ប្រធានាធិបតីប្រេស៊ីលត្រូវគេប្តឹងទៅតុលាការព្រហ្មទណ្ឌអន្តរជាតិ ដោយសារការបំផ្លាញព្រៃអាម៉ាហ្សូន
ចុះផ្សាយនៅថ្ងៃ៖
ស្តាប់ - ០៨:២១
ប្រធានាធិបតីប្រេស៊ីល លោក ហ្សាអៀរ បុលសូណារ៉ូ ត្រូវបានអង្គការក្រៅរដ្ឋាភិបាលមួយរបស់ប្រទេសអូទ្រីសដាក់ពាក្យប្តឹងទៅតុលាការព្រហ្មទណ្ឌអន្តរជាតិ នៅថ្ងៃអង្គារទី ១២ តុលា ក្នុងបទចោទប្រកាន់ប្រព្រឹត្តឧក្រិដ្ឋកម្មប្រឆាំងមនុស្សជាតិ ពាក់ព័ន្ធនឹងការកាប់បំផ្លាញព្រៃអាម៉ាហ្សូន។ តើការកាប់បំផ្លាញព្រៃឈើមានជាប់ទាក់ទងអ្វីនឹងឧក្រិដ្ឋកម្មប្រឆាំងមនុស្សជាតិ? តើតុលាការព្រហ្មទណ្ឌអន្តរជាតិមានសមត្ថកិច្ចបើកការស៊ើបអង្កេតប្រឆាំងប្រធានាធិបតីប្រេស៊ីល ទៅតាមបណ្តឹងរបស់អង្គការអូទ្រីសដែរ?
តាមអង្គការអូទ្រីស AllRise គេត្រូវចាត់វិធានការផ្លូវច្បាប់ ប្រឆាំង ប្រធានាធិបតីប្រេស៊ីល បុលសូណារ៉ូ ពីព្រោះ លោកបានធ្វើនយោបាយជាច្រើន ដែលចូលរួមជំរុញឲ្យមានការប្រែប្រួលអាកាសធាតុ ដែលជះអាក្រក់ទៅលើគ្រប់ទីកន្លែងក្នុងពិភពលោក។
តាមអង្គការ AllRise លោកបុលសូណារ៉ូបានចូលរួមបំផ្លាញព្រៃអាម៉ាហ្សូន ដោយបានធ្វើច្បាប់ អនុញ្ញាតឲ្យគេពង្រីកដីកសិកម្ម ឬធ្វើអាជីវកម្មរ៉ែ ទៅក្នុងតំបន់ព្រៃអាម៉ាហ្សូន។ គេវាយតម្លៃថា ចាប់តាំងពីលោកបុលសូណារ៉ូ ចូលកាន់តំណែងជាប្រធានាធិបតី ប្រេស៊ីល នៅខែមករា ឆ្នាំ ២០១៩ ដីព្រៃអាម៉ាហ្សូន ប្រមាណ ៤សែនហិចតា ត្រូវបានកាប់ ដុតបំផ្លាញ ក្នុងមួយឆ្នាំៗ។ ការកាប់បំផ្លាញ និងដុតព្រៃ ដើម្បីយកដីធ្វើចម្ការ ឬធ្វើអាជីវកម្មរ៉ែ បានធ្វើឲ្យប្រេស៊ីលបញ្ចេញឧស្ម័នកាបូនិក ដែលជាឧស្ម័នផ្ទះកញ្ចក់ ច្រើនជាងសមត្ថភាពស្រូបយករបស់តំបន់ព្រៃអាម៉ាហ្សូន។ ឧស្ម័នកាបូនិក ឧស្ម័នពុលជាដើមហេតុសំខាន់មួយ ដែលធ្វើឲ្យមនុស្សស្លាប់មុនអាយុ ដោយសារជំងឺសួត ជំងឺបេះដូងជាដើម។ ម្យ៉ាងទៀត ឧស្ម័នកាបូនិកដែលចេញ ភ្លើងឆេះព្រៃអាម៉ាហ្សូន បានទៅបង្កើន បរិមាណ ឧស្ម័នផ្ទះកញ្ចក់ ដែលធ្វើឲ្យផែនដី ឡើងកំដៅ រហូតទៅបង្កឲ្យមានការប្រែប្រួលអាកាសធាតុ គ្រោះទឹកជំនន់ ខ្យល់ព្យុះ ឬអាកាសធាតុក្តៅ។
តាមអង្គការAllRise ឧស្ម័នកាបូនិកដែលចេញមកពីការបំផ្លាញព្រៃអាម៉ាហ្សូន ក្នុងអាណត្តិរបស់លោកប្រធានាធិបតីបុលសូណារ៉ូ នឹងធ្វើឲ្យមនុស្ស ប្រមាណ ១សែន ៨ម៉ឺននាក់ ស្លាប់បន្ថែមទៀត នៅក្នុងពិភពលោក ដោយសារអាកាសធាតុក្តៅខ្លាំង ។
មួយវិញទៀត ក្នុងអាណត្តិដឹកនាំរបស់លោកបុលសូណារ៉ូ គេឃើញ ក្រុមអ្នកការពារបរិស្ថាន និងជនជាតិភាគតិច បានក្លាយជាផ្ទាំងស៊ីប កាន់តែខ្លាំង របស់ក្រុមទុច្ចរិត។ ពួកគេជាច្រើន រងការព្យាបាទ និងសម្លាប់ ធ្វើឃាត បន្ទាប់ពីពួកគេតវ៉ាប្រឆាំងនយោបាយកាប់បំផ្លាញព្រៃឈើ ក្នុងតំបន់ព្រៃអាម៉ាហ្សូន។ អាចថា លោកប្រធានាធិបតីបុលសូណារ៉ូ គ្មានជាប់ទាក់ទងនឹងឃាតកម្មរបស់សកម្មជនការពារបរិស្ថាន នៅប្រេស៊ីល ប៉ុន្តែ ការព្រងើយកន្តើយ របស់លោកបុលសូណារ៉ូ និងជំហររបស់លោកក្នុងការការពារនយោបាយធ្វើអាជីវកម្ម ក្នុងដៃព្រៃអាម៉ាហ្សូនបានធ្វើឲ្យគេជឿថា លោកបុលសូណារ៉ូ ចង់ឬមិនចង់ បានជំរុញឲ្យក្រុមឧក្រិដ្ឋកម្ម បានដៃ សម្លាប់បំបិទ មាត់ក្រុមអ្នកការពារបរិស្ថាន។ សម្រាប់ អង្គការអូទ្រីស ដែលជាម្ចាស់បណ្តឹង ប្តឹងប្រធានាធិបតីប្រេស៊ីលទៅតុលាការព្រហ្មទណ្ឌអន្តរជាតិ ការបំផ្លាញបរិស្ថាន ដោយចេតនា រួមទាំងការសម្លាប់បំភិតបំភ័យអ្នកការពារបរិស្ថាន ច្បាស់ណាស់ គឺជាឧក្រិដ្ឋកម្មប្រឆាំងមនុស្សជាតិ ដែលមានចែង ក្នុងលក្ខន្តិកៈក្រុងរ៉ូម។
ប្រធានាធិបតីប្រេស៊ីលរងពាក្យបណ្តឹងចំនួន៣ ក្នុងបទចោទប្រកាន់ឧក្រិដ្ឋកម្មប្រឆាំងមនុស្សជាតិ
នៅមុនពាក្យបណ្តឹងរបស់អង្គការអូទ្រីស លោកប្រធានាធិបតីប្រេស៊ីល បុលសូណារ៉ូ ធ្លាប់បានគេដាក់ពាក្យប្តឹងទៅតុលាការព្រហ្មទណ្ឌអន្តរជាតិដល់ទៅ៣លើកមកហើយ ក្នុងបទចោទប្រកាន់ដូចគ្នា គឺឧក្រិដ្ឋកម្មប្រឆាំងមនុស្សជាតិ។ នៅខែ កក្កដា ឆ្នាំ ២០២០ លោកត្រូវបានអង្គការ សមាគមគ្រូពេទ្យនៅប្រទេសប្រេស៊ីល ដាក់ពាក្យប្តឹងទៅតុលាការព្រហ្មទណ្ឌអន្តរជាតិ ក្នុងបទប្រព្រឹត្តឧក្រិដ្ឋកម្មប្រឆាំងមនុស្សជាតិ ព្រោះលោកបានធ្វេសប្រហែស មិនយកព្រមស្តាប់ តាមយោបល់របស់អ្នកវិទ្យាសាស្រ្ត ដើម្បីទប់ស្កាត់ការរីករាលដាលជំងឺកូវីដ។ ដោយសារតែ នយោបាយមើលស្រាលរបស់ប្រធានាធិបតីបុលសូណារ៉ូ ប្រេស៊ីលមានចំនួនមនុស្សឆ្លងដ៏ច្រើន និងស្លាប់ដោយសារជំងឺកូវីដដល់ជាង ៧សែននាក់។
នៅឆ្នាំនេះទៀតសោត ក្រុមជនជាតិភាគតិច ដែលរស់នៅក្នុងតំបន់ព្រៃអាម៉ាហ្សូន បានដាក់ពាក្យបណ្តឹងសាជាថ្មី ប្តឹងលោកប្រធានាធិបតីបុលសូណារ៉ូ ទៅតុលាការព្រហ្មទណ្ឌអន្តរជាតិ ក្នុងបទប្រព្រឹត្តឧក្រិដ្ឋកម្មប្រឆាំងមនុស្សជាតិ និងប្រល័យពូជសាសន៍ បន្ទាប់ពីជនជាតិភាគតិច ត្រូវបានគេបៀតបៀន លួចសម្លាប់ធ្វើឃាត ក្នុងបុព្វហេតុ ការពារព្រៃអាម៉ាហ្សូន។
តុលាការព្រហ្មទណ្ឌអន្តរជាតិដែលមានតួនាទីជំនុំជម្រះ បទឧក្រិដ្ឋទាក់ទងនឹងការសម្លាប់រង្គាលក្នុងពិភពលោក គ្មានភាពចាំបាច់ ដែលត្រូវទទួលយកគ្រប់ពាក្យបណ្តឹងនោះទេ។ តុលាការដែលមានទីស្នាក់ការនៅទីក្រុងឡាអេ អាចបញ្ចេញយោបល់ណាមួយ នៅបន្ទាប់ពី រដ្ឋអាជ្ញារបស់តុលាការ ប្រកាសបើកការស៊ើបអង្កេតបឋម។ ដរាបណា រដ្ឋអាជ្ញានៅមិនទាន់ចាត់វិធានការអ្វី គេនៅតែមិនដឹង ច្បាស់ថា តើប្រធានាធិបតី ប្រេស៊ីលអាចជាប់ក្នុងសំណាញ់ច្បាប់ តុលាការព្រហ្មទណ្ឌអន្តរជាតិដែរឬទេ។ សម្រាប់មេធាវីរបស់អង្គការអូទ្រីស ទោះគេនៅមិនទាន់ដឹងច្បាស់ថា តុលាការអន្តរជាតិនឹងចាត់វិធានការប្រឆាំងលោកបុលសូណារ៉ូ ប៉ុន្តែ ការពាក្យបណ្តឹង ប្រឆាំងប្រធានាធិបតី ប្រេស៊ីល និងមន្រ្តីរដ្ឋាភិបាលប្រេស៊ីលបច្ចុប្បន្ន ចង់បញ្ជាក់ រំលឹកទៅក្រុមអ្នកជំនួញ ម្ចាស់ធនាគារ និងក្រុមហ៊ុនដែលបានផលជំនួញពីព្រៃអាម៉ាហ្សូន ឲ្យដឹងថា ការចូលរួមបំផ្លាញព្រៃឈើ ធ្វើទុក្ខបុកម្នេញ ជនជាតិភាគតិច និងការដុតព្រៃ ដែលបញ្ចេញឧស្ម័នកាបូនិក ធ្វើឲ្យផែនដីឡើងកំដៅ និងការប្រែប្រួលអាកាសធាតុដែលសម្លាប់ជីវិតមនុស្សនៅលើផែនដី អាចធ្វើឲ្យពួកគេប្រឈមនឹងការចោទប្រកាន់ ពីបទឧក្រិដ្ឋកម្មប្រឆាំងមនុស្សជាតិ។
ការសិក្សា៖ ប្រជាជន៨៥%នៅលើផែនដី បានរងប៉ះពាល់ដោយសារការប្រែប្រួលអាកាសធាតុ ដោយមិនចាំបាច់រង់ចាំ ដល់ចុងសតវត្សរ៍ទី២១
របាយការណ៍ចេញផ្សាយកាលពីថ្ងៃចន្ទ ម្សិលមិញកើតចេញមកពីការវិភាគលើការសិក្សាវិទ្យាសាស្រ្តជាង ១សែន ដែលគេបានធ្វើ ពីឆ្នាំ ១៩៥១ រហូតដល់ឆ្នាំ ២០១៨ដោយផ្តោតទៅលើការឡើងកំដៅផែនដី។
ដោយវិភាគទៅលើទៅព្រឹត្តិការណ៍សំខាន់ៗ ដូចជា ការធ្លាក់ចុះនៃផលដំណាំ គ្រោះទឹកជំនន់ និង រលកកំដៅ ខុសធម្មតា អ្នកវិទ្យាសាស្រ្តបានទាញការសនិ្នដ្ឋាន អាកាសធាតុប្រែប្រួលជ្រុលហួស មានជាប់ទាក់ទងនឹងសកម្មភាពរបស់មនុស្ស។
ការសិក្សាទាំងនោះ បានធ្វើឲ្យគេយល់ថា ការប្រែប្រួលអាកាសធាតុបានប៉ះពាល់គ្រប់ទ្វីប គ្រប់ប្រព័ន្ធជីវចម្រុះ។ ៨០ភាគរយនៃផ្ទៃផែនដី ជាទីដែលមនុស្សភាគច្រើននៃផែនដី កំពុងរស់នៅ បានរងប៉ះពាល់ រួចទៅហើយ ដោយសារការប្រែប្រួលអាកាសធាតុ។ តាំងពីប្រទេសអ្នកមាន អាមេរិក រហូតដល់ប្រទេសក្រីក្រ ស៊ីដង់ នៅតំបន់អាហ្វ្រិក គឺសុទ្ធតែរងគ្រោះតិច ឬច្រើន ដោយសារគ្រោះរាំងស្ងួត គ្រោះទឹកជំនន់ ខ្យល់ព្យុះ ដែលជាលទ្ធផលនៃការប្រែប្រួលអាកាសធាតុ។
ការសិក្សា ថ្មីនេះអាចជាជំនួយដាស់ រំលឹក មេដឹកនាំ ដែលត្រូវចូលរួមក្នុងសន្និសីទអន្តរជាតិស្តីពីអាកាសធាតុ នៅប្រទេសអង់គ្លេសនៅខែក្រោយនេះ ពោលគឺឲ្យពួកគេចាត់វិធានការ មានមហិច្ឆតា ជាងនេះ បើសិនមិនចង់ឲ្យផែនដី ឡើងកំដៅ ជាងនេះ។ ត្រូវដឹងថា ការសន្យារបស់ពួកគេ នៅឆ្នាំ ២០១៥ ដើម្បីកាត់បន្ថយការបញ្ចេញឧស្ម័នកាបូនិក នឹងអាចធ្វើឲ្យផែនដី ឡើងកំដៅ បន្ថែម២,៧អង្សា។ សព្វថ្ងៃនេះ ផែនដី ឡើងកំដៅ តែ ១អង្សាប៉ុណ្ណោះ មនុស្សជួបគ្រោះធម្មជាតិ កាន់តែធ្ងន់ធ្ងរ ទៅហើយ ចុះបើកើនឡើង ២អង្សា តើអនាគតមនុស្សលើផែនដី នឹងទៅជាយ៉ាងណា?
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ