ការបាត់ខ្លួនកីឡាការនីតេនីសចិន ផឹង ស្ហយ ធ្វើឲ្យពិភពកីឡា និងសហគមន៍អន្តរជាតិព្រួយបារម្ភ
ចុះផ្សាយនៅថ្ងៃ៖
ស្តាប់ - ០៧:០៤
កំពូលកីឡាការនីវាយតេនីស ជនជាតិចិនដ៏ល្បី ឈ្មោះ ផឹង ស្ហយ បានបាត់ខ្លួន ជាច្រើនថ្ងៃមកហើយ។ ការបាត់ខ្លួន គ្មានដំណឹងនេះ គឺបន្ទាប់ពីកីឡាការនីតេនីសលេខ១លំដាប់ពិភពលោករូបនេះ បានបង្ហោះសារ នៅលើបណ្តាះ Weibo កាលពីថ្ងៃទី២វិច្ឆិកា ដោយចោទលោកអតីតឧបនាយករដ្ឋមន្ត្រីចិន ចាង កៅលី ថាបានចាប់បង្ខំ និងបំពានផ្លូវភេទ មកលើរូបនាង។ សារចោទប្រកាន់នេះ ត្រូវបានអាជ្ញាធរចិន លុបចោលភ្លាមៗផងដែរ។ ការបាត់ខ្លួនរបស់កីឡាការនី ផឹង ស្ហយ ប្រមាណជិត២សប្តាហ៍ កំពុងតែបង្កឲ្យមានការព្រួយបារម្ភកាន់តែខ្លាំង។ កីឡាករល្បីៗ សហព័ន្ធកីឡាអន្តរជាតិនានា ព្រមទាំងប្រទេសមហាអំណាចខ្លះ បាននាំគ្នាអំពាវនាវ ឲ្យអាជ្ញាធរចិន ត្រូវតែបង្ហាញភស្តុតាង បញ្ជាក់ថា កីឡាការនី ផឹង ស្ហយ ពិតជាកំពុងស្ថិតនៅកន្លែងមានសុវត្ថិភាព។
ចោទអតីតឧបនាយករដ្ឋមន្ត្រីចិន ថាបានចាប់បង្ខំរួមភេទ
កីឡាការនី ផឹង ស្ហយ (Peng Shuai) មុននឹងបាត់ខ្លួន គឺនាងបានសរសេរសារមួយ បង្ហោះនៅលើបណ្តាញ Weibo កាលពីថ្ងៃទី២ វិច្ឆិកា។ ក្នុងសារដ៏វែងេនោះ នាងបាននិយាយរៀបរាប់ ថារូបនាង ត្រូវបានលោក ចាង កៅលី (Zhang Gaoli) អតីតឧបនាយករដ្ឋមន្ត្រីចិន បង្ខំឲ្យរួមភេទកាលពី៣ឆ្នាំមុន ហើយបន្ទាប់មកបានចាប់បង្ខំរូបនាង ឲ្យធ្វើជាស្រីកំណាន់។
នាងបានរៀបរាប់ថា នាងមានការភ័យខ្លាចជាទីបំផុត ដោយមិនអាចប្រកែកនឹងការចាប់បង្ខំបាន។ នាងបានអះអាងទៀតថា ភរិយារបស់លោក ចាង កៅលី ក៏បានដឹងរឿងនេះដែរ ដោយគាត់គឺជាអ្នកចាំយាម នៅខាងក្រៅបន្ទប់សណ្ឋាគារ ផ្ទាល់តែម្តង។ តែយ៉ាងណា នាងលើកឡើងថា នាងគ្មានភស្តុតាងអ្វីមកបញ្ជាក់ លើសំណេរចោទប្រកាន់នេះទេ។
ប៉ុន្មានម៉ោងក្រោយមក អាជ្ញាធរចិន បានលុបចោលសារនេះភ្លាម។ ក៏ប៉ុន្តែ មានអ្នកប្រើប្រាស់បណ្តាញWeibo ជាច្រើន បានថតរូបសារនេះទុក និងបានបង្ហោះចែកចាយតៗគ្នា។ ហើយចាប់ពីថ្ងៃទី៤វិច្ឆិកាមក ការវាយអក្សររកឈ្មោះ ផឹង ស្ហយ និង ចាង កៅលី នៅលើ បណ្តាញ Weibo ក៏ដូចជាទំព័រ Baidu គឺមិនចេញជាលទ្ធអ្វីទាំងអស់។
លោក ចាង កៅលី ដែលត្រូវកីឡាការនី ផឹង ស្ហយចោទ នេះ បច្ចុប្បន្នមានអាយុ៧០ឆ្នាំ ហើយធ្លាប់ធ្វើជាឧបនាយករដ្ឋមន្ត្រីចិន ពីឆ្នាំ ២០១៣ ដល់ឆ្នាំ ២០១៨។ ពោលគឺ លោក ចៅ កៅលី ធ្លាប់ជាសមាជិកម្នាក់ ក្នុងចំណោម៧នាក់ នៃការិយាល័យនយោបាយ បក្សកុម្មុយនីស្តចិន ដែលជាកំពូលមនុស្សមានឥទ្ធិពលអំណាច ខ្លាំងបំផុតនៅចិន។
#WhereIsPengShuai
រឿងនេះ មិនមែនផ្អែលតែក្នុងប្រទេសចិនទេ គឺវាបានផ្អើលទូទាំងពិភពលោកតែម្តង ជាពិសេសនៅតាមប្រទេស ដែលនិយមកីឡាតេនីស។ កីឡាការនី ផឹង ស្ហយ មិនមែនជាកីឡាការនីសាមញ្ញទេ ។ នាងធ្លាប់ជាជើងឯកតេនីស លេខមួយពិភពលោក បានពានរង្វាន់ Wimbledon ឆ្នាំ២០១៣ នៅពានរង្វាន់ Roland-Garros ឆ្នាំ២០១៤។
ប៉ុន្មានថ្ងៃមកនេះ នៅតាមបណ្តាញសង្គម Twitter អ្នកប្រើប្រាស់បានសរសេរ ចែកចាយតៗគ្នា យ៉ាងព្រោងព្រាត នូវសារ #WhereIsPengShuai ដើម្បីជាការដាក់សំពាធ លើអាជ្ញាធររដ្ឋាភិបាលចិន ដែលហាក់តែកំពុងលាក់បាំងរឿងនេះ។ កីឡាករតេនីសល្បីៗលំដាប់ពិភពលោក ដូចជា Naomi Ozaka Serana Williams និង Novak Djokovic ជាដើម សុទ្ធតែបានបង្ហាញការព្រួយបារម្ភ និងបានអំពាវនាវ ឲ្យអាជ្ញាធរចិន ត្រូវតែបង្ហាញភស្តុតាង បញ្ជាក់ថា កីឡាការនី ផឹង ស្ហយ នៅមានជីវិត និងស្ថិតនៅកន្លែងដែលមានសុវត្ថិភាព។
មិនត្រឹមតែប៉ុណ្ណេះទេ រដ្ឋាភិបាលអាមេរិក រដ្ឋាភិបាលបារាំង ព្រមទាំងអង្គការសហប្រជាជាតិផង ក៏បានថ្លែងសារ បង្ហាញពីការព្រួយបារម្ភដែរ ទាក់ទិននឹងការបាត់ខ្លួនរបស់កីឡាការនី ផឹង ស្ហយ នេះ។ គេបានអំពាវនាវ ឲ្យរដ្ឋាភិបាលចិន ត្រូវបង្ហាញភស្តុតាង ជាក់ច្បាស់ និងឯករាជ្យ អំពីទីតាំងដែលកីឡាការនីរូបនេះ កំពុងស្ថិតនៅ។ លោកប្រធានាធិបតី អាមេរិក ចូ បៃដិនវិញ បានអះអាងថា គេកំពុងពិចារណា ក្នុងការធ្វើពហិការ មិនចូលរួមក្នុងការប្រកួតកីឡាអូឡាំពិករដូវរងា ដែលនឹងត្រូវធ្វើនៅក្រុងប៉េកាំង នៅឆ្នាំ២០២២។
ចំណែក សមាគម WTA ដែលជាសមាគមរៀបចំការប្រកួតតេនីតផ្នែកនារីទូទាំងពិភពលោក បានអះអាងថា បើសិនជាចិន នៅតែមិនបង្ហាញភស្តុតាច្បាស់លាស់ ថា កីឡាការនី ផឹង ស្ហយ កំពុងស្ថិតនៅទីកន្លែងមានសុវត្ថិភាពទេនោះ គឺគេនឹងពិចារណា មិនឲ្យចិនចូលរួម ទាំងការប្រកួត និងទាំងការរៀបចំការប្រកួត នៅក្នុងកម្មវិធីប្រកួតកីឡាតេនីស្តលំដាប់ពិភពលោក។ លោក Steve Simon អគ្គនាយក WTA បានអំពាវនាវថា អាជ្ញាធរចិន ត្រូវតែបើកការស៊ើបអង្កេតស៊ីជំរៅ ទាក់ទិននឹងការចោទប្រកាន់ ករណីបំពារបំពានផ្លូវភេទលើរូបកីឡាការនី ផឹង ស្ហយ។
អ៊ីមែល និង រូបថត ដែលគ្មានប្រភពច្បាស់លាស់
បណ្តាញទូរទស្សន៍ចិនCGTV ផ្សាយជាភាសាអង់គ្លេស បានផ្សាយរូបភាពថតពីលើកញ្ចក់កុំព្យូទ័រ ដែលគេអះអាងថា ជាសារអ៊ីមែល ដែលកីឡាការនី ផឹង ស្ហយ បានផ្ញើទៅកាន់ថ្នាក់ដឹកនាំ WTA។ ក្នុងសារអ៊ីមែលនេះ មានសរសេរ ថានាងសុខសប្បាយជាធម្មតា ហើយថា ពាក្យចោទប្រកាន់កន្លងមក គឺជារឿងមិនពិតទេ។ បច្ចុប្បន្ននាងកំពុងតែសម្រាក និងសូមអរគុណ ចំពោះការជួយឈឺឆ្អាលបារម្ភពីមនុស្សគ្រប់គ្នា។
ចំណែកកាលពីថ្ងៃសុក្រ ទី១៩វិច្ឆិកា គណនីTwitter មួយ ឈ្មោះ @shen_shiwei ដែលគេដឹងថាជាគណនីរបស់បណ្តាញព័ត៌មានស្និទនឹងរដ្ឋចិន បានបង្ហោះរូបថត ៤សន្លឹក ដែលគេឃើញ កីឡាការិនី ផឹង ស្ហយ ថតជាមួយឆ្មា ក្នុងទឹកមុខញញឹមស្រស់ស្រាយ នៅក្នុងទីតាំងមួយ ដែលទំនងហាក់ដូចជាផ្ទះរបស់នាង។
លោក Steve Simon អគ្គនាយក WTA បានបញ្ជាក់ថា លោកបានទទួលការបញ្ជាក់អះអាង ពីប្រភពជាច្រើន ដូចជាពីសហព័ន្ធកីឡាតេនីសចិនជាដើម ដែលធានាអះអាងថា កីឡាការនី ផឹង ស្ហយ កំពុងស្ថិតនៅកន្លែងមានសុវត្ថិភាព និងមិនបានរងនូវការគំរាមកំហែងលើរូបរាងកាយអ្វីទេ។
តែយ៉ាងណា ប្រភពទាំងអ៊ីមែល ទាំងរូបថតនេះ គឺមិនទាន់ត្រូវបានមតិមហាជនទូទៅ ទុកចិត្តទេ។ ទាំងសហព័ន្ធកឡាតេនីសចិន ទាំងក្រសួងការបរទេសចិន សុទ្ធតែបានបដិសេធ មិនឆ្លើយអ្វីទាំងអស់ ទៅកាន់អ្នកកាសែត រហូតមកទល់ពេលនេះ។
មិនមែនជាលើកទី១ទេ ដែលមានករណីបាត់ខ្លួនមនុស្ស នៅចិន ឲ្យតែអ្នកនោះ បានចោទ ឬរិះគន់មនុស្សមានអំណាច នៃគណបក្សកុម្មុយនីស្តចិន។ ករណីនេះ បានស្តែងឲ្យឃើញផងដែរ អំពី សង្គមចិនដែលមនុស្សមានអំណាចភាគច្រើនលើសលុបជាមនុស្សប្រុស បានប្រើអំណាច ចាប់បង្ខំ បំពារបំពានផ្លូវភេទទៅលើមនុស្សស្រី។ ហើយជានិច្ចជាកាល ស្រ្តីរងគ្រោះមិនដែលហ៊ានចេញមុខ ស្វែងរកយុត្តិធម៌ទេ ព្រោះដឹងថាខ្លួនត្រូវប្រឈមនឹងគ្រោះថ្នាក់ ហើយប្រព័ន្ធយុត្តិធម៌ចិន ក៏មិនបើកផ្លូវស្វាគមន៍ដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ