ស្តេច ប្រមុខរដ្ឋាភិបាល អ្នកនយោបាយ និងតារាច្រើនរូប ជាប់ក្នុងរឿងអាស្រូវគេចពន្ធ « Pandora Papers »
ចុះផ្សាយនៅថ្ងៃ៖
ស្តាប់ - ០៦:៥៦
ថ្ងៃចន្ទ ទី៤តុលា សម្ព័ន្ធអ្នកកាសែតស៊ើបអង្កេតអន្តរជាតិ (ICIJ) ទើបតែបានចេញរបាយការណ៍ថ្មីមួយទៀត ដែលមានឈ្មោះថា « Pandora Papers » ។ វាគឺជាសំណុំរឿងអាស្រូវដ៏ធំ ដែលបានបង្ហាញឲ្យឃើញ ឈ្មោះប្រមុខរដ្ឋ ប្រមុខរដ្ឋាភិបាល អ្នកនយោបាយ និងតារាជាច្រើននាក់ ដែលបានប្រើប្រាស់សេវាហិរញ្ញវត្ថុ នៅក្រៅប្រទេស ដើម្បីទិញអចលនទ្រព្យ ឬលាក់ទ្រព្យសម្បត្តិមហាសាលរបស់ខ្លួន និងដោយគេចមិនបង់ពន្ធត្រឹមត្រូវជូនរដ្ឋ។
ឯកសារជិត១២លានច្បាប់ ក្រុមហ៊ុនoffshore ប្រមាណ២៩០០០
« Pandora Papers » គឺជាលទ្ធផលនៃការស៊ើបអង្កេត របស់អ្នកកាសែតប្រមាណ៦០០នាក់ នៅទូទាំងពិភពលោក ដែលជាសមាជិក នៃក្រុមសម្ព័ន្ធអ្នកកាសែតស៊ើបអង្កេតអន្តរជាតិ International Consortium of Investigative Journalistes (ICIJ)។ គេបានប្រមូលឯកសារ ប្រមាណជា ១១លាន៩សែនច្បាប់បានមកពីក្រុមហ៊ុនផ្តល់សេវាកម្មហិរញ្ញវត្ថុចំនួន១៤។ ឯកសារទាំងនេះ បានបង្ហាញ ឲ្យឃើញក្រុមហ៊ុន offshores ចំនួនជាង២៩០០០ក្រុមហ៊ុន។
ក្រុមហ៊ុន offshores គឺជាប្រភេទក្រុមហ៊ុនដែលគេបង្កើត នៅតាមប្រទេស ឬដែនដីកោះមួយចំនួន ដែលមានច្បាប់ពន្ធដាធូររលុង ហើយជាក្រុមហ៊ុនដែលមានតែឈ្មោះ តែគ្មានសកម្មភាពពាណិជ្ជកម្មអ្វីទាំងអស់។ គេធ្វើបែបនេះ ដើម្បីយកឈ្មោះក្រុមហ៊ុនទាំងនោះ ទៅទិញ ឬក៏ផ្ទេរទ្រព្យសម្បត្តិ អចលទ្រព្យ និងភាគហ៊ុនផ្សេងៗ ព្រោះថាគេអាចធ្វើដោយស្ងាត់ៗ គ្មាននរណាដឹងថា អ្នកណានៅពីក្រោយ ជាម្ចាស់ទ្រព្យសម្បតិ្តទាំងនោះទេ។ អ្វីដែលចំណេញមួយទៀត គឺចំណេញមិនបង់ពន្ធ ទៅឲ្យប្រទេសដែលម្ចាស់ទ្រព្យទាំងនោះ មានអាស័យដ្ឋានរស់នៅ។
រឿងអាស្រូវ « Pandora Papers » បានរំលេចឲ្យឃើញនូវទំហំទ្រព្យសម្បត្តិមហាសាល ដែលគ្មានប្រភពច្បាស់លាស់ របស់មេដឹកនាំ អ្នកនយោបាយមួយចំនួន និងជាពិសេសនោះ គឺការ លាក់លៀមបែបស្ងាត់ៗ បន្លំគេចវេសមិនប្រកាសពន្ធ មិនបង់ពន្ធតែម្តង។
មានឈ្មោះមេដឹកនាំ និងអ្នកនយោបាយជាង៣០០នាក់
យ៉ាងហោចណាស់ មានមេដឹកនាំប្រទេស និងអតីតមេដឹកនាំ ចំនួន៣៥នាក់ ព្រមទាំងអ្នកនយោបាយ ជាង៣៣០នាក់ទៀត រួមទាំងតារាល្បី និងមេបណ្តាញឧក្រិដ្ឋកម្មផងដែរ ដែលមានជាប់ឈ្មោះ នៅក្នុងរឿងអាស្រូវ « Pandora Papers » នេះ។
ជាក់ស្តែង ព្រះចៅ អាប់ដាឡា ទី២ ស្តេចប្រទេសហ្សកដានី។ យោងតាមរបាយការណ៍នេះ ព្រះចៅអាប់ដាឡាទី២ បានទិញអលនទ្រព្យ តម្លៃសរុបដល់ទៅ១០៦លានដុល្លារ នៅសហរដ្ឋអាមេរិក និងនៅអង់គ្លេស ដោយប្រើប្រាស់ឈ្មោះក្រុមហ៊ុន offshore។ មេធាវី របស់ព្រះចៅអាប់ដាឡា បានអះអាងប្រាប់ទូរទស្សន៍ BBC ថាប្រាក់នេះគឺជាទ្រព្យផ្ទាល់ខ្លួនរបស់ព្រះអង្គ ហើយការប្រើប្រាស់ឈ្មោះក្រុមហ៊ុនស្រមោលបែបនេះ គឺដើម្បីគ្រាន់តែដើម្បីរក្សាសន្តិសុខ និងការសម្ងាត់តែប៉ុណ្ណោះ។
លោក Andrej Babis នាយករដ្ឋមន្ត្រីសារធារណរដ្ឋឆេក តាមរយៈក្រុមហ៊ុនស្រមោល បានទិញ ប្រាសាទបុរាណមួយកន្លែង ឈ្មោះ château Bigaud ស្ថិតនៅភាគខាងត្បូងប្រទេសបារាំង ក្នុងតម្លៃ២២លានដុល្លារ នៅឆ្នាំ២០០៩។ ទ្រព្យសម្បត្តិដ៏មានតម្លៃនេះ លោកមិនបានប្រកាសឲ្យគេដឹងទេ នៅពេលលោកឈរឈ្មោះឆ្នោត។ រឿងអាស្រូវ « Pandora Papers » ត្រូវបានលោកនាយករដ្ឋមន្ត្រី Andrej Babis ចាត់ទុកថា គឺជាចេតនានយោបាយ របស់ក្រុមប្រឆាំង ខណៈដែលការបោះឆ្នោតសភាអាណត្តិថ្មី នឹងរៀបចំធ្វើនៅចុងសប្តាហ៍នេះ។
លោកអតីតនាយករដ្ឋមន្ត្រីអង់គ្លេស Tony Blair និងភរិយាក៏មានឈ្មោះដែរ ដោយបានទិញក្រុមហ៊ុនoffshore មួយនៅឆ្នាំ២០១៧ ដើម្បីបានក្លាយជាម្ចាស់កម្មសិទ្ធិ លើអាគារ៤ជាន់មួយកន្លែងនៅក្នុងទីក្រុងឡុងដ៍។ ធ្វើបែបនេះ លោក Tony Blair ចំណេញមិនបាច់បង់ពន្ធជូនរដ្ឋអង់គ្លេស ចំនួនដល់ទៅ៤សែនដុល្លារ។ លោកប្រធានាធិបតីប្រទេសកេនយ៉ា ព្រមទាំងក្រុមគ្រួសារ ក៏ជាប់ឈ្មោះដែរ ដោយបានផ្ទេរប្រាក់ចំនួនយ៉ាងហោច៣០លានដុល្លារ ទៅកាន់ក្រុមហ៊ុន offshore ជាច្រើន នៅតាមដែនកោះនាយសមុទ្រ។
ចំណែក កូនប្រុសលោក Ilham Aliev ប្រធានាធិបតីអាស៊ែរបៃហ្សង់ អាយុទើបតែ១១ឆ្នាំ តែមានឈ្មោះទិញអាគារមួយនៅទីក្រុងឡុងដ៍ តម្លៃ៤៥លានដុល្លារ។ លោក Dominique Strauss-Kahn អតីតប្រធានមូលនិធិរូបិយវត្ថុអន្តរជាតិ តារាចម្រៀងនាង Shakira ព្រមទាំងសមាជិកក្រុមគ្រួសារ លោកនាយករដ្ឋមន្ត្រីប៉ាគីស្ថាន Imran Khan និងមនុស្សស្និទនឹងលោក ប្រធានាធិបតីពូទីនខ្លះផង។
អ្នកប្រកាសថាចង់ប្រឆាំងអំពើពុករលួយ តែធ្វើទង្វើនេះខ្លួនឯង
នេះមិនមែនជាលើកទី១ទេ ដែលក្រុមសម្ព័ន្ធអ្នកកាសែតស៊ើបអង្កេតអន្តរជាតិ (ICIJ) បានទំលាយឯកសារអំពីសកម្មភាពគេចពន្ធ និងការលាក់ទ្រព្យសម្បត្តិរបស់អ្នកនយោបាយ អ្នកមានអំណាច និងតារាជាដើមនេះ។ ICIJ បានទំលាយរឿងអាស្រូវ ទាក់ទិននឹងសកម្មភាពគេចពន្ធនេះ តាំងតែពីឆ្នាំ២០១៣មកម្លេះ។ របាយការណ៍ "Panama Papers » នៅឆ្នាំ២០១៦ បានធ្វើឲ្យរញ្ជួយកក្រើកទូទាំងពិភពលោកតែម្តង។ រឿងអាស្រូវគេចពន្ធនេះ បានធ្វើឲ្យនាយករដ្ឋមន្ត្រីអ៊ីស្លង់ Sigmundur David Gunnlaugsson និងលោកនាយករដ្ឋមន្ត្រីប៉ាគីស្ថាន Nawaz Sharif កាលពីជំនាន់នោះ លាចុះពីតំណែងដោយភាពអាម៉ាស។ ក្រោយមកទៀត មាន "Paradise Papers » នៅឆ្នាំ២០១៧ ដែលក្នុងនោះមានឈ្មោះព្រះអង្គម្ចាស់ Charles និងក្រុមហ៊ុន Nike ជាដើម ដែលបានរៀបផែនការគេចមិនបង់ពន្ធ។
សម្រាប់ករណី « Pandora Papers » នេះ ICIJ បានអះអាងថា គេបានរកឃើញទំនាក់ទំនង រវាងក្រុមហ៊ុន offshore ជាមួយនឹងអ្នកដឹកនាំជាតិ និងអ្នកនយោបាយចំនួនយ៉ាងហោច ជាង៣០០នាក់។ ក្រុមហ៊ុនស្រមោលចំនួនជិត ១០០០ក្រុមហ៊ុន ត្រូវបានគេបង្កើត ចុះបញ្ជីរដើម្បីលាក់លុយ ផ្ទេរលុយ ឬទិញទ្រព្យសម្បត្តិនានា ដោយសម្ងាត់ សម្រាប់អ្នកនយោបាយទាំងនោះ។ លោក Gerard Ryle អគ្គនាយក ICIJ បានលើកឡើងថា តើឲ្យគេសង្ឃឹម ថាការប្រយុទ្ធប្រឆាំងនឹងសកម្មភាពគេចពន្ធ អាចបានជោគជ័យម្តេចនឹងកើត បើថ្នាក់ដឹកនាំប្រទេស អ្នកនយោបាយ ដែលត្រូវមានតួនាទីធ្វើកិច្ចការនេះ បែជាបានចូលរួមធ្វើសកម្មភាពគេចពន្ធ លាក់ទ្រព្យសម្បតិ្តរបៀបនេះដែរនោះ។ វាមិនមែនជាប្រាក់បន្តិចបន្តួចទេ តែមានចំនួន រាប់ម៉ឺនលានដុល្លារឯណោះ។
លោកស្រី Maira Martini អ្នកស្រាវជ្រាវនៅ អង្គការ Transparency International បានលើកឡើងថា របាយការណ៍ « Pandora Papers » បានបញ្ជាក់ជាថ្មីម្តងទៀតថា បណ្តាញក្រុមហ៊ុន offshore ដ៏ស្អេកស្កះ នៅតាមប្រទេសឬដែនដីកោះមួយចំនួន គឺជាឧបករណ៍ល្បែងកំសាន្ត នៃសកម្មភាពពុករលួយ បណ្តាញឧក្រិដ្ឋកម្មហិរញ្ញវត្ថុ លាក់ទ្រព្យសម្បត្តិ លាងលុយក្រខ្វក់ និង ការគេចវេសមិនបង់ពន្ធ ប្រឆាំងនឹងប្រព័ន្ធយុត្តិធម៌ជាតិនិងអន្តរជាតិ។ លោកស្រីបន្ថែមថា គម្រូសេដ្ឋកិច្ច ដែលផ្អែកលើការសម្ងាត់ហិរញ្ញវត្ថុបែបនេះ គឺដល់ពេលដែលត្រូវបិទបញ្ចប់ហើយ។ សហគមន៍អន្តរជាតិ ត្រូវតែរួមគ្នា កសាង ពង្រឹងតម្លាភាព ដើម្បីលុបបំបាត់អំពើពុករលួយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ