អ៊ីរ៉ាក់រៀបចំការបោះឆ្នោត ទាំងគ្មានសង្ឃឹមថា នឹងមានការផ្លាស់ប្តូរ
ចុះផ្សាយនៅថ្ងៃ៖
ស្តាប់ - ០៨:០១
ប្រជាជនអ៊ីរ៉ាក់ប្រមាណ ២០លាននាក់ បានចាប់ផ្តើមទៅបោះឆ្នោត នៅថ្ងៃអាទិត្យទី ១០តុលា ២០២១ ដើម្បី ជ្រើសរើសអ្នកតំណាងរាស្ត្រ នៅរដ្ឋសភាអ៊ីរ៉ាក់។ បេក្ខជន ជាង ៣២០០នាក់ មកពីគណបក្ស យ៉ាងតិច ១៦៧គណបក្សត្រូវប្រកួតប្រជែងគ្នាដើម្បីដណ្តើមអាសនៈ ចំនួន ៣២៩ នៅរដ្ឋសភា។ នៅពេលការបោះឆ្នោត ត្រូវបានរៀបចំឡើង មុនកាលកំណត់ ពោលគឺទៅតាមការទាមទារចង់បានរបស់បាតុករអ៊ីរ៉ាក់ ដែលរងការបង្រ្កាបដ៏ហិង្សា កាលពីដើមឆ្នាំ ២០១៩ គេមិនសង្ឃឹមថា ការបោះឆ្នោតនៅថ្ងៃអាទិត្យ នឹងធ្វើឲ្យរបបនយោបាយនៅអ៊ីរ៉ាក់ មានការផ្លាស់ប្តូរច្រើននោះទេ។
អ៊ីរ៉ាក់បានរៀបចំការបោះឆ្នោតមុនកាលកំណត់ ទៅតាមការទាមទារចង់បានរបស់ប្រជាជនអ៊ីរ៉ាក់ ដែលបានធ្វើបាតុកម្មប្រឆាំង រដ្ឋាភិបាល កាលពីឆ្នាំ ២០១៩ ដើម្បីទាមទារឲ្យមានការការផ្លាស់ប្តូរ ប្រព័ន្ធនយោបាយ នៅអ៊ីរ៉ាក់។
ដោយ រៀបចំការបោះឆ្នោតសភា មុនកាលកំណត់ និងបង្កើតច្បាប់បោះឆ្នោតថ្មី ដែលបានបង្កើនចំនួនមណ្ឌលបោះឆ្នោតថ្មី ដើម្បីលើកទឹកចិត្តឲ្យមានការចូលរួមពីបេក្ខជនឯករាជ្យ អាជ្ញាធរអ៊ីរ៉ាក់ចង់បង្ហាញជាលើកទី១ ថា ខ្លួនបានធ្វើសម្បទាននយោបាយ សម្រាប់ឆ្លើយតបទៅតាមការចង់បានរបស់បាតុករ អ៊ីរ៉ាក់ ដែលបានធ្វើបាតុកម្ម ប្រឆាំងរដ្ឋាភិបាលអស់ រាប់ខែ កាលពីដើមឆ្នាំ ២០១៩។
នៅក្នុងមហាបាតុកម្ម ជាទីដែលការបង្រ្កាបដ៏ហិង្សា របស់ប៉ូលិសនិងយោធាអ៊ីរ៉ាក់ បានសម្លាប់ជីវិតមនុស្ស ជាង ៦០០នាក់ និងរបួស យ៉ាងតិច ៣ម៉ឺននាក់ កាលពីដើមឆ្នាំ ២០១៩ បាតុករធ្លាប់បានស្រែកបរិហារ រិះគន់អំពើពុករលួយ អសមត្ថភាពរបស់រដ្ឋាភិបាល និងបានទាមទារឲ្យមានការផ្លាស់ប្តូរទាំងស្រុង ប្រព័ន្ធនយោបាយ ដែលបានអនុញ្ញាតឲ្យគណបក្សដដែលៗ នៅកាន់អំណាចនៅអ៊ីរ៉ាក់។
ទោះរដ្ឋាភិបាលសម្រេចរៀបចំការបោះឆ្នោតមុនកាលកំណត់ ប៉ុន្តែ គេមិនសង្ឃឹមថា នឹងមានការផ្លាស់ប្តូរធំដុំនៅក្នុងទិដ្ឋភាពនយោបាយនៅអ៊ីរ៉ាក់។ ជាការពិត ការបង្កើតច្បាប់បោះឆ្នោតថ្មី បានជំរុញឲ្យកើតមានគណបក្សឯករាជ្យថ្មី ដែលមានស្ថាបនិកជាសកម្មជនដែលបានចូលរួមក្នុងបាតុកម្មប្រឆាំងរដ្ឋាភិបាល កាលពីឆ្នាំ ២០១៩។ ប៉ុន្តែ យ៉ាងណាក៏ដោយ ចំនួនគណបក្សថ្មីថ្មោងនេះតែតិចតួច មានធនធានថវិកាតិចតួច មិនអាចទៅប្រកួតប្រជែង ជាមួយគណបក្សធំៗ ដែលបុកគ្រឹះកាន់អំណាច រាប់ឆ្នាំ មកហើយនោះទេ។ មានខ្សត់ខ្សោយ សកម្មជននយោបាយឯករាជ្យទាំងនោះ នៅរងការយាយី ប៉ុនប៉ងសម្លាប់ គំរាមកំហែង អសន្តិសុខជាប់ជាប្រចាំ ពីសំណាក់ក្រុមប្រដាប់អាវុធ ដែលគាំទ្រគណបក្សកាន់អំណាច។ ម្យ៉ាង នៅក្នុងចំណោមសកម្មជនដែលប្រឆាំងរដ្ឋាភិបាលទៀតសោត ក៏មានការបែកបាក់គ្នា ព្រោះថា ថ្នាក់ដឹកនាំរបស់ពួកគេមួយចំនួនបានអំពាវនាវឲ្យគេធ្វើពហិការ កុំទៅបោះឆ្នោត នៅថ្ងៃនេះ ដោយសារ គេដឹងហើយថា ទោះយ៉ាងណា ក៏នៅតែមិនអាចឈ្នះ គណបក្សកាន់អំណាច ដែលមានទាំងទាហាន និងលុយ ដែលបានមកពី អំពើពុករលួយ នោះទេ។
គណបក្សចលនាSadriste ដែលមានមេដឹកនាំ ឈ្មោះ ម៉ូតាដា អាល់ សាដ្រ មកពីនិកាយឈីអ៊ីត ធ្លាប់ឈ្នះឆ្នោត ដាច់គេ នៅឆ្នាំ ២០១៨ ត្រូវបានគេរំពឹងថា នឹងអាចទទួលជ័យជំនះដូចមុន។ គណបក្សមួយនេះ ដែលជាអ្នកជ្រើសរើសនាយករដ្ឋមន្រ្តីអ៊ីរ៉ាក់សព្វថ្ងៃ បានបង្កើតយុទ្ធសាស្រ្ត ដើម្បីសម្របខ្លួនទៅតាមកាលៈទេសៈ ដោយបានតែងតាំងយុវជន មនុស្សថ្មី សម្រាប់តំណែងអ្នកតំណាងរាស្រ្ត ក្នុងបំណងបង្ហាញថា គណបក្ស សមាជិកមុខមាត់ថ្មីដែលយល់ពីតម្រូវការចង់បានរបស់យុវជនអ៊ីរ៉ាក់ ដែលតំណាងឲ្យ៤០ភាគរយ នៃប្រជាជនអ៊ីរ៉ាក់សរុប ជាង ៤០លាននាក់។ យុវជនអ៊ីរ៉ាក់ ដែលចូលរួមធ្វើបាតុកម្មប្រឆាំងកន្លងមក ដើម្បី បរិហារ ភាពក្រីក្រ អយុត្តិធម៌ និងភាពគ្មានការងារធ្វើ។ ជារួម គណបក្សកាន់អំណាចនៅអ៊ីរ៉ាក់ អាចផ្លាស់ប្តូរ មុខមាត់ តាមរយៈ ការដាក់បញ្ចូលសមាជិកអ្នកតំណាងរាស្ត្រថ្មី ប៉ុន្តែ រចនាសម្ព័ន្ធ មាគ៌ានយោបាយនៅតែចាស់ដូចមុន មិនផ្លាស់ប្តូរនោះទេ។
ការបោះឆ្នោតអ៊ីរ៉ាក់តែងកត់សំគាល់ដោយអវត្តមាន ដ៏ក្រាស់ក្រែលរបស់អ្នកបោះឆ្នោត។ នៅឆ្នាំ ២០១៨ មានអ្នកមិនទៅបោះឆ្នោត ដល់ ទៅ ៤០% ហើយគេរំពឹងថា ចំនួននេះ នឹងអាចច្រើនជាងនេះ នៅក្នុងការបោះឆ្នោត នៅថ្ងៃអាទិត្យនេះ។
ហេតុអ្វីគេត្រូវចាប់អារម្មណ៍ តាមដានការបោះឆ្នោត នៅអ៊ីរ៉ាក់នោះបុប្ផា?
ការបោះឆ្នោតលើកនេះ ប្រហែលជាគ្មានឥទ្ធិពល ជំរុញ ឲ្យមានការផ្លាស់ប្តូរក្នុងសង្គមអ៊ីរ៉ាក់ ព្រោះថា អ្នកនយោបាយមកពីគណបក្សដដែលៗ នឹងឈ្នះឆ្នោត ដឹកនាំអំណាចនៅអ៊ីរ៉ាក់។ ប៉ុន្តែ សម្រាប់នយោបាយក្នុងតំបន់វិញ គឺវាផ្សេងពីនោះ។ ការបោះឆ្នោត នៅថ្ងៃអាទិត្យនេះ សំខាន់ណាស់ សម្រាប់អនាគត នយោបាយ យុទ្ធសាស្រ្តរបស់តំបន់ដើមបូព៌ា។
ជាការពិត គណបក្សទាំងពីរ មកពីក្រុមឈីអ៊ីត គឺគណបក្សSadriste និងគណបក្ស Hachd al Chaabi ទំនងជានឹងនៅតែរក្សាសំឡេងនាំមុខ នៅរដ្ឋសភា ហើយនិងមានសិទ្ធិជ្រើសរើសបេក្ខជនសម្រាប់តំណែងនាយករដ្ឋមន្រ្តី។ គណបក្សSadriste មានជំហរប្រឆាំងអាមេរិក និងឥទ្ធិពលរបស់អ៊ីរ៉ង់ ចំណែកគណបក្សHachd al Chaabi មាននិន្នាការទៅខាងអ៊ីរ៉ង់។ គណបក្សទាំងពីរ ជាគូប្រកួតប្រជែងគ្នា ប៉ុន្តែ នៅទីបំផុត តែងតែចរចាគ្នា គ្នា នៅក្រោយវាំងនន ដើម្បីជ្រើសរើសបេក្ខជននាយករដ្ឋមន្រ្តីរួមគ្នា។ កន្លងមក នាយករដ្ឋមន្រ្តីអ៊ីរ៉ាក់ដែលគណបក្សឈីអ៊ីតបានជ្រើសរើស គឺតែងមានជំហរមិនសូវតឹងរ៉ឹង ដាក់អ៊ីរ៉ង់ ដែលមានឥទ្ធិពលសំខាន់លើអ្នកនយោបាយអ៊ីរ៉ាក់។
នាយករដ្ឋមន្រ្តី អ៊ីរ៉ាក់សព្វថ្ងៃ គឺលោកMoustafa Al Kazimi ក៏ជាបេក្ខជន ដែលកើតចេញមកពីការចរចារវាងគណបក្សធំៗពីរនេះដែរ។ លោក Moustafa Al Kazimi ធ្លាប់បានសម្រេចស្នាដៃធំមួយ គឺជួយសម្របសម្រួលអ៊ីរ៉ង់ និងអារ៉ាប៊ី សាអូឌីត ដែលតាមពិតជាសត្រូវសួរពូជនឹងគ្នា។ ដូច្នេះ បើសិន អ៊ីរ៉ាក់ មាននាយករដ្ឋមន្រ្តីថ្មី ដែលមិនចង់បន្តនយោបាយសម្របសម្រួលមួយនេះ គេជឿថា ភាពតានតឹង រវាងអ៊ីរ៉ង់ និងអារ៉ាប៊ី សាអូឌីត នៅតែបន្តមាន ហើយភាគីទាំងពីរ នៅតែអាចបន្តចិញ្ចឹម សង្រ្គាម ស៊ីវិលនៅប្រទេសជិតខាង ដូចជានៅស៊ីរី យេម៉ែន ដើម្បី ការពារដែនឥទ្ធិពលរបស់ខ្លួន។
អ៊ីរ៉ាក់ ប្រទេសសំបូរប្រេង ប៉ុន្តែ មិនបានសោយសុខ ទទួលប្រយោជន៍ពីសម្បត្តិប្រេង
ទទួលបានឯករាជ្យពីអង់គ្លេសនៅឆ្នាំ ១៩៣២ អ៊ីរ៉ាក់ បានប្រកាន់របបសាធារណរដ្ឋ នៅក្រោយរដ្ឋប្រហារយោធា ផ្តួលរំលំ របបរាជានិយម នៅឆ្នាំ ១៩៥៨។ ជា ប្រទេសនាំចេញប្រេង ធំទី ២របស់អង្គការOPEP ៩០%នៃប្រភពចំណូលរបស់អ៊ីរ៉ាក់ បានមកប្រេង។ ប៉ុន្តែ ប្រទេសសំបូរប្រេងមួយនេះ បានរងខេ្ទចខ្ទាំ យាយី ដោយសារតែវិបត្តិនយោបាយ និងសង្រ្គាមជាបន្តបន្ទាប់ តាំងពីឆ្នាំ ដែលមានសង្រ្គាមអ៊ីរ៉ាក់ អ៊ីរ៉ង់ និងសង្រ្គាមឈូងសមុទ្រពែក្សរ៍ នៅក្រោយ អ៊ីរ៉ាក់របស់សាដាម ហ៊ូសេន ចាប់ឈ្លានពានកូវ៉ែត។
នៅឆ្នាំ ២០០៣ សង្រ្គាម ឈ្លានពានរបស់អាមេរិកដោយបានផ្តួលរំលំរបបផ្តាច់ការសាដាម ហ៊ូសេនបានបើកផ្លូវឲ្យក្រុមឈីអ៊ីត ចូលកាន់អំណាចនៅអ៊ីរ៉ាក់។ បញ្ហានៅអ៊ីរ៉ាក់នៅត្រង់ថា គ្រប់គណបក្ស នយោបាយ សុទ្ធតែមានក្រុមប្រដាប់អាវុធគាំទ្ររៀងៗខ្លួន និងដើរធ្វើព្យុះភ្លៀង បង្កអសន្តិសុខ គំរាមកំហែងអ្នកនយោបាយប្រឆាំង។
អំពើពុករលួយ បក្សនិយម ក្នុងចំណោមសមាជិកជាន់ខ្ពស់របស់គណបក្សកាន់អំនាច បានចាក់រូងស៊ីជ្រៅ ក្នុងសង្គមអ៊ីរ៉ាក់។ អំពើពុករលួយចាប់តាំងពីឆ្នាំ ២០០៣ បានលេបត្របាក់ថវិកា ប្រមាណ ៤១០ពាន់លានអឺរ៉ូ តាំងពីឆ្នាំ ២០០៣។ អំពើពុករលួយ និងការធ្លាក់ចុះ តម្លៃប្រេង បានធ្វើឲ្យប្រជាជនអ៊ីរ៉ាក់ ១ភាគ៣ ធ្លាក់ក្នុងភាពក្រីក្រ។ ប្រទេសដែលសំបូរប្រេង នាំចេញប្រេង ធំទី ២ ក្នុងពិភពលោក បែរជាមានប្រជាជន ខ្វះប្រេង ប្រើ និងត្រូវពឹងលើការផ្គត់ផ្គង់ថាមពលពីប្រទេសអ៊ីរ៉ង់ទៅវិញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ