វិបត្តិអ៊ុយក្រែន ៖ អូតង់ចង់បានដំណោះស្រាយការទូត តែសង្ស័យថាអាចមានផ្ទុះសង្គ្រាមថ្មី
ចុះផ្សាយនៅថ្ងៃ៖
ស្តាប់ - ០៥:០៩
ភាពតានតឹងនៅតាមព្រំដែនរុស្ស៊ី-អ៊ុយក្រែន នៅតែបន្តឆាបឆេះខ្លាំងដដែល។ នៅថ្ងៃចន្ទទី ១២មករា ២០២២ សហរដ្ឋអាមេរិកនិងរុស្ស៊ីត្រូវចូលតុអង្គុយចរចាមួយទល់នឹងមួយ ដើម្បីសម្របសម្រួលស្ថានការណ៍កុំឱ្យធ្លាក់ធ្ងន់ធ្ងរបន្ថែមទៀត។ ហើយនៅថ្ងៃសុក្រទី ៧មករា ម្សិលមិញ សហរដ្ឋអាមេរិកនិងដៃគូអឺរ៉ុប បាននាំគ្នាជជែកអំពីស្ថានភាពនៅតាមព្រំដែនអ៊ុយក្រែននេះ ក្នុងក្របខ័ណ្ឌនៃជំនួបប្រជុំវិសាមញ្ញអូតង់ស្តីពីសន្តិសុខអឺរ៉ុប។ សម្រាប់អូតង់ ហានិភ័យផ្ទុះសង្គ្រាមមានយ៉ាងជាក់ស្តែង។
នៅថ្ងៃសុក្រទី ៧ មករា ក្នុងជំនួបវិសាមញ្ញអូតង់ ដែលមានរដ្ឋមន្ត្រីការបរទេសរដ្ឋជាសមាជិកទាំង៣០ប្រទេសចូលរួម ប្រជុំតាមអនឡាញ អគ្គលេខាអង្គការអូតង់ ឬណាតូ លោកយែន ស្តុលទែនប៊ែរ បានព្រមានថា ហានិភ័យមានពិតជាក់ស្តែង ៖ វិបត្តិនៅព្រំដែនអ៊ុយក្រែន-រុស្ស៊ី អាចនឹងរាលដាលទៅជាជម្លោះថ្មី។
អូតង់មានហេតុផលដែលត្រូវតែព្រួយបារម្ភ ព្រោះរុស្ស៊ីនៅតែបន្តពង្រឹងកងកម្លាំងយោធានៅតាមព្រំដែនជាប់ជាមួយអ៊ុយក្រែន អមដោយភាសាគំរាមកំហែងប្រើកម្លាំងយោធារហូត បើលោកខាងលិចមិនព្រមតាមការទាមទាររបស់ខ្លួន។ បើតាមលោកប្រមុខការទូតអាមេរិក រុស្ស៊ី បានបញ្ជូនកងទ័ពនៅផ្តុំនៅតាមព្រំដែនដល់ទៅ ប្រមាណ១០០ ០០០នាក់ ដែលត្រៀមលក្ខណៈជាស្រេចនឹងធ្វើសកម្មភាពឱ្យតែមានហេតុការណ៍ឬរឿងចៃដន្យអ្វីកើតឡើងតែបន្តិច។
កាលពីខែធ្នូចុងឆ្នាំ២០២១ រុស្ស៊ី បានបញ្ជាក់ជំហរជាសាធារណៈ ប្រឆាំងដាច់ខាតមិនឱ្យអូតង់ទទួលយកអ៊ុយក្រែនជាសមាជិក នៅថ្ងៃអនាគតបានទេ ហើយអូតង់ត្រូវកាត់បន្ថយកម្លាំងយោធានៅតាមតំបន់ជិតព្រំដែនរុស្ស៊ី។
ប៉ុន្តែសម្រាប់អូតង់ អូតង់គ្មានគោលការណ៍ និងមិនអាចទៅបំបិទសិទ្ធិ របស់រដ្ឋណាមួយក្នុងដំណើរ ជ្រើសរើសចូលបក្សសម្ព័ន្ធ ណាមួយ ឬទៅហាមរដ្ឋណាមួយ មិនឱ្យទៅចុះហត្ថលេខាលើកិច្ចព្រមព្រៀងសន្តិសុខ ដែលរដ្ឋនោះចង់ បានឡើយ។ នេះជាប្រសាសន៍របស់លោកយែន ស្តុលទែនប៊ែរ ជាប្រមុខអង្គការអូតង់។
ម្យ៉ាងវិញទៀត បើតាមលោកអគ្គលេខាធិការអង្គការអូតង់ដដែល ថ្វីបើមានសញ្ញាវិជ្ជមាន ដោយ រុស្ស៊ីព្រមបើកជំនួបទ្វេភាគីជាមួយសហរដ្ឋអាមេរិក និងជាមួយអង្គការអូតង់ ក៏ដោយចុះ ក៏ម្ខាងៗសុទ្ធមានលក្ខខណ្ឌរៀងខ្លួនៗ។
បើកផ្លូវការទូត តែមិនលង់ក្នុងល្បិចរុស្ស៊ី
សមាជិកអូតង់ទាំងអស់ បានបង្ហាញសាមគ្គីភាពនិងការព្រមព្រៀងជាធ្លុងមួយ ដាក់លក្ខខណ្ឌ ឱ្យរដ្ឋាភិបាលក្រុងម៉ូស្គូ ត្រូវតែបញ្ឈប់សកម្មភាពយោធាសិន ហើយប្រកាន់យកផ្លូវការទូត និងគោរពពាក្យប្តេជ្ញារបស់ខ្លួនដែលសន្យាមានតម្លាភាពក្នុងវិស័យយោធា។ ការចរចាអូតង់និងរុស្ស៊ី អាចប្រព្រឹត្តទៅបានដរាបណាតែ រុស្ស៊ីចាប់បន្ធូរបន្ថយសម្ពាធតានតឹងនៅតាមព្រំដែនអ៊ុយក្រែន និងព្រំដែនជាមួយសមាជិកអូតង់។
ដើម្បីសាកល្បងដោះស្រាយវិបត្តិ អ្នកការទូតអាមេរិកនិងរុស្ស៊ី ត្រូវជួបពិភាក្សាគ្នានៅថ្ងៃចន្ទទី ១២មករា នៅទីក្រុងហ្សឺណែវ បន្ទាប់មកនឹងមានជំនួបទ្វេភាគីអូតង់រុស្ស៊ី នៅទីក្រុងព្រុចសែល នៅថ្ងៃពុធទី ១៤មករា ដែលជាជំនួបលើកទីមួយគិតចាប់តាំងពីឆ្នាំ២០១៩មក។ ហើយជាចុងក្រោយ រុស្ស៊ីនឹងមានជំនួបជាមួយអង្គការដើម្បីសន្តិសុខនិងកិច្ចសហប្រតិបត្តិការអឺរ៉ុប ដែលមានអ៊ុយក្រែនជាសមាជិកម្នាក់ដែរ។
ដំណើរការទូត សកម្មខ្លាំងណាស់ សប្តាហ៍ក្រោយនេះ។ តែភាគីរុស្ស៊ីហាក់ដូចជាផ្តល់អាទិភាពខ្លាំងតែលើជំនួបទ្វេភាគី ហេតុដូច្នេះហើយបានជាអូតង់ តើនរំលឹកថា បើនាំគ្នាជជែកអំពីសន្តិសុខអឺរ៉ុបហើយ ត្រូវតែមានភាគីអឺរ៉ុបអង្គុយក្នុងតុចរចា។ នេះជាការអះអាងរបស់អូតង់។ បើចង់ដោះស្រាយវិបត្តិអ៊ុយក្រែន អ៊ុយក្រែនត្រូវតែមានវត្តមានដែរ។ នេះជាការធានារបស់សហរដ្ឋអាមេរិក ដែលបានគូសបញ្ជាក់បន្ថែមថា អាមេរិកមិនលង់តាមល្បិចរបស់រុស្ស៊ី ដែលចង់បង្វែរការចរចាស្តីពីការប៉ុនប៉ងចូលឈ្លានពានអ៊ុយក្រែន ទៅជាសំណុំរឿងរបស់អូតង់ទេ។
អ៊ីចឹងហើយបានជាអូតង់ព្រមានឱ្យត្រៀមលក្ខណៈចាំទទួលលទ្ធផលបរាជ័យ។ បរាជ័យដែលនឹងនាំឱ្យមានជម្លោះថ្មី សង្គ្រាមបែបថ្មីក្នុងវិបត្តិអ៊ុយក្រែននោះ។
អូតង់មិនធ្វើអន្តរាគមន៍យោធាជួយអ៊ុយក្រែន
ប៉ុន្តែ អូតង់មិនអាចចូលធ្វើអន្តរាគមន៍យោធាជួយអ៊ុយក្រែនបានទេ ព្រោះអ៊ុយក្រែនមិនមែនជាសមាជិកអង្គការអូតង់។ នេះជាគោលការណ៍ មួយដែលអូតង់មិនអាចរំលោភបានទេ។ អ៊ុយក្រែនគ្រាន់តែជាដៃគូរបស់អូតង់ មិនជាប់ពាក់ព័ន្ធនឹងកិច្ចសន្យាការពាររួមរបស់បក្សសម្ព័ន្ធដែលមានសមាជិក៣០ប្រទេសទេ។ តែប្រសិនបើរុស្ស៊ី ពិតជាសម្រេចប្រើកម្លាំងយោធាលើប្រទេសជិតខាងអឺរ៉ុប នោះរុស្ស៊ីនឹងត្រូវរងទណ្ឌកម្មសេដ្ឋកិច្ច និងនយោបាយយ៉ាងធ្ងន់ធ្ងរហើយ។ ហើយអូតង់បានចាប់ផ្តើមពង្រឹងវត្តមានកងទ័ពនៅតាមបណ្តាប្រទេសជាសមាជិកអង្គការដែលនៅប៉ែកខាងកើតបំផុតនៃទ្វីបអឺរ៉ុប ពោលនៅកៀកបំផុតនឹងរុស្ស៊ី។ បើតាមលោកអគ្គលេខាធិការអង្គការអូតង់ សមត្ថភាពយោធាអូតង់ បានឡើងខ្ពស់ខ្លាំងគួរឱ្យកត់សម្គាល់នៅពេលនេះ ដោយមានកងកម្លាំងប្រតិកម្មរហ័សដល់ជាង៤ម៉ឺននាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ