ហេតុអ្វីអង់គ្លេស និងអឺរ៉ុបជួបវិបត្តិថាមពលឡើងថ្លៃ នៅពេលនេះ?
ចុះផ្សាយនៅថ្ងៃ៖
ស្តាប់ - ០៨:២៦
ប្រឈមនឹងវិបត្តិខ្វះប្រេង នៅតាមស្ថានីយ៍ ជាច្រើនក្នុងប្រទេស រដ្ឋាភិបាលអង់គ្លេស បានសម្រេច កាលពីយប់ថ្ងៃចន្ទទី ២៧ កញ្ញា ថា នឹងបញ្ជូនកងទ័ពឲ្យទៅដឹកប្រេង ដើម្បី ផ្គត់ផ្គង់ តម្រូវការកើនឡើងរបស់ប្រជាជន។ ប៉ុន្មានថ្ងៃមកហើយ ប្រជាជនអង់គ្លេស បានបើកឡាន ចូលបន្តកន្ទុយគ្នា ទៅចាក់បំពេញធុងប្រេង រហូតធ្វើឲ្យស្ថានីយ៍ប្រេងជាច្រើនត្រូវស្ងួត អស់ប្រេង និងត្រូវបិទទ្វារ ជាបន្តបន្ទាប់។ នៅពេលអង់គ្លេសកំពុងជួបវិបត្តិខ្វះប្រេងនៅតាមស្ថានីយ៍ចាក់ប្រេង អង់គ្លេស និងប្រទេសជាច្រើននៅក្នុងសហភាពអឺរ៉ុប ក៏កំពុងជួបប្រទះវិបត្តិថាមពលឡើងថ្លៃ ជាពិសេស ហ្គាស។ ហេតុអ្វីបានជាប្រជាជនអង់គ្លេសសម្រុកទៅទិញសាំងនៅពេលនេះ
នៅអង់គ្លេស វិបត្តិខ្វះប្រេងនៅតាមស្ថានីយ៍កាន់តែធ្លាក់ធ្ងន់ធ្ងរ នៅថ្ងៃចន្ទ បន្ទាប់ពីប្រជាជននាំគ្នា សម្រុកទៅចាក់ប្រេងបំពេញរថយន្ត ដោយសារតែខ្លាច លែងប្រេងចាក់ តទៅទៀត។
ទាំងរដ្ឋាភិបាល និងក្រុមហ៊ុនប្រេង ធ្លាប់បានចេញមុខធានា ជាច្រើនដង ថា អង់គ្លេសមិនខ្វះខាតប្រេងនោះទេ។ រោងចក្រចម្រាញ់ប្រេងរបស់អង់គ្លេសនៅតែមានប្រេងគ្រប់គ្រាន់ សម្រាប់ការប្រើប្រាស់របស់ប្រជាជនអង់គ្លេស។ ប៉ុន្តែ ពាក្យធានារបស់រដ្ឋាភិបាល និងក្រុមហ៊ុនប្រេង មិនបានធ្វើឲ្យប្រជាជនអង់គ្លេស ឈប់ ជ្រួលច្របល់ទៅ ទិញប្រេងនោះទេ។ អ្នកខ្លះ ត្រូវគេងក្នុងរថយន្តចាំតាំងពីយប់ ឬ បើកទៅចាំ បន្តកន្ទុយរាប់ម៉ោង ព្រោះតែខ្លាចរថយន្ត គ្មានសាំង ចាក់សម្រាប់បើក ទៅធ្វើការ។
តាមសមាគមចែកចាយប្រេងនៅអង់គ្លេស តម្រូវការប្រេង ដ៏គំហុកបានធ្វើឲ្យហាងសាំង ជាង ៥ពាន់ ក្នុងចំណោម ៨ពាន់ នៅទូទាំងប្រទេសអង់គ្លេស ត្រូវជួបវិបត្តិ ខើចប្រេង ចំណែកមួយចំនួនផ្សេងទៀត ក្បែរតែនឹងស្ងួតអស់ប្រេងពីស្តុក។
ព្រឹត្តិការណ៍សម្រុកទៅទិញប្រេង ចាប់កើតមានតាំងពីពាក់កណ្តាលសប្តាហ៍មុន បន្ទាប់ពីរបាយការណ៍របស់ក្រុមហ៊ុនប្រេង អង់គ្លេស BP ផ្ញើទៅកាន់រដ្ឋាភិបាល ត្រូវបែកលេចធ្លាយថា ក្រុមហ៊ុននឹងបិទស្ថានីយ៍ចាក់ប្រេង ជាង ១០កន្លែង ដោយសារតែខ្វះប្រេង។
របាយការណ៍បែកលេចធ្លាយរបស់ក្រុមហ៊ុនប្រេង BPជារឿងមួយ។ រឿងមួយទៀត ដែលធ្វើឲ្យប្រជាជនអង់គ្លេស ប្រញាប់ប្រញាល់ ទៅចាក់ប្រេង បំពេញធុងរបស់ខ្លួននៅពេលនេះ ក៏ដោយសារតែគេខ្លាចថា ស្ថានីយ៍នឹងអាចជួបបញ្ហាខ្វះប្រេង នៅពេលដែលអង់គ្លេសកំពុងជួបវិបត្តិខ្វះ អ្នកបើករថយន្ត ធុនធ្ងន់ ដែលក្នុងនោះ មានផងដែរ រថយន្តដឹកប្រេង។ អង់គ្លេសកំពុងជួបវិបត្តិខ្វះមនុស្ស បើករថយន្តធុនធ្ងន់ ដោយសារ ម្យ៉ាង ពួកគេមួយចំនួនត្រូវចូលនិវត្តន៍ និងម្យ៉ាង ដោយសារ នយោបាយអង់គ្លេសដើរចេញពីសហភាពអឺរ៉ុប ដែលធ្វើឲ្យអង់គ្លេសត្រូវខ្វះកម្លាំងពលកម្ម មកពីបរទេស។
ខ្វះមនុស្សបើករថយន្តធុនធ្ងន់ ជារឿងសំខាន់ណាស់ សម្រាប់ធានាមិនថា ការផ្គត់ផ្គង់ប្រេង ឬ សេវា និង ទំនិញ ប្រើប្រាស់ក្នុងទឹកដីអង់គ្លេស។ ដើម្បីដោះស្រាយវិបត្តិគ្មានអ្នកបើករថយន្តធុនធ្ងន់ រដ្ឋាភិបាលអង់គ្លេសទើបបានសម្រេចផ្តល់ទិដ្ឋាការធ្វើការបណ្តោះអាសន្ន ជាង ១ម៉ឺន ដើម្បីទាក់ទាញ ជនជាតិអឺរ៉ុប ឲ្យទៅធ្វើការនៅអង់គ្លេស។ ដូចបានលើកខាងដើម ដើម្បីដោះស្រាយបញ្ហាប្រឈម គ្មានអ្នកបើករថយន្តផ្គត់ផ្គង់ប្រេង រដ្ឋាភិបាលអង់គ្លេស ត្រៀមនឹងបញ្ចេញកងទ័ព ដើម្បី អន្តរាគម ទៅដឹកប្រេង ចាក់បំពេញ តាមស្ថានីយ៍ប្រេង។
សរុបមក អង់គ្លេសជួបវិបត្តិខ្វះប្រេងលើកនេះ ក៏ដោយសារតែ អារម្មណ៍ភ័យខ្លាច ខ្វះប្រេង ដែលធ្វើប្រជាជនត្រូវសម្រុកទៅទិញប្រេងទុក ប៉ុន្តែ មិនមែនដោយសារអង់គ្លេសកំពុង ខ្វះខាតប្រេងនោះទេ។
ហេតុអ្វីបានជា ហ្គាស ឡើងថ្លៃ ខ្លាំងនៅអឺរ៉ុប?
អង់គ្លេស អាចមិនខ្វះខាតប្រេង ប៉ុន្តែ អង់គ្លេស ក៏ដូចជាប្រទេសនៅអឺរ៉ុបផ្សេងទៀត ក៏កំពុងត្រូវការប្រេង ច្រើន ដើម្បី បំពេញបង្គ្រប់ តម្រូវការថាមពល ជាពិសេស ក្នុងកាលៈទេសៈ ដែល គេកំពុងជួបវិបត្តិថាមពលឡើងថ្លៃ ដូចជា តម្លៃ ឧស្ម័នហ្គាស ជាដើម។ នៅប្រទេសបារាំង តម្លៃហ្គាសបានកើនឡើងខ្ពស់មិនធ្លាប់មាន ក្នុងរយៈពេល ២០ឆ្នាំចុងក្រោយនេះ។
នៅទឹកដីអឺរ៉ុប ឧស្ម័នហ្គាស បានឡើងថ្លៃក្រឺតៗ ក្នុងរយៈពេល១ឆ្នាំមកនេះ។ មានមូលហេតុ ច្រើនយ៉ាងដែលធ្វើឲ្យតម្លៃហ្គាស ស្រាប់តែកើនឡើង ខ្ពស់ សឹងមួយជាបួន នៅទឹកដីអឺរ៉ុប។
ហេតុផលទី១ គឺតម្រូវការ មានច្រើនជាង ការផ្គត់ផ្គង់។ តម្រូវការឧស្ម័ន បានកើនឡើងខ្លាំង នៅគ្រប់ទីកន្លែង ក្នុងពេលតែមួយ នៅក្នុងកាលៈទេសៈដែល សេដ្ឋកិច្ច ចាប់កំរើកឡើងវិញ នៅក្រោយ វិបត្តិកូវីដ។ តម្រូវការឧស្ម័ន កើនឡើង នៅអាស៊ី ជះឥទ្ធិពល អាក្រក់ ធ្វើឲ្យតម្លៃឧស្ម័នក្នុងទីផ្សារអន្តរជាតិកើនឡើង។ ម្យ៉ាងទៀត ដោយសារតែ រុស្ស៊ី និងន័រវែស ដែលជាប្រភពផ្គត់ផ្គង់ឧស្ម័ន សម្រាប់អឺរ៉ុប គ្មានសមត្ថភាព បញ្ជូនលក់ឧស្ម័នបានច្រើន ដើម្បីឆ្លើយតបតម្រូវការរបស់អឺរ៉ុប។ គេវាយតម្លៃថា រុស្ស៊ី ដែលជាប្រភពផ្គត់ផ្គង់ លក់ឧស្ម័នឲ្យអឺរ៉ុប កំពុងកេងចំណេញ យកវិបត្តិខ្វះថាមពលនៅទឹកដីអឺរ៉ុប ដើម្បីតថ្លៃ ចង់ តម្លើង តម្លៃឧស្ម័នរបស់ខ្លួន។ ជាលទ្ធផល តម្លៃឧស្ម័ននៅទឹកដីអឺរ៉ុប ក៏ត្រូវកើនឡើងក្រឺតៗ មិនព្រមធ្លាក់ចុះទាល់តែសោះ។
ហេតុផលទី២ គឺ ការស្តុកឧស្ម័នរបស់ទឹកដីអឺរ៉ុប បានធ្លាក់ចុះទាប បើប្រៀបធៀបនឹងឆ្នាំមុនៗ។ ដូច បាននិយាយ តម្រូវការឧស្ម័ននៅ ទឹកដី អឺរ៉ុបបានកើនឡើង ខ្ពស់ ក៏ដើម្បី យកទៅ បំពេញបង្រ្គប់ បន្ថែម ពីលើថាមពលដែលគេខ្វះខាត ដូចជា ប្រេង ឬ ថាមពលមិនចេះរីងស្ងួតជាដើម។ ជាក់ស្តែង នៅអង់គ្លេស ដោយសារតែ ខ្វះខ្យល់សមុទ្រ នៅរដូវក្តៅ កង្ហារយក្សខ្យល់ ដែលជាប្រភពផ្គត់ផ្គង់ ថាមពលរបស់អង់គ្លេស ត្រូវបញ្ឈរជើង មិនដំណើរការ។ បូកផ្សំនឹងការជួយជុល រោងចក្រនុយក្លេអ៊ែរផង អង់គ្លេស ត្រូវពឹងផ្អែកលើប្រេង និងឧស្ម័ន សម្រាប់ តម្រូវការសេដ្ឋកិច្ចរបស់ខ្លួន។
នៅបារាំង អេស្ប៉ាញ អាល្លឺម៉ង់ រហូតដល់អ៊ីតាលី ដែលត្រូវការឧស្ម័នសម្រាប់បង្រ្គប់បន្ថែមតម្រូវការថាមពលក្នុងស្រុក តម្លៃឧស្ម័នបានកើនឡើងខ្ពស់ ដោយសារតែ នយោបាយ កាត់បន្ថយការបញ្ចេញឧស្ម័នកាបូនិក។ ត្រូវដឹងថា ដើម្បី ជំរុញឲ្យគេប្រើប្រាស់ ថាមពលស្អាតស្អំ ដូចជាថាមពលបានមកពី ផ្ទាំងកញ្ចក់ស្រូបពន្លឺព្រះអាទិត្យ ឬកង្ហារយក្ស រដ្ឋាភិបាលនៅអឺរ៉ុប បានតម្លើង ពន្ធ សម្រាប់អ្នកដែលប្រើប្រាស់ឧស្ម័ន ប្រេង ដែលជាប្រភព បញ្ចេញឧស្ម័នកាបូនិក ដែលជាឧស្ម័នពុល ធ្វើឲ្យផែនដីឡើងកំដៅ។
ប្រេង ហ្គាសឡើងថ្លៃ ជាសញ្ញាមិនល្អនៅពេលអឺរ៉ុបឈានចូលដល់រដូវត្រជាក់
នៅពេលរដូវត្រជាក់កំពុងឈានចូលមកដល់ តម្លៃប្រេង តម្លៃហ្គាសឡើងថ្លៃ ជាសញ្ញាមិនល្អនោះទេ សម្រាប់អឺរ៉ុប និងសម្រាប់សេដ្ឋកិច្ច ជាពិសេស ហោប៉ៅ របស់ប្រជាជន។ ជាក់ស្តែងនៅបារាំង ក្រុមហ៊ុន Engie បានប្រកាសឡើងថ្លៃ ឧស្ម័ន១២% ចាប់ពីខែតុលា តទៅ។ តម្លៃប្រេង នឹងប៉ះពាល់ដោយផ្ទាល់ដល់ប្រជាជនជាង ៣លាននាក់។ នៅអេស្ប៉ាញ តម្លៃឧស្ម័នកើនឡើងខ្លាំង បានធ្វើឲ្យទំនិញឡើងថ្លៃ ខ្ពស់ជាងសមត្ថភាពទិញ របស់ប្រជាជន។
តម្លៃប្រេង ហ្គាសឡើងខ្ពស់នៅពេលនេះ ក៏អាចជាបញ្ហាចោទ សម្រាប់នយោបាយ ដើម្បីថាមពលស្អាតស្អំ ដែលមិនបំពុល មិនបញ្ចេញ ឧស្ម័នកាបូនិក ដែលធ្វើឲ្យ ផែនដីឡើងកំដៅ។ ប្រជាជននៅអឺរ៉ុប អាច ចោទប្រកាន់រដ្ឋាភិបាលរបស់ខ្លួនថា ការដែលរដ្ឋតម្លើងពន្ធ លើការប្រើប្រាស់ ប្រភពថាមពលមិនស្អាតស្អំ ដូចជា ប្រេង និងឧស្ម័ន ជាការរួមចំណែកធ្វើឲ្យតម្លៃឧស្ម័នកើនឡើង។ អ្នកនយោបាយ បារាំងមួយចំនួនបានព្រមានពីបដិវត្ត បាតុកម្មប្រឆាំង ដូចបាតុកម្មក្រុមអាវលឿងកាលពីឆ្នាំ ២០១៨ ប៉ុន្តែ ដែលមានទ្រង់ទ្រាយធំ ព្រោះថា រឿងប្រេង ឧស្ម័នឡើងថ្លៃប្រាកដណាស់ប៉ះពាល់ដំបូងគេដល់ជីវភាពរបស់ប្រជាជន។
ដើម្បីដោះស្រាយវិបត្តិប្រេង ឧស្ម័នឡើងថ្លៃ រដ្ឋាភិបាលនៅអឺរ៉ុប បានចាត់វិធានការបន្ទាន់ ក្នុងគោលដៅ សម្រាលបន្ទុករបស់ប្រជាជន។ នៅបារាំង រដ្ឋាភិបាលផ្តល់កញ្ចប់ជំនួយពិសេស រាប់ពាន់លានអឺរ៉ូ សម្រាប់ជួយប្រជាជនដែលអាចមានជីវភាពប៉ះពាល់ដោយផ្ទាល់ ដោយសារតែវិបត្តិថាមពលឡើងថ្លៃ។ នៅអេស្ប៉ាញ ដើម្បី សម្រាល បន្ទុកចំណាយរបស់ប្រជាជន រដ្ឋាភិបាលបានបញ្ចុះតម្លៃអត្រាពន្ធលើតម្លៃបន្ថែម ក្នុងវិក័យប័ត្រភ្លើង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ