កូវីដ១៩ ៖ ការរីករាលដាលយ៉ាងលឿននៃអូមីក្រុង ជាស្នូលនៃជំនួបកំពូលសហភាពអឺរ៉ុប
ចុះផ្សាយនៅថ្ងៃ៖
ស្តាប់ - ០៧:១០
នៅថ្ងៃព្រហស្បតិ៍ទី ១៦ធ្នូ២០២១នេះ សហភាពអឺរ៉ុបបានផ្តោតជំនួបកំពូលរបស់ខ្លួន ទៅលើមេរោគកូវីដបំប្លែងខ្លួនថ្មី អូមីក្រុង។ នៅចំពោះមុខការស្ទុះឡើង ច្រើនខ្លាំងនៃករណីវិជ្ជមានកូវីដ១៩ និងកំណើនយ៉ាងលឿនស្លេវ របស់ អូមីក្រុង។ អឺរ៉ុបត្រូវសាកល្បងស្វែងរកកិច្ចសហការគ្នាឱ្យបានកាន់តែប្រសើរឡើង ព្រោះបណ្តាប្រទេសជាសមាជិកសហភាពអឺរ៉ុបខ្លះ បានដាក់វិធានការថ្មីជាលក្ខណៈឯកតោភាគី រួចទៅហើយទាក់ទងនឹងការធ្វើដំណើរឆ្លងព្រំដែន។
ប្រទេសជាសមាជិកសហភាពអឺរុប ទាំង២៧ប្រទេស កំពុងជួបជុំគ្នា នៅទីក្រុងព្រុចសែល ក្នុងក្របខ័ណ្ឌនៃជំនួបកំពូលអឹរ៉ុប ចុងក្រោយ សម្រាប់ឆ្នាំ ២០២១។ ក្រៅអំពីជជែកពិភាក្សាគ្នាអំពីបញ្ហាសេដ្ឋកិច្ច នយោបាយ ថាមពល និងការរៀបទណ្ឌកម្មមួយកញ្ចប់សម្រាប់ដាក់លើរុស្ស៊ី ប្រសិនបើម៉ូស្គូហ៊ានប្រមាថអ៊ុយក្រែនតាមផ្លូវយោធានោះ ជំនួបកំពូលអឺរ៉ុបលើកនេះ ពិតណាស់ ថាផ្តោតជាសំខាន់ខ្លាំងទៅលើមេរោគកូវីដបំប្លែងខ្លួនថ្មី អូមីក្រុង។
អឺរ៉ុបកំពុងព្រួយបារម្ភខ្លាំង។ បើតាមប្រធានគណៈកម្មការអឺរ៉ុប អូមីក្រុង ដ៏មហាសែនឆ្លង អាចនឹងក្លាយជាទៅមេរោគចំបងគេនៅក្នុងរង្វង់សហភាពអឺរ៉ុប នាពាក់កណ្តាលខែមករា២០២២ ដ៏ឆាប់ៗខាងមុខនេះហើយ។ ដូច្នេះអឺរ៉ុបចាំបាច់ត្រូវតែសហការគ្នាឱ្យបានកាន់តែល្អប្រសើរ ដើម្បីយកឈ្នះអូមីក្រុង។
ដំណោះស្រាយដែលចេញស្ទើរពីគ្រប់មាត់ប្រមុខរដ្ឋ-រដ្ឋាភិបាលប្រទេសអឺរ៉ុបទាំងអស់ មុនគេ គឺការប្រឹងពង្រីកវិសាលភាពនៃការចាក់ថ្នាំបង្ការថែមទៀត និងជាពិសេសការចាក់ដូសជំរុញ។ ជាមធ្យម ប្រជាពលរដ្ឋអឺរ៉ុបជាង៦៧%បានទទួលវ៉ាក់សាំងពេញលេញ(២ដូស)ហើយ ប៉ុន្តែអត្រាអ្នកចាក់វ៉ាក់សាំងរួចនៅមានកំរិតទាបខ្លាំង ក្រោម៥០% នៅអឺរ៉ុបប៉ែកខាងកើត ក្នុងប្រទេសចំនួនបី ប៊ុលហ្ការី រ៉ូមានី និងស្លូវាគី។ នៅក្រូអាស៊ីមានអត្រាត្រឹមប្រមាណ៥០,៤%។ បារាំងចាក់បានច្រើនជាងគេ ដល់ទៅជិត៨៩%។
ចាក់ថ្នាំបង្ការប្រឆាំងកូវីដ ជាកាតព្វកិច្ចពលរដ្ឋឬ ?
ថ្វីបើកាលពីខែក្តៅ និងនៅចំពោះមុខការគំរាមកំហែងនៃមេរោគបំប្លែងដែលតា ជំនួបកំពូលអឺរ៉ុបពេលនោះសម្រេចបង្កើតបណ្ណវ៉ាក់សាំងរួម ថ្នាក់អឺរ៉ុបបានមែន តែនៅលើកនេះ សហភាពអឺរ៉ុប មិនតម្រូវឱ្យរដ្ឋជាសមាជិក កំណត់ការថ្នាំបង្ការប្រឆាំងកូវីដ ជាកាតព្វកិច្ចទេ ព្រោះនេះជាភារកិច្ចរបស់អង្គការសុខភាពពិភពលោក ។ ក្នុងពេលរង់ចាំ ឬសម្រាប់ស្ថានភាពជាក់ស្តែងក្នុងពេលនេះ អឹរ៉ុបបានត្រឹមតែលើកមកជជែកពិភាក្សាគ្នា ព្រោះមានបណ្តាសមាជិកអឺរ៉ុបមួយចំនួន ដូចជា អាល្លឺម៉ង់ អូទ្រីស កំពុងរៀបចំផែនការបញ្ចូលការចាក់ថ្នាំបង្ការកូវីដ ជាកាតព្វកិច្ចពលរដ្ឋត្រូវតែចាក់ហើយ។ ប៉ុន្តែសម្រាប់អឺរ៉ុបនេះជាសិទ្ធិរបស់ប្រទេសនីមួយៗតែប៉ុណ្ណោះ។
ថ្នាំបង្ការជារនាំងការពារដ៏សំខាន់មែនហើយ តែបើតាមសហភាពអឺរ៉ុបវ៉ាក់សាំងតែមួយមុខមិនអាចរារាំងការចម្លងរាតត្បាត និងបន្ធូរបន្ថយបន្ទុកប្រព័ន្ធសុខាភិបាលបានទេ។ គឺត្រូវតែមានវិធានការអម ជាបន្ទាន់ និងជាច្រើនទៀត ដូចជា ជំរុញការធ្វើការពីផ្ទះ ពាក់ម៉ាស់ កំរិតកុំឱ្យមានមនុស្សធ្វើដំណើរតាមមធ្យោបាយសាធារណៈ និងនៅតាមទីសាធារណៈ ប្រជ្រៀតកកកុញគ្នាពេក។
បណ្ណវាក់សាំងអឺរ៉ុប នឹងអស់ន័យ ?
សហភាពអឺរ៉ុបចង់ឱ្យមានការសហការគ្នា ឱ្យបានកាន់តែប្រសើរឡើង ដើម្បីកុំឱ្យប៉ះពាល់ដល់ដំណើរការទីផ្សាផ្ទៃក្នុងអឺរ៉ុប និងកុំឱ្យប៉ះពាល់ខ្លាំងដល់សេរីភាពនៃការធ្វើដំណើរ នេះការធ្វើបម្លាស់ទី ក្នុងរង្វង់សហភាពអឹរ៉ុប ប៉ុន្តែរាល់គ្រប់វិធានការទប់ស្កាត់កូវីដ ជាសមត្ថកិច្ចរបស់ជាតិនីមួយៗទេ។ ហេតុដូច្នេះហើយបានសហភាពអឹរ៉ុប ធ្វើការដាស់តឿនរំលឹកថា រាល់គ្រប់វិធានការជាលក្ខណៈឯកតោភាគី ត្រូវតែមានទំហំសមហេតុសមផល និងក្នុងរយៈពេលខ្លីបំផុត។
វិធានការរបស់សមាជិកខ្លះ កំពុងតែធ្វើឱ្យបណ្ណវ៉ាក់សាំងដែលអឺរ៉ុបសម្រេចបានកាលពីខែក្តៅ និងដែលអនុញ្ញាតឱ្យប្រជាពលរដ្ឋអឺរ៉ុបធ្វើដំណើរឆ្លងពីប្រទេសមួយទៅមួយ ដោយសេរីក្នុងផ្ទៃអឹរ៉ុប ដោយពុំចាំបាច់ត្រូវមានលទ្ធផលតេស្តកូវីដអវិជ្ជមាន ឬធ្វើចត្តាឡីស័កនោះ កំពុងចាប់អស់តម្លៃ មានជាអាទិ៍នៅអៀរឡង់ ព័រទុយហ្កាល់ អ៊ិតាលី និងក្រិក។ ប្រទេសទាំងបួននេះ បានតម្រូវឱ្យអ្នកដំណើរអឺរ៉ុបទាំងអស់ ត្រូវមានលទ្ធផលតេស្តPCR អវិជ្ជមានបន្ថែមពីលើបណ្ណវ៉ាក់សាំងគ្រប់ពីរដូស ទើបឱ្យចូលប្រទេសរបស់ពួកគេ។
កំហិតអ្នកដំណើរមកពីអង់គ្លេស
ចំណែកបារាំងវិញ រដ្ឋាភិបាលទំនងជានឹងអាចចេញវិធានការរឹតបន្តឹងបន្ថែមទៀត នៅរសៀលថ្ងៃសុក្រស្អែក ក្រោយជំនួបប្រជុំក្រុមប្រឹក្សាសន្តិសុខជាតិរួច។ ហើយដើម្បីពន្យឺតដំណើររាតត្បាតរបស់អូមីក្រុង និងបង្អូសពេលវេលានៃការស្ទុះឡើងរបស់អូមីក្រុង បារាំងបានសម្រេចនៅថ្ងៃព្រហស្បតិ៍ទី ១៦ធ្នូនេះ ដាក់លក្ខខណ្ឌថ្មីសម្រាប់អ្នកដំណើរមកអង់គ្លេស ថាត្រូវធ្វើតេស្តអវិជ្ជមាន២៤ម៉ោងមុន មិនមែន៤៨ម៉ោងទៀតទេ។ ជាការធ្វើដំណើរត្រលប់មកផ្ទះ និងមកជួបក្រុមគ្រួសារនៅបារាំង។ ឯដំណើរទេសចរណ៍ និងការងារ ត្រូវកំហិតសិន។ អ្នកដំណើរត្រូវធ្វើចត្តាឡីស័កចំនួនមួយសប្តាហ៍ ឬបីថ្ងៃក្រោយលទ្ធផលតេស្តអវិជ្ជមាន។
នៅអង់គ្លេស ចំនួនអ្នកឆ្លងអូមីក្រុង បានឡើងដល់៣០-ទៅ៤០ម៉ឺននាក់ ក្នុងមួយថ្ងៃៗ។ នេះបើតាមអាជ្ញាធរដែលបញ្ជាក់ថា អូមីក្រុងឆ្លងខ្លាំង ឆ្លងលឿន និងវិវឌ្ឍលឿន ទ្វេដងបើប្រៀបទៅនឹងដែលតា។ ហើយបើតាមបទពិសោធន៍កន្លងមក មេរោគបំប្លែងខ្លួនថ្មី នឹងចូលមកដល់អឺរ៉ុប/បារាំង និងក្លាយជាមេរោគចំបងគេ នៅពីរបីខែក្រោយអង់គ្លេស។ ហេតុដូច្នេះហើយបានជាបារាំងប្រឹងធ្វើគ្រប់យ៉ាង ដើម្បីចំណេញពេលវេលា អាចជំរុញការចាក់វ៉ាក់សាំងដូសទីបីឱ្យបានកាន់តែច្រើន។ ពេលនេះបារាំងរាប់ឃើញមានករណីកូវីដអូមីក្រុង ២៤០នាក់ហើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ