ហេតុអ្វីអាស៊ានសម្រេចមិនឱ្យមេដឹកនាំយោធាភូមា ចូលរួមក្នុងជំនួបកំពូល ?
ចុះផ្សាយនៅថ្ងៃ៖
ស្តាប់ - ០៦:៣០
នៅថ្ងៃសៅរ៍ទី ១៦តុលា២០២១នេះ រដ្ឋមន្ត្រីការបរទេសអាស៊ានបានចេញសេចក្តីថ្លែងការណ៍សម្រេចជាផ្លូវការមិនអញ្ជើញមេដឹកនាំសឹកភូមា លោក មីន អ៊ុងឡាំង ឱ្យចូលរួមក្នុងជំនួបកំពូលអាស៊ាន ដែលនឹងប្រព្រឹត្តទៅពី ថ្ងៃទី២៦ដល់ថ្ងៃទី២៨តុលា ខាងមុខទេ។ ជាវិធានការដ៏កម្ររបស់អាស៊ានចំពោះក្រុមយោធាភូមា ដែលហាក់ដូចជាមិនខ្វល់នឹងចង់ដោះស្រាយវិបត្តិ។
ជំនួបកំពូល ដែលនឹងប្រព្រឹត្តទៅនៅព្រុយណេ ប្រទេសជាប្រធានផ្លាស់វេនអាស៊ាន ពីថ្ងៃទី ២៦-២៨តុលា ២០២១ នឹងគ្មានវត្តមានលោក មីន អុងឡាំង ប្រមុខដឹកនាំរបបសឹកភូមាទេ។ អាស៊ាន បានជូនដំណឹងជាផ្លូវការនៅថ្ងៃសៅរ៍ទី ១៦ តុលា ដោយពន្យល់ថា ដោយហេតុតែរបបសឹកបដិសេធមិនឱ្យអន្តរការីពិសេសរបស់អាស៊ានជួបពិភាក្សាជាមួយគ្រប់ភាគីបក្សដិបក្សនៅភូមា ជាពិសេសលោកស្រី អ៊ុង សានស៊ូជី ដែលក្រុមយោធាបានធ្វើរដ្ឋប្រហារទម្លាក់កាលពីថ្ងៃទី ១កុម្ភៈ២០២១ អាស៊ានត្រូវតែចាត់វិធានការពិសេសនិងដ៏កម្ររបស់ខ្លួនដែរ គឺមិនហៅមេដឹកនាំប្រទេសភូមានេះឱ្យមកចូលក្នុងជំនួបកំពូលទេ។
ភូមាបានចុះកិច្ចព្រមព្រៀងលើផែនការ៥ចំណុចជាមួយអាស៊ាន កាលពីខែមេសា និង បានចំណាយពេលចរចាអស់ជាច្រើនខែទម្រាំជ្រើសតាំងអន្តរការីអាស៊ាន ទទួលបន្ទុកដោះស្រាយវិបត្តិនយោបាយភូមាបាន តែរបបសឹកបែរជាបានពន្យឺតពេលវេលាចុះទៅបំពេញបេសកកម្មការងារនៅក្នុងប្រទេសភូមា របស់អន្តរការីអាស៊ាន លោក អេរីវ៉ាន់ យូស៊ូហ្វ និងរារាំងដំណើរការផែនការ៥ចំណុចនោះទៅវិញ។ នេះជាមូលហេតុមួយទៀត ដែលអាស៊ានមានបញ្ជាក់ក្នុងសេចក្តីថ្លែងការណ៍ដែរ។
ហើយបើតាមសំណើរបស់ឥណ្ឌូណេស៊ី អាស៊ាននឹងត្រូវផាត់លោកមីន អ៊ុងឡាង មិនឱ្យចូលរួមក្នុងជំនួបប្រជុំផ្សេងៗរហូតណាតែភូមា ព្រមគោរព និងដាក់ឱ្យដំណើរផែនការដើរចេញវិបត្តិ៥ចំណុចដែលបានព្រមព្រៀងជាមួយអាស៊ានសិន។
បន្ធូរបន្ថយសម្ពាធនយោបាយ
នៅក្នុងសេចក្តីថ្លែងការណ៍ អាស៊ានសម្រេចចិត្ត តាមអនុសាសន៍របស់ប្រទេសជាសមាជិកមួយចំនួន ទុកភូមាឱ្យនៅដាច់ដោយឡែកពីគេ ដើម្បីទុកពេលឱ្យមេដឹកនាំភូមា ដកឃ្លា ទៅស្តារស្ថានភាពផ្ទៃក្នុងប្រទេសឱ្យបានស្រួលបួលបន្តិចសិន។ តែអាស៊ានបានអញ្ជើញតំណាងភូមា ដែលមិនមែនជាអ្នកនយោបាយ ឱ្យមកចូលរួមប្រជុំកំពូលចុងខែនេះជំនួសវិញ ប៉ុន្តែមិនដឹងថាតើជាអ្នកតំណាងរូបណាទេ។
ម្យ៉ាងវិញទៀត សេចក្តីសម្រេចមិនហៅមេដឹកនាំសឹកភូមាមកប្រជុំកំពូល ដែលជាវិធានការបែបនយោបាយក៏កម្ររបស់អាស៊ាន ក៏ដើម្បីប្រយោជន៍អាស៊ានខ្លួនឯងដែរ។ បើតាមអ្នកជំនាញផ្នែកទំនាក់ទំនងអន្តរជាតិនៃការិយាល័យប្រឹក្សា Solaris Strategies នៅសិង្ហបុរី លោក Mustafa Izzuddin វិធានការផាត់មេដឹកនាំភូមាពីជំនួបប្រជុំអាស៊ាន ជាការបន្ធូរបន្ថយសម្ពាធនយោបាយដែលសហគមន៍អន្តរជាតិ បានដាក់កំហិតលើអង្គការអាស៊ាន។ ហើយក្នុងនាមជាអង្គការសមាគមមួយ អាស៊ានចង់បញ្ជាក់បង្ហាញថា អាស៊ាន នៅតែអាចមាន តួនាទីដ៏សកម្ម ក្នុងតំបន់អាស៊ីអាគ្នេយ៍។ នេះបើតាមលោក Mustafa Izzuddin ដដែល ដែលលម្អិតបន្ថែមថា សេចក្តីសម្រេចរបស់អាស៊ាន មិនឱ្យលោកមីនអ៊ុងឡាង ចូលក្នុងក្រុម ជាសារនយោបាយ សម្រាប់របបសឹកបានភ្លឺភ្នែកនិងបានដឹងថា អាស៊ាន មិនបណ្តោយឱ្យធ្វើអ្វីស្រេចនឹងចិត្តទេ ភូមាត្រូវតែធ្វើខ្លួនឱ្យត្រឹមត្រូវហ្មត់ចត់ គោរពតាមអ្វីដែលបានសន្យា គឺដាក់ឱ្យដំណើរការផែនការ៥ចំណុច។
នៅចំពោះមុខវិបត្តិភូមា អាស៊ានជាប់ឈ្មោះថាជាអង្គការគ្មានប្រសិទ្ធភាព ហើយក្រោយមកប្រឈមនឹងការធ្លាក់កាន់តែដុនដាបនៃវិបត្តិភូមា អាស៊ានរងសម្ពាធកាន់តែខ្លាំងឱ្យបញ្ចេញសកម្មភាពដោះស្រាយ។
សកម្មភាពរបស់សហគមន៍អន្តរជាតិ
នៅថ្ងៃសុក្រទី ១៥តុលា ៨ ប្រទេស ៖ សហរដ្ឋអាមេរិក អង់គ្លេស អូស្ត្រាលី កាណាដា កូរ៉េខាងត្បូង នូវែលហ្សេឡង់ ន័រវែស និងទីម័រខាងកើត ព្រមទាំងសហភាពអឺរ៉ុប បានចេញសេចក្តីថ្លែងការណ៍រួម សម្តែងការព្រួយបារម្ភយ៉ាងខ្លាំងចំពោះស្ថានភាពនៅក្នុងប្រទេសភូមា និងបានអំពាវនាវឱ្យរបបសឹកភូមា បើកផ្លូវឱ្យអន្តរការីអាស៊ាន លោក អេរីវ៉ាន់ យូស៊ូហ្វ បានចូលជួបអតីតមេដឹកនាំស៊ីវីលភូមា លោកស្រី អ៊ុង សានស៊ូជី និងស្វាហាប់សហការការងារក្នុងអត្ថន័យស្ថាបនាជាមួយសមាគមអាស៊ាន។
អ្នកនាំពាក្យក្រសួងការបរទេសអាមេរិក បានសង្កត់ធ្ងន់អំពីភាពចាំបាច់ដែលរបបសឹកភូមាត្រូវអនុញ្ញាតឱ្យលោក អេរីវ៉ាន់ យូស៊ូហ្វ បំពេញទស្សនកិច្ចនៅប្រទេសភូមា តាមតម្រូវការនិងដោយរលូន ពោលគឺអាចជួបពិភាក្សាជាមួយគ្រប់ភាគី។ តំណាងជាន់ខ្ពស់នៃក្រសួងការបរទេសអាមេរិក នឹងអញ្ជើញទៅដល់ប្រទេសឥណ្ឌូណេស៊ី សិង្ហបុរី និងថៃ ចាប់ពីនៅថ្ងៃអាទិត្យស្អែកនេះទៅ ក្នុងក្របខ័ណ្ឌនៃដំណើរទស្សនកិច្ចមួយជុំតូចនៅអាស៊ីអាគ្នេយ៍ ដើម្បីជជែកពិភាក្សាអំពីវិបត្តិភូមានេះឯង។ នេះបើតាមការជូនដំណឹងរបស់ក្រសួងការបរទេសអាមេរិក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ