អេមីរ៉ាតអារ៉ាប់រួម បើកសម្ភោធពិពណ៌សកលោក Dubai Expo-2020 ព្រឹត្តិការណ៍អន្តរជាតិធំបំផុត លើកទី១ក្នុងបរិបទកូវីដ១៩
ចុះផ្សាយនៅថ្ងៃ៖
ស្តាប់ - ០៧:៣៤
នៅថ្ងៃសុក្រ ទី១តុលា នៅទីក្រុងឌូបៃ ប្រទេសអេមីរ៉ាតអារ៉ាប់រួម មានបើកសម្ភោធកម្មវិធីតាំងពិពណ៌សកលលោក Dubai Expo-2020។ គ្រោងធ្វើកាលពីឆ្នាំមុន កម្មវិធីដ៏ធំមហិមានេះ ត្រូវបានលើក មកធ្វើនៅពេលនេះ ដោយសារតែបញ្ហាជំងឺឆ្លងកូវីដ១៩។ យ៉ាងណា នេះគឺជាកម្មវិធីអន្តរជាតិដ៏ធំបំផុត ដែលត្រូវបានចាប់ផ្តើមរៀបចំឡើងវិញ ហើយដែលមានគេរំពឹងថានឹងមានមនុស្សចូលរួមច្រើន បន្ទាប់ពីពិពភពលោកយើង បានពើបប្រទះនឹងបញ្ហាជំងឺឆ្លងកូវីដ១៩ ប្រមាណជាង២ឆ្នាំមកនេះ។ ហើយវាក៏ជាលើកទីមួយផងដែរ សម្រាប់ ប្រទេសអេមីរ៉ាតអារ៉ាប់រួម និងសម្រាប់បណ្តាប្រទេសពិភពអារ៉ាប់ទាំងមូលតែម្តង ដែលបានទទួលរៀបចំកម្មវិធីដ៏ធំមហិមានេះ។
រយៈពេល៦ខែ រំពឹងមានមនុស្សទស្សនា ២៥លាននាក់
កម្មវិធី Dubai Expo-2020 ត្រូវបានគេគ្រោងធ្វើនៅឆ្នាំមុន តែដោយសារតែកូវីដ គេបានលើកមកធ្វើនៅពេលនេះ។ កម្មវិធីនេះ អាចចាត់ទុកបានថា ជាកម្មវិធីតាំងពិព៌ណដ៏ធំបំផុត ក្នុងពិភពលោក ដែលត្រូវគេរៀបចំរៀងរាល់៥ឆ្នាំម្តង ។ ឆ្នាំ២០១៥ គឺធ្វើនៅទីក្រុងមីឡង់ ប្រទេសអ៊ីតាលី លើកនេះ គឺទីក្រុងឌូបៃ ប្រទេសអេមីរ៉ាតអារ៉ាប់រួម ដែលត្រូវបានគេជ្រើសរើសឲ្យរៀបចំ ហើយនៅឆ្នាំ២០២៥ គឺទីក្រុងអូសាកា ប្រទេសជប៉ុន។
ពិធីបើកសម្ភោធនៅថ្ងៃទី១តុលា គឺត្រូវបានប្រកាសដោយ ព្រះអង្គម្ចាស់រាជទាយាទឌូបៃ Cheikh Hamdane ben Mohammed ដែលបានថ្លែងថា ពិភពលោកទាំងមូល បានមកជួបជុំគ្នានៅអេមៀរ៉ាតអារ៉ាប់រួម។ គេបានសាងសង់អាគារ ប៉មរាងមូលដ៏ធំស្កឹមស្កៃ យ៉ាងទំនើប និងយកលំនាំតាមស្ថាបត្យកម្មអ៊ីស្លាម ដើម្បីប្រារព្ធកម្មវិធីនេះ។ ក្រៅពីតារាល្បីល្បីរបស់អេមីរ៉ាតអារ៉ាប់រួម កម្មវិធីបើកសម្ពោធដ៏អធិកអធមនេះ មានការចូលរួម ពីតារាចម្រៀងស្រីអង់គ្លេស Ellie Goulding កំពូលតារាចម្រៀងតេន័រអូប៉េរ៉ា ជនជាតិអ៊ីតាលី Andrea Bocelli និងកំពូលតន្ត្រីករលេងព្យ៉ាណូ Lang Lang ថែមទៀតផង។
កាលពីកីឡាអូឡាំពិកនៅតូក្យូ ខែកក្កដា-សីហាកន្លងទៅ រដ្ឋភិបាលជប៉ុន បានរៀបចំដោយបិទទ្វារ មិនឲ្យមានទស្សនិកជនចូលទៅមើលទេ ព្រោះខ្លាចបញ្ហាឆ្លងរាលដាលកូវីដ។ តែសម្រាប់កម្មវិធីតាំងពិពណ៌ Dubai Expo-2020 នេះ គឺអាជ្ញាធរឌូបៃ បើកទ្វារស្វាគមន៍ភ្ញៀវទាំងអស់ ដែលបានចាក់វ៉ាក់សាំងហើយ ឬដែលមានលទ្ធផលតេស្តអវិជ្ជមានជាដើម។ សម្រាប់កម្មវិធីដែលនឹងមានរយៈពេល៦ខែនេះ ការរៀបចំទាំងស្រុង ត្រូវបានចំណាយប្រាក់ប្រមាណ ៧ពាន់លានដុល្លារ ហើយគេរំពឹងថា នឹងមានមនុស្សទៅទស្សនា ប្រមាណ២៥លាននាក់ ចាប់ពីពេលនេះ រហូតដល់បិទកម្មវិធី។
ដូច្នេះ វាគឺជាកម្មវិធីអន្តរជាតិ ដ៏ធំណាស់ ដែលគេបានរៀបចំជាលើកទី១ បន្ទាប់ពីពិភពលោកយើង បានឆ្លងកាត់វិបត្តិកូវីដ១៩។ លើកទី១ក្នុងបរិបទកូវីដ លើកទី១សម្រាប់ប្រទេសអេមីរ៉ាតអារ៉ាប់រួម ហើយជាលើកទីមួយសម្រាប់ប្រទេសអារ៉ាប់នៅក្នុងតំបន់នេះទៀត។
បច្ចេកវិទ្យាបម្រើដល់ការរីកចម្រើន និងសុខមាលភាពរបស់មនុស្សលោក
ជាទូទៅ កម្មវិធីពិពណ៌សលកលោក គឺគេត្រូវតែតាំងអ្វី ដែលបង្ហាញអំពី ការរីកចម្រើន ដែលមានអត្ថប្រយោជន៍ ដល់មនុស្សជាតិ ហើយឆ្លើយតបទៅនឹងរបត់សង្គម បច្ចុប្បន្ននិងអនាគត លើកកំពស់ចំណេះដឹង និងសុខមាលភាព មិនថាផ្នែកស្ថាបត្យកម្ម បច្ចេកវិទ្យា វិទ្យាសាស្ត្រទំនើបជាដើម ។ ប្រទេសនីមួយៗ ដែលចូលរួមក្នុងកម្មវិធីនេះ គឺគេបានសាងសង់ ប៉ាវីយ៉ុង ឬហៅថាអាគារវិមានមួយរបស់គេ ដែលឆ្លុះបញ្ចាំង ពីការរីកចម្រើន និងរបត់គំនិតរបស់គេ។
សម្រាប់ឆ្នាំនេះ ចិនគេបានអួតថា ប៉ាវីយ៉ុងគេ ធំស្កឹមស្កៃ និងល្អអស្ចារ្យលើសគេ ដែលមានរូបរាង្គ ជាចង្កៀងគោមបុរាណចិន តែត្រូវបានសាងសង់ឡើងដោយសម្ភារៈទំនើប។ ក្នុងឱកាសនេះ ចិនក៏មានបង្ហាញនូវ រ៉ូបូបង់ដា របស់ខ្លួនដែរ។ នៅប៉ាវីយ៉ុង អេស្ប៉ាញវិញ អ្វីដែលគេចាប់អារម្មណ៍បំផុតនោះ គឺយានធ្វើដំណើរដ៏ទំនើន ឈ្មោះ Hyperloop ដែលបំណាក់ដោយកង្ហាររ៉េអាក់ទ័រ ដូចរ៉េអាក់ទ័រយន្តហោះ។ ប្រទេសម៉ារ៉ុកវិញ បានសាងសង់ប៉ាវីយ៉ុង របស់ខ្លួន ដោយប្រើដីសុទ្ធតែម្តង ដើម្បីបញ្ជាក់ពីហេតុផលបរិស្ថានធម្មជាតិ។
ដោយឡែក ប្រទេសហូឡង់វិញ គេបានសាងសង់អាគារប៉ាវីយ៉ុងរបស់គេ មានទម្រង់ជាពីរ៉ាមីដ គ្របដណ្តប់ដោយរុក្ខជាតិ ដំណាំដែលអាចបរិភោគបាន ហើយដោយមានបណ្តាញទឹកហូរស្រោចស្រព បានមកពីទឹកភ្លៀងដែលគេច្នៃចេញពីចំហាយនៃកំដៅព្រះអាទិត្យ។ របត់នៃគំនិតស្ថាបត្យកម្មថ្មី ដែលគួបផ្សំបញ្ចូលគ្នា រវាងបច្ចេកទេសទំនើប ដោយគោរពធម្មជាតិ រុក្ខជាតិ ទឹក ពន្លឺ ខ្យល់បរិសុទ្ធជាដើមនេះ គឺជាជំនាញរបស់ប្រទេសហូឡង់ហើយ។
មហិច្ឆិតាកសាងមុខមាត់ របស់អេមីរ៉ាតអារ៉ាប់រួម
ក្នុងនាមប្រទេសអារ៉ាប់ដ៏តូចមួយ មានប្រជាជនប្រមាណតែ១០លាននាក់ តែអេមីរ៉ាតអារ៉ាប់រួម មានមហិច្ឆិតាកសាងមុខមាត់ខ្លាំងណាស់ នៅលើឆាកអន្តរជាតិ តាមរយៈការរៀបចំកម្មវិធីធំៗ ការតាំងពិពណ៌ វេទនិងទិការអន្តរជាតិនានា។ ប្រទេសមហាសេដ្ឋីប្រេងនេះ ចំណាយប្រាក់រាប់ពាន់លាន ដោយឥតស្តាយទេ ដើម្បីកសាងមុខមាត់ ទាក់ទាញការស្ងើចសរសើរ ពីអ្នកទេសចរណ៍ និងជាពិសេសនោះគឺអ្នកវិនយោគតែម្តង។ វាក៏ជាផ្នែកមួយ នៃនយោបាយការទូតរបស់អេមីរ៉ាតអារ៉ាប់រួមដែរ។
ជាដែនដី មានតែវាលខ្សាច់ល្ហរល្ហេវ តែគេបានចំណាយប្រាក់ដ៏សន្ធឹកសន្ធាប់ ដើម្បីកសាងទីក្រុងទំនើប អាគារខ្ពស់ស្កឹមស្កៃ ដូចជានៅទីក្រុងអាប៊ូដាប៊ី និង ឌូបៃនេះជាដើម។ ភាពទំនើបអស្ចារ្យទាំងនេះ គឺចិញ្ចឹមគំនិតមោទនភាពជាតិ និងឯកភាពជាតិរបស់ប្រទេសនេះផងដែរ ព្រោះជាប្រទេសតូច តែផ្សំឡើងដោយ ក្រុមនិងដែនដីចំនួន៧ផ្សេងៗគ្នា។ យ៉ាងណាមិញ នៅខែធ្នូខាងមុខនេះ កម្មវិធីតាំងពិពណ៌នេះ វាគាប់ជួន ជាមួយការប្រារព្ធខួប៥០ឆ្នាំ នៃការបង្រួបបង្រួមដែនដីទាំង៧ ដើម្បីបង្កើតជារដ្ឋសហព័ន្ធ អេមីរ៉ាតអារ៉ាប់រួមផងដែរ។
សភាអឺរ៉ុប និងអង្គការសិទ្ធិមនុស្សអំពាវនាវ ឲ្យធ្វើពហិកា Dubai Expo-2020
តែយ៉ាងណា អេមីរ៉ាតអារ៉ាប់រួម ត្រូវគេរិះគន់ច្រើនណាស់ ដោយសារតែបញ្ហាសិទ្ធិមនុស្ស។ ការបំបិទសិទ្ធិស្ត្រី ការកៀបសង្កត់សិទ្ធិសេរីភាពបញ្ចេញមតិ ហាមឃាត់ការរិះគន់ផ្សេងៗ គឺជាហេតុផលត្រួសៗ ដែលអង្គការសមាគមន៍ការពារសិទ្ធិមនុស្សបានលើកឡើង។ បន្ថែមពីនេះទៀត គឺបញ្ហាលក្ខខណ្ឌការងារ របស់ពលករ កម្មករបរទេស ដែលទៅធ្វើការស៊ីឈ្នួល ក្នុងប្រទេសនេះ ភាគច្រើនផ្នែកវិស័យសំណង់តែម្តង។ មានរបាយការណ៍ច្រើនណាស់ ដែលលើកឡើងពីការជិះជាន់កម្លាំងពលកម្ម ការរំលោភសិទ្ធិរបស់ពលករទាំងនោះ ដែលភាគច្រើនមកពីប៉ាគីស្ថាន ឥណ្ឌា បង់ក្លាដែស និងប្រទេសអាស៊ីអាគ្នេយ៍យើងខ្លះទៀតផង។
នៅពីក្រោយភាពស្កឹមស្កៃ ហ៊ឺហារអស្ចារ្យ នៃទីក្រុងឌូបៃ អាប៊ីដាប៊ីនេះ គឺវាមានបង្កប់ដោយកម្លាំងញើសឈាមពលករ កម្មករបរទេស ដែលត្រូវគេជិះជាន់កម្លាំងពលកម្ម និងមានករណីគ្រោះថ្នាក់ស្លាប់ជាហូរហែរ ដោយគ្មានសំណងជំងឺចិត្តត្រឹមត្រូវទេ។ ដោយហេតុនេះហើយ បានជាអង្គការសិទ្ធិមនុស្សបានអំពាវនាវ ឲ្យធ្វើពហិការកម្មវិធីពិពណ៌នៅក្រុងឌូបៃនេះ។ សភាអឺរ៉ុបកាលពីពាក់កណ្តាលខែកញ្ញានេះ ក៏បានចេញសេចក្តីអំពាវនាវមួយដែរ ប្រាប់ទៅប្រទេសអឺរ៉ុបថា មិនត្រូវទៅចូលរួមកម្មវិធីនេះទេ។ តែយ៉ាងណា គ្មានប្រទេសណាធ្វើតាមទេ ព្រោះថាម្នាក់ៗគេឆក់ឱកាសនេះ ដើម្បីទៅផ្សព្វផ្សាយឃោសនា ពីប្រទេសគេ និងភាពអស្ចារ្យរបស់ប្រទេសគេដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ