អាមេរិក និងរុស្ស៊ី សាកល្បងដោះស្រាយគ្នាស្តីពីបញ្ហាអ៊ុយក្រែន និងការពង្រាយកម្លាំងរបស់អូតង់
ចុះផ្សាយនៅថ្ងៃ៖
ស្តាប់ - ០៧:២០
សំណុំរឿងអ៊ុយក្រែន និងស្ថិរភាពនៅតំបន់ព្រំដែន រវាងអឺរ៉ុបខាងកើត និងរុស្ស៊ី កំពុងតែចោទជាបញ្ហាខ្លាំងបំផុត នារយៈពេលចុងក្រោយនេះ។ ក្រុមប្រទេសលោកខាងលិច ដែលមានអាមេរិក និងអង្គការអូតង់ បានចោទរុស្ស៊ីថាបានបញ្ជូនទ័ពគំរាមឈ្លានពានអ៊ុយក្រែន ខណៈដែលរុស្ស៊ីវិញ បានចោទអាមេរិក និងអូតង់ ថាបានពង្រឹងកម្លាំងសព្វាវុធ នៅតាមបណ្តោយព្រំដែន ដើម្បីគំរាមស្ថិរភាពរបស់រុស្ស៊ី។ ដើម្បីដោះស្រាយ បញ្ហាដ៏ចម្រូងចម្រាសនេះ ភាគីទាំង២ ជួបប្រជុំគ្នានៅទីក្រុងហ្សឺណែវ នៅថ្ងៃចន្ទ ទី១០មករា។
បើមិនព្រមទាំងអស់ គឺរុស្ស៊ីនឹងដើរចេញ
បើយើងស្តាប់សម្តីអះអាងរបស់លោក Sergueï Riabkov រដ្ឋលេខាធិការទទួលបន្ទុកកិច្ចការបរទេស និងដែលជាអ្នកដឹកនាំគណៈប្រតិភូភាគីរុស្ស៊ី គឺយើងសង្កេតឃើញថា រុស្ស៊ីចង់បង្ហាញថាខ្លួនមានប្រៀប ហើយចង់បង្ខំឲ្យភាគីអាមេរិក ត្រូវតែធ្វើតាមការចង់បានរបស់ខ្លួន។
នៅក្នុងបទសម្ភាសន៍ ផ្តល់ឲ្យកាសែត Izvestia មន្ត្រីរុស្ស៊ីរូបនេះ បានលើកឡើង ពីលក្ខខណ្ឌធំៗរបស់រុស្ស៊ី ដែលមានដូចជា អូតង់ត្រូវឈប់រើសសមាជិកថ្មី ត្រូវឈប់ពង្រាយកម្លាំងទ័ព និងសព្វាវុធ នៅតាមបណ្តោយព្រំដែនរុស្ស៊ី ដោយរាប់ទាំងនៅអ៊ុយក្រែនផង ហើយត្រូវតែឈប់ធ្វើសមយុទ្ធយោធាគ្រប់ទំរង់ទាំងអស់។ លក្ខខណ្ឌទាំងនេះ គឺជាលក្ខខណ្ឌរួម ដែលអាមេរិក ត្រូវតែធ្វើតាមគ្រប់ចំណុច មិនអាចចោលចំណុចណាមួយបានទេ។ ពុំនោះទេ រុស្ស៊ីនឹងដើរចេញពីតុចរចា បើអាមេរិកហ៊ានតែបង្ហាញការស្ទើរស្ទាក់ លើចំណុចណាមួយ។
សំដីនេះ គឺមានន័យថា ភាគីរុស្ស៊ី មិនព្រមធ្វើសម្បទានអ្វីទាំងអស់។ ការចរចានៅទីក្រុងហ្សឺណែវនៅថ្ងៃទី១០ធ្នូ គឺអាមេរិកគ្មានជំរើសក្រៅពីយល់ព្រមតាមលក្ខខណ្ឌរបស់រុស្ស៊ីទេ ប្រសិនបើចង់ដោះស្រាយបញ្ហា។
អាមេរិកត្រៀមទណ្ឌកម្មសេដ្ឋកិច្ច
ធម្មតាទេ ក្នុងការចរចា ភាគីនីមួយៗ តែងតែសម្រាំងទុក នូវគន្លឹះដើម្បីដាក់សំពាធ ភាគីម្ខាងទៀត។ ភាគីទាំង២ រុស្ស៊ី និងអាមេរិកនេះ មានទស្សនវិស័យ២ខុសគ្នាស្រឡះ។ រុស្ស៊ីចង់ឲ្យអាេមរិក និងអូតង់ ព្រមព្រៀងតាមលក្ខខណ្ឌខ្លួនជាមុនសិន ទើបខ្លួនសម្រេចដកថយទ័ពចេញពីព្រំដែន។ ដោយឡែកអាមេរិកវិញ គឺគេចង់ឲ្យរុស្ស៊ីដកទ័ពចេញសិន ទើបស្រឡះចិត្ត ងាយស្រួលនិយាយគ្នា ដើម្បីគូសវាសផែនការ ឈានទៅរក្សាស្ថិរភាព នៅតំបន់ភាគខាងកើតអឺរ៉ុបនេះ។
ដូច្នេះភាគីអាមេរិក គេមិនមែនឆោតទៅធ្វើតាមការទាមទាររបស់រុស្ស៊ីទាំងស្រុង ដោយគ្មានការធានាណាមួយ ថារុស្ស៊ីនឹងដកថយ ឬ ឈប់បង្កបញ្ហានោះទេ។ ក្នុងករណីដែលរុស្ស៊ីរឹងរូសខ្លាំង អាមេរិក គេមានផែនការទណ្ឌកម្មសេដ្ឋកិច្ចមួយចំនួន ត្រៀមដាក់លើរុស្ស៊ីរួចជាស្រេច។ យោងតាមការចុះផ្សាយរបស់កាសែត New York Times ទណ្ឌកម្មដែលអាមេរិកអាចដាក់ទៅលើរុស្ស៊ី គឺមានដូចជា ការដករុស្ស៊ីចេញប្រព័ន្ធហិរញ្ញវត្ថុ Swift (Society for Worldwide Interbank Financial Telecommunication) ពោលគឺជាប្រព័ន្ធអន្តរធនាគារ ដោះដូរប្រាក់ ចរាចរណ៍ និងផ្ទេរសាច់ប្រាក់នៅទូទាំងពិភពលោកតែម្តង។ តែទណ្ឌកម្មមួយនេះ មិនមែនអាមេរិកសម្រេចតែម្នាក់ឯងទេ គឺទាល់តែអឺរ៉ុបយល់ព្រមដែរ។
ទណ្ឌកម្មមួយទៀត អាចជាការហាមឃាត់ ការនាំចេញទំនិញសំខាន់ៗមួយចំនួន ទៅរុស្ស៊ី ជាអាទិ៍ទំនិញគ្រឿងផ្សំអេឡិចត្រូនិក ម៉ាស៊ីនកុំព្យូទ័រ ឬទូរស័ព្ទទំនើបជាដើម។ ហើយចំណុចមួយទៀត អាចជាការសំពងលើរុស្ស៊ីដែរ គឺការបន្ថែមជំនួយហិរញ្ញវត្ថុ និងកម្លាំងទ័ពទៅឲ្យអ៊ុយក្រែន។ ឆ្នាំ២០២១កន្លងមកនេះ អ៊ុយក្រែនបានទទួលប្រាក់ចំនួន៤៥០លានដុល្លាររួចហើយ ពីសហរដ្ឋអាមេរិក ដើម្បីពង្រឹងវិស័យកងទ័ព ទប់ទល់ក្នុងករណីដែលរុស្ស៊ីហ៊ានឈ្លានពាន។
« ក្រុមប្រទេសលោកខាងលិច មិនត្រូវចាញ់ការសំឡុតរបស់រុស្ស៊ី »
តែយ៉ាងណា ការគំរាមពីសំណាក់រុស្ស៊ី ថាអាចឈ្លានពានអ៊ុយក្រែន ត្រូវបានអ្នកវិភាគខ្លះអះអាងថាគ្រាន់តែជាការកំញើញ ដែលប្រហោងក្នុង។ មានមតិអ្នកវិភាគមួយចំនួន លើកឡើងថាលោកប្រធានាធិបតីពូទីន កំពុងតែប្រើសន្លឹកបៀរ បំភ័យអាមេរិក និងអូតង់ ទាំងដែលការពិតជាក់ស្តែង គឺរុស្ស៊ីមិនប្រាកដក្នុងចិត្ត ថានឹងអាចលើកទ័ពទៅឈ្លានពានអ៊ុយក្រែនមែននោះទេ។
លោក Dimitry Oreschkine នយោបាយវិទូ បានលើកឡើងថា ក្រុមប្រទេសលោកខាងលិច មិនត្រូវចាញ់ការសំឡុត របស់រុស្ស៊ីនៅពេលនេះទេ ព្រោះថាធាតុពិត រុស្ស៊ីមិនហ៊ានលើកទ័ពមកឈ្លានពានអ៊ុយក្រែនទេ។ ករណីអ៊ុយក្រែនទាំងមូល គឺវាខុសពីករណីតំបន់គ្រីម៉េ ដែលជាដែនដីជ្រោយកោះ។ អ្នកវិភាគរូបនេះ ពន្យល់ថាលោកពូទីន កំពុងតែលេងស្នៀតចុងក្រោយ បំភ័យអាមេរិក អូតង់ និងក្រុមប្រទេសលោកខាងលិច ព្រោះចំណុចខ្លាំងរបស់រុស្ស៊ីនៅពេលនេះ គឺនៅសល់តែមួយគត់ គឺកម្លាំងទ័ពនិងសព្វាវុធនេះឯង។ ដោយឡែក វិស័យផ្សេងៗ ដូចជាសេដ្ឋកិច្ចវិទ្យាសាស្ត្រ វប្បធម៌ ការប្រកួតប្រជែងពាណិជ្ជកម្មជាដើម គឺរុស្ស៊ីកំពុងតែធ្លាក់ចុះខ្លាំងណាស់។ ហើយបញ្ហាសង្គម នយោបាយផ្ទៃក្នុងរុស្ស៊ី ក៏កំពុងតែចោទជាបញ្ហាទៅលើលោកពូទីនដែរ។ ដូច្នេះកាលៈទេសៈពេលនេះ ក្រុមប្រទេសលោកខាងលិច ត្រូវតែរឹងមាំឡើង កុំចាញ់សំឡុតរបស់លោកពូទីនឲ្យសោះ។
ការចាប់ផ្តើមចរចាដ៏ល្អមួយ
បើតាមការលើកឡើង របស់លោក Andreï Kortunov អគ្គនាយកក្រុមប្រឹក្សាកិច្ចការអន្តរជាតិរុស្ស៊ី គឺថាអាចមានសង្ឃឹមខ្លះដែរ ដែលភាគីទាំង២ឈានទៅស្រុះស្រួលគ្នា។ មន្ត្រីរុស្ស៊ីម្នាក់នេះ លើកឡើងថា អាមេរិក និងរុស្ស៊ី អាចនឹងនិយាយត្រូវរ៉ូវគ្នា ទាក់ទិននឹងសំណុំរឿងអាវុធមីស៊ីលនុយក្លេអ៊ែរចំងាយមធ្យម ព្រមទាំងការបង្កើតតំបន់ស រវាងរុស្ស៊ី និងប្រទេសសម្ព័ន្ធមិត្តអូតង់ ដើម្បីចៀសវាងបញ្ហា។ ការធ្វើសមយុទ្ធយោធាទាំងសងខាង ក៏ប្រហែលជាគេអាចនិយាយគ្នា រៀបចំវាឲ្យមានតម្លាភាព និយាយគ្នាត្រង់ៗទៅវិញទៅមក តាមរយៈខ្សែទូរស័ព្ទដោយផ្ទាល់រវាងកងទ័ពទាំងសងខាង ដើម្បីចៀសវាងការយល់ច្រឡំណាមួយ ជាដើម ។ល។
ដូចគ្នាដែរ លោក James Cameron អ្នកស្រាវជ្រាវនៅសកលវិទ្យាល័យអូស្លូ ក៏យល់ឃើញថា ការរៀបចំ ធ្វើឲ្យសកម្មភាពសមយុទ្ធយោធាទាំងសងខាងមានតម្លាភាព និងការនិយាយគ្នាដោយផ្ទាល់ត្រង់ទៅត្រង់មក រវាងកងទ័ពទាំង២ គឺជារឿងសំខាន់។ ចំនុចនេះ ភាគីទាំង២អាចត្រូវរ៉ូវគ្នាបាន ដើម្បីបន្ធូរបន្ថយស្ថានការណ៍ ចៀសវាងជម្លោះ។ ក្នុងសំណុំរឿងសន្ធិសញ្ញាមិនរីកសាយភាពអាវុធនុយក្លេអ៊ែរ រវាងអាមេរិក និងរុស្ស៊ី ដែលបានផុតសុពលភាពហើយនោះ ក៏ប្រហែលជាគេអាចនិយាយគ្នា កំណត់វិធានត្រូវគោរពបណ្តោះអាសន្នសិន មុននឹងមានកិច្ចព្រមព្រៀងថ្មីមួយទៀត។
ការចរចាទ្វេភាគី អាមេរិក និងរុស្ស៊ី នៅថ្ងៃចន្ទទី១០ធ្នូ គឺគ្រាន់តែជាផ្នែកមួយនៃផែនការចរចាទាំងអស់ ដើម្បីដោះស្រាយបញ្ហារវាងរុស្ស៊ី និងប្រទេសលោកខាងលិច។ នៅថ្ងៃទី១២មករា គឺរុស្ស៊ីនិងប្រជុំជាមួយអូតង់។ ហើយថ្ងៃបន្ទាប់ ទី១៣មករា គឺរុស្ស៊ីប្រជុំជាមួយអង្គការដើម្បីសន្តិសុខ និងសហប្រតិបត្តិការអឺរ៉ុប OSCE នៅទីក្រុងវីយែន ដោយមានអ៊ុយក្រែនចូលរួមដែរ។ តែយ៉ាងណាក៏ដោយ លោអង់តូនី ប្លីងកិន បានលើកឡើងថា លោកមិនសូវសង្ឃឹមប៉ុន្មានទេ ថាការចរចានៅក្នុងសប្តាហ៍នេះ អាចនឹងបោះជំហានទៅមុខខ្លាំង។ ក៏ប៉ុន្តែ វាជាការចាប់ផ្តើមដ៏ល្អមួយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ