនៅអឺរ៉ុប មានការខកចិត្តមិនច្រើនដងហើយ។ ជាក់ស្តែងបញ្ហាដកទ័ព យ៉ាងតក់ក្រហល់ពីអាហ្វហ្កានីស្ថាន ដោយគ្មានជូនដំណឹង និងពិភាក្សាជាមួយ សម្ព័ន្ធមិត្តអឺរ៉ុប សូម្បីតែមួយម៉ាត់។ ហើយទាក់ទិននឹងវិបត្តិកូវីដទៀត រហូតមកទល់ពេលនេះ អាមេរិកមិនបើកទទួលអ្នកដំណើរទៅពីអឺរ៉ុបទេ ទោះអ្នកនោះបានចាក់វ៉ាក់សាំងរួចហើយក៏ដោយ។ ហើយឥឡូវបន្ថែម ជាមួយបញ្ហា ដែលរដ្ឋាភិបាលលោកចូ បៃដិន បានលួចចរចា អូសទាញឲ្យអូស្ត្រាលីបោះបង់ចោលកិច្ចសន្យាជាមួយបារាំង ហើយងាកទៅទិញរបស់ខ្លួនវិញ។ ទង្វើទាំងអស់នេះរបស់អាេមរិក សម្រាប់បារាំង គឺគេមិនហៅថាជាមិត្តល្អទេ។
បារាំងមិនចង់ស្អប់ចិនខ្លាំងដូចអាមេរិក
នៅពីក្រោយការស៊ំគ្រលំគ្នារវាង អាមេរិក អូស្ត្រាលី និងអង់គ្លេស ទាក់ទិននឹង យុទ្ធសាស្ត្រឥណ្ឌូប៉ាស៊ីហ្វិកនេះ គឺបារាំងយល់ថា អាមេរិកចង់ទាត់បារាំងចេញ ពីតំបន់នេះតែម្តង ដោយមិនឲ្យអូស្ត្រាលីប្រើប្រាស់គ្រឿងសព្វាវុធរបស់បារាំងទេ។ យុទ្ធសាស្ត្រ AUKUS នេះ គឺអាមេរិករៀបចំឡើង ដើម្បីទប់ទល់ជាមួយនឹងឥទ្ធិពលចិន។
ដោយឡែក បារាំង ក៏ដូចជាអឺរ៉ុប បានព្យាយាម នៅឆ្ងាយ មិនចង់ក្លាយជាកូនអុក តាមតែអាមេរិក អូសទាញតាមចិត្តនោះទេ។ បារាំងជាសម្ព័ន្ធមិត្តជាមួយអាមេរិកមែន តែបារាំងមានភាពឯករាជ្យម្ចាស់ការ មិនតាមតែអាមេរិកញាក់ ឲ្យខឹងស្អប់ចិន ក៏ចេះតែធ្វើតាមដោយគ្មានការពិចារណានោះដែរ។ ត្រង់នេះហើយ ដែលអាមេរិក មិនពេញចិត្តគោលជំហរបារាំង។ គោលជំហររបស់អាមេរិក គឺថាបើអ្នកណាមិនចូលរួមសហការ ស្អប់ចិនដូចខ្លួនទេនោះ នោះគឺអាមេរិកនឹងមិនលេងចូលជាមួយ ហើយក៏មិនទុកមុខឲ្យដែរ។
យ៉ាងណាក៏ដោយ គេសង្ឃឹមថាវិបត្តិនេះ អាចនឹងមានផ្លូវដោះស្រាយគ្នា ប្រសិនបើលោក ចូ បៃដិន និងលោក ម៉ាក្រុង ទូរស័ព្ទនិយាយគ្នាដោយផ្ទាល់នៅថ្ងៃខាងមុខ។ នៅសប្តាហ៍ក្រោយ នឹងមានមហាសន្និបាទអង្គការសហប្រជាជាតិ ដោយមានវត្តមានរដ្ឋមន្ត្រីការបរទេសបារាំង និងអាមេរិកចូលរួមដែរ។ អ្នកនាំពាក្យក្រសួងការបរទេសអាមេរិកអះអាងថា គេសង្ឃឹមថានឹងអាចជួបនិយាយគ្នាជាមួយភាគីបារាំងនៅក្នុងពេលនេះ ដើម្បីបន្ធូរបន្ថយបញ្ហា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ